Siga Pakaradjaan bay Pinalahil 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

SIGA PAKARADJAAN BAY PINALAHIL

¹ Isi kitab tuu yana siga pakaradjaan ma bay pinalahil meꞌ si Isa Almasi, yana hāl ma yaꞌ na hallom talpaksaꞌ tinakdil. Labbasakayi lay na bay pinamāꞌ meꞌ Tuhan ni si Isa supaya tapalahil na meꞌ na ni siga sosohoan na. Meꞌ si Isa bay malahil, lay ya bay nohoꞌ malaikat na pa mman sosohoan na si Yahiya, yana aku.

² Dari suwatan ku na mimon ma bay tasakup ku sampay umanat Tuhan ma bay pinalahil meꞌ si Isa Almasi niyaku.

³ Njawom supaat sina soysoy matsa kitab tuu. Damikiyan, njawom supaat du sagannap ma pakale sampay nganna mimon isi na, batan yaꞌ na situ hallom binakbul na siga tunaꞌ ni suwat tuu.

Si Yahiya nuwat pa mman pituꞌ baanan sukuꞌ si Isa

⁴ Ituu tu si Yahiya nuwat pa mman siga baanan sukuꞌ si Isa ni pituꞌ daira nnaa ni Asiya. Kamura-murahan binuwanan na pin kam kasannangan maka barakat meꞌ Tuhan sabanna, ilooy ma ndang luu na man maruhuꞌ-ruhuꞌ ngabut batnaa sampay saumu ni sinōng. Maka kamura-murahan binuwanan na pin kam kasannangan ka barakat meꞌ ilooy ma ginalla Rū Sikapituꞌ, yana Rū Tuhan ma luu na pin ni awpan paningkoan man Tuhan ningkōꞌ marinta.

⁵ Maka kamura-murahan binuwanan na pin kam kasannangan ka barakat meꞌ si Isa Almasi, ilooy ma kanaalla masampay kabanahan pasal Tuhan. Iya ilay bay duhuꞌ pinakallum pabalik ka baran ma yaꞌ na kuhi matoy. Maka iya du marintahan mimon panghuluꞌ ni sikaliput junyaꞌ. Ni kaehe aseꞌ na ningkitabi, atas na man lahaꞌ na bay tumpa supaya tapaddusan na kitabi man hisab ni dusa tabi.

⁶ Boꞌ lay gi kitabi pinatabeꞌ meꞌ na ni pagkasultan na sampay lay gi kitabi binuwat siga imam njawman Mmaꞌ na Tuhan. Tud tawop ya binuwanan kabantugan mehe sampay kapatut magbayaan mimon-mimon saumu-umu. Amin.

⁷ Indanan bi sa. Takka jaꞌ sina mintu si Isa Almasi liput leꞌ tayiꞌ baliyu sampay takita meꞌ mimon manusiyaꞌ. Minsan sagannap ma bay ngalansang iya taꞌ tehang, ngita iya du sina bbos-bbos. Maka manusiyaꞌ ina mintu man mimon kabangsa-bangsahan magkarukkaan na ni kasasso da bay nuwak iya. Na ilooy ilay siꞌ ma bay sabbut ku, tattap binakbul jaꞌ sina mintu. Amin.

⁸ Na yuk Papuꞌ tabi Tuhan, “Aku itu yana Alpa ka Omega Sangat Kawasa, yana ilooy ma ndang luu na man maruhuꞌ-ruhuꞌ lagi ngabut batnaa sampay saumu ni sinōng.”

Si Yahiya tinammuhan meꞌ si Isa Almasi

⁹ Na ni kapasal aku itu ma nuwat, meꞌ halling sambat ku na siꞌ, aku itu si Yahiya, disu danganakan bi meꞌ kaam du tibuuk ka Papuꞌ Isa. Aku itu sibuꞌ du ka kaam bininsanaꞌ. Saliꞌ-saliꞌ du kitabi natasan laug ma tuwaꞌ ni sagannap ma tabeꞌ ni pamarinta Tuhan. Lay situ ku tasungkub sampay luu na ku bay binoo pitu tinahan ni nusa Patmos. Kon ku bay tasungkub sabap meꞌ ku bay masaplag palman Tuhan ka umanat pasal si Isa.

¹⁰ Na luu disu llaw, yana llaw man jama kumpo-kumpo numba Papuꞌ, lay ku bay pinakitahan pandapat meꞌ Rū Tuhan. Njawom pandapat ku, lay ku kale suwara ni bukutan ku meꞌ haddo tabuliꞌ.

¹¹ Yuk na, “Suwatan nu mimon pakaradjaan ma song takita nu na. Pag-anu, boꞌ nu mokonan siga akigan na pa mman siga baanan sukuꞌ ku ni pituꞌ daira; disu akigan pa mman siga sukuꞌ ku ndooy ni daira Epesus, disu pa daira Ismirna, disu pa daira Pergamam, disu pa daira Tayatira, disu pa daira Saldis, disu pa daira Piladelpiya, maka disu pa daira Leyodisiya.”

¹² Pag teleꞌ ku ngandaꞌ bong soy mitsala niyaku njawom pandapat ku, lay ku ngita pituꞌ palitaan ddas ka siga pananggehan da pulnaꞌ mmas.

¹³ Ni tangngaan siga pananggehan palitaan looy siꞌ, luu bay takita ku meꞌ bantuk manusiyaꞌ. Pamakoy na juba tahaꞌ ngkod battis na, maka luu gi kindang na mmas.

¹⁴ Dūn kōk na poteꞌ malaas, meꞌ poteꞌ kapas na, maka mata na meꞌ api noleyab.

¹⁵ Kuwan battis na ninag subay ga tumbagaꞌ binaba njawom api basag. Suwara na mitsala ngallub meꞌ karuha boheꞌ sōng tumpa man taꞌ pampang.

¹⁶ Njawom tangan na huwin pa kawnan luu pituꞌ potean, maka luu pōꞌ man jawom behe na kataliꞌ tawom sikaduwambilaꞌ mata na. Kuwan luwa na ninag meꞌ karuha silaw mataallaw.

¹⁷ Pag ndaꞌ ku meꞌ looy, ilooy ma takkahan tawu na ku sampay lay na ga ku humantak ni awpan na subay ga jama matoy. Pag-anu, lay tappak na baran ku ka kawnan na sambayan na halling, “Daa ko ba tawu. Aku na situ panagnaan sampay katapusan ni mimon-mimon.

¹⁸ Aku na situ ginalla ‘Ilooy ma Llum.’ Bay baw ku situ pingkaꞌ matoy, sugaꞌ ndaun na, itu na ku llum pabalik, boꞌ saumu-umu na situ kaallum ku. Aku na situ ngantanan kawasa-kapatut maddusan manusiyaꞌ man kapatoy sampay man tahanan jama matoy.

¹⁹ Batnaa, tugun ku ningkau, suwatan nu sa njawom būk ilooy ma bay takita nu siꞌ. Maka suwatan nu mimon hāl ma song pakitahan ku kau labba man hāl ma binakbul batnaa sampay hāl ma yaꞌ na hallom pasunuꞌ.

²⁰ Batnaa, palahil ku na ningkau kamaatunan siga potean sikapituꞌ ma bay takita nu ni kawnan ku sampay siga palitaan looy siꞌ sikapituꞌ ddas ka pananggehan da mmas. Na kuwan siga potean looy ilay siꞌ, tuwaꞌ pa pituꞌ pa-mmean ma ngantanan baanan sukuꞌ ku ndooy ni siga daira sikapituꞌ ma bay sabbut ku siꞌ. Kuwan siga palitaan looy ddas ka pananggehan da sikapituꞌ, tuwaꞌ pa pituꞌ baanan sukuꞌ ku ni siga daira looy.”