Matiyu 21 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa pinudji pag takka na pa Jerusalem

¹ Na tapit jaꞌ siꞌ ga si Isa pa Jerusalem, takita da na kawum Betpaji ni bihing Punu Jaytun. Pag-anu siꞌ, lay doꞌ si Isa maduhuꞌ mulit na duwa,

² yuk na, “Pilay kam pa kawum looy ni duhuan. Ndooy ngita sina kam kuraꞌ iningkotan. Maka anak na luu du ndooy ni bihing na. Lakkahan bi ingkot na boꞌ boonun bi sikaduwa pitu.

³ Bong luu nilaw kaam bong ongoy kam buwat meꞌ naa, baan bi ya, gunahan ni Papuꞌ. Magti du sina nohoꞌ binoo ningkaam.”

^4-7 Dari lay jaꞌ siꞌ lumān ga mulit si Isa ilooy ma duwa, takita da na kuraꞌ looy ka anak na. Luu jaꞌ siꞌ bay taboo da pa mman si Isa, lay na inampihan meꞌ da anak kuraꞌ looy ka sammek boꞌ lay na bakuraꞌ si Isa. Dari lay na binakbul palman ma ndang bay sinuwatan meꞌ disu nabi, ilooy ma yuk na, “Baan nu siga jama ni Zayon, ‘Ndaun bi ba, alu na Sultan bi takka pa mman bi. Diyoꞌ sina pangatayan na. Iya ina takka bakuraꞌ taꞌ anak kuraꞌ jaꞌ.’ ”

⁸ Na sasang si Isa pasōng taꞌ kuraꞌ looy, meka na jama ni duhuan natag pakayan da ni lān man ngalak iya. Kuwan kasohean lay nappeꞌ engas katumbu-tumbuhan ndooy boꞌ lay du tinatag ni lān.

⁹ Kuwan baanan ga jama ma lumān ni duhuan si Isa sampay ilooy ma ni dambulihan na, maghowapan na pin, yuk da, “Pudji tabi panubuꞌ Sultan Daud! Sinupaatan jama naa ma pitu ni kawasa-kapatut Papuꞌ tabi Tuhan! Pudji tabi Tuhan ni sulgaꞌ!”

¹⁰ Ni katakka ga si Isa pa Jerusalem, maghiposan na jama ndooy sitilaw-tilaw, yuk da, “Soy doꞌ ina jama naa?”

¹¹ Pag tampung baanan jama ma ngahaboyan si Isa, “Iya na sina si Isa, nabi looy man Nasaret ndooy ni Jalil.”

Si Isa malakka siga padadagang man langga mehe

¹² Pag-anu siꞌ, lay na baw si Isa paasok pa haman langga mehe. Ndooy siꞌ, ngita na ya siga tukang dagang ka jama malli. Ni kalasu na, lay sila palakka na. Boꞌ lay gi bulikad na ga lamisahan siga tukang nambian sīn sampay ga paningkoan siga jama dagang atsang man ngulban.

¹³ Maka yuk na ninsila, “Luu bilay palman njawom kitab, ilooy ma yuk Tuhan, ‘Lumaꞌ ku ina lugar halliꞌ man maku duwaa.’ Sugaꞌ kaam tu, lay na pabuwat bi subay ga lumaꞌ baanan sugaru.”

¹⁴ Sasang si Isa masi ni haman langga mehe, luu na baw pa mman na ga jama buta ka ga jama tongkaꞌ. Pag-anu siꞌ, lay na sila inulian meꞌ na.

¹⁵ Sugaꞌ pag takita siga imam langkaw ka ga guru saraꞌ agama ndooy siga pakaradjaan kahaylan-haylan bay pabuwat si Isa, tud bay dugahan sila. Boꞌ lay gi magdaruhun duga da pag takale da siga anak-anak ni langga mehe howap lagi nohoꞌ pinudji panubuꞌ Sultan Daud.

¹⁶ Dari yuk siga imam ka ga guru looy ni si Isa, “Yaꞌ kina takale nu bong oy bitsala ga anak-anak naa?” Yuk si Isa, “Takale ku bina. Ongoy, yaꞌ kilay bay batsa bi suwat jawom kitab? Yuk na, ‘Minsan siga anak-anak, mehe-dikiꞌ, pinabadja meꞌ Tuhan mudji iya.’ ”

¹⁷ Lupus si Isa mitsala, lay na sila mbanan na boꞌ na pilay pa Betani. Maka ni kawum looy na ya bay tuli sangom looy.

Si Isa numpaan poon kayu igira

¹⁸ Na sayu alab lagi, lān ga si Isa pabeleng pa Jerusalem, lingantu na ya.

¹⁹ Pag ngita ya disu poon kayu igira yaꞌ du tā man bihing lān, lay ya pilay miha buwaꞌ na sugaꞌ yaꞌ ya bay nammu, isu-isu dawun. Pag-anu, yuk na ni kayu looy, “Labba man batnaa, yaꞌ na sina ko buwaꞌ pabalik.” Paddus na pin halling na, magti du ngalayu kayu looy.

²⁰ Pag takita jaꞌ siꞌ tu meꞌ ga mulit na, kapajayip sila. Dari yuk da, “Pooy doꞌ ina meꞌ kayu naa magti du ngalayu?”

²¹ Yuk si Isa, “Baan ta kam banahan, bong ina luu pangando bi pa Tuhan maka yaꞌ kam hawal-hawalan, tapabuwat bi du sina meꞌ ilooy ma bay pabuwat ku siꞌ ni poon igira looy. Maka san labi gi man ilooy siꞌ. Nduwan jaꞌ sina kam san gi sohoꞌ bi punu naa pungkad boꞌ na nohoꞌ ngahiyakan dī na pa dilawut.

²² Oy-oy paku bi njawom duwaa bi pa Tuhan, nduwan jaꞌ sina kam basta kam pitsayaꞌ jaꞌ.”

Tinilaw si Isa bong lakka man ninggai kapatut na

²³ Pag-anu, lay na baw si Isa pabeleng pa langga mehe boꞌ na nagnaꞌ noan jama ndooy. Sasang na ndooy, luu siga imam langkaw ka ga matatoa ni agama pasōng pa mman na, yuk da, “Soy doꞌ ina bay muwanan kau kapatut, taggahaꞌ ilu na ko pabasa-basa buwat kajinisan ni langga tuu?”

²⁴ Iya tampung si Isa, “Doꞌ kam bi. Tilaw ta doꞌ kam duhuꞌ. Bong tatampungan bi tilaw ku, malaingkan baan ta kam bong soy bay muwanan aku kapatut buwat mimon meꞌ looy siꞌ.

²⁵ Ituu tilaw ku: Soy ilay bay muwanan si Yahiya kapatut na mandi jama? Tuhan kilay, atawa manusiyaꞌ sadjaꞌ?” Sila baw siꞌ tu, lay doꞌ duhuꞌ isun bong oy pataꞌ tampung da. Yuk da padisu-padisu, “Yaꞌ bitu la luu dapat tabi tumanjataꞌ. Bong itu tabi māꞌ lakka man Tuhan, yuk na na baw, ‘Bong meꞌ looy, ongoy baw kam yaꞌ bay pitsayaꞌ ni umanat na?’

²⁶ Bong baw itu yuk tabi, ‘Kapatut na lakka man manusiyaꞌ sadjaꞌ,’ piligru ningkitabi sabap mimon jama ntuu pitsayaꞌ si Yahiya bay disu nabi.”

²⁷ Dari siꞌ, tampung da niiya, “Yaꞌ la katoonan kami.” Pag halling si Isa, “Bong meꞌ naa, yaꞌ du kam baan ku bong soy bay muwanan aku kapatut.”

Daa sat ni kuwit tōng ta sadjaꞌ meꞌ ta mean kahandak Tuhan

²⁸ Pag-anu, yuk si Isa ni siga pa-mmean agama ndooy, “Baan ta doꞌ kam pasal disu jama anakan duwa lalla. Pag-lupus, boꞌ ku baan bi bong oy bistahan bi. Na luu disu llaw, yuk jama looy ni anak na ma siyaka, ‘Pilay ko Toꞌ, intuhun doꞌ kabbun tabi.’

²⁹ “Sugaꞌ yuk anak na siꞌ tu, ‘Yaꞌ ku la kuhi.’ Sugaꞌ yaꞌ hallom, lay du halin na pikilan na sampay lay na ya pilay pa kabbun da.

³⁰ “Pag-anu siꞌ, lay na baw ya nohoꞌ anak na ilooy ma siyali patuhut buwat ni kabbun da. Pag tampung anak na siꞌ tu, ‘Ohoꞌ Maꞌ, pilay sa ku.’ Sugaꞌ yaꞌ san ya bay pilay.”

³¹ Pag-anu, tilaw si Isa ni siga pa-mmean looy, “Bong kaam, mamooy ilay bay ngasip mmaꞌ da?” Pag tampung da, “Ilooy bilay ma siyaka.” Yuk si Isa, “Dari ongoy baw ilay ilooy ya disu akig bi? Baan ta kam banahan, siga tukang ninga sukay sampay siga puta, luu na paasok pa jawom pamarinta Tuhan duhuꞌ gi man kaam.

³² Batan kaam ina, jaman si Yahiya ma Tukang Mandi bay pitu makitahan kaam lān intong tinūs pa Tuhan, yaꞌ kam bay kuhi pitsayaꞌ niiya. Gam gi siga tukang ninga sukay ka ga puta pitsayaꞌ lagi. Boꞌ ilooy gi laat na, san lay na takita bi lay na paayad kawul-piil da, masi du kam yaꞌ pitsayaꞌ ni umanat si Yahiya sampay nawbat.”

Dalil pasal siga panungguꞌ ma yaꞌ tapangandohan

³³ Yuk si Isa lagi, “Pakale doꞌ kam. Luu lagi disu dalil dean ku kaam. Luu disu jama bay ngabbun poon anggul. Pag-lupus, lay pinaga, boꞌ na lay buwat tapaggaꞌ buwaꞌ anggul man maggaan boheꞌ na. Maka bay gi ya buwat lumaꞌ-lumaꞌ langkaw man nganjaga. Pag-anu, lay sohoꞌ na tinungguan ni jama boꞌ na lay lome pa lahat disu.

³⁴ “Pag taabut kakattuan buwaꞌ anggul looy, lay na sohoꞌ dapu kabbun looy ga ata na kasohean pilay ngaddoꞌ bahagiꞌ na.

³⁵ Sugaꞌ pag takka ga ata na, gam pin lay sila sinungkuban meꞌ siga panungguꞌ kabbun looy. Kuwan disu lay llagpiꞌ, disu lay hiniyak ka batu, maka disu lay pinapatoy.

³⁶ “Pag-anu, lay na baw dapu kabbun looy nohoꞌ ga ata na sarī pilay, meka gi man maruhuꞌ. Sugaꞌ damikiyan, meꞌ looy du balik meꞌ siga panungguꞌ kabbun looy buwat sila.

³⁷ “Katapusan, anak dapu kabbun looy na mismu bay sohoꞌ na pilay. Honaꞌ-honaꞌ dapu kabbun looy, ‘Bong itu anak ku na mismu sohoꞌ ku, mastiꞌ magmaltabat na sila niiya.’

³⁸ Sugaꞌ pag takita leꞌ ga panungguꞌ kabbun looy, gam pin lay sila isun, yuk da, ‘Inaa na sina lalla kapusakahan kabbun tuu. Tu kam, papatoy tabi na mari kapakitabi na kabbun tuu.’

³⁹ Dari lay du ya bay sinungkuban sampay binoo pa poan kabbun looy boꞌ na lay pinapatoy.”

⁴⁰ Pag-anu, yuk si Isa ni siga pa-mmean agama, “Na pag mintu takka jama looy ma dapu kabbun, bong kaam, batōy ilay mintu meꞌ na ga panungguꞌ kabbun looy?”

⁴¹ Tampung da, “Mastiꞌ pinapatoy jaꞌ silay meꞌ na ga jama jahat looy siꞌ, boꞌ pina-ntan na meꞌ na kabbun na ni jama sarī ma kuhi ngandean bahagiꞌ na.”

⁴² Pus meꞌ looy siꞌ, yuk si Isa ninsila, “Yaꞌ kilay kam bay kabatsa suwat njawom kitab, ilooy ma yuk na, ‘Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon. Ilooy ilay siꞌ man gantaan Tuhan na du, boꞌ tud kainu-inu ningkitabi.’

⁴³ “Hantak bitsala looy ilay siꞌ, pagka yaꞌ kam kuhi pitsayaꞌ ni kabanahan, kinaddoan na sina mintu sukuꞌ bi ni pamarinta Tuhan, boꞌ ndean jama sarī ma taasahan mmeꞌ ni kahandak Tuhan.

⁴⁴ Indanan bi ituu. Batu looy ilay siꞌ tuwaꞌ pa aku. Sagannap ma nuwak aku, bbos-bbos sibuꞌ du sina karuha da ka labuꞌ taꞌ batu looy siꞌ. Maka soysoy ina labuꞌ taꞌ batu looy, mastiꞌ pong-mamōng jaꞌ sina. Maka sagannap ma kalabuan meꞌ batu looy, mastiꞌ pipis jaꞌ sina.”

⁴⁵ Na pag tabista meꞌ siga imam langkaw ka ga Parisi sila na siꞌ bay awnan si Isa ni dalil looy siꞌ,

⁴⁶ kainagon da sungkuban da na ya. Sugaꞌ hanggaw baw sila batan baanan ga jama ndooy manganna iya nabi man Tuhan.