Matiyu 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

MATIYU Usuwan si Isa Almasi

¹ Ituu tu usuwan siga pangkatan kabboꞌ-bboan si Isa Almasi, panubuꞌ Sultan Daud, yana disu panubuꞌ Nabi Ibrahim.

² Labba man jaman Nabi Ibrahim ngabut sampay Sultan Daud, ituu na siga pangkatan kabboꞌ-bboan si Isa: Nabi Ibrahim mmaꞌ si Isahak, si Isahak mmaꞌ si Yaꞌkub, si Yaꞌkub mmaꞌ si Juda ka siga danganakan na.

³ Si Juda mmaꞌ si Peres maka si Zera, nneꞌ da si Tamal. Si Peres mmaꞌ si Hesdon, si Hesdon mmaꞌ si Aram,

⁴ si Aram mmaꞌ si Aminadab, si Aminadab mmaꞌ si Nasson, si Nasson mmaꞌ si Salmon,

⁵ si Salmon mmaꞌ si Bowas, nneꞌ na si Rehab. Si Bowas mmaꞌ si Obed, nneꞌ na si Rut. Si Obed mmaꞌ si Jesse,

⁶ si Jesse mmaꞌ Sultan Daud. Na labba man jaman Sultan Daud ngabut sampay pa jaman bangsa Israil bay tasungkub ni bonoꞌ sampay binoo pa Babilon, ituu na siga pangkatan kabboꞌ-bboan si Isa: Sultan Daud mmaꞌ si Sulayman. Nneꞌ si Sulayman bay nda si Uriyas.

⁷ Si Sulayman mmaꞌ si Robowam, si Robowam mmaꞌ si Abiya, si Abiya mmaꞌ si Asa,

⁸ si Asa mmaꞌ si Josapat, si Josapat mmaꞌ si Joram, si Joram mmaꞌ si Usiyas,

⁹ si Usiyas mmaꞌ si Jutam, si Jutam mmaꞌ si Ahaz, si Ahaz mmaꞌ si Hesakaya,

¹⁰ si Hesakaya mmaꞌ si Manasse, si Manasse mmaꞌ si Amon, si Amon mmaꞌ si Josaya,

¹¹ si Josaya mmaꞌ si Jekoneya ka siga danganakan na. Jaman looy ilay, bangsa Israil bay tasungkub ni bonoꞌ sampay binoo pa Babilon.

¹² Na labba man jaman bangsa Israil bay tasungkub sampay binoo pa Babilon ngabut sampay si Isa bay pinamaddihan, ituu na siga pangkatan kabboꞌ-bboan si Isa: si Jekoneya mmaꞌ si Salati, si Salati mmaꞌ si Sirubabel,

¹³ si Sirubabel mmaꞌ si Abiyud, si Abiyud mmaꞌ si Eleyakim, si Eleyakim mmaꞌ si Asol,

¹⁴ si Asol mmaꞌ si Sadok, si Sadok mmaꞌ si Akim, si Akim mmaꞌ si Eliyud,

¹⁵ si Eliyud mmaꞌ si Eleyasal, si Eleyasal mmaꞌ si Matan, si Matan mmaꞌ si Yaꞌkub,

¹⁶ si Yaꞌkub mmaꞌ si Yusup. Si Yusup lla si Mariyam ma bay mamaddihan si Isa, ma ginalla Almasi.

¹⁷ Dari siꞌ, luu sapu-mpat pangkatan labba man jaman Nabi Ibrahim ngkod jaman Sultan Daud. Damikiyan, luu du baw sapu-mpat pangkatan labba man jaman Sultan Daud ngabut sampay pa jaman bangsa Israil bay tasungkub sampay binoo pa Babilon. Maka luu gi du baw sapu-mpat pangkatan labba man jaman bangsa Israil bay binoo pa Babilon ngabut sampay pa jaman man Almasi bay pinamaddihan.

Si Isa Almasi pinamaddihan

¹⁸ Na si Isa Almasi ilay bay pinamaddihan, meꞌ tuu karuha na. Nneꞌ na, yana si Mariyam, lay sipagtunang ka si Yusup. Sugaꞌ niyaꞌ gi san sila bay takawin, ndang lay na ya battong man kawasa Rū Sutsiꞌ.

¹⁹ Kuwan si Yusup ilay siꞌ, jama intong maka yaꞌ doman makiyaꞌ si Mariyam. Dari lay tapiki na magpabakkat na jaꞌ, san yaꞌ na ya hiluhalaꞌ.

²⁰ Hangat na mamiki, lay ya kapatuli. Pag-anu, lay na ga ya tinammuhan meꞌ malaikat Tuhan njawom upihan. Yuk malaikat looy niiya, “Yusup, panubuꞌ Sultan Daud, daa ko alang-kapalang ngawinan si Mariyam sabap iya ina bay battong man kawasa Rū Sutsiꞌ.

²¹ Pag maddi na ina mintu, lalla anak na. Awnan nu ya si Isa, hati na tukang nalamat, sabap iya na sina mintu nalamat siga sukuꞌ na mari sila yaꞌ minulkaan sabapan bay dusa da.”

²² Na pagka si Mariyam bay battong man kawasa Rū Sutsiꞌ, lay na binakbul palman Tuhan ni Nabi Isaya maruhuꞌ-ruhuꞌ, ilooy ma yuk Tuhan,

²³ “Bbos-bbos luu sina budjang battong yaꞌ san bay pingkaꞌ sitapit ka lalla. Pag pōꞌ anak na, lalla. Bbos-bbos inawnan ya si Emmanuwel.” (Hatiyan na, Tuhan luu na ntuu mman tabi.)

²⁴ Dari pag batiꞌ si Yusup, lay du bean na bay halling malaikat looy niiya sampay lay na kawinan na si Mariyam.

²⁵ Sugaꞌ yaꞌ gi sila bay pingkaꞌ ubay ngkod-ngkoran yaꞌ gi bay pinamaddihan anak na. Pag maddi si Mariyam, lalla du bana anak na. Sampay lay na du bay inawnan si Isa meꞌ si Yusup.