Matiyu 8 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa ngulian disu lalla inipu

¹ Pag lūd si Isa man taꞌ buntuꞌ looy, sakiyan jama patuhut niiya.

² Pag-anu, luu na baw disu lalla inipu pasōng pa mman na, boꞌ na sujud ni awpan na sambayan na halling, “Tuwan, bong siꞌ ko la kuhi, mastiꞌ kaulian jaꞌ ku meꞌ nu.”

³ Pag-anu siꞌ, lay tappak si Isa bumbunan na sambayan na halling, “Kuhi ku ba. Kaulian na sina ko.” Dari siꞌ, sarunduun du lanyap ipu na.

⁴ Pag-anu, yuk si Isa niiya, “Amay-amay daa ko maꞌ-māꞌ ni jama ga aku bay ngulian kau. Arapun pilay na ko pa mman imam nohoꞌ maliksaꞌ kuwit nu mari tasaksiꞌ na na yaꞌ na ko inipu. Pag-anu, boꞌ nu nong kulban meꞌ ndang bay tinaat ni saraꞌ Nabi Musa supaya kinatoonan na meꞌ mimon lay na ko kaulian.”

Si Isa ngulian tindog kapitan sundalu

⁵ Pag-anu, lay na baw si Isa pilay pa Kapelniyum. Ndooy siꞌ, luu na baw disu kapitan sundalu, bangsa Rom, pasampang niiya maku aseꞌ,

⁶ yuk na, “Tuwan, tulungun doꞌ ku. Luu la ndooy ni lumaꞌ kami tindog ku matoy baran na. Tud malasahi ya.”

⁷ Tampung si Isa, “Ohoꞌ ba, pilay sa ku ngulian iya.”

⁸ Sugaꞌ pag halling kapitan looy, “Tuwan, san ko ba yaꞌ na pilay. Yaꞌ bitu ku la tawop nohoꞌ kau pilay pa lumaꞌ ku meꞌ naa na langkaw kawasa-kapatut nu. Sugaꞌ bong siꞌ ko lay jaꞌ ngabtang mantuu, mastiꞌ kaulian jaꞌ silay tindog ku.

⁹ Aku tu, tahati ku hāl kapatut, batan aku disu ndiyoan kapatut panghuluꞌ kami; damikiyan, luu du siga sundalu ndiyoan kapatut ku. Dari bong sohoꞌ ku dangan pilay, pilay du. Bong sohoꞌ ku disu pitu, pitu du. Maka bong sohoꞌ ku tindog ku buwat, buwat du. Labi na saꞌ subay inasip bong kau na bay nohoꞌ. Sangkon, tatantu ku bong ko bay jaꞌ ngabtang mantuu, mastiꞌ kaulian jaꞌ tindog ku.”

¹⁰ Pag takale si Isa halling na, kapajayip ya sampay yuk na ni siga jama ma ngahaboyan iya, “Baan ta kam banahan, minsan ni bangsa Israil, yaꞌ gi ku bay ngita san disu meꞌ ehe pangando kapitan tuu.”

¹¹ Maka yuk si Isa, “Bbos-bbos, meka sina jama pōꞌ man sika-mpat pidju alam siharung-harung mangan ka ga Nabi Ibrahim, Nabi Isahak ka Nabi Yaꞌkub ni pamarinta Tuhan.

¹² Sugaꞌ meka sina mintu bangsa Yahudi ma subay siꞌ tabeꞌ ni jawom pamarinta Tuhan hiniyakan pa jawom lindom tangob-tangoban. Ndooy ilay, mag-ulawi na sila sampay magkattop naggaan paddi.”

¹³ Pag-anu, yuk si Isa ni kapitan looy, “Sigi ba, moleꞌ na ko. Sabapan pangando nu, lay na ko nduwan.” Pag lupus si Isa mitsala, magti du koleꞌ tindog kapitan looy.

Si Isa ngulian matoa si Pitel

¹⁴ Pag-anu siꞌ, lay na baw palanja si Isa pa lumaꞌ si Pitel. Pag asok na, lay takita na matoa si Pitel ma danda pabāk sabap lammunan.

¹⁵ Dari siꞌ, lay ntanan na tangan danda looy, boꞌ magti lay na lakka lammun na. Pag-lupus, lay na ya bangun, boꞌ na motangan ga si Isa.

¹⁶ Pag sangom, meka na jama sineytan bay binoo pa mman si Isa. Dari siꞌ, ni bitsala si Isa sadjaꞌ nohoꞌ siga seytan ni baran da lakka, lay du magti sila pōꞌ. Maka mimon jama ndooy ma sakihan lay na du inulian meꞌ na.

¹⁷ Sabap meꞌ looy, lay na binakbul ilooy ma bay tinunaꞌ meꞌ Nabi Isaya maruhuꞌ-ruhuꞌ, ilooy ma yuk na, “Lay tinanggung meꞌ na kasusahan tabi sampay lay ulian na siga saki tabi.”

Bitsala si Isa ni sagannap ma doman mmeꞌ niiya

¹⁸ Na pag ndaꞌ si Isa yaꞌ na taambat manusiyaꞌ ngaliput iya, yuk na ni ga mulit na, “Palintas doꞌ kitabi pa dambilaꞌ danaw.”

¹⁹ Saddong da adak palakka, luu na baw disu guru saraꞌ agama pasōng pa mman si Isa, yuk na, “Tuwan, mmeꞌ ku la ningkau paninggai-paninggai jaꞌ ko.”

²⁰ Tampung si Isa, “Mamiki doꞌ ko ba paayad. Gam gi ina ga sattuwa tawun, luu gi katattogan man da patannaꞌ sangom-sangom. Minsan ga manuk-manuk, luu du ka sāng da. Boꞌ aku, Anak Manusiyaꞌ, yaꞌ san luu patulihan ku.”

²¹ Pag-anu, luu na baw disu lalla ma mmeꞌ ni si Isa bay muhun, yuk na, “Tuwan, bong-anu, moleꞌ doꞌ ku. Kubu ku na doꞌ mmaꞌ ku, boꞌ ku sa pabeleng mmeꞌ ningkau.”

²² Sugaꞌ yuk si Isa niiya, “Mmeꞌ na jaꞌ ko ba niyaku. Bbiyahun na ba sagannap ma matoy ngubu jama matoy.”

Si Isa mataddoꞌ libut

²³ Pag-anu siꞌ, lay na dutai si Isa ka ga mulit na taꞌ kumpit.

²⁴ Lān da palintas pa dambilaꞌ danaw, lay kapatuli si Isa. Yaꞌ hallom, libut na baw lahat. Ni kabasag lamba nimpok, meka na ga boheꞌ paisi sampay adak na ga tumallob kumpit da. Boꞌ si Isa siꞌ tu yaꞌ san kabatiꞌ.

²⁵ Dari lay binatiꞌ meꞌ siga mulit na, yuk da, “Tuwan, tabangun kami! Matoy limbo na situ kitabi!”

²⁶ Yuk si Isa, “Ongoy subay na pin kam tawu? Tud kulang bitu pangando bi pa Tuhan.” Dari siꞌ, lay na ya bangun sambayan na nohoꞌ baliyu looy ka siga lamba na patagong. Pag ndaꞌ da, taddoꞌ na lahat saꞌ alang-alang.

²⁷ Dari siꞌ, tud bay haylan siga mulit na sampay yuk da, “Uy la! Jama oy doꞌ tu meꞌ tuu? Sampay baliyu ka lamba ngasip jaꞌ niiya!”

Si Isa malakka siga seytan man jawom baran lalla duwa

²⁸ Pag takka da pa dambilaꞌ danaw, lay sila parungguꞌ ni lahat jama Gadara. Ndooy siꞌ, luu na baw pasōng pa mman si Isa duwa lalla sineytan. Man da tamban, ndooy ni tagan kakubuhan sadjaꞌ. Tud kamula sila sampay yaꞌ na ga luu jama nawakka pingkaꞌ mandooy.

²⁹ Pag takita da si Isa, lay hinowapan meꞌ da, yuk da, “Ū Anak Tuhan, manggoy ina ko luꞌ pitu? Batōy nu kami? Pidjalaꞌ nu na kina kami san yaꞌ gi ngabut waktu bay ginantaꞌ meꞌ Tuhan ningkami?”

³⁰ Na ndooy siꞌ ni katāhan, meka bawi takita magkakanan.

³¹ Dari siꞌ, bbuwatan siga seytan njawom ga baran lalla looy siꞌ nganjunjung ni si Isa, yuk da, “Bong kami palakka nu, pasaynun na jaꞌ kami pa jawom baanan bawi looy.”

³² Pag halling si Isa, “Pilay na kam!” Dari lay du pōꞌ siga seytan man jawom ga baran lalla looy boꞌ da pasayin pa jawom baran ga bawi looy. Pag-anu siꞌ, ilooy ma magti magsonsehan baanan ga bawi looy palūd pa jawom danaw sampay lay na katis limbo.

³³ Pag takita meꞌ siga tukang ngipat bawi looy meꞌ looy, magti sila sonse pa daira. Pag takka da, lay sila nuntut mimon ma bay tasakup da sampay na pasal siga lalla looy ma bay sineytan.

³⁴ Dari siꞌ, adak na mimon jama daira looy lay pilay nammuhan si Isa. Takka ndooy, lay sila nganjunjung niiya bong pin ya lakka jaꞌ man lahat da.