Matiyu 27 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa binoo pa mman Gubnul Pilatu

¹ Pag kallat subu, lay na isun siga imam langkaw ka ga matatoa ni agama bong pooy meꞌ si Isa kalabuan hukuman kapatoy.

² Dari lay na ya iningkotan boꞌ na binoo pa mman Gubnul Pilatu.

Kapatoy si Judas

³ Pag tasayu meꞌ si Judas si Isa song pinapatoy na, tud bay sasso ya bay nipu. Dari lay na ya pilay pa mman siga imam langkaw ka ga matatoa ni agama mapoleꞌ tallumpūꞌ dublun pilak porol looy ninsila.

⁴ Luu jaꞌ siꞌ, yuk na ninsila, “Ndusa ku batan bay ku nipu jama yaꞌ dusahan.” Sugaꞌ yuk ga imam ka ga matatoa looy, “Bahalaꞌ nu. Batōy kami inaa?”

⁵ Dari bbuwatan si Judas, lay ngahiyakan ga dublun pilak porol looy pa jawom langga mehe boꞌ na lakka. Pag-anu, lay na ga ya nganggantung dī na.

⁶ Kuwan ga pilak looy siꞌ, lay na pinūt meꞌ siga imam langkaw sambayan da halling, “Pooy na tu la? Haram situ sīn tuu. Yaꞌ dari pinatabeꞌ ni sīn para langga mehe pagka ituu ballihan lahaꞌ jama.”

⁷ Pag-anu siꞌ, ni bay pag-isunan da, mahap bong sīn looy pinakoy man malli tanaꞌ halliꞌ man ngubu jama sampi. Dari lay sila kaballi tanaꞌ man disu tukang buwat kibut.

⁸ Kuwan tanaꞌ looy siꞌ, pinag-awnan na Tanaꞌ Lahaꞌ ngabut sampay batnaa.

^9-10 Dari lay na binakbul tunaꞌ Nabi Jeremaya, ilooy ma yuk na, “Ituu bay bāꞌ Tuhan niyaku: ‘Bay kinaddoꞌ meꞌ da tallumpūꞌ dublun pilak porol, yana hagaꞌ bay ginantaꞌ meꞌ bangsa Israil niiya, boꞌ pinakoy man malli tanaꞌ disu tukang buwat kibut.’ ”

Si Isa sinumariya meꞌ Gubnul Pilatu

¹¹ Pag luu jaꞌ siꞌ tu si Isa ni awpan Gubnul Pilatu, sinumariya na ya. Tilaw gubnul, “Kau na kina sultan bangsa Yahudi?” Tampung si Isa, “Meꞌ bay halling sambat nu na siꞌ.”

¹² Na pag lay pinōꞌ mimon sumbung njataꞌ na meꞌ siga imam langkaw ka ga matatoa ni agama, yaꞌ san ya bay halling-halling.

¹³ Dari halling Gubnul Pilatu niiya, “Ongoy, yaꞌ kilay bay takale nu mimon sumbung bay uwan da njataꞌ nu?”

¹⁴ Sugaꞌ masi du si Isa yaꞌ bay nampung san dakabtang. Dari tud bay jayip gubnul niiya.

Si Isa binotangan hukuman kapatoy

¹⁵ Na taun-taun taabut paballangan Ngalingkaꞌ, ndang luu tabiat gubnul mapeneꞌ baanan jama ndooy disu pilisu pinōꞌ.

¹⁶ Ni jaman looy, luu disu pilisu tanyag baldusa inawnan si Barabas.

¹⁷ Pagka meka jama kumpo-kumpo ni awpan Gubnul Pilatu, tilaw na, “Pilisu mamooy karomanan bi pinōꞌ, si Barabas ka atawa si Isa ma inawnan meꞌ kasohean Almasi?”

¹⁸ Kon Gubnul Pilatu nilaw batan kainagon na maddusan si Isa. Batan katoonan na danan siga pa-mmean agama bay ma-ntan si Isa niiya sabap dangkiꞌ sila.

¹⁹ Na sasang Gubnul Pilatu ningkōꞌ numariya, takka na baw umanat man nda na, yuk na, “Daa ko buwat oy maka oy na ni jama looy ma intong batan tud bay malasahi ku ni upihan ku pasal iya dabuhiꞌ.”

²⁰ Sugaꞌ meka jama ndooy inoyo-oyohan na pin meꞌ siga imam langkaw ka ga matatoa ni agama nohoꞌ mogos si Barabas pinōꞌ. Kuwan si Isa nohoꞌ na pinapatoy.

²¹ Pag-anu siꞌ, nilaw na pin Gubnul Pilatu pabalik ni ga jama ndooy, yuk na, “Ni ga lalla tuu ma duwa, mamooy karomanan bi pinōꞌ?” Pag tampung da, “Si Barabas na!”

²² Dari tilaw Gubnul Pilatu, “Hati, batōy ku na baw si Isa, ilooy ma inawnan Almasi?” Tampung da sikamimon, “Lansangun na taꞌ tehang mari ya matoy.”

²³ Tilaw gubnul, “Ongoy, oy tu dusa na?” Sugaꞌ amu-amu hinowapan meꞌ da pa haddo, yuk da, “Lansangun na taꞌ tehang!”

²⁴ Pag tabista Gubnul Pilatu yaꞌ na du tapaling manusiyaꞌ ndooy, gam pin song hiluhalaꞌ na, magti ya ngaddoꞌ boheꞌ, boꞌ na ngosoan tangan na ni awpan ga jama looy. Yuk na, “Bahalaꞌ bi na. Lay na kosoan ku tangan ku mari yaꞌ na ku talapay ndusa ni kapatoy jama tuu.”

²⁵ Pag tampung ga jama sikamimon ndooy, “Kami sa bahalaꞌ ni kapatoy na sampay ga anak-mpu kami.”

²⁶ Dari siꞌ, lay na pinōꞌ si Barabas ninsila meꞌ gubnul. Kuwan si Isa, lay na sinohoꞌ llagpiꞌ ni sundalu na, boꞌ nohoꞌ llansang taꞌ tehang.

Si Isa binuwat kalabbiyan meꞌ siga sundalu

²⁷ Pag binoo si Isa leꞌ siga sundalu gubnul pa jawom kampu da, lay tawag da mimon pagkahi da sundalu sampay liput na si Isa meꞌ da.

²⁸ Pag-anu, lay na baw urusan da pamakoy na boꞌ na pinapatukan juba tawuk bahasa juba sultan.

²⁹ Maka lay gi sinangonan taꞌ kōk na bahasa karuna bay pabuwat da ka bahan itingan. Pag-anu, boꞌ na pina-ntanan pongan buway ni kawnan na bahasa bastun sultan. Maka lay gi sila nangge ka tuut da bahasa maehe iya man da buwat iya kalabbiyan sambayan da halling, “Kasannangan ningkau Ampun Sultan bangsa Yahudi.”

³⁰ Pag-anu, lay na baw ya lluraan, boꞌ lay kinaddoꞌ pongan buway looy ni tangan na man mangkung kōk na.

³¹ Paddus jaꞌ siꞌ sila bay buwat si Isa kalabbiyan, lay na urusan da juba tawuk looy boꞌ lay pinapatuk meꞌ da balik bay ndang pakayan na. Pag lupus, lay na ya boo da pōꞌ lān llansang na taꞌ tehang.

Si Isa llansang taꞌ tehang

³² Sasang da pōꞌ man daira, sitammu na baw sila ka disu lalla man Sayrin inawnan si Saymon. Pag-anu, lay na baw ya pinaggos meꞌ siga sundalu looy nohoꞌ ningan si Isa manangkit tehang na.

³³ Pag takka da taꞌ buntuꞌ inawnan Golgota, hatiyan na Lugar Baung Kōk,

³⁴ lay na baw si Isa sinongan tubaꞌ anggul bay sinakotan uliꞌ pait. Sugaꞌ pag lay jaꞌ takissa na, yaꞌ na ya kuhi nginum.

³⁵ Pag-anu, lay na ya llansang taꞌ tehang. Kuwan pakayan na, lay na pinagsarī-sarī meꞌ siga sundalu boꞌ pinagkimbuan meꞌ da bong mamooy sukuꞌ ni dangan.

³⁶ Pag lupus, boꞌ da ningkōꞌ nganjaga sasang si Isa taꞌ tehang.

³⁷ Pa jataꞌ man takōk si Isa, luu gi papan bay llansang. Ni papan looy luu suwat man mahati bong oy palkalaꞌ njataꞌ na. Batsahan na, “Ituu itu si Isa, Sultan bangsa Yahudi.”

³⁸ Maka luu gi duwa mundu bay du llansang taꞌ tehang ndooy, disu huwin pa kawnan man si Isa, kuwan disu, huwin pa kayli.

³⁹ Jama baw siꞌ tu, luu-luu pingkaꞌ, bbuwatan da eleng-eleng sambayan da ngaludjum iya.

⁴⁰ Yuk da, “Baꞌ-bāꞌ nu, talangkat nu langga mehe boꞌ pinatangge bbalik njawom tallu ngallaw du. Bong mattan takaya nu meꞌ looy, tabangun teꞌ dī nu! Bong bana kau Anak Tuhan, duwai na ko ba man taꞌ tehang naa!”

⁴¹ Damikiyan, siga imam langkaw ka ga guru saraꞌ sampay ga matatoa ni agama lay du buwat iya kalabbiyan.

⁴² Sambat da, “Bay baw ya katabang jama, pagka dī na, niyaꞌ san tatabang na. Bong siꞌ ina mattan iya sultan bangsa Israil, subay ya duwai man taꞌ tehang naa boꞌ kami pitsayaꞌ niiya.

⁴³ Baꞌ-bāꞌ na, mangando ya pa Tuhan maka mangaku ya Anak Tuhan. Bong ina ya kinaasean meꞌ Tuhan, mastiꞌ tinabang jaꞌ ya batnaa.”

⁴⁴ Sarī man sila, sampay ga mundu looy ma bay llansang haboy ka si Isa, lay du mmeꞌ-mmeꞌ ngaludjum iya.

Kapatoy si Isa

⁴⁵ Na pag taabut tangngaꞌ llaw, ngalindom na ni sikaliput lahat ngabut sampay lisag tallu kohap.

⁴⁶ Tapit jaꞌ siꞌ lisag tallu kohap, ilooy ma ngingan na si Isa pahaddo, yuk na, “Eli, Eli, lama sabaktani?” Hatiyan na, “Tuhan ku, Tuhan ku, ongoy ku lay mbanan nu?”

⁴⁷ Kuwan kasohean jama ma nangge-nangge ndooy, magsāꞌ meꞌ da kale. Kanna da ngalinganan Nabi Eliyas ya.

⁴⁸ Pag-anu, magti lay sonse disu ninsila ngaddoꞌ sammek boꞌ iningkotan ni tōng kayu-kayu. Pag-anu, boꞌ tinalloban ni jawom tubaꞌ anggul bahal boꞌ inangkat pa behe si Isa pinasassop.

⁴⁹ Sugaꞌ yuk kasohean, “Bbiyahun bi na doꞌ. Ndaꞌ tabi teꞌ bong tulun du Nabi Eliyas nabang iya.”

⁵⁰ Pag-anu, lay na baw si Isa ngingan pahaddo balik sampay bakkat na napas na.

⁵¹ Maka ni sasangan waktu looy du siꞌ, sarunduun du salik duwa man jataꞌ pa diyoꞌ kultina kapa ma nallang Bilik Pinakasutsiꞌ ka Bilik Sutsiꞌ ni langga mehe. Maka linug na ga lahat sampay sobak na siga batu mehe.

⁵² Maka meka na kubu pungkad boꞌ na meka na du sukuꞌ Tuhan llum na pabalik.

⁵³ Sampay lay na sila pōꞌ man jawom kubu da. Pag-anu, paddus si Isa bay pinakallum pabalik, lay na baw sila pilay pa Jerusalem, boꞌ meka du jama bay ngita sila ndooy.

⁵⁴ Na kuwan kapitan sundalu ka ga soheꞌ na siꞌ ma nganjagahan si Isa, pag ndaꞌ da linug na lahat sampay mimon ma bay tasakup da ndooy, tud bay tawu sila. Dari yuk da, “Tud bana du la lalla tuu Anak Tuhan.”

⁵⁵ Ndooy siꞌ, luu gi baanan karandahan maimanan si Isa na pin man katāhan. Sila ilay ndang bay haboy ka si Isa lakka man Jalil batan ndang sila nabangan iya.

⁵⁶ Ni baanan ga karandahan looy, luu si Mariyam man Magdala ka nneꞌ si Yaꞌkub ka Yusup inawnan du si Mariyam sampay nda si Sibidi.

Si Isa kinubu

⁵⁷ Pag kohap, luu na takka disu mulit si Isa ma dayahan inawnan si Yusup, lalla man Aramatiya.

⁵⁸ Iya siꞌ tu lay pilay pa mman Gubnul Pilatu maku mayat si Isa mari takubu na. Sampay lay du sohoꞌ Gubnul ndean iya.

⁵⁹ Dari lay na kaddoꞌ si Yusup mayat si Isa boꞌ na tinungkus ka kuku poteꞌ.

⁶⁰ Si Yusup ilay ndang luu na kubu na bahau bay sohoꞌ na pinabuwat ni battisan pampang halliꞌ ni dī na. Dari ndooy na man na bay nampat si Isa. Pag lupus, lay na baw sohoꞌ na lligiran batu mehe man nambo behe kubu looy, boꞌ na lay lakka.

⁶¹ Kuwan si Mariyam man Magdala ka si Mariyam looy disu, bbuwatan da ningkōꞌ jaꞌ ndooy paatag man kubu na maiman.

Tukang jaga ni kubu si Isa

⁶² Na llaw looy siꞌ yana llaw bangsa Yahudi manyap ni Llaw Pahali. Pag taabut llaw disu, yana Llaw Pahali, lay na baw pilay siga imam langkaw ka ga Parisi pa mman Gubnul Pilatu,

⁶³ yuk da, “Tuwan, baꞌ-bāꞌ lalla looy ma pangandustaꞌ jaman na llum, paddus tallu ngallaw, llum du ya konoꞌ pabalik.

⁶⁴ Sangkon, bong siꞌ kadarihan ningkau, sōn doꞌ njagahan kubu na ngkod tallu ngallaw taggahaꞌ lay na baw mintu tinangkaw mayat na meꞌ siga mulit na. Batiꞌ ta mintu, māꞌ na baw sila ga lay na ya pinakallum pabalik. Bong ilay mintu bay magkadarihan meꞌ looy, pag toklas na, magdaruhun na meꞌ da ngandupang jama.”

⁶⁵ Pag tampung Gubnul Pilatu, “Sigi ba, moo na kam siga sundalu nohoꞌ nganjagahan kubu looy paayad.”

⁶⁶ Pag takka da ni kubu looy, lay gi tinandaan meꞌ da batu mehe man bay nambo behe kubu looy supaya kinatoonan bong lay inusik atawa niyaꞌ. Pag-anu, lay na mbanan da ga sundalu looy ndooy nohoꞌ nganjaga.