Malkus 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa ngulian lalla matoy baran na

¹ Luu jaꞌ siꞌ daka dangoy ngallaw bay pingkaꞌ, lay na baw si Isa pabeleng pa Kapelniyum. Pag taaka jaꞌ siꞌ meꞌ jama luu na ya ni lumaꞌ,

² yaꞌ na baw taambat jama lay bahuklud pilay pa mman na. Yaꞌ hallom, pannoꞌ na lumaꞌ looy sampay yaꞌ na ga luu kapassut man behe lawang. Sasang si Isa njawom masaplag umanat Tuhan ninsila,

³ luu na baw takka mpat jama ngalanggung disu lalla matoy baran na ddas ka patulihan na.

⁴ Ni kaeka manusiyaꞌ baw siꞌ tu ndooy, yaꞌ na san kapassut siga lalla looy sika-mpat pa mman si Isa. Dari bbuwatan da, lay dutai pa taꞌ sapaw ngalakkahan kasohean lambahan sapaw man da mapassut lalla looy. Pag-lupus, lay na tonton da lalla looy ddas ka patulihan na.

⁵ Pag ndaꞌ si Isa meꞌ looy na basag pangando da niiya, yuk na ni lalla looy ma matoy baran na, “Nges, puwas na sina dusa nu labbasakayi.”

⁶ Pag lay jaꞌ takale bitsala na meꞌ siga guru saraꞌ agama ma ningkōꞌ ndooy, honaꞌ-honaꞌ da,

⁷ “Uy, pangka bina bitsala na! Buwat ya dī na subay ga Tuhan! Isu-isu Tuhan bina luu kapatut na muwasan dusa!”

⁸ Na si Isa siꞌ tu, ndang katoonan na du njawom pamiki da. Dari yuk na ninsila, “Marean ta kanna bi yaꞌ luu kawasa-kapatut ku muwasan dusa.

⁹ Sugaꞌ subay siꞌ tabista bi pagka luu kawasa-kapatut ku ngulian jama, mastiꞌ luu du kawasa-kapatut ku muwasan dusa.

¹⁰ Na supaya katoonan bi luu kapatut Anak Manusiyaꞌ muwasan dusa, pakitahan ta doꞌ kam buktiꞌ.” Dari yuk si Isa ni lalla looy ma matoy baran na,

¹¹ “Nges, nangge na ko, boꞌ boonun na patulihan nu moleꞌ.”

¹² Dari magti du nangge lalla looy boꞌ na mūt patulihan na sampay lay na pōꞌ ni pag-awpan da labbasakayi. Mimon siꞌ ndooy tud bay haylan sampay mudji na ga sila Tuhan, maka yuk da, “Yaꞌ gi kitabi la bay pingkaꞌ ngita meꞌ tuu!”

Si Isa nohoꞌ si Libay mmeꞌ niiya

¹³ Pus meꞌ looy, lay na baw pabeleng si Isa pa bihing Danaw Jalil sampay yaꞌ na taambat manusiyaꞌ bahuklud pa mman na. Dari lay du sila toan na.

¹⁴ Pag lakka si Isa mandooy, sasang na lumān, lay ya ngita disu tukang ninga sukay ningkōꞌ ni upis na. Awon na si Libay, anak si Alpiyus. Yuk si Isa niiya, “Tu ko. Mmeꞌ na ko niyaku.” Dari siꞌ, nangge na ya sampay lay na mmeꞌ ni si Isa.

¹⁵ Pag-anu siꞌ, lay na baw boo si Libay si Isa ka ga mulit na pa lumaꞌ na mangan. Ndooy siꞌ, meka du tukang ninga sukay maka ga pagkahi da baldusa bay binoo mmeꞌ paharung mangan. Batan ndang meka na sila mmeꞌ ni si Isa paninggai-paninggai jaꞌ ya.

¹⁶ Pag tasayu siga guru saraꞌ agama ma tabeꞌ ni palhimpunan siga Parisi lay si Isa mangan ndooy, tilaw da ni siga mulit na, “Ongoy doꞌ ilay guru bi kuhi paharung mangan ni siga tukang ninga sukay ka ga pagkahi da baldusa?”

¹⁷ Pag lay jaꞌ takale si Isa tilaw da, iya na ya bay nampung, yuk na, “Siga baldusa ilay meꞌ karuha jama saki. Boꞌ jama saki ina subay inulian meꞌ duktul. Boꞌ sagannap ma yaꞌ saki, san daa na. Intong na, aku itu bay pitu, saꞌ ga maksud ku ngaliyun jama ma mista dī da intong. Arapun aku itu bay pitu ngaliyun sagannap ma mangaku baldusa.”

Si Isa tinilaw pasal puwasa

¹⁸ Na luu disu waktu, siga mulit si Yahiya ma Tukang Mandi ka ga mulit siga Parisi saliꞌ-saliꞌ puwasa. Dari buwatan kasohean jama, lay bay pa mman si Isa nilaw, yuk da, “Ongoy ilay siga mulit si Yahiya ka ga mulit siga Parisi puwasa, boꞌ ningkau, niyaꞌ san?”

¹⁹ Pag tampung si Isa, lay ya ngandalil siga mulit na pa jama ngaluruk ni pangawinan, yuk na, “Yaꞌ bilay sikatuwaꞌ bong siga luruk ni pangawinan puwasa halloman pangantin ma lalla masi dambuwaꞌ ka sila.

²⁰ Sugaꞌ luu du sina mintu masa man pangantin ma lalla llakkahan na mman da. Ni masa looy ilay mintu, bohoꞌ da pataꞌ yaꞌ na nginum atawa mangan ni kabasag lindu da.”

Tōꞌ si Isa ka tōꞌ agama Yahudi yaꞌ tapagsilamud

²¹ Pag-anu, lay na baw si Isa ngandalil pasal tōꞌ na yaꞌ dari llamuran ka tōꞌ agama Yahudi, yuk na, “Yaꞌ sina luu jama nupakan badjuꞌ daan ka kakanaꞌ bahau, batan pag ina mintu pakallos tupak na, paehe jaꞌ geseꞌ na.

²² “Damikiyan, yaꞌ du sina dari inisi tubaꞌ anggul bahau ni jawom pangannaan kuwit kambing ma daan na pasal yaꞌ pahenet. Pag lappuꞌ na, passaꞌ jaꞌ pangannaan looy sampay lopas jaꞌ isi na. Sangkon, bong inawnan tubaꞌ anggul bahau, subay bahau jaꞌ du siga pangannaan man ngisi.”

Pasal buwat ni Llaw Pahali

²³ Na ni disu Llaw Pahali, lay si Isa ka ga mulit na palintas ni tinanom poonan taligu. Sasang da siꞌ lumān, bbuwatan ga mulit na lay ngattuꞌ dangkitiꞌ buwaꞌ tinanom looy, boꞌ lay kakan da isi na.

²⁴ Pag takita meꞌ siga Parisi ndooy, yuk da ni si Isa, “Uy, Llaw Pahali bitu batnaa! Yaꞌ dari ngattuꞌ ni llaw tuu!”

^25-26 Tampung si Isa, “Uy, hantak bitsala bi, maat pabuwatan siga mulit ku meꞌ naa. Bong siꞌ ina bay bana ningkaam, labi na saꞌ maat bay pabuwatan Sultan Daud mattoꞌ. Yaꞌ gi kilay bay tabatsa bi njawom kitab bong oy bay pabuwat na ni bay jaman si Abiyatal panghuluꞌ imam? Saꞌ ba, pag kalingantuhan Sultan Daud ka ga soheꞌ na, lay ya bay paasok pa jawom langga boꞌ na mangan tinapay ma bay sinongan pa Tuhan? Sampay lay gi buwanan na siga soheꞌ na. Mingkan ilay siꞌ, tinapay meꞌ looy tagga ni saraꞌ kinakan leꞌ soysoy sarī man siga imam. Sugaꞌ san meꞌ looy, yaꞌ du bay dari man ga Sultan Daud ndusa.”

²⁷ Maka yuk si Isa lagi ninsila, “Inawnan Llaw Pahali bina, bay sinukuꞌ meꞌ Tuhan para kaayaran ni manusiyaꞌ, saꞌ ga manusiyaꞌ bay pinapayak para kaayaran ni Llaw Pahali.

²⁸ Boꞌ na, aku itu, yana Anak Manusiyaꞌ, luu kapatut ku magbayaꞌ bong oy pataꞌ pinabuwat atawa niyaꞌ ni Llaw Pahali.”