Matiyu 18 - Sabahagiꞌ Kitab Tawrat: Panagnaan ni Awwal Jaman maka Kitab Injil

Jama ma patingkat ni pamarinta Tuhan

¹ Ni waktu looy du siꞌ, lay pilay siga mulit si Isa pa mman na, yuk da, “Tuwan, ni mimon manusiyaꞌ njawman pamarinta Tuhan, soy lay la patingkat?”

² Pag lupus da nilaw, lay si Isa ngalinganan disu anak-anak pa mman na, boꞌ lay boo na pa tangngaan da.

³ Pag-anu, yuk na, “Ddong na kam ba ngulihal meꞌ bi patingkat. Baan ta kam banahan, bong ina yaꞌ halin bi pamiki bi supaya diyoꞌ pangatayan bi meꞌ karuha anak-anak tuu, malaingkan yaꞌ kam kapatabeꞌ ni pamarinta Tuhan.

⁴ Sugaꞌ soysoy ina magpadiyoꞌ sampay ngakig diyoꞌ pangatayan anak-anak tuu, iya na patingkat ni pamarinta Tuhan.

⁵ “Lagiꞌ na,” yuk si Isa, “soysoy ina ngahasi disu anak-anak meꞌ tuu kalnaꞌ aku, saliꞌ du ka aku bay hasi na.

⁶ Sugaꞌ soysoy ina buwat oy maka oy na ma kalangkat ni pangando anak-anak meꞌ tuu ma pitsayaꞌ niyaku, gam na bay ginantungan kallong na ka batu mehe, boꞌ na llabuhan ni tangngaꞌ sallang.

⁷ Baan ta kam banahan, siya-siya sina manusiyaꞌ ma mandang hāl junyaꞌ sabap wā sila takoleꞌ sinasat. Ni junyaꞌ tuu itu ndang yaꞌ taambat sasat ma moo jama buwat dusa. Sugaꞌ tud siya-siya sina mintu sagannap ma bay moo sasat meꞌ looy.

⁸ Sangkon ilagan bi dī bi. Bong sawpama dambilaꞌ tangan bi atawa dambilaꞌ battis bi kaboo-boo ningkaam buwat dusa, kurungan bi na boꞌ tinimanan. San ina langkap battis-tangan bi sikaduwambilaꞌ, bong man bi taisi pa jawom api nalkaꞌ ma yaꞌ tapawman, gam na baw dambilaꞌ sa tangan bi atawa battis bi bong pin kam koleꞌ jaꞌ kasampulnaan nyawa saumu-umu.

⁹ Minsan mata bi, bong luu dambilaꞌ ma kaboo ningkaam buwat dusa, kuwirian bi na boꞌ tinimanan. Gam na kam koleꞌ kasampulnaan nyawa saumu ka mata bi dambilaꞌ sa, man bi nnaa hiniyakan pa jawom api nalkaꞌ ddas ka mata bi sikaduwambilaꞌ.

¹⁰ “Paayad-ayad kam taggahaꞌ meꞌ bi mista yaꞌ puntukan disu anak-anak meꞌ tuu. Batan baan ta kam banahan, luu sina siga malaikat para ninsila wā ni awpan Mmaꞌ ku ni sulgaꞌ.”

Bili-bili lungay

¹¹ Pag-anu, yuk si Isa, “Anak Manusiyaꞌ itu bay pitu pa junyaꞌ miha jama ma lawak man Tuhan maka nalamat sila.

¹² Bong sawpama luu jama magbili-bili dahatus, boꞌ lay lungay disu, saꞌ ba, mbanan na doꞌ ilooy ma siyampuꞌ-siyam mangan taꞌ buntuꞌ, boꞌ na miha ilooy disu ma bay lungay?

¹³ Bong mintu lay na tatammu na, baan ta kam, tud gāk silay ya banahan. Gāk gi ya ni ilooy disu man ni ilooy ma siyampuꞌ-siyam ma yaꞌ bay lungay.

¹⁴ Damikiyan, meꞌ naa du sina parasahan Mmaꞌ bi ni sulgaꞌ. Yaꞌ du ya doman minsan disu jama meꞌ anak-anak tuu lungay man jawom okoman na sampay man na binasa.”

Bong pagkahi bi sukuꞌ si Isa buwat dusa ningkaam

¹⁵ Pag-anu, yuk si Isa lagi, “Bong luu disu jama ma pitsayaꞌ niyaku bay buwat maat ningkau, pilay ko pa mman na. Baan nu ya bong oy kasaan na. Sugaꞌ subay duwang-duwangan jaꞌ kam. Bong ina ya pakale sampay mangaku sāꞌ na, malaingkan sikahāp na sina kam pabalik.

¹⁶ Sugaꞌ bong ina tuwak na bitsala nu, subay ko moo disu duwa pagkahi nu ma pitsayaꞌ niyaku pa mman na. Batan talpaksaꞌ subay luu duwa tallu saksiꞌ ni bay pagsaggaan bi.

¹⁷ Bong yaꞌ hasi na palbiatan saksiꞌ nu, pasahid ko ni baanan pagkahi bi ni langga. Na bong masi gi ya yaꞌ mmeꞌ ni palbiatan siga pagkahi bi, bilangun bi na ya jama yaꞌ pitsayaꞌ ni Tuhan ka baldusa meꞌ karuha siga tukang ninga sukay.

Kapatut siga sukuꞌ si Isa

¹⁸ “Baan ta kam banahan, oy-oy ina tinagga meꞌ bi ntuu ni junyaꞌ, tinagga du sina meꞌ Tuhan. Oy-oy padari bi ntuu ni junyaꞌ, pinadari du sina meꞌ Tuhan.

¹⁹ Maka luu gi bāꞌ ku ningkaam. Bong luu san lasa duwa jaꞌ kam ma mmeꞌ niyaku magbēꞌ pikilan pasal oy-oy paku bi man Mmaꞌ ku ni sulgaꞌ, nduwan jaꞌ sina kam.

²⁰ Batan bila ina luu duwa tallu jama kumpo ma pitsayaꞌ niyaku, mastiꞌ luu du ku ni bihing da.”

Tindog yaꞌ ngampun

²¹ Pag-anu siꞌ, lay na baw pasōng si Pitel pa mman si Isa nilaw, yuk na, “Tuwan, subay ilay min dangoy ampun ku pagkahi ku bong ya amu-amu buwat dusa niyaku? Sukup na kilay min pituꞌ?”

²² Pag tampung si Isa, “Saꞌ sina sat min pituꞌ, arapun subay min pitumpūꞌ llipat pituꞌ,

²³ batan pamarinta Tuhan ina, meꞌ tuu karuha na: Luu disu sultan ninga siga tindog na ma utangan niiya.

²⁴ Sasang na maliksaꞌ utang da, luu disu tindog na binoo pa awpan na utangan niiya salaksaꞌ pilak.

²⁵ Boꞌ yaꞌ luu sīn na man na mayaran sultan looy. Dari lay ya sohoꞌ sultan looy pinaballihan ka altaꞌ na mimon sampay anak-nda na man mayaran utang na.

²⁶ Sugaꞌ bbuwatan tindog looy, lay nangge ka tuut na maku aseꞌ niiya, yuk na, ‘Ampun Sultan, panimbangan doꞌ ku maka tangguhan doꞌ ku, boꞌ sa bayaran ku utang ku sikamimon.’

²⁷ Dari siꞌ kapaluuy sultan looy niiya sampay lay na pawman na utang na labbasakayi, boꞌ na lay na sinohoꞌ moleꞌ.

²⁸ “Pag poleꞌ na, sitammu na baw ya ka disu pagkahi na tindog utangan dangkitiꞌ du niiya. Pag-anu, magti sungkuban na boꞌ na sinakko-sakko sambayan na halling, ‘Bayaran nu na utang nu niyaku!’

²⁹ Dari kuwan ilooy siꞌ ma utangan, lay nangge ka tuut na ni awpan na maku aseꞌ, yuk na, ‘Panimbangan doꞌ ku maka tangguhan doꞌ ku, boꞌ sa bayaran ku utang ku ningkau.’

³⁰ Sugaꞌ yaꞌ ya bay kuhi, gam pin lay gi sohoꞌ na nijīl ngkod-ngkoran yaꞌ gi bay kabayad utang na.

³¹ “Pag takita leꞌ siga pagkahi na tindog meꞌ na bay buwat lalla looy, tud bay susa atay da sampay lay na sila pa mman sultan māꞌ mimon ma bay takita da.

³² Lay jaꞌ siꞌ kabaan sultan, lay tawag na tindog na ilooy siꞌ ma bay utangan mehe niiya. Luu jaꞌ siꞌ, yuk sultan niiya, ‘Kau na bina tindog biddaꞌ na dahulakaꞌ nu. San kau meꞌ looy na ehe utang nu, pagka ko lay maku aseꞌ niyaku, lay gi du ko ampun ku.

³³ Dapat siꞌ lay du panimbangan nu pagkahi nu tindog meꞌ kadari bay pabuwat ku ningkau.’

³⁴ Dari ni kaehe lasu sultan looy, lay sohoꞌ na lalla looy njīl boꞌ bininsanaꞌ ngkod-ngkoran yaꞌ gi puwas utang na sikamimon.

³⁵ Damikiyan,” yuk si Isa, “meꞌ naa du sina meꞌ Mmaꞌ ku ni sulgaꞌ buwat kaam bong kam yaꞌ ngampun siga pagkahi bi ni kahilas atay bi.”