Malkus 5 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa malakka siga seytan man jawom baran disu lalla

¹ Takka jaꞌ siꞌ sila pa dambilaꞌ danaw, lay sila parungguꞌ ndooy ni Gerasa.

² Pag duwai si Isa man taꞌ kumpit, luu na baw pasōng pa mman na disu lalla sineytan bay lakka man kakubuhan

³ man na patannaꞌ. Yaꞌ na luu dapat jama ngingkotan iya

⁴ batan san ya daran na bay pinusas ka karina battis-tangan na, bakkat jaꞌ du leꞌ na, boꞌ yaꞌ luu jama kasapad iya.

⁵ Sangom-llaw bbuwatan na maglanan ni tagan kakubuhan sampay ni kapunu-punuhan magkillahapan sampay makatan dī na na ga ka batu tawom.

⁶ Pag takita na jaꞌ siꞌ si Isa ni katāhan, ilooy ma lay ya sonse pa mman na boꞌ na sujud ni awpan na.

^7-8 Dari lay sohoꞌ si Isa seytan na pōꞌ man jawom baran na. Pag-anu, magti ngahowap seytan looy, yuk na, “Batōy nu itu ku, Isa? Katoonan ku du bina kau Anak Tuhan Mahatinggi! Junjung ku na ningkau ni awon Tuhan, baan nu na ku yaꞌ ko midjalaꞌ aku.”

⁹ Tilaw si Isa niiya, “Soy ina awon nu?” Pag tampung seytan looy, “Aku tu si Libuhan, batan biddaꞌ na situ eka kami njawom lalla tuu.”

¹⁰ Pag-anu siꞌ, tinuyuan na pin meꞌ seytan looy nganjunjung si Isa pin yaꞌ jaꞌ sila nohoꞌ lahi man lahat looy.

¹¹ Na ndooy siꞌ, luu baanan bawi inipat magkakanan ni tabbis punu.

¹² Dari siꞌ, bbuwatan siga seytan njawom baran lalla looy siꞌ nganjunjung ni si Isa, yuk da, “Bong dari ningkau, pasayin na jaꞌ kami pa jawom baran baanan bawi looy.”

¹³ Dari lay na sila nduwan sampay lay na du sila pōꞌ, boꞌ da paasok pa jawom baanan bawi looy. Pag-anu siꞌ, ilooy ma magti magsonsehan baanan ga bawi looy palūd pa jawom danaw sampay lay na katis limbo. Eka bawi looy siꞌ, luu ga duwa libu.

¹⁴ Pag takita meꞌ siga tukang ngipat bawi looy meꞌ looy, magti sila sonse pa daira sampay pa siga kawum ni bihing na nuntutan jama mimon ma bay tasakup da. Dari meka na jama bay bahuklud pilay ngandaꞌ.

¹⁵ Takka jaꞌ siꞌ sila pa mman si Isa, takita da na lalla looy ma bay inasok meꞌ libuhan seytan ningkōꞌ sampay lay na ga mamakoy maka basanayan na pamiki na. Dari takkahan tawu na ga sila.

¹⁶ Pag-anu siꞌ, lay na sila tinuntutan meꞌ sagannap ma bay kasakup bong oy bay katuwaꞌ ni lalla looy siꞌ sampay na ga bawi looy.

¹⁷ Sugaꞌ pag lay jaꞌ siꞌ kabaan ga jama looy, ilooy ma lay sila nganjunjung si Isa nohoꞌ na lakka man lahat da.

¹⁸ Pag dutai ga si Isa pa taꞌ kumpit lān da na siꞌ lakka, kuwan lalla looy siꞌ ma bay sineytan, lay na muhun mmeꞌ.

¹⁹ Sugaꞌ yaꞌ bay kuhi si Isa, gam pin yuk na, “Gam na ko ba moleꞌ pa mman ga lūng-kampung nu boꞌ da baan nu mimon bay pabuwat Tuhan ningkau sampay ehe timbang na ni jataꞌ nu.”

²⁰ Dari lay na lakka lalla looy sampay lay na ya ngalataan lahat ndooy ni Dekapolis nuntut mimon bay pabuwat si Isa niiya. Dari sagannap ma bay kabaan, tud bay mehe meꞌ da inu-inu.

Anak si Jayrus maka disu danda ma katumpahan lahaꞌ

²¹ Pag-anu, lay na baw balik ga si Isa palintas pa dambilaꞌ danaw. Pag duwai da ni tapiyan, yaꞌ na baw taambat manusiyaꞌ nampang iya.

²² Yaꞌ hallom, takka na baw disu pa-mmean langga inawnan si Jayrus. Takita na jaꞌ si Isa, ilooy ma lay ya magti sujud ni awpan na

²³ sambayan na maku junjung niiya, yuk na, “Tuwan, luu la anak ku magkamatoy-matoy na, boꞌ isu-isu du silay anak ku danda. Bong siꞌ kadarihan ningkau, mmeꞌ doꞌ ko niyaku boꞌ tappakun doꞌ bumbunan na mari kaulian.”

²⁴ Dari lay du mmeꞌ si Isa. Kuwan ga jama ndooy siꞌ tu, tud meka patuhut sampay magdogsog-dogsog na ga.

²⁵ Njawom baanan ga jama looy siꞌ, luu disu danda sapu-duwan taun na halloman na daran katumpahan lahaꞌ.

²⁶ Minsan meka na duktul man na bay nguliꞌ, yaꞌ du ya bay kaulian, gam pin magdaruhun lagi. Sampay lay na ga katis altaꞌ na man na bay nguliꞌ.

^27-28 Dari pagka ndang bay taaka na habal pasal si Isa, honaꞌ-honaꞌ na, “Bong tu lay jaꞌ tapurut ku san lasa juba na, kaulian na situ ku.” Dari lay ya magtuyuꞌ papassūt pa dambulihan si Isa boꞌ na murut juba na.

²⁹ Pag-anu siꞌ, sarunduun du lay banti lahaꞌ na tumpa, sampay takissa na na parasahan na kaulian.

³⁰ Kuwan si Isa baw siꞌ tu, takissa na na luu kawasa bay pōꞌ man jawom baran na. Dari lay ya pateleꞌ pa dambulihan ngandaꞌ ni baanan looy siꞌ sambayan na nilaw, yuk na, “Soy lay siꞌ bay murut juba ku?”

³¹ Yuk ga mulit na baw siꞌ tu, “Uy Tuwan, meꞌ tuu na eka manusiyaꞌ magdogsogan na, nilaw gi ko bong soy bay murut kau!”

³² Sugaꞌ si Isa baw siꞌ tu amu-amu maglinga-linga miha bong soy bay murut iya.

³³ Kuwan danda looy siꞌ tu, pagka katoonan na lay na ya kaulian, ilooy ma pasōng na ya sujud ni awpan si Isa mipig na ni katawu na. Maka lay na ya magsabanna iya bay murut.

³⁴ Dari yuk si Isa ni danda looy, “Nang, ilooy ilay siꞌ man nu lay na kasay sabapan pangando nu. San ko moleꞌ na. Pasannangun na atay nu. Lay na du lakka saki nu.”

³⁵ Sasang si Isa masi mitsala ni danda looy, luu na takka siga jama man lumaꞌ si Jayrus. Yuk da ni si Jayrus, “Daa na ba pahusaan tabi Tuwan Guru naa. Lay na la taabut anak nu.”

³⁶ Sugaꞌ pag takale si Isa bay halling da, yuk na ni si Jayrus, “Daa ko ba hanggaw. Mangando jaꞌ ko niyaku.”

³⁷ Pag-anu, ilooy ma lay jaꞌ sohoꞌ si Isa baanan ga jama looy tamban ndooy. Kuwan sila ka si Jayrus lay na palanja. Ilooy du bay boo da si Pitel maka ilooy ma duwa magdanganakan yana si Yaꞌkub ka si Yahiya.

³⁸ Takka jaꞌ siꞌ sila pa lumaꞌ si Jayrus, takita da na jama maghiposan nangis sampay killahap mag-ulawi.

³⁹ Lay jaꞌ siꞌ ga si Isa paasok, yuk na ni ga jama looy, “Ongoy doꞌ tu kam hipos sampay nangis? Yaꞌ du bilay matoy anak-anak looy, arapun tuli jaꞌ silay.”

⁴⁰ Pag takale da meꞌ looy, lay jaꞌ ya pinatattohan meꞌ da. Dari lay doꞌ sila sohoꞌ si Isa pōꞌ sikamimon, boꞌ na moo ga induꞌ-mmaꞌ anak-anak looy ka ga mulit na ilooy siꞌ ma tallu pa jawom bilik man anak-anak looy.

⁴¹ Pag-anu, inantanan na meꞌ si Isa tangan anak-anak looy sambayan na halling niiya ni pallun Yahudi, “Talita, kum.” Hatiyan na, “Nang, bangun na ko.”

⁴² Boꞌ magti du bangun anak-anak looy sampay lay na ga magliputan lumān. Umu na ilay siꞌ, sapu-duwan taun. Dari siꞌ tud bay kahimattaan siga induꞌ-mmaꞌ na.

⁴³ Sugaꞌ lay sila inamay-amayan meꞌ si Isa yaꞌ nohoꞌ māꞌ ni jama bong oy bay pabuwat na. Maka lay na sohoꞌ na anak-anak looy pinakan ninsila.