Malkus 7 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa nahawi siga Parisi

¹ Na disu llaw, luu na baw bay pilay pa mman si Isa baanan ga Parisi ka ga guru saraꞌ agama lakka man Jerusalem.

² Ndooy siꞌ, takita da na baw kasohean mulit si Isa yaꞌ san bay ngikut aturan agama meꞌ ngosoan tangan bong sila mangan. Dari ni bandingan da, yaꞌ sutsiꞌ tangan da ni mata Tuhan.

³ Batan aturan siga Yahudi awla na siga Parisi, yaꞌ dari mangan bong yaꞌ bay duhuꞌ ikut da lanan kabboꞌ-bboan da bay ngosoan tangan da.

⁴ Damikiyan, bong sila bay man tabuꞌ, yaꞌ du sila kakakan bong sila yaꞌ doꞌ bay duhuꞌ ngosoꞌ man da ngikut aturan kabboꞌ-bboan da. Maka meka gi silay jinisan aturan kabboꞌ-bboan da ikut da ni hāl meꞌ ngosoan ga sawan, karilu sampay ga siliꞌ.

⁵ Dari tilaw ga Parisi ka ga guru saraꞌ agama ni si Isa, “Ongoy lay ga mulit nu yaꞌ san ngikut aturan kabboꞌ-bboan tabi? Ndaꞌ kami, mangan jaꞌ sila san yaꞌ gi sutsiꞌ tangan da ni mata Tuhan.”

⁶ Pag tampung si Isa, “Kaam tu, magbawuꞌ-bawuꞌ jaꞌ kam sutsiꞌ. Tud lay du bana tuwaꞌ pa kaam palman ma bay sinuwatan meꞌ Nabi Isaya mattoꞌ, ilooy ma yuk Tuhan, ‘Ga jama tuu, bong ni bitsala pōꞌ man jawom behe da, maehe sila aku. Sugaꞌ njawom atay da, yaꞌ san hagaan ninsila kahandak ku.

⁷ Sumba da niyaku yaꞌ du luu pūs na, batan siga panohoan ma tinōꞌ meꞌ da, lay jaꞌ pinabuwat-buwat meꞌ manusiyaꞌ, saꞌ ga lakka man aku.’ ”

⁸ Dari yuk si Isa ninsila, “Kaam pun ilay meꞌ looy du. Batan bbuwatan bi mogbogan siga aturan manusiyaꞌ, boꞌ siga panohoan Tuhan tikutan bi na.

⁹ Tud alistu kam buwat daawa man bi nunggud ga panohoan Tuhan bong pin tabogbogan bi jaꞌ siga aturan kabboꞌ-bboan bi.

¹⁰ Saꞌ ba, luu panohoan Tuhan bay sinuwatan meꞌ Nabi Musa, ilooy ma yuk na, ‘Pag-aratan bi induꞌ-mmaꞌ bi?’ Maka yuk na, ‘Soysoy bay mitsala pangka ni mmaꞌ na atawa nneꞌ na subay pinapatoy.’

¹¹ “Boꞌ ningkaam, tōꞌ bi sarī. Pamāꞌ bi, bong induꞌ-mmaꞌ maku tulung man anak da, dari san anak da maan sila, ‘Yaꞌ luu sīn ku man nabangan kaam batan ituu ma luu niyaku, lay na pasarī ku para ni Tuhan.’

¹² Dari sabapan tōꞌ bi, sat bi saꞌ māꞌ, san tabi yaꞌ na nulung induꞌ-mmaꞌ tabi.

¹³ Sangkon, saꞌ ga bina oy, talloban bi na panohoan Tuhan bong pin tapaantup bi jaꞌ aturan kabboꞌ-bboan bi. Boꞌ meka gi sarī man naa pabuwat bi ma nulang ni kahandak Tuhan.”

Oy mattan makatamak ni jama?

¹⁴ Pag-anu siꞌ, lay na baw sohoꞌ si Isa baanan ga jama ndooy patapit. Luu jaꞌ siꞌ, yuk na ninsila, “Pakale doꞌ kam ka hatiyun bi banahan bitsala ku.

¹⁵ Oy-oy ina makanan ma isi jama pa jawom behe da, yaꞌ sina makatamak ninsila ni mata Tuhan. Arapun ilooy ya makatamak yana kalaatan ma pōꞌ man jawom atay da.

¹⁶ Kaam ma pakale ni bitsala ku, pahamun bi paayad.”

¹⁷ Lay jaꞌ siꞌ lakka si Isa ka ga mulit na man baanan ga jama looy, lay sila paasok pa jawom lumaꞌ. Pag-anu siꞌ, ilooy ma tinilaw du ya meꞌ siga mulit na pasal bay tōꞌ na siꞌ.

¹⁸ Yuk si Isa ninsila, “Hati, sampay kaam, yaꞌ gi du kina kam kahati? Subay siꞌ tahati bi na, oy-oy kakan jama, yaꞌ du luu katamak ninsila pa Tuhan

¹⁹ batan yaꞌ du sina tuwaꞌ pa jawom atay da. Oy-oy ina paasok pa jawom behe tuwaꞌ pa jawom battong ta sadjaꞌ, boꞌ na pinōꞌ du.” Na hantak bitsala si Isa ilay siꞌ, oy-oy jaꞌ makanan, yaꞌ luu haram.

²⁰ Yuk si Isa lagi, “Inaa ya ina katamak ni manusiyaꞌ yana jinisan kalaatan ma pōꞌ man jawom atay da.

²¹ Batan man jawom atay, luu pōꞌ jinisan pamiki maat meꞌ sapantun buwat kasabuhan danda-lalla, nangkaw, mapatoy,

²² magjina ka magnapsu mulakab. Damikiyan, luu du pōꞌ man jawom atay jama ngandahulakaꞌ, nipu, magkamuklahan, ngandangkiꞌ, mitna, ngabbu sampay buwat jinisan karupangan.

²³ Mimon kalaatan meꞌ looy ilay siꞌ, poonan da mastiꞌ lakka man jawom atay manusiyaꞌ. Siga pabuwatan meꞌ looy ilay, ilooy na silay bana katamak ni jama ni mata Tuhan.”

Pangando disu danda bangsa Sayropinisya ni si Isa

²⁴ Pag-anu, lay na baw ga si Isa lakka man Jalil song pilay pa disu lahat tapit pa daira Tayil. Takka ndooy siꞌ, lay doꞌ sila pahantiꞌ ni disu lumaꞌ. Na si Isa siꞌ tu, kainagon na, yaꞌ ya tasayu ga luu na ya ndooy. Sugaꞌ san meꞌ looy, masi du bay taaka jama.

²⁵ Ndooy siꞌ, luu disu danda anakan danda sineytan. Pag lay jaꞌ taaka na luu na si Isa ni lahat da, magti ya pilay pa mman na, boꞌ na sujud ni awpan na.

²⁶ Pag-anu, boꞌ na maku junjung niiya nohoꞌ llakkahan seytan anak na. Danda looy siꞌ tu bangsa Sayropinisya, saꞌ ya Yahudi.

²⁷ Dari pagka doman si Isa nongkad bong pooy basag pangando danda looy niiya, yuk na, “Subay bangsa Yahudi doꞌ paruhuꞌ ku tinabang. Bong ina kau ya paruhuꞌ ku, sibuꞌ du ka bay kaddoꞌ ku kinakan sinukuꞌ ni siga anak ku, boꞌ ndean na baw siga idoꞌ.”

²⁸ Pag tampung danda looy, “Bana sina Tuwan, sugaꞌ minsan ina ga idoꞌ, masi gi du dari mangan san lasa mimis ma bay talabuꞌ meꞌ siga anak-anak man lamisahan.”

²⁹ Yuk si Isa niiya, “Pagka meꞌ naa tampung nu, tumatandaꞌ luu pangando nu niyaku. San ko moleꞌ na. Lay na du silay pōꞌ seytan man jawom baran anak nu.”

³⁰ Pag poleꞌ danda looy, tud mattan du lay na lakka seytan man baran anak na, batan ndaꞌ na sannang na anak na pabāk taꞌ bangkuꞌ.

Lalla bisu ka yaꞌ tattas bitsala na kaulian meꞌ si Isa

³¹ Na pag lakka ga si Isa man tagan Tayil, lay sila pingkaꞌ man jawom daira Saydon sampay lay na sila nakka Danaw Jalil ndooy ni Dekapolis.

³² Ndooy siꞌ, luu lalla bisu maka yaꞌ tattas bitsala na bay binoo pa mman si Isa. Dari lay sila maku junjung ni si Isa nohoꞌ nappak bumbunan lalla looy mari kaulian.

³³ Dari lay binoo meꞌ si Isa lalla looy palawak dangkitiꞌ man baanan ga jama ndooy. Pag-anu, boꞌ lay sallokan na siga timbōꞌ na pa jawom lowang tinga lalla looy sikaduwambilaꞌ. Pag lupus, lay na baw luraan na timbōꞌ na, boꞌ na murut dallaꞌ lalla looy.

³⁴ Pus meꞌ looy, lay na baw pahangad si Isa taꞌ langit sambayan na ngahelaꞌ inansong na, boꞌ na halling, “Eppata.” (Hatiyan na, “Bukaꞌ na kam!”)

³⁵ Dari ilooy ma magti kale du lalla looy sampay tattas na ga bitsala na.

³⁶ Pus meꞌ looy, lay gi si Isa ngamay-ngamayan baanan jama ndooy yaꞌ nohoꞌ māꞌ pasal ilooy ma bay tasakup da. Sugaꞌ minsan sila bay sinupali, mangkin lay gi tinanyagan meꞌ da.

³⁷ Dari siꞌ, sagannap ma bay kaaka, biddaꞌ na haylan da sampay yuk da, “Mimon ma pabuwat na, yaꞌ luu saꞌ yaꞌ mahap. Minsan jama ma yaꞌ kale atawa yaꞌ kabitsala, kaulian na du meꞌ na.”