Matiyu 26 - Sabahagiꞌ Kitab Tawrat: Panagnaan ni Awwal Jaman maka Kitab Injil

Siga Yahudi bagaraꞌ mapatoy si Isa

¹ Pag lupus jaꞌ siꞌ si Isa bay nabbut pakaradjaan meꞌ looy siꞌ, yuk na ni siga mulit na,

² “Ndang katoonan bi na du, njawom duwa ngallaw taabut na paballangan Ngalingkaꞌ. Ni waktu looy ilay mintu sinungkuban na Anak Manusiyaꞌ boꞌ llansang taꞌ tehang sampay matoy.”

³ Na sasang si Isa mitsala ni siga mulit na, kuwan ga imam langkaw ka ga matatoa ni agama lay kumpo ni lumaꞌ Imam Kayapas, yana panghuluꞌ imam.

⁴ Maksud da isun bong pooy meꞌ da nungkuban si Isa gantaꞌ yaꞌ tasayu jama, boꞌ na nohoꞌ pinapatoy.

⁵ Sugaꞌ pag-isunan da, bong sila nungkub, subay yaꞌ sinabuhan ni timpu paballangan looy taggahaꞌ hiluhalaꞌ na baw jama.

Disu danda numpahan kōk si Isa insallan hamut

⁶ Na sasang ga si Isa ndooy ni Betani, lay sila pa lumaꞌ disu lalla bay pingkaꞌ inipu inawnan si Saymon.

⁷ Pag-anu siꞌ, sasang si Isa ningkōꞌ ni lamisahan, luu disu danda pasōng pa mman na moo katsaꞌ-katsaꞌ isihan insallan hamut hagaan banahan. Pag-anu, boꞌ tinumpahan meꞌ na taꞌ kōk si Isa man maehe iya.

⁸ Pag takita leꞌ siga mulit na, tud yaꞌ sila kasulutan sampay yuk da padangan-padangan, “Ongoy doꞌ ilay pasensengan danda looy jaꞌ insallan hamut looy?

⁹ Hagaan bilay la! Gam na bay pinaballihan boꞌ ndean jama miskin ballihan na.”

¹⁰ Na si Isa siꞌ tu, katoonan na du bong oy binitsala meꞌ da. Dari yuk na ninsila, “Ongoy doꞌ ina kam ngalingog danda tuu? Tud mahap bitu bay pabuwat na niyaku.

¹¹ Jama miskin ina, mastiꞌ luu jaꞌ ninggai-ninggai mman bi. Boꞌ aku tu, yaꞌ na humallom ntuu mman bi.

¹² Tuwaꞌ na du situ siꞌ danda tuu bay numpahan baran ku insallan hamut batan sibuꞌ na du ya ka bay manyapan baran ku duhuꞌ para ni llaw ku kinubu.

¹³ Baan ta kam banahan, nnoy-nnoy jaꞌ ina mintu man umanat mahap pinasaplag ni sikaliput junyaꞌ, tasabbut jaꞌ sina danda tuu pangintoman ni bay pabuwat na niyaku.”

Si Judas nipu si Isa

¹⁴ Pus meꞌ looy siꞌ, kuwan si Judas Iskariyut, san ya tabeꞌ ni mulit si Isa sikasapu-duwa, lay pilay pa mman siga imam langkaw

¹⁵ nilaw bong dangoy dean da iya bong ya nabangan sila nungkuban si Isa. Dari pagsulutan da, bay ya binuwanan tallumpūꞌ dublun pilak porol.

¹⁶ Dari siꞌ, mandooy na si Judas lay miha lawang man na ma-ntan si Isa ninsila.

Siga mulit si Isa manyap ni paballangan Ngalingkaꞌ

¹⁷ Pag taabut llaw sibuwa ni paballangan Tinapay Yaꞌ Magpasulig, pasōng na baw mulit si Isa pa mman na, yuk da, “Tuwan, nnoy tu la karomanan nu man kami manyap leꞌ tabi mangan para ni paballangan Ngalingkaꞌ?”

¹⁸ Tampung si Isa, “Pilay kam pa mman jama looy bay sabbut ku nsiniꞌ ndooy ni Jerusalem boꞌ baan bi ya, ‘Tugun Tuwan Guru nohoꞌ ko binaan tapit na waktu bay ginantaꞌ niiya. Maka doman konoꞌ ya mangan para paballangan Ngalingkaꞌ ka ga mulit na ni lumaꞌ nu.’ ”

¹⁹ Dari lay na pilay ga mulit na mean bay sohoꞌ na sampay lay na sila buwat leꞌ mangan halliꞌ paballangan looy.

²⁰ Na pag sangom jaꞌ siꞌ tu, siharung-harung na si Isa ka ga mulit na sikasapu-duwa mangan.

²¹ Sasang da mangan, yuk si Isa, “Baan ta kam banahan, luu situ kam mintu disu nipu aku.”

²² Lay jaꞌ takale meꞌ mulit na, tud susa sila sampay magsing-sīng na sila nilaw, “Saꞌ bilay aku awnan nu Tuwan, saꞌ ba?”

²³ Tampung si Isa, “Ilooy ma soheꞌ ku sawu mangan, iya na sina nipu aku.

²⁴ Anak Manusiyaꞌ itu ndang bay tinunaꞌ njawom kitab, mastiꞌ pinapatoy jaꞌ. Sugaꞌ tud siya-siya silay mintu ilooy ma nipu iya. Gam na ya yaꞌ bay pinamaddihan.”

²⁵ Pag-anu siꞌ, nilaw na baw si Judas, ilooy ma nipu iya, yuk na, “Saꞌ kina aku awnan nu Tuwan?” Tampung si Isa, “Kau na bina.”

Katapusan waktu si Isa siharung-harung mangan ka ga mulit na

²⁶ Na sasang da siꞌ mangan, lay si Isa ngaddoꞌ dambatang tinapay boꞌ pinagsukuhan pa Tuhan. Pag lupus, pinong-pōng meꞌ na boꞌ sinongan ni siga mulit na sambayan na halling, “Atu, ngaddoꞌ kam boꞌ kakanun bi. Ingatun bi ituu baran ku.”

²⁷ Pag-anu, lay na baw si Isa ngaddoꞌ sawan tubaꞌ anggul boꞌ pinagsukuhan pa Tuhan. Pag lupus, lay du sinongan ni ga mulit na sambayan na halling, “Nginum kam sikamimon.

²⁸ Ingatun bi inaa lahaꞌ ku song tinumpahan supaya meka na jama taampun sampay puwas na dusa da labbasakayi. Batan lahaꞌ ku ina, inaa na muwan kasāhan ni pagsulutan bahau ni antaraꞌ Tuhan ka manusiyaꞌ.

²⁹ Baan ta kam, ituu sa situ katapusan waktu ku nginum tubaꞌ anggul ka kaam. Sakayi ku itu nginum ka kaam pabalik, noy bahau na kahalan tabi njawom pamarinta Mmaꞌ ku.”

³⁰ Pag-anu, lay sila ngalang kalangan pudji pa Tuhan boꞌ da pōꞌ song pilay pa Punu Jaytun.

Si Isa nunaꞌ si Pitel song maylu

³¹ Lān da pilay, yuk si Isa ninsila, “Sangom tuu du pinasonsehan na sina ku meꞌ bi sikamimon. Song binakbul na suwat njawom kitab, ilooy ma yuk Tuhan, ‘Ndang bay na silay gantaꞌ ku ilooy ma tukang ngipat baanan bili-bili pinapatoy. Kuwan siga bili-bili na magkanatan na sonse.’

³² “Sugaꞌ,” yuk si Isa, “pag mintu lay na ku pinakallum pabalik, duhuꞌ na ku man kaam pilay pa Jalil. Ndooy sa kitabi sitammu.”

³³ Pag-anu, yuk si Pitel niiya, “Minsan sikamimon ngambanan kau Tuwan, bong aku, basta yaꞌ baw ku kuhi ngamban.”

³⁴ Sugaꞌ yuk si Isa, “Baan ta ko banahan Pitel, sangom tuu du situ, yaꞌ gi bay tingkauk manuk, ndang min tallu na ko bay maylu bahasa yaꞌ ku takila nu.”

³⁵ Sugaꞌ si Pitel siꞌ tu, gam pin amu-amu magsambatan, yuk na, “San gi man ku matoy, basta yaꞌ du ku maylu!” Damikiyan, ga mulit si Isa siꞌ tu ilooy kasohean, meꞌ looy du halling da.

Si Isa maku duwaa ndooy ni Getsemani

³⁶ Pag-anu, lay na ga si Isa palanja pa Getsemani. Takka ndooy, yuk na ni ga mulit na, “Ningkōꞌ doꞌ kam ntuu. Pilay doꞌ ku ndē maku duwaa.”

³⁷ Sugaꞌ lay gi baw boo na si Pitel ka ga anak si Sibidi sikaduwa. Pag-anu, takkahan susa na si Isa maka yaꞌ na katoon-toonan na parasahan na.

³⁸ Dari yuk na ninsila sikatallu, “Biddaꞌ na baw tu susa jawom atay ku. Agon dak kapatoy na niyaku. Ntuu jaꞌ doꞌ kam maka unungan bi na doꞌ ku matiꞌ.”

³⁹ Pag-anu siꞌ, lay na ya palawak-lawak dangkitiꞌ man bihing da boꞌ na pahangkop taꞌ tanaꞌ maku duwaa, yuk na, “Maꞌ, bong siꞌ luu dapat, hawasan nu na kabinsanaan ma bay gantaꞌ nu njataꞌ ku. Sugaꞌ subay kahandak nu binean, saꞌ ga niyaku.”

⁴⁰ Pag-anu siꞌ, lay na ya pabeleng pa mman ga mulit na, ilooy ma tallu. Pag ndaꞌ na, tuli jaꞌ sila. Dari yuk na ni si Pitel, “Ongoy doꞌ ina yaꞌ san kam katatas ngunungan aku magpajaga san lasa danjām?

⁴¹ Daa kam ba tuli, arapun maku na pin kam duwaa pa Tuhan mari yaꞌ tungkas iman bi. Batan san ina njawom atay bi doman kam buwat kahandak Tuhan, yaꞌ baw takaya bi ni dī bi.”

⁴² Pag-anu siꞌ, lakka na baw si Isa pabalik, boꞌ na maku duwaa ni kaminduwa na, yuk na, “Maꞌ, bong yaꞌ na luu dapat man ngalakkahan kamalasahiyan mehe ma song tuwaꞌ njataꞌ ku, mastiꞌ subay kahandak nu binean.”

⁴³ Pag luu jaꞌ ya bay pabeleng pa mman siga mulit na, pag ndaꞌ na, tuli na baw sila pabalik batan tud kajagahan sila.

⁴⁴ Pag-anu, lakka na baw ya pabalik, boꞌ na maku duwaa kamintallu na meꞌ bay bitsala na du sibuwa.

⁴⁵ Pag beleng na pabalik pa mman siga mulit na, yuk na ninsila, “Uy! Ongoy doꞌ kam ina amu-amu tuli? Saꞌ bitu ituu waktu man pahali-hali. Taabut na situ waktu Anak Manusiyaꞌ tinipu, boꞌ pina-ntan pa mman siga baldusa.

⁴⁶ Bangun na kam. Alu na lalla ma nipu aku.”

Si Isa sinungkuban

⁴⁷ Yaꞌ gi siꞌ lupus si Isa mitsala, ilooy ma takka du si Judas, yana disu mulit ni ilooy ma sikasapu-duwa. Maka meka du jama bay boo na ddas ka kataliꞌ da maka takaka da. Sila siꞌ tu bay pilay nungkuban si Isa man panohoan siga imam langkaw ka ga matatoa ni agama.

⁴⁸ Na si Judas siꞌ tu, ndang bay isun ka ga soheꞌ na muwanan sila sinyal, yuk na, “Lalla ma ūk ku, ilooy na mintu sungkuban bi.”

⁴⁹ Dari magti pasōng si Judas pa mman si Isa sambayan na halling, “Tuwan Guru,” boꞌ inūk meꞌ na si Isa.

⁵⁰ Yuk si Isa niiya, “Gay, pilayun na. Darahan nu na maksud nu.” Pag-anu siꞌ, ilooy ma sinungkuban na ya meꞌ baanan soheꞌ si Judas.

⁵¹ Sugaꞌ kuwan disu soheꞌ si Isa, lay magti ngurus bariꞌ na sampay lay tigad na tindog panghuluꞌ imam, boꞌ lay na ga latak tinga na.

⁵² Pag-anu, yuk si Isa niiya, “Asokun ba bariꞌ nu. Soysoy ina monoꞌ ka bariꞌ, malaingkan matoy du ya meꞌ bariꞌ.

⁵³ Yaꞌ kina tabista nu bong ku maku tabang man Mmaꞌ ku, mastiꞌ sarunduun du sohoꞌ na pūan libu malaikat pa mman ku?

⁵⁴ Sugaꞌ bong itu ku nohoꞌ na baw tinabang, pooy gi baw meꞌ na binakbul tunaꞌ njawom kitab ma bay ginantaꞌ niyaku?”

⁵⁵ Maka yuk si Isa ni siga jama looy, “Ongoy doꞌ kam ina pitu na ka ga kataliꞌ sampay ga takaka? Ongoy kanna bi, mundu kitu ku? Aku bitu, llaw pa dangallaw na ku bay magpanoan kaam ni langga mehe. Ongoy taggahaꞌ yaꞌ gi ku bay sungkuban bi ndooy?

⁵⁶ Sugaꞌ biyahun na, nduwan jaꞌ sina kam supaya binakbul na siga tunaꞌ ma bay sinuwatan meꞌ kanabi-nabihan.” Pag-anu siꞌ, ilooy ma lay na ya pinasonsehan meꞌ siga mulit na sikamimon.

Si Isa binoo pa mman baanan Sanhidrin sinumariya

⁵⁷ Pag-anu siꞌ, lay na si Isa binoo meꞌ siga jama looy siꞌ ma bay nungkuban iya pa lumaꞌ Imam Kayapas, yana panghuluꞌ imam. Ndooy siꞌ, ndang luu na siga guru saraꞌ ka ga matatoa ni agama lay kumpo.

⁵⁸ Kuwan si Pitel siꞌ tu, luu na pin patuhut man katāhan sampay lay na du ya nakka bihing haman lumaꞌ Imam Kayapas. Pag-anu, lay ya paasok pa jawom haman ningkōꞌ ni bihing ga tukang jaga supaya katoonan na bong oy katuwaꞌ si Isa.

⁵⁹ Na kuwan siga imam langkaw ka mimon pagkahi da paki njawom baanan Sanhidrin, miha na pin saksiꞌ nohoꞌ mitnahan si Isa supaya tasohoꞌ da na pinapatoy.

⁶⁰ Sugaꞌ san meka na bay pasōng mitnahan si Isa, yaꞌ du sila bay nammu buktiꞌ pataꞌ man na pinapatoy. Pag-anu siꞌ, luu na baw duwa bay pasōng,

⁶¹ yuk da, “Lalla tuu tu, lay takale kami bitsala na. Baꞌ-bāꞌ na, luu kawasa na ngahansu langga mehe, sugaꞌ njawom tallu ngallaw, patangge na du konoꞌ pabalik.”

⁶² Pag meꞌ looy jaꞌ, magti nangge panghuluꞌ imam sambayan na nilaw si Isa, yuk na, “Oy tapahalling nu pasal sumbung ma bay takale kami siꞌ sikamimon?”

⁶³ Pag yaꞌ jaꞌ siꞌ nampung si Isa, mitsala na baw bbalik panghuluꞌ imam, yuk na, “Sapahan nu teꞌ ba batnaa ni awpan Tuhan sabanna ma llum saumu-umu bong bana kau na Almasi, yana Anak Tuhan.”

⁶⁴ Iya tampung si Isa niiya, “Meꞌ halling sambat nu na du bilay siꞌ. Maka baan ta kam banahan, luu du sina masa ni sinōng, takita bi Anak Manusiyaꞌ ningkōꞌ huwin pa kawnan man Tuhan Sangat Kawasa. Maka bbos-bbos takita bi du sina ya takka man sulgaꞌ taꞌ tayiꞌ baliyu.”

⁶⁵ Pag takale jaꞌ meꞌ panghuluꞌ imam bitsala si Isa, magti ya nganggeret juba na mismu ni kalasu na sambayan na halling, “Uy, hantak bitsala na bilay siꞌ, saliꞌ du ya ka Tuhan. San bitu yaꞌ na tabi miha jama bay kasakup ni bitsala na pangka pa Tuhan. Ndang-ndang lai na du takale tabi pōꞌ man jawom behe na mismu.

⁶⁶ Bong ningkaam, pooy bandingan bi?” Iya tampung da, “Subay bina ya pinapatoy.”

⁶⁷ Pag lupus meꞌ looy, bbuwatan da ngaluraꞌ ni luwa na. Pag-anu, lay gi pakkos da mata na boꞌ na tinampa sampay sinuntuk

⁶⁸ sambayan da halling, “Bong mattan kau Almasi, tunaun teꞌ bong soy bay nuntuk kau!”

Si Pitel maylu bahasa saꞌ iya soheꞌ si Isa

⁶⁹ Sasang si Isa sinumariya, luu disu tindog danda pasōng pa mman si Pitel sasang na ningkōꞌ ni haman lumaꞌ looy, yuk na, “Kau pun bitu dansoheꞌ du kam ka si Isa, lalla looy man Jalil.”

⁷⁰ Sugaꞌ bbuwatan si Pitel maylu ni awpan da sikamimon, yuk na, “Yaꞌ bilay katoonan ku bong soy awnan nu.”

⁷¹ Pag beleng na pa lawang haman looy, takita na baw ya meꞌ disu tindog danda sarī sambayan na māꞌ ni ga kasohean, “Lalla naa ina dansoheꞌ du ka si Isa, lalla looy man Nasaret.”

⁷² Sugaꞌ lay du bay maylu si Pitel pabalik, yuk na, “Sapahan ku baw basta yaꞌ takila ku jama looy.”

⁷³ Yaꞌ hallom, pasōng na baw kasohean ma nangge-nangge ndooy pa mman si Pitel, halling da, “Mattan du bitu ko haboyan si Isa batan hangpas bitsala nu sibuꞌ du ka jama Jalil.”

⁷⁴ “Ā ssaꞌ ba,” yuk si Pitel. “Yaꞌ san katoonan ku bong soy jama looy. Minulkaan na ku meꞌ Tuhan bong yaꞌ bay bana bitsala ku!” Pag-anu, magti tingkauk na manuk,

⁷⁵ sampay taintom si Pitel na bay tunaꞌ si Isa, ilooy ma yuk na, “Yaꞌ gi san ina mintu bay tingkauk manuk, ndang min tallu na ko bay maylu bahasa yaꞌ ku takila nu.” Pag-anu, lay magti pōꞌ si Pitel man jawom haman looy sampay tud bay ya nangis banahan ni kasasso na.