Malkus 4 - Sabahagiꞌ Kitab Tawrat: Panagnaan ni Awwal Jaman maka Kitab Injil

Dalil pasal jama naburan bani

¹ Pag-anu, lay na baw balik si Isa nōꞌ ndooy ni bihing Danaw Jalil. Sugaꞌ pagka sakiyan na jama ngandogsog iya, lay ya dutai ningkōꞌ taꞌ bagung ma tapit pa bihing. Kuwan baanan ga jama looy siꞌ tu, lay na jaꞌ ndooy ni tapiyan pakale niiya.

² Iya siꞌ bay nōꞌ, meka dalil bay pakoy na. Disu meꞌ tuu, yuk na,

³ “Pakale doꞌ kam. Luu disu jama lay naburan bani ni huma na.

⁴ Pag sabud na, kasohean lay tumiluꞌ pa tangngaꞌ lān sampay lay katis kinakan meꞌ siga manuk-manuk.

⁵ Kuwan kasohean bani, lay tumiluꞌ pa jawom kabatuhan dangkitiꞌ du tanaꞌ na. Dari lay pasapput deꞌ-dēꞌ tomoꞌ bani looy sabap yaꞌ bay lawom man da njawom tanaꞌ.

⁶ Sugaꞌ pag pasuꞌ jaꞌ llaw, yaꞌ hallom, lay du lūs tinanom looy sampay lay na ngalayu sabap yaꞌ bay nganggamut pa lawom.

⁷ Kuwan kasohean bani, lay tumiluꞌ pa jawom lumput itingan. Pag tomoꞌ na, yaꞌ kuhi buwaꞌ batan lay limbo meꞌ lumput.

⁸ Kuwan kasohean bani, lay tuwaꞌ ni tanaꞌ mahap. Dari siꞌ, mahap meꞌ da sulig sampay lay na buwaꞌ. Kasohean, eka buwaꞌ na njawom dampoon lipat min tallumpūꞌ; kasohean lipat min nnompūꞌ; kuwan kasohean, sampay lipat min dahatus.”

⁹ Pag-anu, yuk si Isa lagi, “Kaam ma pakale ni bitsala ku, pahamun bi paayad.”

¹⁰ Pag lay jaꞌ moleꞌ ga baanan jama looy siꞌ, ilooy sa tamban ni si Isa yana ga rasul na sikasapu-duwa ka siga mulit na kasohean. Pag-anu siꞌ, tinilaw na baw ya meꞌ da bong oy kamaatunan dalil looy siꞌ.

¹¹ Yuk si Isa ninsila, “Ohoꞌ, baan ta sa kam, batan ndang bay sina sinukuꞌ ningkaam pinahatiyan hāl pamarinta Tuhan ma yaꞌ gi bay lahil maruhuꞌ. Sugaꞌ bong ni siga jama sarī ma yaꞌ pitsayaꞌ niyaku, ngandalil jaꞌ ku man ku noan sila.

¹² Jama meꞌ sila ina, tuwaꞌ pa sila na bay halling njawom kitab, ilooy ma yuk na, ‘San ina sila ngandaꞌ, yaꞌ du sila kakila. San sila pakale, yaꞌ du sila kuhi kahati. Bong siꞌ ilay saꞌ meꞌ looy, mastiꞌ lay na bay tawbatan da dusa da boꞌ da inampun na meꞌ Tuhan.’ ”

Si Isa makkasan kamaatunan dalil pasal jama naburan bani

¹³ Pag-anu, yuk si Isa ninsila, “Bong yaꞌ san bay tahati bi dalil looy siꞌ samura-mura na, pooy na baw mintu meꞌ bi kahati bong ku makoy ga dalil sarī?

¹⁴ “Na kamaatunan dalil looy ilay siꞌ meꞌ tuu: Bani looy ilay siꞌ ma bay sinaburan yana umanat Tuhan pinasaplag.

¹⁵ Kuwan tanaꞌ ni tangngaꞌ lān man bani looy bay tumiluꞌ, tuwaꞌ pa sagannap ma bay kale umanat Tuhan, sugaꞌ magti ndagmit meꞌ Ibilis man jawom atay da.

¹⁶ “Kuwan tanaꞌ looy ma njawom kabatuhan man bani looy bay tumiluꞌ, tuwaꞌ pa sagannap ma bay kale umanat Tuhan sampay magti pitsayaꞌ ni kagāk da.

¹⁷ Sugaꞌ pagka yaꞌ bay nganggamut pa lawom umanat looy njawom atay da, yaꞌ du hallom tatasan da pitsayaꞌ. Pag luu jaꞌ kabinsanaan atawa laug tuwaꞌ njataꞌ da sabap meꞌ da pitsayaꞌ ni umanat Tuhan, siglaꞌ du sila patatak.

¹⁸ “Kuwan tanaꞌ looy ma meka lumput itingan na man bani looy bay tumiluꞌ, tuwaꞌ pa sagannap ma bay kale umanat Tuhan sampay pitsayaꞌ,

¹⁹ sugaꞌ wā sila hanggaw ni hāl meꞌ da llum ni junyaꞌ. Taboo-boo sila magsiꞌ meꞌ napsu da ni sīn sampay ni kajinisan. Dari song hallom, umanat Tuhan njawom atay da, bong dalil ta pa tinanom, lay na limbo leꞌ lumput sampay yaꞌ du buwaꞌ.

²⁰ “Boꞌ tanaꞌ looy ma mahap man bani looy bay sinaburan, tuwaꞌ pa sagannap ma bay kale umanat Tuhan sampay kinanna meꞌ da banahan. Pag toklas na, jinisan kaayaran takita ni kaallum da. Kaayaran da ina, bong dalil ta pa tinanom, kasohean buwaꞌ lipat min tallumpūꞌ, kasohean lipat min nnompūꞌ, kuwan kasohean sampay lipat min dahatus.”

Kabanahan yaꞌ dari tinapuk

²¹ Pag-anu, yuk si Isa, “Kaam ina, katoonan bi na kabanahan. Sangkon daa na tapukun bi. Bong dalil ta pa palitaan, yaꞌ sina luu jama pus na nantikan palitaan tinangkopan na baw ka undam atawa inannaꞌ ndiyoꞌ kantil. Mastiꞌ gowet na jaꞌ sina pa jataꞌ supaya karantaan mimon njawom lumaꞌ.

²² Intong na, pag pōꞌ kabanahan, mimon ma bay llimbuhan, pinalahil na. Damikiyan, mimon ina ma bay sinipuk, kinatoonan na.

²³ Na kaam ma pakale ni bitsala ku, pahamun bi paayad.”

^24-25 Yuk si Isa lagi, “Isbatun bi paayad tōꞌ ku. Batan mangkin ina kam magtuyuꞌ ngahati, mangkin pasōng gi pangahati bi. Boꞌ na, sinampunan gi sina meꞌ Tuhan. Sugaꞌ soysoy ina yaꞌ ngisbat bitsala ku, san luu pangahati na dangkitiꞌ, kinaddoan du.”

Pamarinta Tuhan ndalil pa bani sinaburan

²⁶ Yuk si Isa lagi, “Meꞌ tuu situ karuha pamarinta Tuhan: Luu jama bay naburan bani njawom huma na.

²⁷ Llaw pa dangallaw, sasang na tuli-matiꞌ, bani looy mastiꞌ tomoꞌ jaꞌ maka suligan didihan da na sadjaꞌ. Boꞌ jama looy ilay siꞌ ma bay nabud, yaꞌ du tahati na bong pooy meꞌ da sulig.

²⁸ Tanaꞌ looy na mismu kasulig ni bani looy. Duhuꞌ takita yana tomoꞌ. Song hallom, pasapput na buwaꞌ da sampay katting na isi da.

²⁹ Pag tahak na banahan, ilooy ma kinattom na meꞌ jama looy sabap taabut na timpu na.”

Pamarinta Tuhan ndalil pa bigi mustard tinanom

³⁰ Maka yuk si Isa, “Ngandalil gi ku pamarinta Tuhan

³¹ pa bigi mustard bay tinanom njawom huma. Minsan lannik bigi looy man sikamimon,

³² pag sulig na, iya gi pinakamehe man mimon jambangan sampay lay na dari kayu. Ngangkang na engas na sampay pinagsangan na meꞌ manuk-manuk.”

³³ Sarī man ga ilooy siꞌ, meka gi dalil man si Isa bay masaplag umanat Tuhan ni baanan jama ndooy, gantaꞌ ma takaya pangahati da.

³⁴ Tuktuk na noan sila, wā ya ngandalil. Sugaꞌ pag taabut sila-sila sa ka ga mulit na, lay du passaꞌ na kamaatunan siga dalil looy labbasakayi.

Si Isa mataddoꞌ libut

³⁵ Pag taabut deꞌ kohap, yuk si Isa ni ga mulit na, “Palintas doꞌ kitabi pa dambilaꞌ danaw.”

³⁶ Dari lay du mbanan ga mulit na baanan jama ndooy sampay lay na sila mmeꞌ dutai pa taꞌ kumpit ma ndang man si Isa bay pauwan. Pag tuwak da, luu gi kasohean kumpit bay pahaboy ninsila.

³⁷ Sasang da siꞌ ngalē pa dambilaꞌ, takka na libut. Ni kabasag baliyu, sinakat na ga kumpit da meꞌ lamba sampay adak na ga tumallob.

³⁸ Libut looy siꞌ takka sasang si Isa tuli ni buliꞌ kumpit. Dari lay ya binatiꞌ meꞌ mulit na, yuk da, “Tuwan, yaꞌ san bitu ko maruli! Matoy limbo na situ kitabi!”

³⁹ Dari ilooy ma bangun du si Isa, boꞌ na nohoꞌ baliyu looy patagong. Maka yuk na ni lamba looy, “Ddong na! Banti na ko!” Dari lay du patagong baliyu looy sampay tud taddoꞌ na lahat saꞌ alang-alang.

⁴⁰ Pag-anu, yuk na ni ga mulit na, “Ongoy tu biddaꞌ na baw tawu bi? Yaꞌ gi kitu luu pangando bi niyaku?”

⁴¹ Ga mulit na siꞌ tu, tud bay kahimattaan. Dari sitilaw-tilaw na ga sila, yuk da, “Jama oy doꞌ tu meꞌ tuu? Sampay baliyu ka lamba ngasip jaꞌ du niiya!”