Matiyu 20 - Sabahagiꞌ Kitab Tawrat: Panagnaan ni Awwal Jaman maka Kitab Injil

Pamintangan pasal meꞌ Tuhan nungbasan jama njawman pamarinta na

¹ Pag-anu, yuk si Isa, “Buwanan ta doꞌ kam pamintangan pasal pamarinta Tuhan. Luu disu lalla dapu kabbun anggul luha. Sayu alab lagi, lay ya lumān miha jama buwat ni jawom kabbun na.

² Pag nammu jaꞌ ya, lay sila magsulut ni gadji pataꞌ ka pabuwatan dangallaw. Dari lay na sila sinohoꞌ buwat ni kabbun na.

³ “Pag ga lisag siyam sayu, lumān na baw pabalik dapu kabbun looy pa tabuꞌ. Ndooy siꞌ, lay ya ngita siga jama nangge-nangge jaꞌ.

⁴ Dari yuk na, ‘Bong yaꞌ luu buwatan bi, boꞌ kam doman buwat, pilay kam pa kabbun ku. Pagsipataꞌ ku sa gadji bi ka halloman man bi bay buwat.’

⁵ Dari lay na sila pilay. “Pag taabut tangngaꞌ llaw, lay na baw ya nammu jama ni tabuꞌ boꞌ sinohoꞌ buwat ni kabbun na. Damikiyan, pag lisag tallu kohap, meꞌ looy du.

⁶ Tapit jaꞌ siꞌ lisag lima, pag beleng na balik pa tabuꞌ, ngita na baw ya balik jama nangge-nangge sadjaꞌ ndooy. Dari yuk na, ‘Ongoy kam nangge-nangge sadjaꞌ ntuu dangallaw na?’

⁷ “Pag halling da, ‘Yaꞌ ba la kami nammu buwatan.’ “Dari yuk na ninsila, ‘Bong meꞌ looy, pilay na kam buwat ni kabbun ku.’

⁸ “Pag sangom, yuk lalla looy ma dapu kabbun ni pa-mmean siga tindog na, ‘Sōn na pitu sila ma bay buwat. Gadjihan nu na. Sugaꞌ ilooy doꞌ ma dambuli paruhuun ginadjihan.’

⁹ “Pag takka sagannap ma bay nagnaꞌ lisag lima kohap, lay sila binuwanan gadji halliꞌ dangallaw.

¹⁰ Dari pag luu jaꞌ sagannap ma bay duhuꞌ buwat, holat da langkaw gadji da man ilooy ma dambuli, sugaꞌ pag ndaꞌ da, saliꞌ du eka gadji da.

¹¹ Pag timaꞌ da gadji da, bbuwatan da magdubdub ni jama dapu kabbun.

¹² Yuk da, ‘Uy la, timpus banahan dangallaw kami bay buwat njawom pasuꞌ llaw, taggahaꞌ saliꞌ du gadji kami ka sila ma danjām du bay buwat.’

¹³ “Pag tampung ilooy ma dapu ni disu ninsila, ‘Pakale doꞌ ko ba Nges. Yaꞌ ko bilay bay lilu ku. Saꞌ ba, bay pagsulutan ta gadji nu ni pabuwatan dangallaw, halliꞌ gadji dangallaw du?

¹⁴ Sangkon, kaddoun na gadji nu boꞌ nu moleꞌ na. Bong ku doman magsisibuꞌ gadji nu ka ga jama looy ma dambuli bay buwat,

¹⁵ yaꞌ kitu ku kapagbayaꞌ ka sīn ku? Marean ta dangkiꞌ ko sukat ku yaꞌ tingot muwanan jama sīn ku.’ ”

¹⁶ Yuk si Isa lagi, “Dari meꞌ halling sambat ku na siꞌ, meka sina jama ma ni dambulihan batnaa, pag taabut mintu ni ahirat, lay na sila ni duhuan. Damikiyan, meka du sina jama ma ni duhuan batnaa, pag ndooy mintu, lay na ni dambulihan.”

Kamintallu na si Isa nunaꞌ kapatoy na

¹⁷ Pag-anu, sasang ga si Isa patukad lān song pilay pa Jerusalem, lay sohoꞌ na mulit na sikasapu-duwa pa bihing na supaya sila jaꞌ kale bitsala na.

¹⁸ Yuk na ninsila, “Pakale kam. Batnaa pilay na kitabi pa Jerusalem. Ndooy ilay mintu, sinungkuban na ku, Anak Manusiyaꞌ, boꞌ ku pina-ntan ni siga imam langkaw ka ga guru saraꞌ agama. Pus meꞌ looy, boꞌ ku binotangan hukuman kapatoy.

¹⁹ Pag-anu, boꞌ ku pina-ntan na baw ni bangsa Rom binuwat kalabbiyan, boꞌ llagpiꞌ ka llansang gi taꞌ tehang sampay matoy. Sugaꞌ pag ina mintu taabut ni katallu ngallaw, pinakallum du ku.”

Paku nneꞌ ga si Yaꞌkub ka si Yahiya

²⁰ Pag-anu siꞌ, pasōng na baw nda si Sibidi ka ga anak na si Yaꞌkub ka si Yahiya pa mman si Isa. Luu jaꞌ siꞌ sila ni awpan na, kuwan danda looy lay pakokoꞌ maka yuk na, “Tuwan, bong siꞌ kadarihan ningkau, luu la paku ku ningkau.”

²¹ Yuk si Isa niiya, “Oy siꞌ tu paku nu?” Tampung danda looy, “Tuwan, pag taabut nu mintu magsultan ni mimon-mimon, bong siꞌ kadarihan ningkau, patingkoun na ga anak ku ni bihing nu, disu ni kawnan nu, disu ni kayli nu.”

²² Tampung si Isa, “Yaꞌ san bitu tasayu bi bong oy paku bi. Tatatas bi kina kabinsanaan meꞌ ilooy ma song lingkaan ku?” Pag tampung da, “Ohoꞌ Tuwan, takaya kami.”

²³ Yuk si Isa, “Bana sina, takissa bi du mintu kabinsanaan meꞌ karuha ilooy mintu ma sinōng meꞌ ku. Sugaꞌ bong baw hāl meꞌ meneꞌ bong soy ningkōꞌ ni kawnan ku ka kayli ku marinta, saꞌ inaa sukuꞌ ku. Siga paningkoan looy ilay ndang lay na hinalliꞌ meꞌ Mmaꞌ ku para ni jama ma karomanan na pinatingkōꞌ ndooy.”

²⁴ Pag takale jaꞌ siꞌ tu meꞌ siga mulit si Isa ilooy ma sapū bay puhung si Yaꞌkub ka si Yahiya, tud bay dugahan sila.

²⁵ Dari lay linganan si Isa ga mulit na sikasapu-duwa pa bihing na maka yuk na, “Sāꞌ bina pamiki bi. Kainagon bi patingkat na kam man pagkahi bi. Daa kam ba ngakig tabiat siga pa-mmean ni junyaꞌ ma yaꞌ ngisbat Tuhan. Sila ina ka ga pagkahi da ma langkaw ntan da, meꞌ da buwat raayat da subay ga ata da.

²⁶ Sugaꞌ kaam, amay-amay daa kam ngakig meꞌ looy. Soysoy kam doman patingkat subay buwat dī na tindog siga pagkahi na.

²⁷ Atawa soysoy kam doman pinaehe banahan subay buwat dī na ata sikamimon.

²⁸ Minsan aku, Anak Manusiyaꞌ, yaꞌ du ga kon ku bay pitu muhung inintu. Arapun kon ku itu bay pitu mari ku kaintu manusiyaꞌ sampay nongan umu ku mari meka na jama pinaddusan man hukuman ni dusa da.”

Si Isa ngulian duwa jama buta

²⁹ Pag lakka si Isa ka ga mulit na man Jeriko, sakiyan na baw jama patuhut niiya.

³⁰ Na ni bihing lān tinūs meꞌ da, luu duwa lalla buta ningkōꞌ. Pag tasayu da si Isa pingkaꞌ, ilooy ma hinowapan meꞌ da, yuk da, “Ū Tuwan, panubuꞌ Sultan Daud, panimbangan doꞌ kami la!”

³¹ Sugaꞌ bbuwatan baanan ga jama ndooy baw siꞌ tu naggong sila yaꞌ nohoꞌ hibuk. Sugaꞌ gam pin pinahaddo gi meꞌ da ngahowap, yuk da, “Ndūꞌ Tuwan, panubuꞌ Sultan Daud, panimbangan doꞌ kami!”

³² Dari lay na patagong si Isa boꞌ sohoꞌ na binoo ga lalla looy ma buta pa mman na. Pag-anu, yuk na ninsila, “Oy siꞌ tu karomanan bi pabuwat ku ningkaam?”

³³ Pag halling da siꞌ tu, “Tuwan, doman na kami la ngita.”

³⁴ Dari ni kaluuy si Isa ninsila, lay na purut na mata da sampay sarunduun du sila ngita. Maka lay na sila mmeꞌ niiya.