Matiyu 6 - Sabahagiꞌ Kitab Tawrat: Panagnaan ni Awwal Jaman maka Kitab Injil

Tōꞌ si Isa pasal naraka

¹ Yuk si Isa lagi, “Paayad-ayad kam. Bila kam magtaat, daa sabtanan bi subay na pin sasang meka jama ngita. Bong ina meꞌ naa maksud bi, yaꞌ sina luu tungbas takoleꞌ bi man Mmaꞌ bi Tuhan ni sulgaꞌ.

² “Sangkon bila kam naraka ni jama miskin, daa na kam ngakig jama ma magbawuꞌ-bawuꞌ jaꞌ sutsiꞌ. Jama meꞌ looy ilay naraka du bong meka jama kumpo ni langga atawa ni mayran bong pin sila sinanglitan jaꞌ meꞌ manusiyaꞌ. Sugaꞌ baan ta kam banahan, pag taabut da sinanglitan meꞌ jama, ngkod looy du silay tungbas takoleꞌ da.

³ Sangkon bila kam naraka ni jama miskin, daa kam maan jama minsan gi bagay bi banahan

⁴ supaya yaꞌ tasayu jama. Ndang-ndang takita du leꞌ Mmaꞌ bi Tuhan ni sulgaꞌ, maka iya sa nungbasan kaam.

Tōꞌ si Isa pasal maku duwaa

⁵ “Maka bila kam maku duwaa pa Tuhan, daa na du kam ngakig jama ma magbawuꞌ-bawuꞌ jaꞌ sutsiꞌ. Sila ina tigiꞌ maku duwaa bila meka na jama kumpo ni langga atawa ni mayran bong pin sila takita leꞌ manusiyaꞌ. Sugaꞌ baan ta kam banahan, pag taabut da takita meꞌ jama, ngkod looy du silay tungbas takoleꞌ da.

⁶ Arapun bila kam maku duwaa, pilay kam pa jawom bilik bi maka tambohun bi lawang gantaꞌ yaꞌ takita meꞌ jama. Batan minsan ina yaꞌ tasayu jama, takita du sina meꞌ Mmaꞌ bi ma yaꞌ takita. Maka iya sa nungbasan kaam.

⁷ “Maka bila kam maku duwaa, daa kam mitsala manunsāp subay na pin pinagsibalik-balik duwaa bi meꞌ karuha jama ma numba tuhan-tuhan. Sila ina, kanna da subay na pin tahaꞌ banahan duwaa da boꞌ da pinaruli meꞌ tuhan-tuhan da.

⁸ Daa na kam ngakig sila batan ndang tasayu du sina meꞌ Mmaꞌ bi bong oy gunahan ningkaam minsan kam yaꞌ gi bay maku niiya.

⁹ Bila kam maku duwaa pa Tuhan, meꞌ tuu hantang na, yuk bi, ‘Tuhan, Mmaꞌ kami ni sulgaꞌ, kamura-murahan pinaehe na pin awon nu meꞌ jama sikamimon.

¹⁰ Kamura-murahan lillaꞌ na mimon manusiyaꞌ ni pamarinta nu supaya kahandak nu jaꞌ pinabuwat ni junyaꞌ meꞌ ndooy du ni sulgaꞌ.

¹¹ Kamura-murahan buwanan nu na pin kami balanjaꞌ llaw pa dangallaw.

¹² Maka ampunun doꞌ kami ni dusa kami batan lay na du kami ngampun sagannap ma dusahan ningkami.

¹³ Maku kami tabang ningkau mari kami yaꞌ takoleꞌ meꞌ siga sasat seytan. Batan kau du magbayaꞌ ni mimon-mimon, Sangat Kawasa ma pinudji saumu-umu. Amin.’ ”

¹⁴ Pag-anu, yuk si Isa lagi, “Bong ina kam ngampun jama ma dusahan ningkaam, inampun du sina kam meꞌ Mmaꞌ bi ni sulgaꞌ.

¹⁵ Sugaꞌ bong ina kam yaꞌ ngampun jama, yaꞌ du kam inampun meꞌ Mmaꞌ bi.

Lanan meꞌ puwasa

¹⁶ “Maka bila kam puwasa, daa na du kam ngakig jama ma magbawuꞌ-bawuꞌ jaꞌ sutsiꞌ. Jama meꞌ sila ilay, sigi-sigi ngaluraꞌ pilay-pitu man da magpasipat sila jama puwasa. Sugaꞌ baan ta kam banahan, pag taabut da takita meꞌ jama, ngkod looy du silay tungbas takoleꞌ da.

¹⁷ Arapun bila kam puwasa, daa subay na pin kam magpasipat.

¹⁸ Batan minsan ina yaꞌ tasayu jama, takita du leꞌ Mmaꞌ bi ma yaꞌ takita. Boꞌ iya sa nungbasan kaam.”

Ngumpo altaꞌ ni sulgaꞌ

¹⁹ Pag-anu, yuk si Isa lagi, “Daa kam ngumpohan dī bi altaꞌ ntuu ni junyaꞌ, batan altaꞌ ni junyaꞌ ina tapakaat lagi meꞌ mananap maka ginahaꞌ, boꞌ tatangkaw lagi.

²⁰ Arapun buwat kam kaayaran ma nulut ni kahandak Tuhan. Meꞌ looy ilay sibuꞌ du kam ka ngumpo altaꞌ ni sulgaꞌ. Boꞌ altaꞌ ni sulgaꞌ ina, mastiꞌ yaꞌ tapakaat meꞌ mananap maka yaꞌ kuhi ginahaꞌ. Boꞌ na, yaꞌ lagi tatangkaw meꞌ sugaru.

²¹ Indanan bi, nnoy-nnoy ina man altaꞌ bi, ndooy du atay bi.”

Jama ma mahap sambuhan mata na

²² Maka yuk si Isa, “Bong siꞌ ina kam mandang jaꞌ meꞌ bi nulut kahandak Tuhan, sibuꞌ du kam ka jama mahap sambuhan mata na. Yaꞌ kam magsiꞌ sabap pamiki bi lay na pinadantaan.

²³ Sugaꞌ bong ina kam mandang jaꞌ meꞌ bi nulut dī bi, sibuꞌ du kam ka jama sakihan mata da. Yaꞌ tumampak meꞌ bi ngandaꞌ. Sibuꞌ du karuha bi ka jama bagagap jaꞌ njawom lindom. Boꞌ na, bong kam mista na pin mahap meꞌ bi ngandaꞌ, mangkin na kam njawom lindom na saꞌ alang-alang.”

²⁴ Yuk si Isa lagi, “Yaꞌ sina luu ata kaintu duwa papuꞌ, batan disu kaasean na, kuwan ilooy disu, niyaꞌ. Atawa disu pinaruli meꞌ na, kuwan ilooy disu, pabiya na jaꞌ. Damikiyan, yaꞌ du sina kam kaisbat Tuhan haboy ka altaꞌ.

Daa kam hanggaw ni hāl meꞌ bi llum

²⁵ “Sangkon, daa na kam hanggaw ni hāl meꞌ bi llum, meꞌ sapantun hāl kinakan ka inuman sampay pamakoy bi. Pagka ina Tuhan bay muwanan kaam napas ka baran, labi na baw bong sat kinakan ka pamakoy saꞌ tapamuwan na.

²⁶ Pamintangan bi na ga manuk-manuk. Yaꞌ sila pandoy tanom ka ngattom sampay ngannaꞌ balanjaꞌ njawom buriga, malaingkan binalanjaan du sila meꞌ Mmaꞌ bi ni sulgaꞌ. Na bong sila binalanjaan, labi na baw kaam saꞌ binalanjaan salawak-lawak ehe hagaꞌ bi man ga manuk-manuk.

²⁷ Sarī gi, yaꞌ du sina tasambungan bi umu bi san lasa danjām san gi pooy meꞌ bi hanggaw.

²⁸ “Maka ongoy subay na pin kam hanggaw pasal pamakoy? Pamintangan bi na katumbu-tumbuhan njawom tawun. Yaꞌ sila maghulas-sangsāꞌ nahiꞌ badjuꞌ batan luu du Tuhan muwanan sila sumping-sumping bilang pamakoy da.

²⁹ Baan ta kam banahan, minsan Sultan Sulayman mattoꞌ meꞌ looy na eka altaꞌ na yaꞌ na taambat, lingkat pamakoy na yaꞌ du kaatu ni sumping-sumping.

³⁰ Na bong katumbu-tumbuhan ma dari jaꞌ llabas sumawung sampay tinunu tapamakoyan meꞌ Tuhan ka sumping-sumping, kaam palagi saꞌ binuwanan pamakoy meꞌ na. Pagka meꞌ looy, ongoy subay na pin kulang pangando bi niiya ngayaran kaam?

³¹ Sangkon, daa na kam hanggaw ni kapasal pooy meꞌ bi koleꞌ kinakan ka inuman atawa pamakoy.

³² Na siga jama ma yaꞌ toon Tuhan ina, ndang kinahanggawan meꞌ da bong pooy meꞌ da koleꞌ pakaradjaan meꞌ looy siꞌ. Boꞌ kaam ina, san kam yaꞌ na hanggaw. Ndang-ndang kinatoonan du sina meꞌ Mmaꞌ bi ni sulgaꞌ gunahan ningkaam mimon inaa siꞌ.

³³ Sangkon pakutuun bi na meꞌ bi mmeꞌ ni pamarinta Tuhan maka akigun bi kaintongan Tuhan. Basta ina inaa numbul satu ningkaam, malaingkan Tuhan sa muwanan kaam mimon ma kagunahan ningkaam.

³⁴ Sangkon, daa na kam hanggaw ni hāl ma inabut meꞌ bi sumawung. Saddong na siga problema ma luu ni llaw tuu, san daa na sampunan bi.”