Siga Pakaradjaan bay Pinalahil 11 - Sabahagiꞌ Kitab Tawrat: Panagnaan ni Awwal Jaman maka Kitab Injil

Duwa sosohoan Tuhan

¹ Pag-anu, lay na baw ku binuwanan meꞌ disu malaikat sukuran kayu-kayu meꞌ karuha tungkud, boꞌ ku sinohoꞌ meꞌ na, yuk na, “Batnaa subay ko nukud lumaꞌ Tuhan sampay pangulbanan ndooy. Maka itungun sagannap jamaa ma numba ndooy.

² Sugaꞌ haman ni poan lumaꞌ looy, daa na sukurun batan lay na sinukuꞌ meꞌ Tuhan ni siga manusiyaꞌ ma kapil. Giniok-giok sina mintu meꞌ da daira Tuhan, yana Jerusalem. Pakaat da daira sutsiꞌ looy njawom mpatpuꞌ-duwam buwan,

³ yana dalibu duwa hatus nnompūꞌ ngallaw. Sugaꞌ ni waktu looy du ilay mintu, luu duwa sosohoan ku sohoꞌ ku masaplag umanat ku. Pamakoy da karut kasap tandaꞌ tud mehe meꞌ da susa.”

⁴ Na ga sosohoan looy ilay mintu sikaduwa, ndang lay na tinunaꞌ njawom kitab kanabi-nabihan. Njawom kitab ginalla sila duwam poon jaytun ma ndang luu na pin ni awpan Tuhan sabanna ma magbayaan sikamimon taꞌ babaw junyaꞌ. Maka sikaduwa sila ginalla du pananggehan palitaan.

⁵ Soysoy ina mintu doman minsanaꞌ ga sosohoan looy, yaꞌ luu dapat da batan binasa sila meꞌ api pōꞌ man jawom behe ga sosohoan looy. Kapatoy meꞌ looy ilay ndang bay ginantaꞌ ni soysoy doman makaat sila.

⁶ Luu gi sina kapatut ga sosohoan looy nambo langit supaya yaꞌ uwan samasakali ni siga buwan timpu man da masampay umanat Tuhan. Maka luu du sina kapatut da madari siga poon boheꞌ pa lahaꞌ. Sarī gi, takaya da du mōꞌ jinisan balaꞌ taꞌ junyaꞌ sumilan-sumilan jaꞌ karomanan da.

⁷ Lupus jaꞌ ina mintu sila masaplag mimon ma bay hinalap meꞌ Tuhan ninsila, luu na baw disu sattuwa pōꞌ man jawom lowang tangob looy siꞌ ma yaꞌ mag-ngkoran lawom na. Pag-anu, boꞌ na monoꞌ ga sosohoan looy. Boꞌ yaꞌ sina mintu sila kaatu ni sattuwa looy, boꞌ pinapatoy gi sila.

⁸ Kuwan mayat da ina mintu, pinabiya jaꞌ palege ni tangngaꞌ lān daira tanyag looy, yana daira looy man Papuꞌ da si Isa bay pinapatoy llansang taꞌ tehang. Ni kajahat siga jama ndooy, daira looy ilay mintu subay ga daira Sodom atawa pun Ejip mattoꞌ.

⁹ Njawom tallu ngallaw ka tongaꞌ, maglegehan jaꞌ silay mintu mayat da ndooy pinaimanan meꞌ mimon kabangsa-bangsahan man mimon kalahat-lahatan, kaniya-kaniya ka jinisan pallun da. Boꞌ yaꞌ luu pinadari ngubu sila.

¹⁰ Jama ni sikaliput junyaꞌ, mehe meꞌ da gāk pag mintu lay na matoy ga sosohoan looy sikaduwa ma masampay umanat Tuhan. Maglami-lami na silay mintu sila sampay sibuwan-buwan gīp sabap lay na pinapatoy ga sosohoan looy ma bay kalingog ninsila.

¹¹ Sugaꞌ pag paddus jaꞌ ilay mintu tallu ngallaw looy ka tongaꞌ, pinabalik du meꞌ Tuhan napas ga sosohoan looy sampay bangun na sila. Dari sagannap ma ngita sila mintu meꞌ looy, tud takkahan sawan na silay.

¹² Pag-anu ilay mintu, kale na baw ga sosohoan looy suwara haddo man sulgaꞌ nohoꞌ sila dutai pa jataꞌ. Dari dutai du sina mintu sila pa sulgaꞌ njawom tayiꞌ baliyu ni pag-awpan siga banta da.

¹³ Lay jaꞌ ilay mintu sila dutai, luu du linug mehe sampay binasa na daira looy sabahagiꞌ sapū. Maka luu sina mintu pituꞌ libu manusiyaꞌ matoy meꞌ linug looy. Kuwan sagannap ma masi llum, tud tawu na sina mintu sampay mudji na sila Tuhan sabanna ma magbayaꞌ ni sulgaꞌ.

¹⁴ Dari ilooy na silay mintu balaꞌ ni kaduwa na, boꞌ luu gi silay magti pasunuꞌ balaꞌ ni katallu na.

Tabuliꞌ ni kapituꞌ na tiniyup

¹⁵ Pag-anu siꞌ, pasīng na baw malaikat looy ni kapituꞌ na niyup tabuliꞌ na. Pag pōꞌ halling na, ilooy ma luu siga suwara ngahowap ni sulgaꞌ, yuk da, “Labba man batnaa, yaꞌ na luu pamarinta manusiyaꞌ ni junyaꞌ, isu-isu pamarinta Papuꞌ tabi Tuhan ka ilooy ma bay peneꞌ na, yana Almasi. Boꞌ iya sa marinta saumu-umu.”

¹⁶ Kuwan ga matatoa looy baw siꞌ tu sikaduwampuꞌ-mpat ma ningkōꞌ taꞌ paningkoan da ni awpan Tuhan, bbuwatan da sujud sampay numba Tuhan,

¹⁷ yuk da, “Tuhan, tud mehe meꞌ kami magsuku ningkau. Kau du Sangat Kawasa ma ndang luu na man maruhuꞌ-ruhuꞌ ngabut sampay batnaa. Lay na pakitahan nu ehe kawasa nu sampay itu na ko matangge pamarinta nu taꞌ junyaꞌ.

¹⁸ Kuwan sagannap ni junyaꞌ ma yaꞌ mmeꞌ ningkau, tud lasu ningkau. Sugaꞌ taabut na waktu man da ngissa mulkaꞌ nu. Taabut na waktu bay ginantaꞌ man nu ngahukum sikamimon ma bay matoy. Maka taabut na du waktu man nu makaat sagannap ma bay makaat junyaꞌ. Kuwan siga ata nu, yana kanabi-nabihan sampay mimon sukuꞌ nu balkanan maka saꞌ balkanan ma ngisbat kau, binuwanan na du meꞌ nu tungbas ayad.”

¹⁹ Pag-anu siꞌ, binukaꞌ na baw langga ndooy ni okoman Tuhan ni sulgaꞌ sampay luu na takita ku ndooy baul pangannaan pagsulutan antaraꞌ Tuhan ka manusiyaꞌ. Maka luu na pin pōꞌ ngallub ka mangirat haboyan guntu. Boꞌ linug na ga lahat sampay labuꞌ na uwan ayis batu man taꞌ langit.