Malkus 8 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa makan jama mpat libu

¹ Na yaꞌ hallom, sakiyan na baw balik manusiyaꞌ pilay pa mman si Isa. Pag lay jaꞌ katis lutuꞌ da, lay linganan si Isa ga mulit na, boꞌ na halling,

² “Luuy ku la ni ga jama naa. Luu na tallu ngallaw halloman da ntuu mman ku, boꞌ yaꞌ na san luu takakan-kakan da.

³ Gampang ku la mapoleꞌ sila ni kalingantu da, taggahaꞌ lay na baw sila mintu kappisan ni tangngaꞌ lān. Kasohean tu, tā paglahat da llān.”

⁴ Pag tampung siga mulit na, “Noy baw tu la man tabi ngaddoꞌ sukup man makan sila meꞌ naa na eka da, boꞌ ni lahat yaꞌ maglumaꞌ lagi?”

⁵ Tilaw si Isa, “Dangom batang gi tinapay tabi?” Pag tampung da, “Pituꞌ sa.”

⁶ Pag-anu, lay sohoꞌ na baanan ga jama looy ningkōꞌ. Pag-anu, kinaddoꞌ na meꞌ na ga tinapay looy sikapitum batang boꞌ pinagsukuhan pa Tuhan. Pag lupus, pinong-pōng na meꞌ na, boꞌ sinongan pa mman ga mulit na nohoꞌ man makan baanan ga jama looy.

⁷ Maka luu gi du baw daying da dangkitiꞌ lay du pinagsukuhan meꞌ si Isa pa Tuhan, boꞌ sohoꞌ na man makan ga jama looy.

⁸ Dari siꞌ, lay na sila sikamimon mangan sampay sso na ga sila. Pag lupus, luu gi bay pumpung ga mulit na pituꞌ bakaꞌ mehe pannoꞌ leꞌ pisan tinapay ka daying bay takapin.

⁹ Boꞌ eka ga jama looy siꞌ bay mangan, luu ga mpat libu. Pag sso jaꞌ sila, lay na sila papoleꞌ si Isa,

¹⁰ boꞌ na dutai taꞌ kumpit ka ga mulit na pilay pa Dalmanuta.

Si Isa sinohoꞌ mōꞌ sipat kawasa Tuhan

¹¹ Takka da ndooy, luu na baw pasōng siga Parisi nual si Isa. Maksud da nuway-nuwayan iya. Dari lay sila nohoꞌ pinakitahan sipat kawasa bong bana-bana du ya bay lakka man Tuhan.

¹² Pag takale si Isa bitsala da, ilooy ma ngahelaꞌ ya inansong na, maka yuk na, “Kaam tu angkat-angkatan batnaa, ongoy tu subay na pin kam nohoꞌ pinakitahan sipat kawasa boꞌ bi pitsayaꞌ niyaku? Baan ta kam banahan, basta yaꞌ baw sina kam pakitahan ku.”

¹³ Pag-anu siꞌ, lay na ga si Isa ka ga mulit na palakka man ga Parisi looy. Maka lay na sila dutai balik taꞌ kumpit da palintas pa dambilaꞌ danaw.

Arat-tabiat siga Parisi ka Gubnul Herod ndalil pa pasulig

¹⁴ Na sila siꞌ tu palintas, lay takupan ga mulit na moo tinapay lutuꞌ da. Boꞌ tinapay taꞌ kumpit dambatang du.

¹⁵ Na sasang da masi ngalē, lay sila binandaan meꞌ si Isa, yuk na, “Paayad-ayad kam. Iyakinan bi pasulig siga Parisi ka Gubnul Herod.”

¹⁶ Na siga mulit na siꞌ tu yaꞌ tabista da iya ngandalil. Dari yuk da padisu-padisu, “Marean ta la ngkon na halling meꞌ naa sabap yaꞌ tabi bay kaboo tinapay.”

¹⁷ Na si Isa siꞌ tu, tasayu na du bong oy binitsala meꞌ da. Dari yuk na ninsila, “Ongoy subay na pin kam hanggaw pasal tinapay yaꞌ luu? Yaꞌ gi bitu hati kam kahati pasal aku! Tud awod kam la tinoan.

¹⁸ Ndaꞌ ku, luu baw mata bi, sugaꞌ yaꞌ du kam ngita. Luu baw tinga bi, sugaꞌ yaꞌ du kam kale. Yaꞌ na kilay taintom bi

¹⁹ waktu ku bay mong-mōng tinapay looy limam batang du man bay makan baanan ga jama looy lima libu? Dangoy bakaꞌ gi bay kumpo bi, ilooy ma bay takapin?” Pag tampung da siꞌ, “Sapu-duwa gi.”

²⁰ Maka yuk si Isa lagi, “Waktu ku bay mong-mōng tinapay looy pitum batang du man bay makan ga jama looy mpat libu, dangoy bakaꞌ gi bay kumpo bi, ilooy ma bay takapin?” Yuk da, “Pituꞌ gi.”

²¹ Dari yuk si Isa ninsila, “Bong meꞌ looy, ongoy baw taggahaꞌ masi gi kam yaꞌ kaindan?”

Si Isa ngulian jama buta

²² Na pag takka ga si Isa pa Betsayda ni dambilaꞌ danaw, luu na baw baanan jama moo disu lalla buta pa mman na. Pag-anu, lay sila maku junjung niiya nohoꞌ murut lalla looy siꞌ mari ya ngita na.

²³ Sugaꞌ lay doꞌ tondaꞌ si Isa lalla looy man tangan binoo palawak-lawak man kalumaan ndooy. Tā-tā jaꞌ siꞌ sila, ilooy ma lay luraan si Isa mata lalla looy. Pag-anu, boꞌ tinappak meꞌ na. Tilaw na ni lalla looy, “Ngita na ko?”

²⁴ Pag-anu, ilooy ma maglinga-linga na lalla looy boꞌ na halling, “Ngita na ku la ga jama lumān, sugaꞌ meꞌ bantuk poon kayu sila!”

²⁵ Dari ilooy ma tinappak na baw balik mata na meꞌ si Isa. Pag kallat lalla looy mata na, ilooy ma kaulian na ya sampay tallak na pangandaan na.

²⁶ Pag lupus, lay na ya sohoꞌ si Isa moleꞌ. Maka yuk na ni lalla looy, “Daa na ko pahās pa jawom daira nuntutan jama ga lay na ko kaulian.”

Si Pitel māꞌ bong soy si Isa

²⁷ Pag-anu, lay na baw pawus si Isa ka ga mulit na pa siga kawum ndooy ni Sesariya Pilipi. Sasang da lumān, tilaw na ni ga mulit na, “Bong ni bitsala jama, soy itu ku?”

²⁸ Tampung da, “Pamāꞌ kasohean, kau konoꞌ yana si Yahiya ma Tukang Mandi; yuk kasohean baw, kau konoꞌ Nabi Eliyas atawa disu nabi sarī man maruhuꞌ-ruhuꞌ luu na bay pinakallum.”

²⁹ “Na bong kaam,” yuk si Isa, “soy baw itu ku?” Tampung si Pitel, “Kau na bina Almasi, tukang nalamat ma bay njanjiꞌ meꞌ Tuhan.”

³⁰ Pag-anu siꞌ, lay na sila supali si Isa yaꞌ nohoꞌ māꞌ ni soysoy bong soy ya.

Si Isa nunaꞌ kapatoy na

³¹ Na puwas mandooy, lay na baw si Isa mahati siga mulit na bong oy katuwaꞌ niiya ni sinōng, yuk na, “Ndang lay na situ ginantaꞌ niyaku, yana Anak Manusiyaꞌ, natasan jinisan kabinsanaan. Boꞌ tinuwak lagi ku meꞌ siga matatoa ni agama ka ga imam langkaw sampay ga guru saraꞌ agama. Maka pinapatoy lagi ku. Sugaꞌ pag ina mintu taabut ni katallu ngallaw, llum na du sina ku pabalik.”

³² Na bay bitsala si Isa ilay siꞌ, tud lay na tinumlang meꞌ na. Dari pag takale si Pitel, ilooy ma lay doꞌ boo na si Isa palawak-lawak boꞌ na naggong, yuk na, “Uy Tuwan, daa ko ba halling meꞌ naa!”

³³ Sugaꞌ lay doꞌ pateleꞌ si Isa ngandaꞌ ni siga mulit na, boꞌ na mahallingan si Pitel, yuk na, “Lakka na ko man bihing ku Ibilis! Pamiki nu ina kahandak manusiyaꞌ, saꞌ ga kahandak Tuhan.”

³⁴ Pag-anu, lay na baw linganan si Isa baanan ga jama ndooy ka ga mulit na pa mman na boꞌ na halling, “Soysoy doman mmeꞌ niyaku subay tikutan na kahandak na bong pin taduwan na jaꞌ kahandak ku. Subay atas na manangkit tehang halliꞌ man na nilansang, boꞌ na patuhut niyaku. Hati na, subay atas na lumingkaꞌ njawom jinisan katiksaan ka kabinsanaan kalnaꞌ aku san man na matoy, boꞌ na kapa-mmeꞌ niyaku.

³⁵ Soysoy ina yaꞌ mean kahandak na kalnaꞌ aku ka umanat mahap, mastiꞌ sampulnaꞌ jaꞌ nyawa na labba man junyaꞌ sampay pa ahirat. Sugaꞌ soysoy ina numbul satu niiya meꞌ na nulut dī na halloman na ntuu ni junyaꞌ, tiksaꞌ nyawa na saumu.

³⁶ Jama meꞌ naa ina, san gi sina lay na takoleꞌ na mimon altaꞌ njawom junyaꞌ tuu, yaꞌ du luu pūs na bong tiksaꞌ du nyawa na.

³⁷ San du ina dangoy pilak bay tapumpung na, yaꞌ du sina sukup man na ngalakkat nyawa na man jawom katiksaan.

³⁸ “Jama ni angkat-angkatan batnaa ina tinagi buwat dusa. Yaꞌ sila kanaalla pa Tuhan. Sugaꞌ indanan bi. Soysoy ina iyaꞌ mangaku mmeꞌ niyaku atawa pun iyaꞌ mōꞌ tōꞌ ku, malaingkan iyaꞌ du ku mangaku iya sukuꞌ ku pag beleng ku, yana Anak Manusiyaꞌ, ddas ka kabantugan Mmaꞌ ku ka siga malaikat man sulgaꞌ.”