Matiyu 19 - Sabahagiꞌ Kitab Tawrat: Panagnaan ni Awwal Jaman maka Kitab Injil

Hāl jama sitampu ka sapeꞌ

¹ Pag lupus si Isa nōꞌ, lay na baw ya palakka man Jalil, boꞌ na pilay pa Yahudiya ni dambilaꞌ Sōng Juldan.

² Manusiyaꞌ siꞌ tu, sakiyan patuhut niiya maka mimon ma sakihan lay du kaulian meꞌ na.

³ Ndooy siꞌ, luu na baw takka siga Parisi pa mman na nual man da niit iya. Tilaw da niiya, “Bong ni saraꞌ agama tabi, dari kilay lalla napean nda na san gi oy sabapan na?”

⁴ Tampung si Isa ninsila, “Ongoy, yaꞌ kam kina bay matsa jawom kitab jaman Tuhan bay mapayak manusiyaꞌ? Lay silay ya buwat disu lalla ka disu danda.

⁵ Pag lupus, lay na baw Tuhan magpalman, yuk na, ‘Subay lalla pasakkat man induꞌ-mmaꞌ na, boꞌ na nibuuk dī na na ka nda na. Dari bay duwa gi sila, lay na dari disu baran sa.’

⁶ Dari ni mata Tuhan, bong jama sitampu, saꞌ na duwa baran da, arapun disu sa sabap tibuuk na sila. Sangkon, ma lay na tinibuuk meꞌ Tuhan, daa na sinalay meꞌ manusiyaꞌ.”

⁷ Pag-anu, nilaw na baw ga Parisi ni si Isa, yuk da, “Bong meꞌ naa, ongoy lay bay pinadari meꞌ Nabi Musa lalla napean nda na bong luu suwat pasa?”

⁸ Sambung si Isa, “Bana bilay bay tinugutan leꞌ Nabi Musa kabboꞌ-bboan tabi napean nda da. Sugaꞌ kon meꞌ looy sabap tohas atay da, saliꞌ du ka kaam batnaa. Boꞌ Tuhan ina, saꞌ meꞌ naa karomanan na labba man tagnaꞌ na bay mapayak lalla maka danda.

⁹ Sugaꞌ ituu jaꞌ meꞌ ku maka kaam: Soysoy ina napean nda na, boꞌ nda na yaꞌ bay magjina, bong ya handa na pa sarī, saliꞌ du ya ka magjina.”

¹⁰ Yuk siga mulit na niiya, “Uy la, bong bilay meꞌ looy kahalan jama ka nda na, gam na daa na jama sitampu.”

¹¹ Tampung si Isa, “Yaꞌ baw bina sikamimon jama katatas yaꞌ sitampu. Kamasaꞌ luu du baw ina jama ma bay binuwanan meꞌ Tuhan gaos man da gāk san yaꞌ luu soheꞌ da sitampu.

¹² Meka sina danan man kasohean lalla yaꞌ handa. Disu, ndang luu na salla ni baran da labba man kūn induꞌ da lagi. Kuwan kasohean, kon da yaꞌ handa sabap bay pinakaat meꞌ jama baran da. Kuwan kasohean, ndang yaꞌ doman handa sabap yaꞌ sila doman luu gi kasanggalang ninsila malān pamarinta Tuhan. Na soysoy ina doman nūs limpaꞌ da, pilayun bi.”

Si Isa makuhan ga anak-anak duwaa

¹³ Pag-anu siꞌ, luu na baw ndooy kasohean moo siga anak da pa mman si Isa nohoꞌ tinappak niiya bumbunan da sampay makuhan sila duwaa. Sugaꞌ kuwan ga mulit na baw siꞌ tu, bbuwatan da naggong ga jama looy.

¹⁴ Pag ndaꞌ si Isa meꞌ looy, yuk na ni ga mulit na, “Pabiyahun bi na ba pitu siga anak-anak naa pa mman ku. Daa na saggongun bi, batan pamarinta Tuhan ina ndang para ni jama diyoꞌ pangatayan meꞌ karuha ga anak-anak naa.”

¹⁵ Pag-anu siꞌ, lay na tinappak meꞌ si Isa bumbunan ga anak-anak looy pinakuhan duwaa. Pag lupus, lay na si Isa lakka ka ga mulit na.

Awod jama dayahan koleꞌ kasampulnaan nyawa ma yaꞌ luu katapusan na

¹⁶ Yaꞌ gi hallom, luu na baw disu lalla pa mman si Isa, yuk na, “Tuwan Guru, oy tu la pabuwatan mahap subay pabuwat ku mari sampulnaꞌ nyawa ku saumu-umu?”

¹⁷ Yuk si Isa, “Ongoy ko nilaw aku bong oy mahap? Isu-isu Tuhan bina mahap. Sangkon bong ko doman koleꞌ kasampulnaan nyawa saumu-umu, subay bogbogan nu siga panohoan na.”

¹⁸ Tilaw lalla looy, “Siga panohoan mamooy?” Yuk si Isa, “Daa ko mapatoy jama, daa ko magjina, daa ko nangkaw, bong ko naksiꞌ, subay bana,

¹⁹ maka pag-aratan nu induꞌ-mmaꞌ nu sampay kaasean nu pagkahi nu manusiyaꞌ sibuꞌ du ka aseꞌ nu ni dī nu.”

²⁰ Pag halling lalla looy, “Lay na bilay bogbogan ku panohoan looy siꞌ sikamimon. Oy na pin subay pabuwat ku?”

²¹ Yuk si Isa niiya, “Bong ko doman yaꞌ luu kulang nu pa Tuhan, moleꞌ na ko, paballihan nu na altaꞌ nu sikamimon boꞌ pagdeanun na jama miskin ballihan na. Bong siꞌ ina ko buwat meꞌ naa, luu na ladjikiꞌ nu mehe ni sulgaꞌ. Pag lupus, boꞌ nu pabeleng pitu mmeꞌ niyaku.”

²² Pag takale meꞌ lalla looy panohoan si Isa, lay halin parasahan na sabap sēng ya ni altaꞌ na yaꞌ taambat. Dari lay na jaꞌ ya lakka ni kasusa na.

²³ Pag-anu, yuk si Isa ni ga mulit na, “Baan ta kam banahan, awod sina jama dayahan tumabeꞌ ni pamarinta Tuhan.

²⁴ Kamurahan gi untaꞌ papassūt ni lowang panahiꞌ man jama dayahan patabeꞌ ni pamarinta Tuhan.”

²⁵ Pag takale meꞌ siga mulit na bay bitsala na siꞌ, tud bay jayip sila sabap kanna da poonan jama altaan sabap kinahopan sila meꞌ Tuhan. Sangkon yuk da, “Bong meꞌ naa, soy baw ilay tasalamat?”

²⁶ Pag-anu siꞌ, ilooy ma lay si Isa ngandaꞌ ninsila sambayan na halling, “Ndang tunmanūn sina meꞌ manusiyaꞌ nalamat dī da, sugaꞌ bong Tuhan, yaꞌ luu tunmanūn niiya.”

²⁷ Pag-anu, yuk si Pitel, “Pooy baw tu la meꞌ kami lay na ngambanan mimon-mimon supaya kami kapa-mmeꞌ ningkau? Oy baw tungbas ningkami?”

²⁸ Yuk si Isa, “Baan ta kam banahan, pag ina mintu pinabahauwan na junyaꞌ, Anak Manusiyaꞌ itu mintu ningkōꞌ na ni tingkoan man na magsultan ni kaehe kawasa na. Kaam pun, siga mulit ku, pinatingkōꞌ na du kam mintu ni sapu-duwa tingkoan marintahan mimon panubuꞌ lakka man siga anak si Israil sikasapu-duwa.

²⁹ Maka soysoy ina bay ngambanan lumaꞌ na, siga danganakan na, induꞌ-mmaꞌ na, siga anak na, atawa tanaꞌ na supaya ya kapa-mmeꞌ niyaku, lipat min dahatus gi tungbas Tuhan niiya. Boꞌ na, koleꞌ gi ya kasampulnaan nyawa ma yaꞌ luu katapusan na.

³⁰ Indanan bi. Meka sina jama ma ni duhuan batnaa, pag taabut mintu ni ahirat, lay na sila ni dambulihan. Damikiyan, meka du sina jama ma ni dambulihan batnaa, pag ndooy mintu, lay ni duhuan.”