Malkus 6 - Sabahagiꞌ Kitab Tawrat: Panagnaan ni Awwal Jaman maka Kitab Injil

Jama Nasaret yaꞌ pitsayaꞌ ni si Isa

¹ Pag-anu, lay na ga si Isa bbeleng ka ga mulit na pa Nasaret, yana kawum man na bay sulig.

² Pag taabut Llaw Pahali, lay na baw ya pa langga magnasihat. Pag lay jaꞌ takale ga jamaa ndooy, meka sila bay inu-inu. Yuk dangan pa dangan, “Ninggai na la man lalla naa bay koleꞌ pangahati lawom meꞌ naa ka kawasa na buwat pakaradjaan kahaylan-haylan?

³ Tukang kayu jaꞌ bina ya. Saꞌ ba, anak si Mariyam ya? Maka saꞌ ba, danganakan na yana ga si Yaꞌkub, si Joses, si Judas ka si Saymon? Sampay ga danganakan na ma danda, dambuwaꞌ du tabi lahat.” Dari yaꞌ sila kuhi pitsayaꞌ niiya.

⁴ Dari yuk si Isa ninsila, “Bong inawnan nabi, mastiꞌ binantug jaꞌ sina paninggai-paninggai jaꞌ ya. Sugaꞌ bong kinawnan jama ni daira man na bay sulig, minsan lūng-kampung na yaꞌ du magmaltabat niiya.”

^5-6 Dari eleng-eleng na si Isa pagka yaꞌ kuhi pitsayaꞌ siga jama ndooy. Sangkon yaꞌ na meka pakaradjaan kahaylan-haylan bay tapōꞌ na ndooy. Kamasaꞌ luu gi du baw disu-disu jama saki bay kaulian poonan na bay nappak bumbunan da. Pus meꞌ looy, lay na ya ngalataan kakawum-kawman sarī masaplag umanat Tuhan.

Siga mulit si Isa sikasapu-duwa sinohoꞌ masaplag

⁷ Na disu llaw, lay linganan si Isa ga mulit na sikasapu-duwa pa bihing na. Luu jaꞌ siꞌ, lay sila sohoꞌ na ngalataan lahat masaplag duwa-duwa maglimbang paninggai-paninggai jaꞌ tiluꞌ da. Maka lay gi sila buwanan na kawasa-kapatut malakka siga seytan.

⁸ Tugun na ninsila, “Pag lumān bi, daa na kam moo oy maka oy na. San lutuꞌ, bāg, atawa sīn, daa na du. Dari baw kam moo tungkud

⁹ sugaꞌ bong sinilas, ngkod ilooy jaꞌ ma ndang lay na patuk bi. Badjuꞌ pasaynan pun, daa na du kam moo.

¹⁰ “Na bong mintu kam bay hinasi leꞌ jama nohoꞌ pahantiꞌ ni lumaꞌ da, ndooy na jaꞌ mman bi halloman bi yaꞌ gi palakka man daira da.

¹¹ Sugaꞌ bong baw kam bay takka ni disu daira boꞌ bi yaꞌ hinasi atawa yaꞌ pinaruli umanat bi, lakka na kam mandooy. Sugaꞌ papasan bi doꞌ duhuꞌ momok tanaꞌ lahat da ma ngakkot ni sinilas bi tandaꞌ yaꞌ na luu lamud bi ninsila.”

¹² Dari siꞌ, lay na sila ngalataan lahat masaplag ni jama nohoꞌ nawbatan dusa da.

¹³ Lay gi sila malakka jinisan seytan man jawom baran jama. Maka meka gi jama sakihan lay na du kaulian meꞌ da pag lay jaꞌ puusan da bumbunan da ka insallan.

Kapatoy si Yahiya ma Tukang Mandi

¹⁴ Na yaꞌ gi siꞌ hallom, lay na baw kaakahan Gubnul Herod pasal si Isa batan song patanyag na pin awon na. Habal takka pa mman na, baꞌ-bāꞌ kasohean, “Iya na wapat si Yahiya ma Tukang Mandi llum na baw pabalik. Ilooy na silay kon na luu kawasa na mōꞌ pabuwatan kahaylan-haylan.”

¹⁵ Tanggap kasohean baw, Nabi Eliyas konoꞌ ya luu na kaluwa pabalik. Kuwan kasohean māꞌ iya disu nabi sarī meꞌ karuha kanabi-nabihan kasohean mattoꞌ.

¹⁶ Dari pag tahabal Gubnul Herod halling ga jama meꞌ looy, yuk na, “Ilooy na silay Yahiya ma bay sohoꞌ ku pinonggolan kallong na! Luu na hati llum pabalik!”

¹⁷ Ngkon ilay Gubnul Herod bay mitsala meꞌ looy sabapan ilooy ma bay pabuwat na ni si Yahiya. Batan iya bay nohoꞌ si Yahiya sinungkuban sampay iningkotan boꞌ njīl. Kon na ilay bay nungkub sabap bay ya sinahawi meꞌ si Yahiya pasal kalaatan na bay ngagaw nda si Pilip, yana si Herodiyas. Boꞌ si Pilip ilay yana ariꞌ Gubnul Herod mismu.

¹⁸ Daran yuk si Yahiya ni Gubnul Herod, “Tagga bina ni saraꞌ bong ko sitampu ka nda danganakan nu.”

¹⁹ Dari sabap si Yahiya bay halling meꞌ looy, tud maat atay si Herodiyas niiya sampay kainagon na nohoꞌ na ya pinapatoy. Sugaꞌ yaꞌ gi bay luu dapat na

²⁰ sabap lay sohoꞌ Gubnul Herod si Yahiya njagahan mari yaꞌ kongoy-kongoy. Mehe maltabat Gubnul Herod ni si Yahiya batan katoonan na si Yahiya jama intong sampay sutsiꞌ pa Tuhan. Sarī gi, tigiꞌ ya pakale ni tōꞌ si Yahiya. Sat na jaꞌ, daran na baw ya takkahan hanggaw bila ya pakale.

²¹ Sugaꞌ song hallom, luu na dapat si Herodiyas ngahawasan paddi inansong na. Dari meꞌ tuu silay: Pag taabut haliyan buwan man Gubnul Herod bay pinamaddihan, lay ya ballang mehe. Lay kaddoꞌ na ga kunsihal na, siga komandel sundalu na sampay ilooy kasohean ma balkanan ndooy ni Jalil.

²² Pag-anu siꞌ, paasok na baw anak si Herodiyas budjang mayla ni awpan Gubnul Herod ka ga soheꞌ na ma bay ngaluruk. Boꞌ tud bay kasulutan sila sikamimon. Dari yuk Gubnul Herod ni budjang looy, “Maku jaꞌ ko oy-oy karomanan nu, basta dean ku jaꞌ sina kau.”

²³ Pag-anu siꞌ, lay gi duhunan na bay bitsala na siꞌ, yuk na, “Oy-oy paku nu Nang, sapahan ku baw basta dean ku jaꞌ sina kau san gi gantaꞌ tongaꞌ sakup ni pamarinta ku!”

²⁴ Bbuwatan budjang looy baw siꞌ tu, lay doꞌ pōꞌ nilaw nneꞌ na, yuk na, “Oy tu la Neꞌ paku ku?” Pag tampung nneꞌ na, “Pakuhun kōk si Yahiya ma Tukang Mandi.”

²⁵ Dari magti du budjang looy pabeleng pa mman ga Gubnul Herod boꞌ na māꞌ, “Tuwan Gubnul, paku ku ningkau, deanun na aku deꞌ-dēꞌ takōk si Yahiya ma Tukang Mandi inannaꞌ taꞌ tām.”

²⁶ Pag takale jaꞌ meꞌ Gubnul Herod paku na, tud bay sasso ya. Sugaꞌ yaꞌ na bay luu dapat na mawiꞌ bay bitsala na batan lay gi sapahan na ni pag-awpan mimon jama ma bay ngaluruk.

²⁷ Dari lay du magti Gubnul nohoꞌ disu sundalu monggolan kallong si Yahiya, boꞌ nohoꞌ binoo kōk na pa mman budjang looy. Takka jaꞌ siꞌ sundalu looy pa jawom jīl, lai na ponggolan na kallong si Yahiya.

²⁸ Pag-anu, lay na boo na kōk na pilay taꞌ tām sampay lay na songan na pa mman budjang looy. Luu jaꞌ siꞌ mman na, lay na dean na pa mman nneꞌ na.

²⁹ Taaka jaꞌ siꞌ meꞌ siga mulit si Yahiya, ilooy ma lay na kaddoꞌ da mayat na sampay lay na kinubu.

Si Isa makan jama labi lima libu

³⁰ Na balik ta pa siga rasul si Isa, pag beleng da bay ngalataan lahat, nuntut na sila ni si Isa mimon bay pabuwat da sampay ilooy ma bay tōꞌ da.

³¹ Pag lupus, yuk si Isa ninsila, “Sūng tabi. Pilay doꞌ tabi pa lahat yaꞌ magjama pahali-hali, kita-kitabi jaꞌ.” Ngkon na ilay bay halling meꞌ looy sabap meka jama salin-sunuꞌ na pa mman na ngabut sampay yaꞌ na san ga luu masa man da mangan ka ga rasul na.

³² Dari siꞌ, sila-sila du bay dutai taꞌ kumpit pilay pa lugar yaꞌ magjama.

³³ Sugaꞌ meka du bay ngita sila lakka sampay taatag da du bong song paninggai tiluꞌ da. Dari sakiyan du jama man siga kawum lahat looy bay sonse nusu bihing sampay duhuꞌ gi bay takka pilay man sila.

³⁴ Pag duwai ga si Isa man taꞌ kumpit, pag ndaꞌ na, ndang sakiyan na jama ngagad iya. Iya siꞌ tu kapaluuy na ninsila sabap subay ga sila baanan bili-bili ma yaꞌ luu tukang ngipat sila. Dari ilooy ma nagnaꞌ na baw ya noan sila kajinisan.

³⁵ Pag taabut kohap, pasōng na ga mulit si Isa pa mman na, yuk da, “Tuwan, kohap na bitu la lahat. Boꞌ lahat tuu bitu lau-lau.

³⁶ Daa busung, sohoun na ga jama looy pilay pa kakawum-kawman lahat tuu mallihan dī da kinakan.”

³⁷ Sugaꞌ yuk si Isa, “Kaam sa ba makan sila.” Pag halling da, “Noy baw tu la Tuwan man tabi koleꞌ sīn man mallihan baanan ga jama naa meꞌ naa na eka da? Daa busung, san bitu kitabi bay kaballi tinapay hagaꞌ gadji wawum buwan, masi du yaꞌ sukup man makan sila.”

³⁸ Pag tampung si Isa, “Ndaun bi teꞌ bong dangom batang tinapay tabi.” Pag ndaꞌ da, yuk da, “Limam batang du bitu ka duwa lisu du daying.”

³⁹ Pag-anu siꞌ, lay na si Isa nohoꞌ ga mulit na nappuk-nappuk baanan ga jama ndooy, boꞌ nohoꞌ ningkōꞌ taꞌ kuhun.

⁴⁰ Pag tingkōꞌ da, kasohean baanan dahatus-dahatus, kuwan kasohean lima-limampūꞌ.

⁴¹ Pag-anu, lay na kaddoꞌ si Isa tinapay looy sikalimam batang ka daying looy sikaduwa, boꞌ na pahangad pa taꞌ langit sambayan na muwan pagsukuhan pa Tuhan. Pag lupus, pinong-pōng na meꞌ na ga tinapay looy ka ga daying looy boꞌ sinongan na pa mman siga mulit na nohoꞌ man makan ga baanan jama looy.

⁴² Dari siꞌ, lay na sila sikamimon mangan sampay sso na ga sila.

⁴³ Pag lupus, luu gi bay pumpung da sapu-duwa bakaꞌ pannoꞌ leꞌ pisan tinapay ka daying bay takapin.

⁴⁴ Boꞌ eka ga jama looy siꞌ bay mangan, luu ga lima libu kalallahan, sarī gi karandahan ka ga anak-anak.

Si Isa lumān taꞌ kuwit boheꞌ

⁴⁵ Paddus na pin sila mangan, lay na baw sohoꞌ si Isa ga mulit na dutai taꞌ kumpit nohoꞌ duhuꞌ man iya palintas pa Betsayda. Kuwan iya, lay doꞌ tamban mapoleꞌ ga baanan jama looy.

⁴⁶ Lay jaꞌ siꞌ moleꞌ siga jama looy, lay na baw si Isa patukad pa taꞌ punu maku duwaa pa Tuhan.

⁴⁷ Iya siꞌ tu, ngabut sampay lawom na bahangi, masi na pin ya ndooy dangan-dangan na. Kuwan ga mulit na taꞌ kumpit looy siꞌ, lay na nakka pa tangngaꞌ danaw.

⁴⁸ Pag deꞌ subu, takita na meꞌ si Isa ga mulit na man katāhan kaawran pasōng sabap nugguꞌ sila baliyu landos. Dari lay na ya patuhut ninsila lumān jaꞌ taꞌ kuwit boheꞌ. Na adak jaꞌ siꞌ ya paruhuꞌ man sila,

⁴⁹ takita da na ya lumān taꞌ kuwit boheꞌ, sugaꞌ kanna da ga tubangkit. Dari kakillahapan na sila

⁵⁰ sinawan niiya. Sugaꞌ magti mitsala si Isa ninsila, yuk na, “Daa kam ba tawu. Aku bitu la. Njawom iman teꞌ kam ba.”

⁵¹ Pag-anu, lay na ya dutai pa taꞌ kumpit da sampay sarunduun du lay patagong baliyu looy. Dari tud bay kahimattaan sila.

⁵² Batan ni kabilod da, masi yaꞌ tabistu da bong soy ya san bay na tasakup da ga tinapay looy bay pinaekahan meꞌ na.

Si Isa ngulian jama ndooy ni Genesaret

⁵³ Takka jaꞌ siꞌ sila pa dambilaꞌ danaw, lay sila parungguꞌ ndooy ni Genesaret.

⁵⁴ Pag duwai si Isa man taꞌ kumpit, magti ya takila meꞌ siga jama ndooy.

⁵⁵ Dari lay sila sonse ngalataan lahat mahati luu na takka si Isa. Dari jama siꞌ tu, lay du bahuklud pilay pa mman na ngalanggung jama sakihan taꞌ patulihan da.

⁵⁶ Maka paninggai-paninggai jaꞌ ya, ni kakawum-kawman, ni siga daira atawa ni siga tabuꞌ, luu jaꞌ jama ngannaꞌ siga soheꞌ da sakihan ni bihing lān mehe. Dari pag pingkaꞌ si Isa, bbuwatan da maku junjung niiya nohoꞌ mapurutan ga soheꞌ da ma sakihan san lasa ni bihing-bihing juba na. Boꞌ lay jaꞌ du kaulian soysoy bay kapurut.