Matiyu 25 - Sabahagiꞌ Kitab Tawrat: Panagnaan ni Awwal Jaman maka Kitab Injil

Dalil pasal budjang sapū

¹ Yuk si Isa lagi, “Pag beleng Anak Manusiyaꞌ pa junyaꞌ magsultan, meꞌ tuu karuha na: Luu budjang sapū kaniya-kaniya ka palitaan da lay pōꞌ sangom nampang pangantin ma lalla.

² Kuwan lima, kulang pamiki da, boꞌ ilooy ma lima makoy honaꞌ-honaꞌ da.

³ Ilooy siꞌ ma kulang pamiki yaꞌ bay moo halliꞌ insallan bong kumattaꞌ palitaan da.

⁴ Boꞌ ilooy lima ma makoy honaꞌ-honaꞌ da lay moo halliꞌ man da mohean palitaan da.

⁵ Dari sabap lay lantan katakka pangantin ma lalla, song hallom tintōꞌ na sila mimon sampay lay na ga kapatuli.

⁶ “Pag taabut tangngaꞌ bahangi, luu na ngingan, yuk na, ‘Alu na pangantin ma lalla. Pōꞌ na kam nampang.’

⁷ Pag-anu siꞌ tu, bangun du ga kabudjangan looy sikasapū boꞌ da ngintu palitaan da.

⁸ Yuk ilooy sikalima ma kulang pamiki ni siga soheꞌ da, ‘Buwanan bi doꞌ kami insallan. Adak na la kumattaꞌ palitaan kami.’

⁹ “Sugaꞌ iya tampung da, ‘Yaꞌ kami la kabuwan taggahaꞌ yaꞌ na baw mintu sukup ningkami. Pa kadday na doꞌ kam malli.’

¹⁰ “Na likutan da siꞌ bay malli insallan, ilooy ma takka na pangantin ma lalla. Kuwan ilooy sikalima ma ndang sakap na, lay na pahaboy ni pangantin ma lalla paasok pa lumaꞌ pangawinan. Lay jaꞌ siꞌ sila njawom, lay na tinambo lawang.

¹¹ “Pag takka jaꞌ siꞌ kabudjangan looy kasohean, yuk da, ‘Ū Tuwan, bukisan doꞌ kami!’

¹² “Sugaꞌ tampung pangantin ma lalla, ‘Yaꞌ dari batan yaꞌ kam takila ku.’

¹³ “Sangkon,” yuk si Isa, “subay ndang saddiya na kam, batan yaꞌ tatunaꞌ bi bong llaw oy atawa lisag dangoy katakka ku ni sinōng.”

Siga tindog ma kanaalla ka niyaꞌ

¹⁴ Pag-anu, lay na baw si Isa ngandalil pasal siga sukuꞌ na ma nulut ni kahandak na maka niyaꞌ, yuk na, “Luu disu jama song lome pa lahat disu. Yaꞌ gi ya bay lome, lay ya nawag ga tindog na, boꞌ da pina-ntanan sīn na nohoꞌ pinalān likut na.

¹⁵ Ilooy disu bay inambanan limampūꞌ libu, kuwan disu, duwampūꞌ libu maka ilooy disu, sapū libu. Bōs da siꞌ tu bay ma-ntan sīn, lay jaꞌ pinagsitawop meꞌ na ka kapandoyan da. Pag-anu, boꞌ na lome.

¹⁶ Likutan bōs da, kuwan ilooy ma bay inambanan limampūꞌ libu, magti du pinalān meꞌ na sampay lay ya nguntung limampūꞌ libu.

¹⁷ Damikiyan, ilooy ma bay inambanan duwampūꞌ libu, meꞌ looy du meꞌ na bay buwat sampay lay ya nguntung duwampūꞌ libu.

¹⁸ Sugaꞌ kuwan ilooy ma bay inambanan sapū libu, lay jaꞌ ngali lowang, boꞌ tinapuk meꞌ na sīn bōs na njawom tanaꞌ.

¹⁹ “Sōng hallom, luu na takka bōs looy. Pag-anu, lay na tawag na siga tindog na boꞌ da nohoꞌ māꞌ bong pooy meꞌ da bay buwat sīn na.

²⁰ Yuk ilooy ma bay inambanan limampūꞌ libu, ‘Tuwan, atu na sīn nu bay mbanan nu, limampūꞌ libu maka luu gi untung na limampūꞌ libu.’

²¹ “Tampung bōs na, ‘Tud bay mahap meꞌ nu buwat. Kau na tindog mahap maka kanaalla. Pagka ko bay kanaalla ni pabuwatan dangkitiꞌ, batnaa paeka ku na altaꞌ ku hinalap ningkau. Tu ko. Patabeꞌ ta na ko ni kagakan ku.’

²² “Pag-anu, pasunuꞌ na baw ilooy ma bay inambanan duwampūꞌ libu, yuk na, ‘Tuwan, atu na sīn nu bay mbanan nu, duwampūꞌ libu maka luu gi untung na duwampūꞌ libu.’

²³ “Dari meꞌ looy du siꞌ baw sambatan bōs looy, yuk na, ‘Tud bay mahap meꞌ nu buwat. Kau na tindog mahap ka kanaalla. Pagka ko bay kanaalla ni pabuwatan dangkitiꞌ, batnaa paeka ku na altaꞌ ku hinalap ningkau. Tu ko. Patabeꞌ ta na ko ni kagakan ku.’

²⁴ “Pag taabut liu ilooy ma bay inambanan sapū libu, yuk na, ‘Tuwan, katoonan ku kau jama tohas. Tigiꞌ ko ngattom tinanom jama san saꞌ kau bay tanom.

²⁵ Sangkon bay jaꞌ tapuk ku sīn nu njawom tanaꞌ sabap tawu ku tapalkalaꞌ meꞌ nu bong bay lugiꞌ. Atu na sīn bay halap nu niyaku.’

²⁶ “Tampung bōs na, ‘Kau na bitu tindog maat maka hūk ko. Baꞌ-bāꞌ nu aku tigiꞌ ngattom tinanom jama san saꞌ aku bay tanom.

²⁷ Bong meꞌ naa pamiki nu, subay siꞌ bay nnaꞌ nu sīn ku ni bangku supaya pag beleng ku luu gi ka anak na.’

²⁸ “Pag-anu, yuk bōs looy ni ga tindog na kasohean, ‘Kaddoun bi na sīn ku man lalla tuu boꞌ deanun bi pa mman ilooy ma ngantanan limampūꞌ libu.

²⁹ Batan soysoy ina kanaalla makoy ilooy ma bay hinalap niiya, mastiꞌ sinampunan gi sina. Pag toklas na, tamba-manamba na ilooy ma luu niiya. Sugaꞌ soysoy ina yaꞌ kanaalla makoy ilooy ma bay hinalap niiya, san sawpama dangkitiꞌ du bay pina-ntan niiya, mastiꞌ llakkahan du sina.

³⁰ Na kaddoan bi na tindog tuu ma yaꞌ luu kapansahaliyan na. Hiyakan bi na ya pa poan njawom kalindoman man jama mag-ulawi sampay magkattop naggaan paddi.’ ”

Hukuman ni llaw dambuli

³¹ Yuk si Isa lagi, “Pag ina mintu takka Anak Manusiyaꞌ ni kaehe sahayaꞌ na haboyan mimon malaikat, ningkōꞌ na ya ni paningkoan kawasa-kapatut magsultan.

³² Maka luu na ni awpan na bay kinumpo sikamimon manusiyaꞌ lakka man mimon kabangsa-bangsahan. Pag-anu, boꞌ na nakkat sila binuwat duwa baanan meꞌ karuha tukang ngipat hayop nakkat siga bili-bili na ka ga kambing na.

³³ Kuwan sagannap ma meꞌ sapantun bili-bili, nnaꞌ na huwin pa kawnan na. Kuwan sagannap ma meꞌ sapantun kambing, nnaꞌ na huwin pa kayli na.

³⁴ “Pag-anu, yuk Sultan ninsila ni kawnan na, ‘Kaam ina sikamimon sinupaatan meꞌ Mmaꞌ ku. Pitu kam. Timaun bi na mimon kaayaran ni pamarinta ma bay hinalliꞌ ningkaam man awwal tagnaꞌ lagi junyaꞌ bay pinapayak.

³⁵ Tawop kam sinupaatan meꞌ tuu batan pag taaka bi lingantu ku, lay ku pakan bi. Pag tabista bi bay tohoꞌ kallong ku, lay du ku painum bi. Maka jaman ku bay sampi ni lahat bi, lay du ku bay hulmat bi.

³⁶ Pag taaka bi yaꞌ luu pakayan ku, lay du ku buwanan bi. Pag taaka bi bay ku saki, lay du ku ndaꞌ-ndaꞌ bi, maka waktu ku bay njawom jīl, meꞌ naa du.’

³⁷ “Dari pag halling sagannap ma intong, yana jama huwin pa kawnan na, ‘Papuꞌ, sumilan ko lay la bay takita kami lingantu boꞌ nu bay pakan kami, atawa tohoꞌ kallong nu boꞌ nu bay painum kami?

³⁸ Maka sumilan ko bay sampi ni lahat kami boꞌ nu bay hulmat kami? Maka sumilan yaꞌ bay luu pakayan nu boꞌ nu bay buwanan kami?

³⁹ Maka sumilan ko bay saki atawa njawom jīl boꞌ nu bay ndaꞌ-ndaꞌ kami?’

⁴⁰ “Pag tampung Sultan ilay mintu, ‘Baan ta kam banahan, waktu bi ilay bay buwat meꞌ looy ni soysoy danganakan ku san du pooy diyoꞌ na ni bandingan manusiyaꞌ, saliꞌ du ka aku bay pabuwat bi meꞌ looy.’

⁴¹ “Pag-lupus, halling na baw Sultan ni sagannap ma huwin pa kayli na, ‘Kaam ina, basta pinagmulkaan sina kam. Lakka na kam man bihing ku. Pilay na kam pa jawom api ma yaꞌ kuhi pawom saumu-umu, ma hinallian Ibilis ka ga sosohoan na.

⁴² Batan pag ku bay takita bi lingantu, yaꞌ ku bay pakan bi. Maka pag ku bay tabista bi tohoꞌ kallong ku, yaꞌ ku bay painum bi.

⁴³ Jaman ku sampi ni lahat bi, yaꞌ ku bay hulmat bi. Ni waktu yaꞌ luu pakayan ku, yaꞌ ku bay buwanan bi. Waktu ku bay saki atawa njawom jīl, yaꞌ ku bay ndaꞌ-ndaꞌ bi.’

⁴⁴ “Pag-anu, sila pun ina mintu nilaw du, yuk da, ‘Uy la Papuꞌ, sumilan ko bay takita kami lingantu atawa tohoꞌ kallong nu? Maka sumilan ko bay sampi ni lahat kami, atawa yaꞌ luu pakayan nu, atawa saki, atawa njawom jīl, boꞌ nu yaꞌ bay tabangan kami?’

⁴⁵ “Pag tampung ku ina mintu, ‘Baan ta kam banahan, waktu bi ilay yaꞌ bay nulung ni soysoy danganakan ku san du pooy diyoꞌ na ni bandingan manusiyaꞌ, sibuꞌ du ka aku yaꞌ bay tulung bi.’ ”

⁴⁶ Pag-anu, yuk si Isa, “Na siga jama meꞌ looy ilay ma bay sabbut ku siꞌ dambuli, llakkahan na silay mintu sampay minulkaan saumu-umu. Boꞌ siga jama looy ma intong, binuwanan na kasampulnaan nyawa njawom okoman Tuhan saumu-umu.”