Matiyu 23 - Sabahagiꞌ Kitab Tawrat: Panagnaan ni Awwal Jaman maka Kitab Injil

Bandingan si Isa pasal siga Parisi ka ga guru saraꞌ agama

¹ Pus meꞌ looy siꞌ, binaan na baw meꞌ si Isa ga mulit na sampay ga baanan jama ndooy,

² yuk na, “Siga guru saraꞌ agama ina ka ga Parisi bay inuwakilan noan jama saraꞌ Nabi Musa.

³ Sangkon subay bean bi tōꞌ da. Sugaꞌ daa jaꞌ kam ngakig tangge-tingkōꞌ da sabap yaꞌ sila mmeꞌ ni tōꞌ da.

⁴ Bbuwatan da ina ngalogos jama mogbogan jinisan aturan awod. Bong dalil ta pa boonan bohat, jama jaꞌ sohoꞌ da manangkit. Kuwan sila, yaꞌ san nabang moo san lasa dangkitiꞌ.

⁵ “Sikamimon tangge-tingkōꞌ da man magpakita-kita sadjaꞌ mari sila sinanglitan. Ndaun bi doꞌ ba pangannaan suwat man jawom kitab bay kinabit ni tundun da ka langngon da. Maka ndaun bi doꞌ ba tahaꞌ jambu ni battis juba da man da magpakita-kita.

⁶ Bong ni paballangan atawa ni langga, kainagon da pinatingkōꞌ ni paningkoan balbangsa.

⁷ Kainagon da subay sila inalak ni mayran sampay ginalla ‘Tuwan Guru.’

^8-10 “Sugaꞌ kaam, daa kam magsitingka pagkahi bi ma pitsayaꞌ niyaku. Daa subay na pin kam nganggalla pagkahi bi ‘Tuwan Guru,’ atawa ‘Maꞌ,’ atawa ‘Papuꞌ,’ batan saliꞌ-saliꞌ du kam magdanganakan, boꞌ disu du guru bi ka Papuꞌ bi, yana aku, Almasi. Damikiyan, disu du Mmaꞌ bi sikamimon, yana Tuhan ni sulgaꞌ.

¹¹ “Na soysoy kam doman patingkat, subay ya buwat dī na tindog sikamimon.

¹² Batan soysoy ina magpadiyoꞌ, pinalangkaw du sina. Sugaꞌ soysoy ina malangkaw dī na, pinadiyoꞌ du sina.”

Si Isa mahallingan siga Parisi ka ga guru saraꞌ agama

¹³ Maka yuk si Isa, “Siya-siya kam la, siga guru saraꞌ agama ka ga Parisi! Magbawuꞌ-bawuꞌ jaꞌ kam sutsiꞌ. Bong luu na jama doman paasok pa jawom pamarinta Tuhan, bbuwatan bi pagapa ninsila ka tōꞌ bi bingkok. Yaꞌ gi kam kuhi nūs lān pa jawom pamarinta Tuhan, gam pin sinaggaꞌ gi meꞌ bi jama ma doman.

¹⁴ “Siya-siya kam la, siga guru saraꞌ agama ka ga Parisi! Ngandupang jaꞌ kam ga bawu danda supaya takoleꞌ bi altaꞌ da sampay lumaꞌ da. Magbawuꞌ-bawuꞌ jaꞌ kam sutsiꞌ. Bbuwatan bi nganduwaa pa tahaꞌ ni mayran mari kam binista meꞌ jama tud basag ngisbat Tuhan. Baan ta kam banahan, tud bohat sina mintu hukuman Tuhan ningkaam!

¹⁵ “Siya-siya kam, siga guru saraꞌ agama ka ga Parisi! Magbawuꞌ-bawuꞌ jaꞌ kam sutsiꞌ. Padile padilawut na kam maglanan bong pin kam nammu jaꞌ san lasa disu jama binuwat mulit bi. Pag lay jaꞌ kam nammu, sabapan tōꞌ bi, magdaruhun gi kalaatan na. Pag toklas na, mangkin na ya pataꞌ pinidjalaꞌ ni nalkaꞌ labi gi man kaam.

¹⁶ “Siya-siya kam, siga pa-mmean agama! Ni kaawam bi, subay ga kam jama buta nondaꞌ jama buta. Baꞌ-bāꞌ bi bong jama napa makoy awon langga mehe binuwat saksiꞌ na, yaꞌ dari oy na san ya yaꞌ mogbogan bay sapa na. Sugaꞌ bong ya napa makoy awon mmas ni jawom langga looy binuwat saksiꞌ na, baꞌ-bāꞌ bi talpaksaꞌ subay ya mogbogan bay sapa na.

¹⁷ Kulang pamiki bitu kam, subay ga kam jama buta. Mamooy lay sila hagaan, mmas ni langga mehe atawa langga mehe ma kaboo mmas looy pinamulliya?

¹⁸ Baꞌ-bāꞌ bi, bong jama napa makoy awon pangulbanan binuwat saksiꞌ na, yaꞌ dari oy na san ya yaꞌ kanaalla ni bay sapa na. Sugaꞌ bong ya napa makoy awon kulban taꞌ pangulbanan binuwat saksiꞌ na, baꞌ-bāꞌ bi, talpaksaꞌ subay ya mogbogan bay sapa na.

¹⁹ Buta kam! Yaꞌ san tasayu bi mas puntukan gi pangulbanan man kulban. Subay siꞌ katoonan bi danan kulban sutsiꞌ pa Tuhan sabap lay na inannaꞌ taꞌ pangulbanan.

²⁰ Sangkon bong luu jama napa makoy awon pangulbanan binuwat saksiꞌ na, tabeꞌ na du silay siga kulban taꞌ pangulbanan looy.

²¹ Damikiyan, bong jama napa makoy awon langga mehe binuwat saksiꞌ na, tabeꞌ na du Tuhan sabap inaa lumaꞌ na.

²² Damikiyan, bong jama napa makoy awon sulgaꞌ binuwat saksiꞌ na, tabeꞌ na du Tuhan batan sulgaꞌ ina yana paningkoan na.

²³ “Siya-siya kam la, siga guru saraꞌ agama ka ga Parisi! Magbawuꞌ-bawuꞌ jaꞌ kam sutsiꞌ. Pandoy baw kam nong sabahagiꞌ sapū ni sikamimon altaꞌ bi pa Tuhan sampay na ni mimon lampa-lampahan bi. Sugaꞌ yaꞌ san baw paruli bi ilooy ma hagaan banahan ni saraꞌ, yana buwat kaintongan, manimbang ni manusiyaꞌ, maka magkanaalla mmeꞌ ni lapa bi. Subay siꞌ inaa doꞌ duhuꞌ pakutuun bi, boꞌ bi mogbogan siga saraꞌ dikiꞌ meꞌ sapantun muwan sabahagiꞌ sapū.

²⁴ Kaam ina subay ga pa-mmean buta nondaꞌ jama buta. Magtuyuꞌ baw kam mean siga aturan ma yaꞌ puntukan. Sugaꞌ bong panohoan ma hagaan, yaꞌ san paruli bi. Kaam ina, tigiꞌ baw kam ngalakkahan taliyaw man jawom inuman bi, sugaꞌ nallon baw kam untaꞌ katibuukan na.

²⁵ “Siya-siya kam, siga guru saraꞌ agama ka ga Parisi! Magbawuꞌ-bawuꞌ jaꞌ kam sutsiꞌ. Inaa du jagahan bi kasutsian ni poan. Bong siꞌ ibaratan sawan atawa pinggan, ni poan du kosoan bi. Sugaꞌ njawom, pabiya bi jaꞌ pannoꞌ meꞌ jinisan kalalamaan. Meꞌ naa du sina karuha njawom atay bi, masi du pannoꞌ meꞌ napsu mulakab batan isu-isu parasahan bi du pinaruli meꞌ bi.

²⁶ Kaam siga Parisi subay ga kam jama buta. Sutsiun bi doꞌ ba duhuꞌ njawom atay bi supaya sutsiꞌ na du kam ni poan.

²⁷ “Siya-siya kam, siga guru saraꞌ agama ka ga Parisi! Magbawuꞌ-bawuꞌ jaꞌ kam sutsiꞌ. Kaam ina meꞌ sapantun kubu bay inari-arihan, lingkatan inandaꞌ, sugaꞌ ni jawom na pannoꞌ meꞌ towang jama matoy maka kajinisan kalalamaan.

²⁸ Bong ndaꞌ mata, kaam jama intong, sugaꞌ njawom atay bi pannoꞌ leꞌ dustaꞌ ka dusa.

²⁹ “Siya-siya kam, siga guru saraꞌ agama ka ga Parisi! Magbawuꞌ-bawuꞌ jaꞌ kam sutsiꞌ. Tigiꞌ baw kam buwat lumaꞌ-lumaꞌ taꞌ kubu kanabi-nabihan mattoꞌ sampay ngari-ngarihan kubu jama tanyag intong.

³⁰ Baꞌ-bāꞌ bi, bong siꞌ kam bay siabut ka bay timpu kabboꞌ-bboan bi, yaꞌ kam bay mmeꞌ-mmeꞌ meꞌ bay uwahan da mapatoy kanabi-nabihan.

³¹ Sugaꞌ bong pinindogahan ni bay bitsala bi nsiniꞌ ni hāl meꞌ bi nulang aku, tumatandaꞌ na sibuꞌ du akka bi ka bay jaman kabboꞌ-bboan bi bay mapatoy kanabi-nabihan.

³² Pagka inaa du taabut-abut pamiki bi, pilayun bi na, pupusun bi na kalaatan bay tinagnaan meꞌ kabboꞌ-bboan bi!

³³ “Kaam ina, sibuꞌ du kam ka bay jaman kabboꞌ-bboan bi, subay ga baanan sō latsunan. Daa na kam ngaholat ga tailagan bi lagi hukuman nalkaꞌ.

³⁴ Batan luu-luu ina mintu sohoꞌ ku pitu pa mman bi siga nabi ka ga jama halul-akka ka ga guru, kasohean llansang jaꞌ du meꞌ bi taꞌ tehang. Kuwan kasohean, pinawu-pawu meꞌ bi ni siga langga bi sampay inonse meꞌ bi padisu-padisu lahat.

³⁵ Sangkon, kalabuan jaꞌ sina kam mulkaꞌ Tuhan. Batan meꞌ Tuhan mista, kaam na ina bay mapatoy mimon jama intong ma bay mean kahandak na, labba man anak Boꞌ Adam, yana si Habil, ngabut sampay anak si Baraki, yana Nabi Zekaraya ma bay papatoy bi ni sallangan langga ka pangulbanan.

³⁶ Baan ta kam banahan, mulkaꞌ ma bay sabbut ku ilay siꞌ, mastiꞌ labuꞌ du sina mintu pa jataꞌ bi siga Yahudi ni angkat-angkatan batnaa.”

Si Isa susahan jama Jerusalem

³⁷ Pag-anu, sabap susa atay si Isa ni siga Yahudi ndooy, yuk na, “Ag-agan kam la jama Jerusalem. Bbuwatan bi mapatoy kanabi-nabihan. Maka bila pin luu na pōꞌ siga sosohoan Tuhan, hiyak bi ka batu ngabut sampay matoy. Daran na ku bay doman ngaliyun kaam pa jawom okoman ku meꞌ sapantun induꞌ manuk ngokoman anak na, sugaꞌ yaꞌ du kam kuhi.

³⁸ Sangkon tinikutan na paglahat bi meꞌ Tuhan.

³⁹ Maka yaꞌ na sina ku takita bi pabalik ngkod-ngkoran bi yaꞌ gi kapahalling, ‘Bana-bana du sinupaatan ilooy ma bay pitu ni kapatut Tuhan!’ ”