Matiyu 16 - Sabahagiꞌ Kitab Tawrat: Panagnaan ni Awwal Jaman maka Kitab Injil

Siga Parisi ka ga Saddusi nohoꞌ pinakitahan sipat kawasa Tuhan

¹ Na disu llaw, luu na baw siga Parisi ka Saddusi pilay pa mman si Isa nuway-nuwayan iya. Yuk da niiya, “Pakitahan teꞌ kami sipat kawasa mari luu buktiꞌ kau bay pinapitu meꞌ Tuhan.”

^2-3 Iya tampung si Isa, “Kaam tu, bong hāl meꞌ mindogahan bū lahat, kamurahan jaꞌ kam. Sugaꞌ bong baw hāl meꞌ mindoga bong oy pabuwat Tuhan ni batnaa, kaawran kam. Bong takita bi na akket na langit pag sumaddop llaw, yuk bi, ‘Tallak lahat sumawung.’ Atawa pag sayu, bong kam ngita andom, yuk bi, ‘Uwan na sina mintu.’ Sugaꞌ ni hāl meꞌ mindoga bong oy pabuwat Tuhan ni batnaa, masi yaꞌ tabistu bi san meka na sipat kahaylan-haylan bay pinōꞌ ningkaam.

⁴ Tud maat jama angkat-angkatan batnaa. Yaꞌ sila kanaalla pa Tuhan. Yaꞌ sila kuhi pitsayaꞌ bong sila yaꞌ bay pinakitahan sipat kawasa. Sugaꞌ yaꞌ du sila pinakitahan sipat sarī man meꞌ ilooy ma bay katuwaꞌ ni Nabi Yunus mattoꞌ.” Pag-anu siꞌ, lay na si Isa palakka mandooy.

Subay jama iyakin ni tōꞌ siga Parisi ka ga Saddusi

⁵ Na yaꞌ hallom, lay si Isa ka ga mulit na dutai taꞌ kumpit palintas pa dambilaꞌ danaw. Lān da pilay, bohoꞌ tasayu ga mulit na lay takupan da moo tinapay lutuꞌ da.

⁶ Pag-anu, yuk si Isa ninsila, “Paayad-ayad kam. Iyakinan bi pasulig siga Parisi ka ga Saddusi.”

⁷ Na siga mulit na siꞌ tu, yaꞌ tabista da iya ngandalil. Dari yuk da padisu-padisu, “Mahapsaꞌ la ngkon na halling meꞌ naa sabap yaꞌ tabi bay kaboo tinapay.”

⁸ Na si Isa siꞌ tu, tasayu na du bong oy binitsala meꞌ da. Dari yuk na ninsila, “Ongoy na inaa na pagbitsalahan bi sat ga hāl tinapay yaꞌ luu? Kulang bitu pangando bi niyaku.

⁹ Amu-amu kam kitu yaꞌ kahati? Marean ta lay na takupan bi limam batang du tinapay looy man ku bay makan ga jama looy lima libu. Intomun bi doꞌ bong dangoy bakaꞌ gi takapin bay pumpung bi.

¹⁰ Maka intomun bi doꞌ tinapay looy pitum batang du man ku bay makan ga jama looy mpat libu. Dangoy bakaꞌ gi takapin bay pumpung bi?

¹¹ Tud jayip ku yaꞌ san bay tahati bi saꞌ tinapay bay awnan ku ni bay halling ku nsiniꞌ, ‘Iyakin kam ni pasulig siga Parisi ka ga Saddusi.’ ”

¹² Dari siꞌ, bohoꞌ tahati meꞌ da tud saꞌ du pasulig tinapay inawnan. Ilooy ya inawnan meꞌ na nohoꞌ sila iyakin ni tōꞌ siga Parisi ka ga Saddusi.

Si Pitel māꞌ bong soy si Isa

¹³ Pag-anu, lay na baw pawus ga si Isa pa bihing daira inawnan Sesariya Pilipi. Sasang da ndooy, tilaw si Isa ni ga mulit na, “Na kuwan aku, Anak Manusiyaꞌ, bong ni bitsala jama, soy tu ku?”

¹⁴ Tampung da, “Pamāꞌ kasohean, kau na konoꞌ si Yahiya ma Tukang Mandi lay na llum pabalik. Yuk kasohean baw, kau na konoꞌ Nabi Eliyas. Boꞌ yuk kasohean baw, kau na konoꞌ Nabi Jeremaya atawa disu nabi sarī man maruhuꞌ-ruhuꞌ bay pinakallum pabalik.”

¹⁵ “Na bong kaam,” yuk si Isa, “soy baw itu ku?”

¹⁶ Tampung si Saymon Pitel, “Kau na bina Almasi, tukang nalamat ma bay njanjiꞌ meꞌ Tuhan sabanna ma llum saumu-umu. Kau na Anak Tuhan.”

¹⁷ Yuk si Isa niiya, “Saymon, anak si Yahiya, sinupaatan ko batan pangahati nu pasal aku lay na pinalahil ningkau meꞌ Mmaꞌ ku ni sulgaꞌ, saꞌ man kapandoyan manusiyaꞌ.

¹⁸ Batnaa, awnan ta na ko si Pitel, hatiyan na batu. Batan bitsala nu ilay siꞌ pasal aku meꞌ sapantun batu man ku matangge lumaꞌ ku. Lumaꞌ ma awnan ku itu yana mimon manusiyaꞌ ma pitsayaꞌ niyaku. Boꞌ yaꞌ na sina sila ā meꞌ Ibilis ka ga pagkahi na seytan.

¹⁹ Maka Pitel, buwanan ta na ko kapatut meꞌ sapantun kunsiꞌ man mukisan lawang pa jawom pamarinta Tuhan. Dari oy-oy tinagga meꞌ nu ntuu ni junyaꞌ, tinagga du sina meꞌ Tuhan. Oy-oy padari nu ntuu ni junyaꞌ, pinadari du sina meꞌ Tuhan.”

²⁰ Pag-anu siꞌ, lay supali si Isa siga mulit na yaꞌ nohoꞌ māꞌ ni soysoy ga iya na Almasi.

Si Isa nunaꞌ kapatoy na

²¹ Na pus meꞌ looy, nagnaꞌ na baw si Isa mahati siga mulit na bong oy katuwaꞌ niiya ni sinōng. Yuk na, “Aku itu, talpaksaꞌ niyaku pilay na pa Jerusalem. Ndooy ilay mintu, subay ku natasan jinisan kabinsanaan meꞌ siga matatoa ni agama ka ga imam langkaw sampay ga guru saraꞌ agama, boꞌ pinapatoy lagi ku. Sugaꞌ pag ina mintu taabut ni katallu ngallaw, llum na du sina ku pabalik.”

²² Pag takale si Pitel bitsala si Isa, ilooy ma lay doꞌ boo na si Isa palawak-lawak, boꞌ na naggong, yuk na, “Uy, Tuwan, daa ko ba halling meꞌ naa. Sipais du pin ko! Niyaꞌ bina dari meꞌ naa katuwaꞌ ningkau.”

²³ Pag-anu, ilooy ma paawop si Isa ni si Pitel sambayan na halling, “Lakka na ko man bihing ku Ibilis! Pamiki nu ina kahandak manusiyaꞌ, saꞌ ga kahandak Tuhan.”

²⁴ Pag-anu, yuk si Isa ni ga mulit na, “Soysoy doman mmeꞌ niyaku subay tikutan na kahandak na bong pin taduwan na jaꞌ kahandak ku. Subay atas na manangkit tehang halliꞌ man na nilansang, boꞌ na patuhut niyaku. Hati na, subay atas na lumingkaꞌ njawom jinisan katiksaan ka kabinsanaan kalnaꞌ aku san man na matoy, boꞌ na kapa-mmeꞌ niyaku.

²⁵ Soysoy ina yaꞌ mean kahandak na bong pin tabean na kahandak ku, mastiꞌ sampulnaꞌ jaꞌ nyawa na labba man junyaꞌ sampay pa ahirat. Sugaꞌ soysoy ina numbul satu niiya meꞌ na nulut dī na halloman na ntuu ni junyaꞌ, tiksaꞌ nyawa na saumu.

²⁶ San du sina lay katis mimon altaꞌ njawom junyaꞌ lay takoleꞌ bi, oy pūs na bong tiksaꞌ du nyawa bi njawom nalkaꞌ? San ina pooy eka altaꞌ bi, yaꞌ du dari man ngalakkat nyawa bi man jawom katiksaan.

²⁷ Ni sinōng, pabeleng du situ Anak Manusiyaꞌ ka ga malaikat na pa junyaꞌ liput meꞌ sahayaꞌ Mmaꞌ na. Pag-anu, boꞌ na nungbasan mimon manusiyaꞌ ni oy-oy bay pabuwat da, mahap-maat.

²⁸ Maka baan ta kam banahan, kasohean kam ma luu nangge ntuu, yaꞌ gi situ kam mintu bay matoy, ndang takita bi na katakka Anak Manusiyaꞌ ddas ka pamarinta na.”