Malkus 9 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Yuk si Isa lagi, “Baan ta kam banahan, kasohean kam ma nangge ntuu, yaꞌ gi situ kam mintu bay matoy, ndang takita bi na katakka pamarinta Tuhan ddas ka kawasa na.”

Halin bantuk si Isa taꞌ punu

² Na luu jaꞌ siꞌ nnom ngallaw bay pingkaꞌ, lay na baw boo si Isa ga si Pitel, si Yaꞌkub ka si Yahiya pa taꞌ punu langkaw, sila-sila jaꞌ. Lay jaꞌ siꞌ sila ndooy, halin na bantuk si Isa ni pag-awpan da.

³ Pakayan na lay na ga papoteꞌ malaas na maka nahayaꞌ na. San gi pooy poteꞌ kakanaꞌ junyaꞌ tuu, basta lay gi kalabihan meꞌ poteꞌ pakayan na.

⁴ Maka pag ndaꞌ ga mulit na, luu na tulun duwa jama mattoꞌ magbitsala ka si Isa, yana Nabi Eliyas maka Nabi Musa.

⁵ Pag-anu, yuk si Pitel ni si Isa, “Tuwan Guru, kahapan la luu kami ntuu. Bong anu, buwatan kami doꞌ kam bawung-bawung tallu, disu ningkau, disu ni Nabi Musa, maka disu ni Nabi Eliyas.”

⁶ Na ngkon si Pitel bay mitsala meꞌ looy sabap ni kaehe tawu na, yaꞌ na katoon-toonan na bong oy pataꞌ halling na ninsila.

⁷ Mindangoy ko, luu na baw duwai tayiꞌ baliyu ngaliput sila. Maka luu gi suwara pōꞌ man jawom tayiꞌ baliyu looy, yuk na, “Inaa ina Anak ku, kakasi ku. Indanan bi bitsala na.”

⁸ Pus meꞌ looy, sasang ga si Pitel magliling-liling, sarunduun du dangan-dangan si Isa sa takita da ndooy.

⁹ Na pag lūd da man taꞌ punu looy, lay doꞌ sila inamay-amayan meꞌ si Isa, yuk na, “Daa kam māꞌ ni soy maka soy na pasal ilooy ma bay tasakup bi siꞌ. Noy mintu ku, yana Anak Manusiyaꞌ, bay na matoy sampay pinakallum pabalik boꞌ bi māꞌ.”

¹⁰ Dari lay na du asip da bay tugun na. Sugaꞌ papiha-piha na pin baw sila bong oy hiyak bitsala na pinakallum ya pabalik.

¹¹ Pag-anu, tilaw da ni si Isa, “Ongoy lay la baꞌ-bāꞌ ga guru saraꞌ agama talpaksaꞌ doꞌ duhuꞌ Nabi Eliyas pōꞌ boꞌ takka Almasi?”

^12-13 Tampung si Isa ninsila, “Bana du baw bilay ninsila mastiꞌ duhuꞌ doꞌ Nabi Eliyas pōꞌ manyap labbasakayi boꞌ takka Almasi. Sugaꞌ baan ta kam banahan, luu na silay Nabi Eliyas bay pōꞌ. Sugaꞌ meꞌ jama bay buwat iya, lay jaꞌ sila madara kahandak da makaat iya meꞌ ndang bay tinunaꞌ njawom kitab. Damikiyan Anak Manusiyaꞌ pun, yuk njawom kitab, subay du lumingkaꞌ njawom jinisan kabinsanaan sampay tinuwak.”

Si Isa ngulian anak-anak sineytan

¹⁴ Luu jaꞌ siꞌ takka ga si Isa pa diyoan, pag ndaꞌ da, sinual na siga mulit na ilooy siꞌ ma bay tamban meꞌ siga guru saraꞌ agama. Boꞌ meka na jama ngaliput sila.

¹⁵ Luu jaꞌ siꞌ si Isa takita meꞌ baanan jama looy, takurat sila sampay magti du sila sonse nampang iya.

¹⁶ Tilaw si Isa ninsila, “Oy tu la pagjawapan bi?”

¹⁷ Na yaꞌ gi siꞌ bay tatampungan da si Isa, yuk disu lalla ni baanan looy, “Tuwan Guru, luu situ siꞌ la anak ku umaw meꞌ seytan bay boo ku pitu. Bong siꞌ dari, junjung ku na ningkau, ulian doꞌ ya.

¹⁸ Bila patakka na seytan na, sarunduun ya humantak sambayan na magkuweregan. Maka ngalappuꞌ na ga behe na sambayan na magkattop sampay ngatto na ga baran na. Dari lay na situ ku siꞌ maku tulung ni siga mulit nu nohoꞌ malakka seytan na, sugaꞌ yaꞌ du bay takoleꞌ da.”

¹⁹ Yuk si Isa, “Uy la, angkat-angkatan batnaa tud kulang bitu pangando da pa Tuhan! Meꞌ noy na pin doꞌ tu hallom ku dambuwaꞌ ka kaam natasan arat bi boꞌ bi pitsayaꞌ?” Pag-anu, yuk na ni lalla looy siꞌ, “Bōn na pitu anak nu.”

²⁰ Pag-anu siꞌ, lay na boo da anak-anak looy pa mman si Isa. Pag takita si Isa meꞌ seytan njawom baran anak-anak looy, sarunduun du anak-anak looy magkuweregan sampay humantak, boꞌ na magligiran sampay ngalappuꞌ na ga behe na.

²¹ Tilaw si Isa ni mmaꞌ na, “Meꞌ noy na tu hallom anak nu meꞌ tuu?” Tampung na, “Man kadikiꞌ na gi sina Tuwan.

²² Boꞌ daran gi ya pinatimbag meꞌ seytan na pa jawom api atawa pa jawom boheꞌ tandaꞌ seytan na doman mapatoy iya. Sugaꞌ bong siꞌ luu tarapat nu, panimbangan doꞌ kami. Tulungun doꞌ kami.”

²³ Yuk si Isa niiya, “Ongoy lay yuk nu, ‘bong siꞌ’ lagi? Yaꞌ bina luu tunmanūn basta ko pitsayaꞌ jaꞌ niyaku.”

²⁴ Pag tampung mmaꞌ anak-anak looy, “Pitsayaꞌ ku Tuwan! Sugaꞌ tabangun doꞌ ku supaya yaꞌ na ku duwa-duwa pitsayaꞌ.”

²⁵ Pag takita si Isa magsasōng na pin eka jama bahuklud pasōng pa mman na, padpad masi haluhaya, yuk na ni seytan looy njawom baran anak-anak looy, “Seytan, kau ma tukang maumawan jama, pōꞌ na ko! Maka daa na ko paasok pa jawom anak-anak naa bbalik!”

²⁶ Pag-anu, magti du killahap seytan looy sampay magkuweregan na anak-anak looy meꞌ na, boꞌ na pōꞌ. Dari siꞌ meꞌ hantang mayat na anak-anak looy sampay meka na ga bay kapahalling, “Lay na bitu matoy anak-anak naa.”

²⁷ Sugaꞌ lay na pin hinelaꞌ meꞌ si Isa tangan na sampay lay na du ya nangge.

²⁸ Paddus meꞌ looy, lay na ga si Isa moleꞌ. Pag taabut sila-sila sa njawom lumaꞌ, tilaw ga mulit na niiya, “Ongoy lay la yaꞌ siꞌ bay tapōꞌ kami seytan anak-anak looy?”

²⁹ Tampung si Isa, “Siga seytan meꞌ looy ilay yaꞌ takoleꞌ pinōꞌ bong kam yaꞌ makutuꞌ meꞌ bi maku duwaa.”

Kaminduwa si Isa nunaꞌ kapatoy na

³⁰ Lakka mandooy siꞌ, lay na baw ga si Isa pingkaꞌ man jawom Jalil. Sugaꞌ yaꞌ ya doman tasayu meꞌ jama bong noy man da

³¹ batan doman gi ya noan ga mulit na sila-sila jaꞌ. Yuk na ninsila, “Yaꞌ na hallom, tinipu na situ ku, Anak Manusiyaꞌ, boꞌ pina-ntan ni saraꞌ sampay pinapatoy. Sugaꞌ pag taabut ni katallu ngallaw, llum du ku pabalik.”

³² Kuwan ga mulit na siꞌ tu, yaꞌ gi bay tahati da maksud bitsala na. Sarī gi, yaꞌ sila nawakka nilaw iya.

Jama ma patingkat man mimon

³³ Pag-anu siꞌ, takka na sila pa Kapelniyum. Lay jaꞌ siꞌ sila taꞌ lumaꞌ, tilaw si Isa ni ga mulit na, “Oy lay siꞌ la pagjawapan bi ni tangngaꞌ lān?”

³⁴ Sugaꞌ diyam-diyam jaꞌ sila, batan iyaꞌ sila māꞌ lay sila magjawap pasal soy sila patingkat ni baanan da.

³⁵ Pag-anu siꞌ, ningkōꞌ na si Isa boꞌ na nohoꞌ ga mulit na sikasapu-duwa pa bihing na. Halling na ninsila, “Soysoy kam doman patingkat, subay magpadiyoꞌ, buwat dī na tindog sikamimon.”

³⁶ Pag-anu siꞌ, lay na baw ya ngaddoꞌ disu anak-anak boꞌ inannaꞌ ni tangngaan da. Pag-anu siꞌ, kinakkopan meꞌ na sambayan na mitsala, yuk na,

³⁷ “Soysoy ngahasi jama diyoꞌ pangkat na meꞌ karuha anak-anak tuu kalnaꞌ aku, sibuꞌ du ya ka bay ngahasi aku. Boꞌ na, soysoy ina bay ngahasi aku, saꞌ sina sat aku bay hasi na. Ilooy pun ma bay mapitu aku, hasi na du.”

Soysoy yaꞌ nguntra si Isa tabilang nanggehan iya

³⁸ Pag-anu siꞌ, yuk si Yahiya ni si Isa, “Tuwan Guru, lay kami la ngita disu lalla malakka siga seytan makoy awon nu. Sugaꞌ lay bay saggong kami sabap yaꞌ ya tabeꞌ ni baanan tabi.”

³⁹ Yuk si Isa, “Ongoy subay na pin saggong bi jama meꞌ looy? Tiyap-tiyap ilay jama makoy awon ku man na mōꞌ pabuwatan kahaylan-haylan, malaingkan yaꞌ baw ilay ya malaat aku.

⁴⁰ Maka tiyap-tiyap ina jama yaꞌ nguntra kitabi, tabilang du sina nanggehan kitabi.

⁴¹ Baan ta kam banahan, soysoy ina mainuman kaam san lasa mbuwaꞌ sawan boheꞌ sabap meꞌ bi kinatoonan sukuꞌ ku, basta tinungbasan jaꞌ sina ya leꞌ Tuhan.”

⁴² Pag-anu siꞌ, yuk si Isa lagi, “Soysoy ina moo-moo disu anak-anak meꞌ ituu ma pitsayaꞌ niyaku pagsiꞌ, basta bahaya mehe silay mintu niiya. Gam na bay ginantungan kallong na ka batu mehe, boꞌ na llabuhan ni tangngaꞌ sallang.

^43-44 “Sangkon, bong dambilaꞌ tangan bi bay kaboo-boo ningkaam buwat dusa, kurungan bi na. Gam na dambilaꞌ sa tangan bi bong pin sampulnaꞌ jaꞌ nyawa bi saumu, man bi nnaa taisi pa jawom api nalkaꞌ ma yaꞌ tapawman ddas ka tangan bi sikaduwambilaꞌ.

^45-46 Damikiyan, bong dambilaꞌ battis bi bay kaboo-boo ningkaam buwat dusa, kurungan bi na. Gam na dambilaꞌ sa battis bi bong pin sampulnaꞌ jaꞌ nyawa bi saumu man bi nnaa tahiyakan pa jawom api nalkaꞌ ddas ka battis bi sikaduwambilaꞌ.

⁴⁷ Atawa pun, bong dambilaꞌ mata bi bay kaboo-boo ningkaam buwat dusa, kuwirian bi na. Gam na dambilaꞌ sa mata bi bong pin kam tabeꞌ jaꞌ ni pamarinta Tuhan, man bi nnaa tahiyakan pa jawom nalkaꞌ ddas ka mata bi sikaduwambilaꞌ.

⁴⁸ Ndooy ilay ni nalkaꞌ, yaꞌ luu katapusan kamalasahiyan batan siga uwot ma ngeket ndooy yaꞌ na kuhi matoy. Damikiyan, api ndooy yaꞌ na du kuhi pawom saumu.”

⁴⁹ Yuk si Isa lagi, “Mimon ina manusiyaꞌ tinimusan jaꞌ ka api. Hatiyan na, mimon manusiyaꞌ mastiꞌ lumingkaꞌ jaꞌ njawom jinisan kamalasahiyan ma nongkad hāp-laat njawom atay da.

⁵⁰ “Bong inawnan timus, ndang mahap. Sugaꞌ bong meꞌ sapantun lay na lungay maasin na, niyaꞌ na sina tapabalik. Yaꞌ na luu kapansahaliyan na samasakali. Sangkon kuwan kaam, daa palungayun bi kapansahaliyan bi ni pagkahi bi manusiyaꞌ. Maka ngulihal na pin kam meꞌ bi njawom kasalassayan ka sila.”