Matiyu 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Umanat si Yahiya ma Tukang Mandi

¹ Luu jaꞌ daka dangon taun, takka na baw si Yahiya ma Tukang Mandi masaplag ni lahat lau-lau yaꞌ maglumaꞌ ndooy ni Yahudiya.

^2-4 Pamakoy na bay pinabuwat ka bū untaꞌ maka kambot na kuwit sapiꞌ. Makanan na tompang ka gowaꞌ buwani. Ndooy siꞌ, wā ya masaplag ni siga jama ma bay pilay pa mman na, yuk na, “Nawbat na kam sabap tapit na katakka pamarinta Tuhan.” Na sabapan pabuwatan si Yahiya ilay siꞌ, lay na binakbul bay tunaꞌ Nabi Isaya, ilooy ma yuk na, “Luu sina mintu jama takale ngahowap ni lahat lau-lau, yuk na, ‘Saddiyahun bi na lān ni katakka Papuꞌ. Paintongun bi na mari tahan na patiluꞌ pa mman bi.’ ”

⁵ Na manusiyaꞌ siꞌ tu, sakiyan bahuklud pilay pa mman si Yahiya lakka man Jerusalem sampay na man sikaliput Yahudiya ka siga kawum ni tagan Sōng Juldan.

⁶ Ndooy siꞌ, lay na sila magsabanna ni baanan jama bay dusa da sampay nawbat. Pag-anu, boꞌ da pinandi meꞌ si Yahiya ndooy ni Sōng Juldan.

⁷ Maka meka du kapakihan bay pilay man ga palhimpunan Parisi ka Saddusi maimanan si Yahiya mandi jama. Pag takita sila meꞌ si Yahiya, yuk na ninsila, “Kaam bina, subay ga kam baanan sō latsunan! Ongoy subay na pin kam mahusaan dī bi pitu? Bong yaꞌ du tawbatan bi dusa bi, daa kam mista tailagan bi mulkaꞌ Tuhan ma takka bbos-bbos.

⁸ Bong bana tawbatan bi na dusa bi, subay kam mōꞌ buktiꞌ ni kawul-piil bi.

⁹ Daa kam mista sukat kam panubuꞌ Nabi Ibrahim yaꞌ na kam tuwaꞌ mulkaꞌ Tuhan. Bong siꞌ ina tud panubuꞌ Nabi Ibrahim pagpiha Tuhan, san ga buran batu naa, tapadari du meꞌ Tuhan ga panubuꞌ na.

¹⁰ Bong yaꞌ tasayu bi, saddiya na sina hisab Tuhan meꞌ karuha kapa tahan man nabbongan poon kayu. Batan mimon ina poon kayu ma yaꞌ mahap buwaꞌ da, mastiꞌ tinabbongan jaꞌ boꞌ hiniyakan pa jawom api.”

¹¹ Maka yuk si Yahiya lagi, “Luu gi sina pasunuꞌ niyaku tā biddaꞌ na langkaw kawasa-kapatut na man niyaku. Yaꞌ san ku tawop makkasan ingkot tumpaꞌ na. Aku tu mandi kaam ka boheꞌ jaꞌ tandaꞌ lay na kam nawbat. Boꞌ iya ina mintu, man na mandi kaam, Rū Sutsiꞌ ka api.

¹² Iya meꞌ sapantun jama ka tapan na ngahampaan bohas. Isi na inannaꞌ ni jawom buriga na. Kuwan hampaꞌ na, tinunu meꞌ na njawom api ma yaꞌ kuhi pawom saumu-umu.”

Si Isa pinandi meꞌ si Yahiya

¹³ Na sasang si Yahiya masi gi ndooy ni Sōng Juldan mandi jama, luu na baw takka si Isa man Jalil nohoꞌ pinandi.

¹⁴ Sugaꞌ yaꞌ kuhi si Yahiya. Yuk na ni si Isa, “Ongoy ko subay na pin pandi ku? Sapatut na bina, subay kau ya mandi aku.”

¹⁵ Sugaꞌ tampung si Isa, “Pilayun na ba. Dari du sina ko mandi aku, batan subay bean ta mimon kahandak Tuhan ningkita.” Dari lay na kuhi si Yahiya mandi si Isa.

¹⁶ Pag tunga si Isa man jawom boheꞌ, sarunduun takita na langit pabukaꞌ maka luu na Rū Sutsiꞌ duwai meꞌ dagbos atsang, boꞌ na nampi taꞌ baran na.

¹⁷ Maka luu suwara man sulgaꞌ, yuk na, “Ituu tu Anak ku, kakasi ku. Kasulutan ku banahan niiya.”