Siga Pakaradjaan bay Pinalahil 10 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Yahiya sinohoꞌ mangan logoran suwat

¹ Pag-anu siꞌ, ngita na baw ku disu malaikat ma basag kawasa na duwai man sulgaꞌ lakkop meꞌ tayiꞌ baliyu. Luwa na silaw meꞌ karuha mataallaw maka luu bangaw pa jataꞌ man kōk na. Kuwan buwaꞌ battis na, meꞌ dagbos tehang api.

² Maka luu ni tangan na logoran suwat dikiꞌ ndang lay na binallat. Pag-anu, lay nindak battis na huwin pa kawnan taꞌ dilawut. Kuwan kayli na, lay nindak taꞌ gumi.

³ Pag-anu, boꞌ na ngahowap subay ga halling halimaw ngallong. Boꞌ lay gi ya sinambag meꞌ pituꞌ guntu mitsala meꞌ karuha manusiyaꞌ.

⁴ Saddong ku dak bay nuwatan bitsala ga guntu looy siꞌ, lay na baw ku kale suwara pōꞌ man sulgaꞌ, yuk na, “Daa na ba suwatan nu bitsala ga guntu looy. Yaꞌ dari pinalahil.”

⁵ Pag-anu, pus malaikat looy siꞌ ma nangge taꞌ gumi ka dilawut bay ngahowap meꞌ looy, lay ya matangge kawnan na

⁶ napa, yuk na, “Sapahan ku ni awon Tuhan sabanna ma llum saumu-umu, ma bay mapayak gumi, langit, ka dilawut sampay mimon njawom da, basta yaꞌ na situ llantan garaꞌ Tuhan magjatu na.

⁷ Batan pag taabut jaꞌ mintu masa malaikat ni kapituꞌ na niyup tabuliꞌ na, hāl ma hallom na bay sinipuk meꞌ Tuhan, pinalahil na. Garaꞌ Tuhan ma bay pasampay na ni siga ata na, yana kanabi-nabihan, bohoꞌ magjatu na.”

⁸ Pag-anu, lay na baw takale ku balik suwara looy siꞌ man sulgaꞌ, yuk na niyaku, “Kaddoun pilay logoran suwat looy ma ndang lay na binakka ni tangan malaikat looy ma ninggi pa gumi pa dilawut.”

⁹ Dari siꞌ, lay du ku pilay pa mman malaikat looy, boꞌ lay paku ku logoran suwat looy. Halling na niyaku, “Ā, kaddoun na, boꞌ kakanun. Pag kakan nu ina, meꞌ gowaꞌ buwani na mamis na. Sugaꞌ paddi sina mintu battong nu ni kapait na.”

¹⁰ Dari lay na kaddoꞌ ku man tangan malaikat looy. Pag kakan ku, meꞌ mamis gowaꞌ buwani du ni behe ku. Sugaꞌ pag tallon ku, lay du bay paddi battong ku ni kapait na.

¹¹ Pus meꞌ looy, luu suwara mitsala niyaku, yuk na, “Luu gi sina pinalahil ningkau umanat Tuhan pasal pakaradjaan ma song pinatakka ni kabangsa-bangsahan sampay ga sultan da, kaniya-kaniya ka jinisan pallun da. Amay-amay subay ko mahati ni manusiyaꞌ ilooy ma bay pinalahil ningkau.”