Matiyu 28 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa pinakallum

¹ Na paddus jaꞌ siꞌ Llaw Pahali, sayu alab lagi ni llaw Ahad, kuwan si Mariyam man Magdala ka Mariyam looy disu lay pilay ngandaꞌ kubu si Isa.

² Sarunduun du luu linug basag batan luu na takka malaikat Tuhan duwai man taꞌ langit. Pag-anu siꞌ, lay ligiran na batu mehe man bay nambo behe kubu si Isa, boꞌ na ningkōꞌ njataꞌ na.

³ Dagbos malaikat looy meꞌ hantang dantaꞌ mangirat maka pakayan na poteꞌ malaas.

⁴ Kuwan ga sundalu looy ma nganjaga, mipig na ga ni katawu da ni malaikat looy sampay lay na ga kappisan.

⁵ Yuk malaikat looy ni ga danda looy, “Daa kam ba tawu. Katoonan ku du miha kam si Isa ma bay llansang taꞌ tehang.

⁶ Sugaꞌ yaꞌ na ya luntuu, batan lay na ya pinakallum pabalik meꞌ bay halling sambat na du. Tu kam. Ndaun bi na limpaꞌ man na bay pinabāk,

⁷ boꞌ bi pilay na deꞌ-dēꞌ mahati siga mulit na. Baan bi sila lay na ya pinakallum maka duhuꞌ gi silay ya mintu takka man kaam pilay pa Jalil. Ndooy sa kam sitammu. Indanan bi bay bitsala ku siꞌ.”

⁸ Dari siꞌ, lay na sila lakka deꞌ-dēꞌ man kubu looy. Sila siꞌ tu maglamud na tawu ka gāk da sasang da sonse mahati siga mulit si Isa.

⁹ Sasang ga danda looy siꞌ ni tangngaꞌ lān, luu na baw si Isa patammu sambayan na nagina sila. Dari ilooy ma pasōng sila pa mman na, boꞌ da nguwangkutan battis na sampay numba iya.

¹⁰ Yuk si Isa ninsila, “Daa kam ba tawu. Pilay na kam. Sōn bi na siga danganakan ku pilay pa Jalil. Sitammu sa kami ndooy.”

Tuntut tukang jaga

¹¹ Sasang ga danda looy pilay pa mman mulit si Isa, kuwan kasohean sundalu ma bay nganjagahan kubu si Isa lay pabeleng pa jawom daira, boꞌ da nuntut ni siga imam langkaw mimon bay tasakup da ni kubu looy.

¹² Dari lay kumpo siga imam langkaw ka ga matatoa ni agama isun. Katappakan pag-isunan da, subay suap da ga sundalu looy ka sīn paeka mari yaꞌ paintong nuntut ilooy ma bay tasakup da.

¹³ Dari yuk da ni siga sundalu looy, “Baan bi jama pag sangom sasang bi tuli, lay tinangkaw mayat looy meꞌ mulit na.

¹⁴ Bong sawpama taaka meꞌ gubnul lay jaꞌ kam tuli, daa kam susa. Kami sa mitsalahan iya mari kam yaꞌ tapalkalaꞌ.”

¹⁵ Dari siꞌ lay na kaddoꞌ ga sundalu looy sīn looy sampay lay na du bay bean da ilooy ma bay sinohoꞌ ninsila. Dari labba man waktu looy sampay batnaa, bay tuntut ga sundalu looy tinanyagan na pin meꞌ bangsa Yahudi.

Si Isa nammuhan siga mulit na

¹⁶ Na kuwan mulit si Isa siꞌ ma sapu-dambuwaꞌ, lay na pilay pa Jalil, boꞌ da pa taꞌ punu man da bay sinohoꞌ meꞌ Isa pilay.

¹⁷ Luu jaꞌ siꞌ si Isa takita meꞌ siga mulit na, magti du ya sinumba meꞌ da. Sugaꞌ kasohean sila hawal-hawalan lagi taggahaꞌ saꞌ iya si Isa.

¹⁸ Pag-anu, yuk si Isa ninsila, “Sikamimon kapatut ni sulgaꞌ sampay ni junyaꞌ lay na ndean aku.

¹⁹ Sangkon, lataan bi na junyaꞌ boꞌ toan bi na sikamimon bangsa pasal aku supaya sila mmeꞌ niyaku. Maka pandihun bi na sila ni awon Mmaꞌ ku, Anak na, ka Rū Sutsiꞌ.

²⁰ Pabadjahun bi na sila mmeꞌ ni mimon bay panohoan ku ningkaam. Intomun bi, luu na pin sina ku ngunungan kaam ngabut sampay llaw dambuli.”