Pilimun 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

PILIMUN

¹ Ituu itu aku si Pol njawom pilisu sabap meꞌ ku masaplag umanat pasal si Isa Almasi. Ituu itu suwat kami ka danganakan ta si Timuti pa mman nu Pilimun. Kau ina kakasi kami saltaꞌ na limbang kami maghulas-sangsāꞌ kalnaꞌ Papuꞌ.

² Salam duwaa ningkaam ka danganakan tabi si Apiya. Maka salam duwaa du ni si Alkipus, yana limbang tabi sundalu ndiyoan Almasi. Maka salam duwaa du ni mimon sukuꞌ si Isa nnaa ma magpakumpo-kumpo numba ni lumaꞌ bi.

³ Kamura-murahan binuwanan na pin kam kasannangan ka barakat meꞌ Mmaꞌ tabi Tuhan ka Papuꞌ tabi si Isa Almasi.

⁴ Tuktuk ku itu makuhan kau duwaa Pilimun, wā ku muwan pagsukuhan pa Tuhan sabapan nu.

⁵ Lay na silay taaka ku basag pangando nu ni Papuꞌ Isa maka ehe aseꞌ nu ni mimon pagkahi ta sukuꞌ Tuhan.

⁶ Maku na pin situ ku duwaa pa Tuhan, kamura-murahan man sabapan nu masampayan jama kabanahan, yaꞌ hallom tahati da na du mimon supaat ma bay takoleꞌ tabi sabapan pagkatibuuk tabi ka Almasi.

⁷ Tud gāk ku danganakan, maka hayang na situ pamiki ku sabapan aseꞌ nu ni siga pagkahi nu sukuꞌ Tuhan nnaa. Dari man sabapan aseꞌ nu ina, mehe na meꞌ da gāk.

Si Pol makuhan si Onesimas kaampunan

^8-9 Na bong siꞌ kadarihan ningkau, luu situ siꞌ la paku ku. Ni sabana na, meꞌ aku disu rasul Almasi, luu du baw tu kapatut ku nohoꞌ kau buwat ma pataꞌ subay pabuwat nu. Sugaꞌ pagka meꞌ kita ndang jama sikaaseꞌ-kaaseꞌ, gam na ku maku na jaꞌ timbang ningkau. Dari meꞌ aku tu toa laslas na, boꞌ lay gi tajīl sabap meꞌ ku masaplag pasal si Isa Almasi,

¹⁰ junjung ku na ningkau, buwanan nu na si Onesimas kaampunan san ya bay patangkaw. Iya ina batnaa subay ga anak ku na rahasiyaꞌ sabap aku bay kaboo iya mmeꞌ ni Papuꞌ Isa sasang ku ntuu njawom jīl.

¹¹ Bana na maruhuꞌ, agon yaꞌ luu kapansahaliyan na ningkau. Boꞌ batnaa, lay na halin arat-tabiat na. Dari mehe na situ kapansahaliyan na ningkita sikaduwa.

¹² Batnaa, ilu na sina ya papoleꞌ ku pa mman nu minsan ya meꞌ bigi jantung ku na.

¹³ Gāk situ ku bong siꞌ ya bay dari tattog ntuu supaya ya katabang niyaku bilang gantiꞌ nu sasang ku masi njawom jīl sabapan umanat mahap pasal si Isa.

¹⁴ Sugaꞌ yaꞌ baw tu siꞌ ku bay doman nohoꞌ iya tamban ntuu bong ko yaꞌ bay matugut. Bong ko doman nabangan aku subay ni kaayad nu maggasad bayaꞌ nulung. Daa jaꞌ paglogosan.

¹⁵ Marean ta man kahandak Tuhan na du bay kam sakkat ka si Onesimas samantalaꞌ supaya pag takka na pilu, lungbid na kam saumu-umu.

¹⁶ Maruhuꞌ ilay, ata nu jaꞌ ya. Pag batnaa, hagaan na ya man ata sabap lay na ya dari danganakan nu. Tud kinaasean sina ya meꞌ ku, sugaꞌ bistahan ku labi na kau saꞌ maaseꞌ niiya batan lay na halin arat-tabiat na. Batnaa ina, taasahan nu na ya. Boꞌ na, lay na ya dari danganakan nu tibuuk du ka Papuꞌ.

¹⁷ Sangkon karomanan ku, bong tud ingat nu du ku limbang nu maghulas-sangsāꞌ kalnaꞌ Tuhan, pag takka si Onesimas pilu, pooy-pooy meꞌ nu ngahasi aku, subay du meꞌ naa meꞌ nu ngahasi iya.

¹⁸ Bong ya bay buwat dusa ningkau atawa bong ya utangan ningkau, aku sa mayad.

¹⁹ Batnaa, aku na situ si Pol nuwat janjiꞌ ku ningkau ka tangan ku mismu. Oy-oy utang si Onesimas ningkau, aku sa mayad. Kamasaꞌ, bong siꞌ itu kita tud magbista, sa ehe-ehe utang si Onesimas ningkau, mas mehe gi buddi ku njataꞌ nu. Batan danan nu bay nammu kasampulnaan nyawa ma yaꞌ luu katapusan na sabapan man aku.

²⁰ Sangkon danganakan, meꞌ kita dambuwaꞌ atay njawman Almasi, pagakun na atay ku. Duwanun na paku ku pasal si Onesimas. Pakitahan nu na ku kaayaran sabap meꞌ nu mmeꞌ ni Papuꞌ.

²¹ Kamasaꞌ, sasang ku itu nuwat suwat tuu, ndang tatantu ku du pag lay mintu tasambut nu, mastiꞌ duwan nu jaꞌ sina paku ku. Maka bistahan ku san labi gi man naa.

²² Doꞌ ko beꞌ ha, ndang hallian nu na ku bilik ni lumaꞌ bi. Kamura-murahan pinōꞌ na du ku sabapan bi magpamakuhan aku duwaa, boꞌ tabi kapagsitammu na pabalik.

²³ Sarī man naa, luu situ ntuu si Epapras, pagkahi ku du pilisu kalnaꞌ si Isa Almasi, nohoꞌ masampay salam duwaa na ningkau.

²⁴ Ga si Malkus pun ka ga si Aristalkus, si Dimas, ka si Lukas, siga pagkahi ku ma maghulas-sangsāꞌ kalnaꞌ Almasi, lay du bay nohoꞌ masampay salam duwaa da ningkau.

²⁵ Dambuli man inaa, kamura-murahan binuwanan na pin kam barakat meꞌ Papuꞌ tabi si Isa Almasi. Wassalam