Matiyu 17 - Sabahagiꞌ Kitab Tawrat: Panagnaan ni Awwal Jaman maka Kitab Injil

Halin bantuk si Isa taꞌ punu

¹ Na luu jaꞌ siꞌ bay pingkaꞌ nnom ngallaw, lay na baw boo si Isa ga si Pitel ka ilooy duwa magdanganakan, yana ga si Yaꞌkub ka si Yahiya, pa taꞌ punu langkaw, sila-sila jaꞌ.

² Lay jaꞌ siꞌ sila ndooy, ilooy ma halin na bantuk si Isa ni awpan da. Sahayaꞌ luwa na meꞌ mataallaw na sampay pakayan na lay na ga papoteꞌ malaas na maka nahayaꞌ na.

³ Maka pag ndaꞌ ga mulit na, luu na tulun duwa nabi mattoꞌ magbitsala ka si Isa, yana Nabi Musa ka Nabi Eliyas.

⁴ Dari halling si Pitel ni si Isa, “Tuwan, tud kahapan la luu kami ntuu. Bong ko doman, buwatan ta na kam bawung-bawung tallu ntuu, disu ningkau, disu ni Nabi Musa, ka disu ni Nabi Eliyas.”

⁵ Pag-anu, sasang si Pitel siꞌ mitsala, liput na sila meꞌ tayiꞌ baliyu poteꞌ malaas, ninag na. Maka luu gi suwara pōꞌ man jawom tayiꞌ baliyu looy, yuk na, “Inaa ina Anak ku, kakasi ku. Kasulutan ku banahan niiya. Indanan bi bitsala na.”

⁶ Pag takale meꞌ siga mulit si Isa suwara looy, magti sila pahangkop taꞌ tanaꞌ ni katawu da.

⁷ Pag-anu, pasōng si Isa pa mman da, boꞌ na murut sila sambayan na halling, “Bangun na kam. Daa na kam tawu.”

⁸ Pag dongaꞌ da, niyaꞌ na luu takita da sarī man si Isa.

⁹ Na sasang da palūd man taꞌ punu looy, ilooy ma lay sila sinupali meꞌ si Isa, yuk na, “Daa kam māꞌ ni soysoy bong oy bay tasakup bi ngkod-ngkoran yaꞌ gi ku, yana Anak Manusiyaꞌ, bay pinakallum pabalik.”

¹⁰ Pag-anu siꞌ, pakiyaka na baw siga mulit na niiya, yuk da, “Tuwan, baꞌ-bāꞌ siga guru saraꞌ agama mastiꞌ duhuꞌ doꞌ Nabi Eliyas pōꞌ nohoꞌ jama saddiya ni katakka Almasi. Bana kilay bitsala da? Na pasal kau, katoonan kami baw luu na ko, sugaꞌ yaꞌ gi baw bay tumatandaꞌ ga luu na Nabi Eliyas bay duhuꞌ pitu man kau.”

¹¹ Tampung si Isa, “Ohoꞌ, bana silay yuk njawom kitab mastiꞌ duhuꞌ doꞌ pōꞌ Nabi Eliyas noan jama mari sila saddiya ni katakka Almasi.

¹² Sugaꞌ baan ta kam banahan, luu na silay bay pitu Nabi Eliyas sugaꞌ yaꞌ ya bay takila. Sarī gi, lay jaꞌ du manusiyaꞌ nganduwan dī da pooy-pooy karomanan da meꞌ buwat iya. Damikiyan, meꞌ naa du sina mintu meꞌ da buwat aku, yana Anak Manusiyaꞌ.”

¹³ Dari bohoꞌ tahati meꞌ siga mulit na si Yahiya ma Tukang Mandi hati bay awnan na Nabi Eliyas.

Si Isa ngulian disu anak-anak sineytan

¹⁴ Na pag beleng ga si Isa pa jawom baanan jama ndooy, luu na baw disu lalla pasōng pa mman na, boꞌ na pakokoꞌ

¹⁵ sambayan na halling, “Tuwan, panimbangan doꞌ anak ku. Tud malasahi ya meꞌ bilaw-bawi na. Kansang na ga ya habbaꞌ ni jawom api atawa labuꞌ pa jawom boheꞌ.

¹⁶ Bay na silay ya boo ku pa mman ga mulit nu sugaꞌ yaꞌ du bay takoleꞌ da.”

¹⁷ Tampung si Isa, “Uy la! Angkat-angkatan batnaa tud kulang bitu pangando da pa Tuhan maka tud bingkok pamiki da. Subay meꞌ noy gi doꞌ tu hallom ku dambuwaꞌ ka kaam boꞌ bi pitsayaꞌ niyaku? Agon yaꞌ na bitu tatatas ku arat bi.” Pag-anu, yuk na ni mmaꞌ anak-anak looy, “Bōn na pitu anak nu.”

¹⁸ Luu jaꞌ siꞌ, lay na sohoꞌ si Isa seytan njawom baran anak-anak looy pōꞌ. Dari lay du pōꞌ sampay magti kaulian na anak-anak looy.

¹⁹ Na yaꞌ jaꞌ siꞌ luu jama, lay na baw pasōng ga mulit si Isa pa mman na. Tilaw da, “Tuwan, ongoy lay la yaꞌ bay tapōꞌ kami seytan looy man baran anak-anak looy?”

²⁰ Tampung si Isa, “Sabap kulang pangando bi niyaku. Baan ta kam banahan, bong ina luu pangando bi san lasa bateheꞌ bigi mustard, minsan punu naa tahalin bi du bong sohoꞌ bi halin. Yaꞌ sina luu saꞌ tapabuwat bi bong tud luu du pangando bi niyaku.

²¹ Sugaꞌ jinis seytan meꞌ looy ilay, yaꞌ tapōꞌ meꞌ bi bong kam yaꞌ doꞌ duhuꞌ maku duwaa maka puwasa.”

Kaminduwa si Isa nunaꞌ kapatoy na

²² Na disu llaw, sasang si Isa ka ga mulit na kumpo ndooy ni Jalil, yuk si Isa ninsila, “Yaꞌ na hallom, tinipu na situ ku, yana Anak Manusiyaꞌ, boꞌ pina-ntan ni saraꞌ

²³ sampay pinapatoy. Sugaꞌ pag ina mintu taabut ni katallu ngallaw, llum du ku pabalik.” Pag takale siga mulit na bitsala na, tud bay susa sila.

Si Isa maka si Pitel mayad sukay langga mehe

²⁴ Pag-anu, lay na baw takka si Isa ka ga mulit na pa Kapelniyum. Sasang da ndooy, luu pasōng pa mman si Pitel siga tukang maku sukay man ngayaran langga mehe. Tilaw da niiya, “Mayad du kina guru bi sukay ni langga mehe?”

²⁵ Tampung si Pitel, “Ohoꞌ, mayad bilay.” Na pag asok si Pitel pa jawom lumaꞌ man da pahantiꞌ, yaꞌ gi ya bay kabitsala, magti si Isa nilaw, yuk na, “Saymon, kumpasan nu? Ni hāl sukay pa parinta, soy sininga meꞌ siga sultan, anak da atawa jama sarī?”

²⁶ Yuk si Pitel, “Jama sarī bilay.” “Bong meꞌ looy,” yuk si Isa, “sagannap anak Tuhan san yaꞌ na mayaran sukay ni lumaꞌ Mmaꞌ da.

²⁷ Sugaꞌ supaya yaꞌ maat atay da ningkita, mahambu ko pilay pa jawom danaw. Daying ma duhuꞌ takoleꞌ nu, bangaun behe na. Pag-anu, ngita sina ko njawom behe na pilak sukup man mayaran sukay ta sikaduwa. Kaddoun pilak looy, boꞌ deanun siga tukang maku sukay ni langga mehe.”