Matiyu 24 - Sabahagiꞌ Kitab Tawrat: Panagnaan ni Awwal Jaman maka Kitab Injil

Langga mehe ni Jerusalem tinunaꞌ lluntu

¹ Pag pōꞌ si Isa man langga mehe, pasōng na baw siga mulit na pa mman na, yuk da, “Tuwan, ndaun doꞌ ba lingkat langga naa.”

² Yuk si Isa siꞌ tu, “Ohoꞌ, pakaruwan na kam ngandaꞌ batan baan ta kam banahan, luu sina waktu ni sinōng lluntu na labbasakayi. Yaꞌ na sina mintu luu takapin nangge san lasa duwa batu magpangkat.”

Si Isa nunaꞌ kahalan ni sinōng

³ Pag-anu siꞌ, lay na baw patukad ga si Isa pa taꞌ Punu Jaytun. Sasang na ndooy ningkōꞌ, luu na baw pasōng siga mulit na pa mman na sila-sila jaꞌ, maka yuk da, “Bong siꞌ dari, baan doꞌ kami bong sumilan binakbul ilooy ma bay bitsala nu siꞌ. Maka oy lay la mintu siga sipat man jama mindoga tapit na ko pabeleng maka tapit na katapusan junyaꞌ?”

⁴ Tampung si Isa, “Iyakin kam mari kam yaꞌ takoleꞌ binoo magsiꞌ.

⁵ Batan bbos-bbos, meka sina mintu pasunuꞌ māꞌ bahasa sila na Almasi ma bay sinohoꞌ meꞌ Tuhan nalamat manusiyaꞌ. Boꞌ meka jama taboo da magsiꞌ.

⁶ Pag taabut bi ina mintu kaakahan meka na bonoꞌ mehe ni kalahat-lahatan, matā-matapit, daa doꞌ gundalaꞌ pamiki bi batan ndang bay silay ginantaꞌ subay doꞌ magkadarihan meꞌ looy. Sugaꞌ saꞌ gi baw lay katapusan junyaꞌ.

⁷ Bbos-bbos ina, meka na kabangsa-bangsahan ka ga sultan sibonoꞌ-bonoꞌ. Maka meka na sina mintu kalahat-lahatan tuwaꞌ gotom maka linug.

⁸ Sugaꞌ mimon balaꞌ meꞌ looy ilay mintu bohoꞌ panagnaan kamalasahiyan ma magkadarihan ni manusiyaꞌ bbos-bbos. Bong siꞌ dalil ta pa danda maddi, bohoꞌ nagnaꞌ paddi battong na.

⁹ “Masa looy ilay mintu, kuwan kaam, kinagigitan meꞌ sikamimon bangsa sabapan ku. Sinungkuban du sina kam boꞌ bi pina-ntan ni jama supaya kam bininsanaꞌ sampay pinapatoy.

¹⁰ Pag ina mintu taabut meꞌ looy, meka na sina jama patatak mmeꞌ niyaku. Atas da na sina mintu nipu pagkahi da ma masi pitsayaꞌ niyaku sampay lammis ninsila.

¹¹ Meka sina mintu nabi palsu pōꞌ, boꞌ meka du takoleꞌ da binoo magsiꞌ.

¹² Dari sabap pasōng eka jama ngalangga saraꞌ ni junyaꞌ bbos-bbos, maglumba na aseꞌ kaekahan.

¹³ Sugaꞌ soysoy ina natas pangando na niyaku ngabut sampay pa katapusan, malaingkan salamat jaꞌ sina ya.

¹⁴ Na inawnan umanat mahap pasal pamarinta Tuhan, pinasaplag na pin sina mintu ni sikaliput junyaꞌ supaya luu na dapat mimon kabangsa-bangsahan ngahasi. Pag-anu, boꞌ takka na katapusan junyaꞌ.”

Ilooy ma tud sinukang meꞌ Tuhan

¹⁵ Maka yuk si Isa, “Ni sinōng, luu sina takita bi ilooy ma kabinasa ma tud sinukang meꞌ Tuhan pinatangge ni langga sutsiꞌ. Ilooy ilay siꞌ ndang bay tinunaꞌ meꞌ Nabi Danyel njawom kitab mattoꞌ. (Soysoy matsa tunaꞌ looy, pahamun bi paayad.)

¹⁶ Pag mintu kam ngita meꞌ looy, kuwan sagannap ma maglahat ni Yahudiya, subay magti lahi deꞌ-dēꞌ pa kapunu-punuhan.

¹⁷ Ma luu na taꞌ pantān lumaꞌ da, daa na san sila paasok pa jawom ngaddoꞌ oy maka oy na. Subay sila lahi magti.

¹⁸ Damikiyan, sagannap ma njawom huma, san daa na sila pabeleng pa lumaꞌ ngaddoꞌ pamakoy da.

¹⁹ Pag ina mintu magkadarihan na meꞌ looy, tud kaluuy-luuy jama, awla na sagannap karandahan ma battong atawa ma anakan dikiꞌ masi gi duruꞌ.

²⁰ Sugaꞌ pakuhan bi na pin duwaa pa Tuhan, kamura-murahan pag taabut bi maglahiyan, yaꞌ du sumapaꞌ ni timpu tanne atawa ni Llaw Pahali.

²¹ Ni masa looy ilay mintu, kamalasahiyan njataꞌ manusiyaꞌ mas maat gi man mimon ma bay takissa da labba man junyaꞌ bay pinapayak sampay batnaa. Kahapan yaꞌ na du baw lay mintu kabalikan saumu.

²² Bong siꞌ ilay mintu yaꞌ bay kulangan Tuhan halloman kamalasahiyan meꞌ looy, mastiꞌ katis jaꞌ manusiyaꞌ man taꞌ babaw junyaꞌ. Lipara, kalnaꞌ sagannap ma bay peneꞌ Tuhan sukuꞌ na, kulangan na du sina mintu halloman kamalasahiyan meꞌ looy.”

²³ Maka yuk si Isa, “Ni waktu looy ilay mintu, bong luu maan kaam, ‘Ndaun ba, atu na Almasi,’ atawa ‘Alay na ndooy,’ amay-amay daa kam pitsayaꞌ

²⁴ batan luu sina mintu pōꞌ siga pangandustaꞌ māꞌ bahasa sila na Almasi atawa nabi. Boꞌ pandoy gi sina mintu mōꞌ siga pabuwatan kahaylan-haylan bong pin meka jaꞌ jama takoleꞌ da binoo magsiꞌ. Bong siꞌ ilay mintu takaya da, kainagon da sampay sagannap ma bay peneꞌ Tuhan sukuꞌ na taboo da du magsiꞌ.

²⁵ Indanan bi bay bitsala ku siꞌ. Ndang kawalan ta na kam padpad yaꞌ gi taabut masa meꞌ looy.

²⁶ “Sangkon, meꞌ bay halling ku na siꞌ, bong luu jama māꞌ luu na Almasi ndooy ni lahat lau-lau yaꞌ maglumaꞌ, daa kam pilay. Atawa bong yuk jama luu na ya njawom lumaꞌ, daa kam hidjab.

²⁷ Batan pag ina mintu pabeleng na ku, yana Anak Manusiyaꞌ, tumatandaꞌ na ni sikamimon katakka ku, meꞌ karuha mangirat ninag taꞌ langit man mataallaw pa saddopan.”

²⁸ Pag-anu siꞌ, lay na baw si Isa makoy sambatan, yuk na, “Ndang bong ina luu sumpatoy, mastiꞌ luu du sina pumpung siga manuk-manuk ma mangan sumpatoy.”

Katakka Anak Manusiyaꞌ pa junyaꞌ pabalik

²⁹ Pag-anu, yuk si Isa lagi, “Paddus jaꞌ ilay mintu kamalasahiyan ma bay sabbut ku siꞌ, pinapandom na baw mataallaw maka buwan pun yaꞌ na du dantaꞌ. Sikamimon taꞌ langit njogjog na sampay maglatakan na ga siga potean.

³⁰ Pag-anu, luu na pōꞌ man taꞌ langit sipat ni katakka Anak Manusiyaꞌ. Maka takita na sina ya duwai taꞌ tayiꞌ baliyu nahayaꞌ na ni kaehe kawasa na. Dari sikamimon manusiyaꞌ ma yaꞌ mmeꞌ niiya magkarukkaan na sina.

³¹ Ni waktu ilooy du ilay mintu, luu pōꞌ halling tabuliꞌ tiniyup pahaddo. Ilooy ilay mintu sinyal para siga malaikat Anak Manusiyaꞌ pōꞌ na ngumpo mimon manusiyaꞌ ma sukuꞌ na. Pag-anu, boꞌ da ngalataan sika-mpat pidju alam ngumpo sila.”

Pamintangan ni poon igira

³² Yuk si Isa lagi, “Na ni kapasal katakka ku ina mintu, ngaddoꞌ jaꞌ kam pamintangan man poon igira. Pag takita bi pasapput na dawun na, inaa na sipat man bi toon tapit na timpu pangallaw.

³³ Damikiyan, pag takita bi mintu luu na magkadarihan siga balaꞌ ma bay sabbut ku siꞌ, malaingkan katoonan bi na du sina tapit na banahan katakka ku.

³⁴ “Baan ta kam banahan, yaꞌ gi sina mintu katis matoy jama angkat-angkatan batnaa, ndang nagnaꞌ na binakbul ilooy ma bay sabbut ku siꞌ.

³⁵ Indanan bi. Lanyap jaꞌ sina mintu gumi ka langit, sugaꞌ bong bitsala ku, yaꞌ baw situ kuhi baluba saumu-umu.

Yaꞌ kinatoonan bong sumilan takka Papuꞌ Isa

³⁶ “Katakka ku ina mintu, yaꞌ kinatoonan meꞌ manusiyaꞌ bong llaw oy atawa lisag dangoy. San ga malaikat ndooy ni sulgaꞌ sampay aku, Anak Tuhan, yaꞌ du toon. Ilooy du toon yana Mmaꞌ ku.

³⁷ Kahalan manusiyaꞌ ina mintu pag taabut Anak Manusiyaꞌ pabeleng pa junyaꞌ sibuꞌ du ka kahalan jama maruhuꞌ-ruhuꞌ ni bay jaman Nabi Nū.

³⁸ Batan ni jaman looy, halloman junyaꞌ yaꞌ gi ndunukan, yaꞌ san bay taingat manusiyaꞌ njawom bahaya mehe sila. Bbuwatan da llaw pa dangallaw masi na pin maglami-lami nginum-mangan, maghanda-halla, meꞌ naa, meꞌ naa ngabut sampay llaw ga Nabi Nū bay dutai taꞌ bahitlaꞌ.

³⁹ Yaꞌ san bay tasayu manusiyaꞌ bong oy song katuwaꞌ ninsila ngkod-ngkoran yaꞌ gi bay takka dunuk mehe looy sampay lai na ga sila limbo sikamimon. Damikiyan, pag ina mintu pabeleng na Anak Manusiyaꞌ, meꞌ looy du silay mintu kadari manusiyaꞌ, yaꞌ du taingat da.

⁴⁰ Ni katakka ku ina mintu, sasang jama duwa buwat ni huma, sakayi da matiꞌ, disu lay na binoo, kuwan disu inambanan.

⁴¹ Atawa sasang danda magginduwa nappa, disu lay na binoo, kuwan disu lay inambanan.

⁴² Sangkon, iyakin kam mari kam sakap batan yaꞌ tatunaꞌ bi llaw mamooy man Papuꞌ bi takka.

⁴³ “Indanan bi ituu: Bong ina katoonan jama ma dapu lumaꞌ bong lisag dangoy jama panangkaw takka, yaꞌ sina ya tuli, gam pin jaga ya paayad mari yaꞌ katangkawan lumaꞌ na.

⁴⁴ Damikiyan kaam pun, subay du kam saddiya batan yaꞌ katoonan bi bong sumilan ku, yana Anak Manusiyaꞌ, pabeleng.

Ata ma kanaalla

⁴⁵ “Indanan bi. Bong ina luu ata magkanaalla sampay makoy honaꞌ-honaꞌ na, malaingkan iya na sina pineneꞌ meꞌ papuꞌ na magtakōk ni siga pagkahi na ata. Iya na mangatas makan sila tiyap-tiyap waktu.

⁴⁶ Ata meꞌ looy ilay, pag takka papuꞌ na, kaayaran mehe niiya bong ya bay taabut buwat ilooy ma bay hinalap niiya.

⁴⁷ Baan ta kam banahan, ata ma tapangandohan meꞌ looy ilay, iya na silay sinohoꞌ magmalim ni altaꞌ papuꞌ na labbasakayi.

^48-49 Sugaꞌ bong ilay ya ata maat, bbuwatan na minsanaꞌ pagkahi na ata maka nginum-mangan jaꞌ ya ka jama palalango. Njawom honaꞌ-honaꞌ na, hallom gi du takka papuꞌ na.

⁵⁰ Sugaꞌ sasang na buwat meꞌ looy, sarunduun du takka na papuꞌ na ni llaw yaꞌ bay taingat na.

⁵¹ Dari pinidjalaꞌ ya pabasag saꞌ alang-alang sampay inannaꞌ gi ni lugar sagannap ma magbawuꞌ-bawuꞌ jaꞌ sutsiꞌ. Boꞌ ndooy na sila mag-ulawi sampay magkattop naggaan paddi.”