Matiyu 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Katakka siga lalla halul-akka man mataallaw

¹ Na si Isa ilay bay pinamaddihan ni Betlehem ndooy ni Yahudiya jaman Sultan Herod marinta. Ni waktu looy du siꞌ, luu na baw takka pa Jerusalem siga lalla halul-akka lakka man lahat huwin pa mataallaw. Sila ilay tukang ngadjian potean.

² Ni katakka da, tilaw da ni siga jama ndooy, “Ninggai lay la anak-anak looy ma bay pinamaddihan sultan bangsa Yahudi? Sasang kami ni lahat kami ndooy huwin pa mataallaw, lay na takita kami potean na pōꞌ. Ilooy na silay sipat man kami bay mindoga lay na ya pinamaddihan. Dari ituu na situ kon kami bay pitu supaya ya tasumba kami.”

³ Pag taaka meꞌ Sultan Herod luu na sultan bahau pinamaddihan, tud bay gundalaꞌ pamiki na sampay na mimon raayat ndooy ni Jerusalem.

⁴ Dari lay tawag Sultan Herod siga imam langkaw ka ga guru saraꞌ agama. Luu jaꞌ siꞌ sila, tilaw Sultan Herod ninsila, “Meꞌ kaam jama lahal ni kitab, njawom tunaꞌ kanabi-nabihan, ninggai ilay konoꞌ man Almasi pinamaddihan, yana sultan ma inagad meꞌ bangsa bi?”

⁵ Pag tampung da, “Ni kawum Betlehem ntuu du ni Yahudiya, batan ndang luu bay sinuwatan njawom kitab meꞌ Nabi Mayka, ilooy ma yuk Tuhan,

⁶ ‘Kaam, siga jama Betlehem nnaa ni Yahudiya, minsan dikiꞌ kawum bi, pabantug du bbos-bbos sabap luu disu panghuluꞌ pōꞌ man naa, tukang ngayaran sukuꞌ ku bangsa Israil.’ ”

⁷ Pag takale Sultan Herod bay tampung da, lay tawag na siga lalla looy siꞌ ma bay takka man lahat huwin pa mataallaw. Boꞌ subay sila-sila jaꞌ magbitsala. Luu jaꞌ siꞌ, tinilaw na sila meꞌ Sultan Herod bong sumilan sila bay ngita potean looy tulun.

⁸ Lay jaꞌ siꞌ binaan Sultan Herod, ilooy ma lay sohoꞌ na ga lalla halul-akka looy pilay pa Betlehem. Yuk na ninsila, “Pagbuli-bulihan bi miha anak-anak looy. Bong mintu bay tatammu bi, pahatiyun bi sa ku mari ku kapilay du numba iya.”

^9-10 Pus Sultan Herod bay mitsala, lay na ga lalla looy pawus pilay pa Betlehem. Lān da pilay, takita da na baw ni duhuan da potean looy siꞌ ma bay pōꞌ ni lahat da ndooy ni mataallaw. Sasang potean looy tinuhut meꞌ da, lay na patagong ni tagan lumaꞌ man anak-anak looy. Dari tud bay gāk sila banahan.

¹¹ Pag-anu, lay na sila paasok pa jawom lumaꞌ looy. Pag takita da jaꞌ siꞌ anak-anak looy maka nneꞌ na si Mariyam, lay na sila sujud sampay numba anak-anak looy. Pag lupus, inungkad na meꞌ da bay boonan da barang hagaan, boꞌ lay pinamuwan anak-anak looy. Ga barang looy siꞌ yana mmas, bbūg ka insallan hamut inawnan mira.

¹² Tapit jaꞌ siꞌ sila lakka, lay na baw sila bandaan Tuhan njawom upihan yaꞌ nohoꞌ pabeleng pilay pa mman Sultan Herod. Sangkon pag poleꞌ da, lay na sila nūs lān sarī.

Lahi ga si Yusup pa lahat Ejip

¹³ Lay jaꞌ lakka ga lalla looy siꞌ ma halul-akka, lay na baw tinammuhan si Yusup meꞌ malaikat Tuhan njawom upihan, yuk na, “Sinohoꞌ na sina mintu meꞌ Sultan Herod siga sundalu na miha anak-anak naa supaya tapapatoy da. Bangun na ko! Boonun na anak-anak naa maka nneꞌ na lahi pa Ejip. Maglahat na doꞌ kam ndooy ngkod-ngkoran bi yaꞌ gi bay sohoꞌ ku pabeleng.”

¹⁴ Dari lay du bangun si Yusup sampay sangom looy du lay na boo na anak-anak looy maka nneꞌ na lahi pa Ejip.

¹⁵ Dari siꞌ, lay na doꞌ sila maglahat ndooy ni Ejip ngabut sampay lay na matoy Sultan Herod. Na pag taabut da lay na pabeleng pa bay lahat da, lay na binakbul palman ma bay sinuwatan meꞌ Nabi Hoseya, ilooy ma yuk Tuhan, “Lay na linganan ku Anak ku nohoꞌ lakka man Ejip.”

Siga anak-anak lalla pinapatoy ndooy ni Betlehem

¹⁶ Balik ta pa Sultan Herod jaman na masi llum, pag ndaꞌ na yaꞌ na luu bay kaluwa ga lalla looy siꞌ ma tukang ngadjian potean, tabista na na lay jaꞌ ya inakkahan. Dari biddaꞌ na bay lasu na sampay lay sohoꞌ na pinapatoy ni siga sundalu na mimon anak-anak lalla ndooy ni Betlehem sampay ni sikamimon kawman ni bihing na. Labba man anak-anak ma bahau bay pinamaddihan ngabut sampay ilooy ma gantaꞌ umu duwan taun, lay sohoꞌ na pinapatoy. Maksud na bay ngalapay mimon sila mari siguru lay na tapapatoy anak-anak looy. Batan bay bāꞌ ga lalla looy siꞌ ni Sultan Herod agaꞌ ga duwan taun na bay pingkaꞌ labba man sibuwa da bay ngita potean looy tulun.

¹⁷ Dari sabap meꞌ looy, lay na binakbul ilooy ma bay tinunaꞌ meꞌ Nabi Jeremaya njawom kitab, ilooy ma yuk na,

¹⁸ “Luu sina mintu takale jama magtangisan sampay mag-ulawi ndooy ni Rama. Nangis na pin Sitti Rakel maglinduhan ga anak na. Yaꞌ na takoleꞌ pinagamgaman sabap lay kinatisan siga anak na.”

Kalakka ga si Yusup man Ejip

¹⁹ Na taabut Sultan Herod matoy, masi gi ga si Yusup ndooy ni Ejip. Pag-anu siꞌ, lay na baw balik si Yusup tinammuhan meꞌ malaikat Tuhan njawom upihan.

²⁰ Yuk malaikat looy, “Bangun na ko! Boonun na anak-anak naa maka nneꞌ na pabeleng pa Israil, batan lay na matoy jama looy ma bay doman mapatoy anak-anak naa.”

²¹ Dari lay du bangun si Yusup maka lay na boo na anak-anak looy ka nneꞌ na moleꞌ pa Israil.

²² Sugaꞌ pag takka da ndooy, lay na baw taaka si Yusup anak Sultan Herod du, yana si Alkilas, bay nganggantian mmaꞌ na magsultan ni Yahudiya. Dari tawu ya pawus pa bay kawum da. Boꞌ na, lay gi ya pinaupihan balik nohoꞌ pawus pilay pa Jalil.

²³ Pag takka da ndooy, lay sila maglahat ni disu kawum inawnan Nasaret. Na sabap meꞌ looy, lay na binakbul bay tunaꞌ kanabi-nabihan pasal Almasi, ilooy ma yuk da, “Iya inawnan jama man Nasaret.”