Matiyu 13 - Sabahagiꞌ Kitab Tawrat: Panagnaan ni Awwal Jaman maka Kitab Injil

Dalil pasal jama naburan bani

¹ Ni llaw looy du siꞌ, lay na baw si Isa duwai man taꞌ lumaꞌ, boꞌ na pilay pa bihing Danaw Jalil.

² Na ndooy siꞌ, pagka sakiyan na jama kumpo ni bihing na, lay ya dutai sampay ningkōꞌ taꞌ bagung ma tapit ni bihing. Kuwan baanan ga jama looy siꞌ tu, lay na jaꞌ ndooy ni tapiyan pakale niiya.

³ Iya siꞌ bay nōꞌ, meka dalil bay pakoy na. Disu meꞌ tuu, yuk na, “Pakale doꞌ kam. Luu disu jama lay naburan bani ni huma na.

⁴ Pag sabud na, kasohean lay tumiluꞌ pa tangngaꞌ lān sampay lay katis kinakan meꞌ siga manuk-manuk.

⁵ Kuwan kasohean bani, lay tumiluꞌ pa jawom kabatuhan, dangkitiꞌ du tanaꞌ na. Dari lay pasapput deꞌ-dēꞌ tomoꞌ bani looy sabap yaꞌ bay lawom man da njawom tanaꞌ.

⁶ Sugaꞌ pag pasuꞌ jaꞌ llaw, yaꞌ hallom lay du lūs tinanom looy sampay lay na ngalayu sabap yaꞌ bay nganggamut pa lawom.

⁷ Kuwan kasohean bani lay tumiluꞌ pa jawom lumput itingan. Pag tomoꞌ na, pasulig du lumput looy sampay lay jaꞌ limbo meꞌ lumput.

⁸ Kuwan kasohean bani lay tuwaꞌ ni tanaꞌ mahap. Dari siꞌ, mahap meꞌ da sulig sampay lay na buwaꞌ. Kasohean, eka buwaꞌ na njawom dampoon lipat min tallumpūꞌ, kasohean lipat min nnompūꞌ, kuwan kasohean, sampay lipat min dahatus.”

⁹ Pag-anu, yuk si Isa lagi, “Kaam ma pakale ni bitsala ku, pahamun bi paayad.”

Maksud si Isa ngandalil

¹⁰ Pag-anu siꞌ, pasōng na baw pa mman si Isa siga mulit na nilaw, yuk da, “Tuwan, ongoy ko lay la ngandalil man nu noan sila?”

¹¹ Tampung si Isa, “Kon meꞌ looy sabap pangahati pasal pamarinta Tuhan ma yaꞌ gi bay lahil maruhuꞌ, ndean na ningkaam, saꞌ ninsila.

¹² Batan soysoy ina pitsayaꞌ niyaku sampay nganna bitsala ku, mastiꞌ sinampunan na pin pangahati na paeka. Sugaꞌ soysoy ina yaꞌ doman pitsayaꞌ niyaku, san luu pangahati na dangkitiꞌ, song hallom llakkahan du.

¹³ Sangkon ngandalil jaꞌ ku man ku noan sila, batan san luu mata da, yaꞌ du sila ngandaꞌ. San luu tinga da, yaꞌ du sila pakale maka yaꞌ du sila ngahati.

¹⁴ Dari njataꞌ da lay na binakbul palman ma bay sinuwatan meꞌ Nabi Isaya maruhuꞌ-ruhuꞌ, ilooy ma yuk Tuhan, ‘Sigi-sigi sila pakale sugaꞌ yaꞌ du sila kuhi kahati. Wā sila ngandaꞌ sugaꞌ yaꞌ du sila kakila.

¹⁵ Batan ni katohas kōk da, lay na sompong da tinga da maka lay na pakaddom da mata da. Bong siꞌ saꞌ meꞌ looy, mastiꞌ ngita na sila, kale sila sampay kahati sila. Boꞌ na, mastiꞌ nawbat jaꞌ sila, boꞌ taulian ku pangatayan da.’ ”

¹⁶ Pag-anu, yuk si Isa lagi ni ga mulit na, “Boꞌ kaam ina, njawom supaat kam sabap tahati bi inaa ma takale bi maka takita bi.

¹⁷ Baan ta kam banahan, meka silay nabi ka ga jama intong mattoꞌ tud bay doman ngita ituu ma takita bi batnaa, sugaꞌ yaꞌ gi bay luu dapat da. Tud bay sila doman kale ituu ma takale bi batnaa sugaꞌ yaꞌ gi du bay luu dapat da.”

Si Isa makkasan kamaatunan dalil looy pasal jama naburan bani

¹⁸ Pag-anu yuk na, “Pakale kam paayad mari tahati bi kamaatunan bay dalil looy siꞌ pasal jama naburan bani.

¹⁹ Bani looy ilay siꞌ yana umanat Tuhan pinasaplag. Kuwan tanaꞌ ni tangngaꞌ lān man bani looy bay tumiluꞌ, tuwaꞌ pa sagannap ma bay kale umanat Tuhan sugaꞌ yaꞌ tahati da. Dari takka du Ibilis boꞌ na ngandagmit umanat looy man jawom atay da.

²⁰ “Kuwan tanaꞌ looy ma njawom kabatuhan man bani looy bay tumiluꞌ, tuwaꞌ pa sagannap ma bay kale umanat Tuhan sampay magti pitsayaꞌ ni kagāk da.

²¹ Sugaꞌ pagka yaꞌ bay nganggamut pa lawom umanat looy njawom atay da, yaꞌ du hallom tatasan da pitsayaꞌ. Pag luu jaꞌ kabinsanaan atawa laug tuwaꞌ njataꞌ da sabap meꞌ da pitsayaꞌ ni umanat Tuhan, siglaꞌ du sila patatak.

²² “Kuwan tanaꞌ looy ma meka lumput itingan na man bani looy bay tumiluꞌ, tuwaꞌ pa sagannap ma bay kale umanat Tuhan sampay pitsayaꞌ, sugaꞌ wā sila hanggaw ni hāl meꞌ da llum ni junyaꞌ. Taboo-boo sila magsiꞌ meꞌ napsu da ni sīn. Dari song hallom, umanat Tuhan njawom atay da, bong dalil ta pa tinanom, lay na limbo leꞌ lumput sampay yaꞌ du buwaꞌ.

²³ “Boꞌ tanaꞌ looy ma mahap man bani looy bay sinaburan, tuwaꞌ pa sagannap ma bay kale umanat Tuhan, boꞌ tahati da sampay kinanna meꞌ da. Pag toklas na, jinisan kaayaran takita ni kaallum da. Kaayaran da ina, bong dalil ta pa tinanom, kasohean buwaꞌ lipat min tallumpūꞌ, kasohean lipat min nnompūꞌ, kuwan kasohean sampay lipat min dahatus.”

Lumput ka bani mahap

²⁴ Pag-anu siꞌ, lay na baw si Isa ngandalil pabalik, yuk na, “Luu disu lalla lay naburan bani mahap ni jawom huma na.

²⁵ Pag disu sangom njawom na tuli, luu na baw banta na lay naburan bigi lumput ni jawom huma na.

²⁶ Pag tomoꞌ jaꞌ siꞌ tinanom na, meka na du lumput bay tomoꞌ.

²⁷ Dari yuk ga tindog jama looy ma dapu huma, ‘Tuwan, saꞌ ba, bani mahap jaꞌ bay saburan tabi ni huma nu? Ongoy lay la meka na lumput na?’

²⁸ “Tampung jama looy ma dapu huma, ‘Inaa bina man kapandoyan banta ku.’ “Yuk ga tindog na, ‘Tuwan, pooy karomanan nu, lumputan kami na?’

²⁹ “Pag tampung jama dapu huma looy, ‘Daa na ba lumputan bi taggahaꞌ tabeꞌ jaꞌ ga tinanom ku.

³⁰ Bbiyahun bi na doꞌ paehe saliꞌ-saliꞌ. Dari pag mintu taabut ngattom, sohoꞌ ku sa pinaduhuꞌ llumputan ni siga tukang ngattom, boꞌ sohoꞌ ku kinumpo lumput na tinunu. Pag-anu, boꞌ sohoꞌ ku na kinattom buwaꞌ na boꞌ inannaꞌ ni jawom buriga ku.’ ”

Pamarinta Tuhan ndalil pa bigi mustard tinanom

³¹ Pag-anu, lay na baw si Isa ngandalil pabalik, yuk na, “Pamarinta Tuhan ina meꞌ karuha bigi mustard bay tinanom njawom huma.

³² Minsan lannik bigi looy man sikamimon, pag sulig na, iya gi pinakamehe man mimon jambangan ndooy sampay lay na dari kayu. Maka pinagsangan na meꞌ siga manuk-manuk engas na.”

Pamarinta Tuhan ndalil pa pasulig

³³ “Damikiyan,” yuk si Isa, “pamarinta Tuhan ina meꞌ karuha pasulig pinalamud meꞌ danda njawom disu undam taligu. Minsan dangkitiꞌ du bay inannaꞌ, pag ngassob na, pasulig du mimon addunan na.”

³⁴ Na siga dalil meꞌ looy ilay siꞌ, meka bay pinōꞌ meꞌ si Isa man noan baanan jama ndooy. Tuktuk na noan sila, wā ya ngandalil.

³⁵ Sabap meꞌ looy, lay na binakbul palman Tuhan ma bay sinuwatan meꞌ disu nabi njawom kitab, ilooy ma yuk na, “Bbos-bbos ngandalil jaꞌ ku man ku noan sila siga pakaradjaan ma ndang bay llimbuhan labba man jaman junyaꞌ bay pinapayak.”

Kamaatunan dalil looy pasal lumput ka bani mahap

³⁶ Pag lupus si Isa magnasihat, lai na mbanan na siga baanan jama ndooy boꞌ na paasok pa jawom disu lumaꞌ. Kuwan siga mulit na, lay du mmeꞌ niiya boꞌ da nohoꞌ binaan, yuk da, “Tuwan, bong dari, pahatiyan doꞌ kami kamaatunan dalil looy siꞌ pasal lumput ni huma.”

³⁷ Tampung si Isa, “Jama looy ilay siꞌ ma naburan bani mahap yana aku, Anak Manusiyaꞌ.

³⁸ Huma looy yana junyaꞌ tuu. Siga bani ma mahap, yana sukuꞌ Tuhan njawom pamarinta na. Kuwan lumput looy, yana jama ma sukuꞌ Ibilis.

³⁹ Banta ma naburan lumput yana Ibilis. Timpu ngattom, yana llaw dambuli. Maka sagannap ma tukang ngattom yana siga malaikat.

⁴⁰ Yana meꞌ siga lumput kinumpo boꞌ tinunu, meꞌ naa du sina mintu katuwaꞌ ni mimon jama ma bay takawum meꞌ Ibilis pag taabut llaw dambuli.

⁴¹ Bbuwatan Anak Manusiyaꞌ itu mintu nohoꞌ siga malaikat na pitu pa junyaꞌ ngumpo sikamimon ma bay moo-moo pagkahi da buwat dusa sampay mimon ma yaꞌ mean siga panohoan na.

⁴² Pag-anu, hiniyakan na sila pa jawom api nalkaꞌ. Boꞌ ndooy na sila mag-ulawi sampay magkattop naggaan paddi.

⁴³ Boꞌ sagannap ma intong, nahayaꞌ na sina mintu meꞌ karuha mataallaw njawom pamarinta Mmaꞌ da Tuhan. Na kaam ma pakale ni bitsala ku, pahamun bi paayad.”

Pamarinta Tuhan ndalil pa altaꞌ hagaan

⁴⁴ Pag-anu, ngandalil na baw si Isa pabalik, yuk na, “Pamarinta Tuhan ina meꞌ sapantun altaꞌ hagaan bay llabbong ni jawom tanaꞌ. Pag lay tatammu jama, lay na baw llabbong meꞌ na pabalik. Dari ni kaehe gāk na, lay na paballihan na altaꞌ na sikamimon boꞌ lay balli na tanaꞌ looy.

Pamarinta Tuhan ndalil pa mutsaꞌ

⁴⁵ “Damikiyan, pamarinta Tuhan ina meꞌ tuu karuha na: Luu disu tukang malli mutsaꞌ, bbuwatan na ngalataan lahat miha siga mutsaꞌ mahap.

⁴⁶ Pag lay jaꞌ ya nammu disu ma biddaꞌ na ayad na, lay na bballihan na altaꞌ na sikamimon, boꞌ lay du balli na mutsaꞌ looy.

⁴⁷ “Maka Pamarinta Tuhan ina meꞌ tuu karuha na: Luu siga jama mukut njawom danaw, boꞌ meka jinisan daying lay takoleꞌ da.

⁴⁸ Lapat jaꞌ siꞌ pukut da meꞌ daying, lay na jaꞌ guyud da pa tapiyan. Pag-anu, boꞌ lay na penean da daying da. Sagannap ma mahap, lay inisi njawom siga bakaꞌ, kuwan ma maat, lay jaꞌ tinimanan meꞌ da.

⁴⁹ Na meꞌ naa du sina mintu pag taabut llaw dambuli. Pag takka siga malaikat, sinakkat na meꞌ da manusiyaꞌ ma maat ka ma intong.

⁵⁰ Kuwan ma maat, hiniyakan na meꞌ malaikat pa jawom api nalkaꞌ. Maka ndooy na sila mag-ulawi sampay magkattop naggaan paddi.”

⁵¹ Pag-anu siꞌ, tinilaw na baw meꞌ si Isa ga mulit na, yuk na, “Tahati bi kilay siꞌ sikamimon bay halling ku?” Tampung da, “Ohoꞌ, Tuwan.”

⁵² Pag-anu, yuk si Isa, “Soysoy ina guru lahal ni kitab kanabi-nabihan, boꞌ isbat na lagi tōꞌ ku pasal pamarinta Tuhan, sibuꞌ du ya ka jama dayahan. Bila ya magnasihat, dansusun du ya ka jama makitahan siga pagkahi na altaꞌ na ma bahau ka altaꞌ na man maruhuꞌ-ruhuꞌ lagi.”

Jama Nasaret yaꞌ pitsayaꞌ ni si Isa

⁵³ Pag lupus si Isa bay ngandalil, lay na ya lakka

⁵⁴ boꞌ na pilay pa daira man na bay sulig. Ndooy siꞌ, lay ya magnasihat njawom langga da. Pag lay jaꞌ takale ga jamaa ndooy, tud bay inu-inu sila. Yuk da padisu-padisu, “Ninggai na la man na bay koleꞌ pangahati lawom meꞌ naa ka kawasa na mōꞌ pabuwatan kahaylan-haylan?

⁵⁵ Iya bina anak tukang kayu looy sadjaꞌ maka katoonan tabi du nneꞌ na si Mariyam maka siga danganakan na si Yaꞌkub, si Yusup, si Saymon maka si Judas.

⁵⁶ Sampay ga danganakan na ma danda dambuwaꞌ du tabi lahat. Pooy lay la meꞌ na bay kapabuwat meꞌ looy siꞌ labbasakayi?”

⁵⁷ Dari labba man waktu looy na siꞌ, sarī na jaꞌ parasahan da niiya. Pag-anu, ilooy ma yuk si Isa ninsila, “Bong inawnan nabi, mastiꞌ binantug jaꞌ sina paninggai-paninggai jaꞌ ya. Sugaꞌ bong kinawnan jama ni daira man na bay sulig, minsan paglūng na mismu, yaꞌ du mag-arat niiya.”

⁵⁸ Dari yaꞌ na meka pakaradjaan kahaylan-haylan bay pabuwat na ndooy sabap yaꞌ sila pitsayaꞌ niiya.