Matiyu 22 - Sabahagiꞌ Kitab Tawrat: Panagnaan ni Awwal Jaman maka Kitab Injil

Meka jama kinaddoꞌ tumabeꞌ ni pamarinta Tuhan, sugaꞌ dangkitiꞌ du paasok

¹ Pag-anu siꞌ, lay na baw si Isa ngandalil, yuk na,

² “Pamarinta Tuhan ina meꞌ tuu karuha na: Luu disu sultan bay nohoꞌ nakap pangawinan para ni anak na pangantin ma lalla.

³ Sakap jaꞌ siꞌ mimon, ilooy ma lay na sohoꞌ sultan looy siga tindog na ngaddoꞌ sagannap ma bay pahati na. Sugaꞌ yaꞌ sila kuhi mmeꞌ.

⁴ Pag yaꞌ jaꞌ sila kuhi, sarī na baw ga tindog na bay sohoꞌ na ngaddoꞌ sila. Tugun na, ‘Baan bi siga jama looy, lai na sinumbaliꞌ siga sapiꞌ ku ma lammok, sakap na mimon. Amay-amay subay sila pitu.’

⁵ Sugaꞌ yaꞌ du sila bay paruli. Gam pin disu lay buwat pa huma na, kuwan disu lay dagang ni kadday na.

⁶ Kuwan kasohean, lay gi sungkuban da siga tindog sultan looy boꞌ pinawu-pawu lagi sampay pinapatoy.

⁷ Dari tud bay lasu sultan looy. Maka lay na ga sohoꞌ na sundalu na mapatoy siga jama looy ma bay monoꞌ siga tindog na, boꞌ lay sohoꞌ na tinunu daira da.

⁸ “Pag-anu, lay na baw sultan looy nawag siga tindog na, yuk na, ‘Pangawinan ku itu sakap na, sugaꞌ ga jama looy ma bay kinaddoꞌ yaꞌ na tawop mmeꞌ ni pangawinan tuu.

⁹ Sangkon, lataan bi na lahat boꞌ bi ngaddoꞌ soysoy takita bi.’

¹⁰ Dari lai na siꞌ tu ga tindog na ngalataan lahat boꞌ da ngaddoꞌ mimon ma takita da mahap-maat. Sampay pannoꞌ na pangawinan looy meꞌ jama.

¹¹ “Pag paasok sultan ngandaꞌ siga jama bay ngaluruk, ngita ya disu jama bay matuk badjuꞌ yaꞌ tawop man mmeꞌ ngawin.

¹² Dari yuk sultan niiya, ‘Uy Nges, ongoy taggahaꞌ ko bay paasok pitu yaꞌ san bay matuk badjuꞌ man mmeꞌ ngawin?’ Sugaꞌ yaꞌ san ya nammu halling.

¹³ Pag meꞌ looy jaꞌ, yuk sultan ni siga tindog na, ‘Ingkotan bi battis-tangan lalla tuu boꞌ hiyakan bi pa poan ni jawom kalindoman. Boꞌ ndooy na ya mag-ulawi sampay magkattop naggaan paddi.’ ”

¹⁴ Pus meꞌ looy, yuk si Isa, “Meka sina jama kinaddoꞌ tumabeꞌ ni jawom pamarinta Tuhan, sugaꞌ dangkitiꞌ du pineneꞌ.”

Pataꞌ kina binayaran sukay parinta bangsa Rom atawa niyaꞌ?

¹⁵ Pag lupus meꞌ looy, lay lakka siga Parisi boꞌ da isun bong pooy meꞌ da niit si Isa ni bitsala na.

¹⁶ Dari siꞌ, lay sohoꞌ da kasohean mulit da ka kasohean raayat Gubnul Herod pilay nohoꞌ nual si Isa. Pag takka da, yuk da, “Tuwan Guru, katoonan kami bonto ko maka wā ko noan jama kabanahan pasal kahandak Tuhan. Yaꞌ ko minig jama maka yaꞌ ko loman ni jama san gi pooy langkaw ntan da.

¹⁷ Sangkon, Tuwan Guru, luu situ siꞌ la tilaw kami ningkau. Bong ningkau, sikatuwaꞌ kilay ni saraꞌ bangsa tabi mayaran sukay pa mman panghuluꞌ sultan bangsa Rom, atawa niyaꞌ?”

¹⁸ Na si Isa baw siꞌ tu tasayu na du maksud da niit bitsala na. Dari yuk na, “Kaam tu, magbawuꞌ-bawuꞌ jaꞌ bina kam hilas nilaw. Ongoy kam nallok-nallok aku?

¹⁹ Boonan bi teꞌ ku pitu disu pasita pilak porol ma pinakoy man mayaran sukay parinta Rom.” Luu jaꞌ siꞌ,

²⁰ yuk na, “Limbagan soy tu ni pasita tuu ddas ka awon na?”

²¹ Tampung da, “Sultan Sisal, panghuluꞌ sultan bangsa Rom.” Dari yuk si Isa, “Pagka meꞌ naa, oy-oy sukuꞌ Sultan Sisal, deanun bi iya. Damikiyan, oy-oy sukuꞌ Tuhan, deanun bi du Tuhan.”

²² Pag takale da bitsala na, tud bay haylan sila ni tampung na sampay lay na jaꞌ sila lakka mandooy.

Sinual si Isa pasal jama pinakallum

²³ Ni llaw looy du siꞌ, luu na baw pasōng pa mman si Isa baanan siga Saddusi. Maksud da pilay nual si Isa. Njawom tōꞌ da, bong jama matoy, yaꞌ na luu masa da pinakallum.

²⁴ Dari yuk da, “Tuwan Guru, njawom saraꞌ Nabi Musa bong luu lalla ndahan boꞌ lay na matoy yaꞌ gi bay anakan, talpaksaꞌ konoꞌ pinūt bawu na meꞌ danganakan na supaya tabangunan na awon danganakan na bong sila bay hanak.

²⁵ Na ntuu konoꞌ bay luu pituꞌ lalla magdanganakan. Pag-anu siꞌ, kuwan ma siyaka, lay na ndahan sugaꞌ yaꞌ gi san sila anakan, lay na ya matoy. Dari lay na baw pinūt bay nda na meꞌ danganakan na ma pasunuꞌ niiya.

²⁶ Sugaꞌ yaꞌ gi san sila bay anakan, lai na du matoy lla na. Damikiyan, pag ni katallu na ngabut sampay ilooy ni kapituꞌ na sibuꞌ du karuha da. Yaꞌ gi du san bay hanak sampay lay na jaꞌ matoy sikamimon.

²⁷ Song hallom, sampay danda looy, lay na du bay matoy.

²⁸ Na bong mattan luu gi llaw jama matoy pinakallum pabalik, pagka sila sikapituꞌ bay pingkaꞌ sitampu ka danda looy, mamooy na lay la mintu lla na?”

²⁹ Dari yuk si Isa ninsila, “Tud magsāꞌ kam sabap yaꞌ san tahati bi suwat njawom kitab maka yaꞌ du katoonan bi ehe kawasa Tuhan.

³⁰ Batan pag taabut ina mintu jama matoy pinakallum, yaꞌ na sila halla atawa handa. Sibuꞌ na du karuha da ka siga malaikat ni sulgaꞌ.

³¹ Na ni kapasal jama pinakallum, mastiꞌ lay na du bay tabatsa bi njawom kitab ilooy ma yuk Tuhan,

³² ‘Aku na situ Tuhan ma sinumba meꞌ Nabi Ibrahim, Nabi Isahak ka Nabi Yaꞌkub.’ “Na san ilay hallom na ga Nabi Ibrahim bay matoy, llum na sila pabalik. Batan yaꞌ sina luu jama matoy kasumba Tuhan. Ilooy du kasumba, sagannap ma llum.”

³³ Pag takale meꞌ baanan manusiyaꞌ ndooy bay tampung si Isa ni siga Saddusi, tud bay jayip sila.

Panohoan numbul satu

³⁴ Pag takale meꞌ siga Parisi yaꞌ na bay nammu halling baanan Saddusi, sila na baw bay isun-isun pasīng nual si Isa.

³⁵ Dari siꞌ, ilooy ma bay nual iya yana disu guru lahal ni saraꞌ agama da. Maksud na niit bitsala si Isa.

³⁶ Dari yuk na, “Tuwan Guru, ni saraꞌ agama tabi, bong ningkau, mamooy lay la panohoan patingkat man sikamimon?”

³⁷ Tampung si Isa, “ ‘Subay kaasean bi Papuꞌ bi Tuhan ni pupus hilas atay bi sampay pa bigi-bigi jantung bi. Maka mimon pamiki bi subay magbēꞌ ka aseꞌ bi niiya.’

³⁸ Inaa sina panohoan patingkat man sikamimon. Inaa numbul satu ni saraꞌ.

³⁹ Ni kaduwa panohoan ma puntukan banahan dak sibuꞌ du, ilooy ma yuk na, ‘Subay kaasean bi pagkahi bi manusiyaꞌ sibuꞌ ka aseꞌ bi ni dī bi.’

⁴⁰ Na mimon ilay saraꞌ Nabi Musa ka ga tōꞌ kanabi-nabihan bay ndean meꞌ Tuhan man mabadja manusiyaꞌ mmeꞌ ni panohoan looy siꞌ sikaduwa.”

Papuꞌ Sultan Daud yana panubuꞌ na

⁴¹ Sasang ga Parisi ndooy kumpo-kumpo, tinilaw na baw sila meꞌ si Isa, yuk na,

⁴² “Oy ina la bistahan bi pasal Almasi? Njawom kitab, panubuꞌ soy ya?” Tampung da, “Panubuꞌ Sultan Daud.”

⁴³ Yuk si Isa, “Bana ningkaam. Sugaꞌ ongoy baw lay awnan Sultan Daud panubuꞌ na yana Papuꞌ na? Batan saꞌ ba, sasang Sultan Daud ssob meꞌ Rū Sutsiꞌ, yuk na njawom kitab,

⁴⁴ ‘Yuk Tuhan ni Papuꞌ ku: Ningkōꞌ ko ni bihing ku huwin pa kawnan, boꞌ nnaꞌ ku mimon banta nu ni diyoꞌ pāt battis nu.’

⁴⁵ “Na bong lay awnan Sultan Daud Almasi yana Papuꞌ na, baan bi teꞌ ku bong pooy meꞌ Almasi dari Papuꞌ Sultan Daud magsabtan ka iya panubuꞌ na?”

⁴⁶ Pag meꞌ looy jaꞌ bay halling si Isa, minsan disu yaꞌ luu bay nammu halling. Maka labba man llaw looy, yaꞌ na luu bay nawakka nual si Isa pabalik.