Malkus 14 - Sabahagiꞌ Kitab Tawrat: Panagnaan ni Awwal Jaman maka Kitab Injil

Siga Yahudi bagaraꞌ mapatoy si Isa

¹ Na paddus meꞌ looy, duwa ngallaw sa taabut na paballangan Ngalingkaꞌ ka paballangan Tinapay Yaꞌ Magpasulig. Kuwan siga imam langkaw ka ga guru saraꞌ agama, ndang miha na pin lawang man da nungkuban si Isa gantaꞌ yaꞌ tasayu jama supaya tapapatoy da na.

² Sugaꞌ yuk da, “Bong ya sinungkuban, yaꞌ dari sinabuhan ni paballangan taggahaꞌ hiluhalaꞌ na baw manusiyaꞌ.”

Disu danda numpahan battis si Isa insallan hamut

³ Na waktu looy siꞌ, lay ga si Isa ndooy ni Betani ni lumaꞌ disu lalla inawnan si Saymon ma bay pingkaꞌ inipu. Pag-anu siꞌ, sasang ga si Isa mangan ndooy, luu na baw pasōng pa mman na disu danda moo katsaꞌ-katsaꞌ dorogan pannoꞌ meꞌ insallan hamut landuꞌ hagaan inawnan nalda. Pag-anu, lay pongan na kallong katsaꞌ-katsaꞌ looy boꞌ tumpahan na insallan hamut looy taꞌ kōk si Isa.

⁴ Pag takita leꞌ jama ndooy, kasohean tud yaꞌ bay kasulutan sampay yuk da padangan-padangan, “Uy, ongoy doꞌ ilay subay na pin pinasensengan jaꞌ insallan hamut looy?

⁵ Bong siꞌ bay pinaballihan, subay ga hagaꞌ gadji labi dantaun. Gam na bilay bay pinaballihan boꞌ ndean ga jama miskin ballihan na.” Pag-anu, ilooy ma lay sinahawi meꞌ da danda looy.

⁶ Sugaꞌ yuk si Isa siꞌ tu, “Bbiyahun bi na ba. Ongoy doꞌ ina kam ngalingog danda tuu? Tud mahap bitu bay pabuwat na niyaku.

⁷ Jama miskin ina, mastiꞌ luu jaꞌ ninggai-ninggai mman bi. Sumilan-sumilan kam doman nulung sila, dari jaꞌ. Boꞌ aku tu, yaꞌ na ku humallom ntuu mman bi.

⁸ Tuwaꞌ na du situ siꞌ danda tuu bay numpahan baran ku insallan hamut batan sibuꞌ na du ya ka bay manyapan baran ku duhuꞌ para ni llaw ku kinubu.

⁹ Baan ta kam banahan, nnoy-nnoy jaꞌ ina mintu man umanat mahap pinasaplag ni sikaliput junyaꞌ, tasabbut jaꞌ du sina bay pabuwatan danda tuu niyaku. Tud yaꞌ sina ya takupan meꞌ manusiyaꞌ pangkat-mamangkat.”

Si Judas nipu si Isa

¹⁰ Na ni waktu looy du siꞌ, kuwan si Judas Iskariyut, san ya tabeꞌ ni mulit si Isa sikasapu-duwa, lay pilay pa mman siga imam langkaw muwan tipu-akka bong pooy meꞌ na katabang ninsila nungkuban si Isa.

¹¹ Pag bay takale da halling si Judas meꞌ looy, tud bay gāk sila. Sampay lay na ga ya njanjian binuwanan sīn. Dari labba mandooy, bbuwatan si Judas, miha na jaꞌ lawang man na ma-ntan si Isa ninsila gantaꞌ yaꞌ tasayu jama.

Siga mulit si Isa manyap ni paballangan Ngalingkaꞌ

¹² Pag-anu siꞌ, taabut na llaw sibuwa ni paballangan Tinapay Yaꞌ Magpasulig. Maka ndooy na du llaw man bangsa Yahudi magsumbaliꞌ siga anak bili-bili para paballangan Ngalingkaꞌ. Dari lay na ga mulit si Isa pa mman na nilaw, yuk da, “Tuwan, nnoy tu la karomanan nu man kami manyap leꞌ tabi mangan para ni paballangan Ngalingkaꞌ?”

¹³ Dari siꞌ, lay na ya nohoꞌ mulit na duwa, yuk na ninsila, “Pilay kam pa jawom daira. Takka jaꞌ kam ndooy, sitammu kam sina ka lalla manangkit kibut bohean. Patuhut jaꞌ kam niiya pa lumaꞌ man na paasok.

¹⁴ Yuk bi ni jama ma dapu lumaꞌ looy, ‘Tugun Tuwan Guru nohoꞌ ko tinilaw bong ninggai man bilik halliꞌ man na mangan ka ga mulit na para ni paballangan Ngalingkaꞌ?’

¹⁵ Pag-anu, pinakitahan du sina kam bilik mehe ni jataꞌ ndang langkap na maka tahan buwat sa. Dari ndooy na man bi buwatan kitabi leꞌ mangan.”

¹⁶ Pag-anu siꞌ, lay na pilay mulit na ilooy siꞌ ma duwa pa jawom daira. Pag ndaꞌ da, tuwaꞌ bana labbasakayi bay bāꞌ si Isa. Dari siꞌ, lay na sila buwat kohap halliꞌ paballangan Ngalingkaꞌ.

^17-18 Pag taabut sangom, sasang ga si Isa ka ga mulit na sikasapu-duwa mangan, yuk si Isa, “Baan ta kam banahan, kaam ntuu ma soheꞌ ku mangan, luu situ kam mintu disu nipu aku.”

¹⁹ Lay jaꞌ takale meꞌ mulit na, tud susa sila sampay magsing-sīng na sila nilaw, yuk da, “Uy Tuwan, saꞌ bilay aku awnan nu, saꞌ ba?”

²⁰ Pag tampung si Isa, “Awnan ku ilay siꞌ disu ningkaam sikasapu-duwa ma soheꞌ ku sawu mangan.

²¹ Anak Manusiyaꞌ itu ndang bay tinunaꞌ njawom kitab, mastiꞌ pinapatoy jaꞌ. Sugaꞌ tud siya-siya silay mintu ilooy ma nipu iya. Gam na ya yaꞌ bay pinamaddihan.”

Katapusan waktu si Isa siharung-harung mangan ka ga mulit na

²² Na sasang da siꞌ mangan, lay si Isa ngaddoꞌ dambatang tinapay boꞌ pinagsukuhan pa Tuhan. Pag lupus, pinong-pōng meꞌ na boꞌ sinongan ni siga mulit na sambayan na halling, “Atu, ngaddoꞌ kam boꞌ kakanun bi. Ingatun bi ituu baran ku.”

²³ Pag-anu, lay na baw ya ngaddoꞌ mbuwaꞌ sawan tubaꞌ anggul, boꞌ lay du pinagsukuhan pa Tuhan. Pag-anu, lay du sinongan ni ga mulit na sampay lay na sila nginum sikamimon.

²⁴ Yuk si Isa ninsila, “Ingatun bi inaa lahaꞌ ku song tinumpahan supaya meka na jama koleꞌ kaampunan. Batan lahaꞌ ku ina, inaa na muwan kasāhan ni pagsulutan bahau antaraꞌ Tuhan ka manusiyaꞌ.”

²⁵ Yuk si Isa lagi, “Baan ta kam banahan, ituu na situ katapusan ku nginum tubaꞌ anggul meꞌ tuu ka kaam. Sakayi ku nginum meꞌ tuu balik, noy bahau na kahalan tabi njawom pamarinta Tuhan.”

²⁶ Pag-anu, lay sila ngalang kalangan pudji pa Tuhan, boꞌ da pōꞌ song pilay pa Punu Jaytun.

Si Isa nunaꞌ si Pitel song maylu

²⁷ Lān da pilay, yuk si Isa ninsila, “Yaꞌ hallom, sikamimon kam ngambanan aku na sina. Song binakbul na situ suwat njawom kitab, ilooy ma yuk Tuhan, ‘Ndang bay na silay gantaꞌ ku ilooy ma tukang ngipat baanan bili-bili pinapatoy. Kuwan siga bili-bili na, magkanatan na sonse.’

²⁸ “Sugaꞌ,” yuk si Isa, “pag mintu lay na ku pinakallum pabalik, pilay sa ku pa Jalil duhuꞌ man kaam. Ndooy sa kitabi sitammu.”

²⁹ Sugaꞌ kuwan si Pitel baw siꞌ tu, yuk na, “San sila sikamimon ngambanan kau Tuwan, bong aku, basta niyaꞌ baw la.”

³⁰ Sugaꞌ yuk si Isa, “Baan ta ko banahan Pitel, sangom tuu du situ, yaꞌ gi sina mintu bay taabut tingkauk kaminduwa na manuk, ndang min tallu na ko sina mintu bay maylu bahasa yaꞌ ku takila nu.”

³¹ Sugaꞌ si Pitel siꞌ tu, gam pin amu-amu magsambatan, yuk na, “San gi man ku matoy, basta yaꞌ du ku maylu!” Damikiyan, ga mulit si Isa siꞌ tu ilooy kasohean, meꞌ looy du halling da.

Si Isa maku duwaa ndooy ni Getsemani

³² Pag-anu, lay na ga si Isa palanja pa disu lugar inawnan Getsemani ndooy du taꞌ Punu Jaytun. Takka ndooy, yuk na ni ga mulit na, “Ningkōꞌ doꞌ kam ntuu. Pilay doꞌ ku ndē maku duwaa.”

³³ Sugaꞌ lay gi baw boo na ga si Pitel, si Yaꞌkub, ka si Yahiya. Pag-anu, takkahan susa na si Isa maka yaꞌ na katoon-toonan na parasahan na.

³⁴ Dari yuk na ninsila ma tallu, “Biddaꞌ na baw tu susa jawom atay ku. Agon dak kapatoy na niyaku. Ntuu jaꞌ doꞌ kam maka iyakin kam. Daa kam tuli.”

³⁵ Pag-anu siꞌ, lay na ya palawak-lawak dangkitiꞌ mman da boꞌ na pahangkop taꞌ tanaꞌ. Pag-anu siꞌ, boꞌ na maku duwaa pa Tuhan supaya bong siꞌ luu dapat, hinawasan na man jataꞌ na kabinsanaan ma bay ginantaꞌ niiya.

³⁶ Yuk na, “Maꞌ, katoonan ku du yaꞌ luu tunmanūn ningkau. Bong siꞌ luu dapat, hawasan nu na kabinsanaan ma bay gantaꞌ nu njataꞌ ku. Sugaꞌ subay kahandak nu binean, saꞌ ga niyaku.”

³⁷ Pag-anu siꞌ, lay na ya pabeleng pa mman ga mulit na ilooy ma tallu. Pag ndaꞌ na, tuli jaꞌ sila. Dari yuk na ni si Pitel, “Saymon, ongoy kam tuli? Yaꞌ san kam kina katatas magpajaga san lasa danjām?

³⁸ Daa kam ba tuli, arapun maku na pin kam duwaa pa Tuhan mari yaꞌ tungkas iman bi. Batan san ina njawom atay bi doman kam buwat kahandak Tuhan, yaꞌ baw takaya bi ni dī bi.”

³⁹ Pag-anu siꞌ, lay na baw si Isa bbeleng balik maku duwaa meꞌ kadari ilooy du siꞌ ma sibuwa.

⁴⁰ Pag beleng na pa mman mulit na, ndaꞌ na, lay gi du sila tuli pabalik batan tud tintōꞌ na sila. Pag binatiꞌ, yaꞌ na ga luu tapahalling da ni kaiyaꞌ da niiya.

⁴¹ Pag-anu, lakka na baw si Isa pabalik maku duwaa. Pag beleng na ni kamintallu na, yuk na ninsila, “Uy, amu-amu bitu hati kam tuli! Ddong na kam ba pahali. Taabut na situ waktu man Anak Manusiyaꞌ tinipu boꞌ pina-ntan pa mman siga baldusa.

⁴² Bangun na kam! Alu na lalla ma nipu aku! Sūng bi, sampang tabi na sila!”

Si Isa sinungkuban

⁴³ Yaꞌ gi siꞌ lupus si Isa mitsala, ilooy ma takka du si Judas, yana disu mulit ni ilooy ma sikasapu-duwa. Maka luu na du bay boo na baanan jama ddas ka kataliꞌ da maka takaka da. Sila siꞌ tu bay pilay nungkuban si Isa man panohoan siga imam langkaw, ga guru saraꞌ ka ga matatoa ni agama.

⁴⁴ Na si Judas siꞌ tu, ndang bay isun ka ga soheꞌ na muwanan sila sinyal, yuk na, “Lalla ma ūk ku, ilooy na mintu sungkuban bi, boꞌ jagahan bi sa paayad.”

⁴⁵ Dari magti pasōng si Judas pa mman si Isa sambayan na halling, “Tuwan Guru.” Pag-anu, boꞌ na ngūk si Isa.

⁴⁶ Pag-anu siꞌ, lay na du sungkuban da si Isa.

⁴⁷ Sugaꞌ kuwan disu soheꞌ si Isa, lay magti ngurus bariꞌ na sampay lay tigad na tindog panghuluꞌ imam, boꞌ lay na ga latak tinga na.

⁴⁸ Pag-anu, halling si Isa ni baanan jama looy, “Ongoy doꞌ kam ina, itu na pitu ka ga kataliꞌ sampay ga takaka nungkuban aku? Ongoy kanna bi, mundu kitu ku?

⁴⁹ Aku bitu, llaw pa dangallaw na ku magpanoan kaam ni langga mehe. Ongoy taggahaꞌ yaꞌ gi ku bay sungkuban bi ndooy? Sugaꞌ biyahun na, nduwan jaꞌ du sina kam mari binakbul na siga tunaꞌ ma bay sinuwatan njawom kitab.”

⁵⁰ Na ga mulit na baw siꞌ tu sikamimon, magsaw-simpāk na sonse ngambanan iya.

⁵¹ Sugaꞌ luu baw disu subul ndooy patuhut na pin ni si Isa, lay jaꞌ tadjung. Pag-anu, lay du ya sinungkuban.

⁵² Sugaꞌ pag lay jaꞌ ya ta-ntan man dikat na, lay jaꞌ ya paurus, boꞌ na sonse nantang jaꞌ.

Si Isa binoo pa mman baanan Sanhidrin sinumariya

⁵³ Na si Isa siꞌ tu, lay na binoo pa lumaꞌ panghuluꞌ imam. Ndooy siꞌ, ndang luu na siga imam langkaw ka ga guru saraꞌ sampay ga matatoa ni agama lay kumpo.

⁵⁴ Kuwan si Pitel baw siꞌ tu, luu na pin bay patuhut man katāhan sampay lay gi paasok pa jawom haman panghuluꞌ imam looy. Pag-anu, lay gi ya mmeꞌ ningkōꞌ ni bihing api mapasuꞌ-pasuꞌ baran na ka ga tukang jaga ndooy.

⁵⁵ Na kuwan siga imam langkaw baw siꞌ tu sampay na mimon pagkahi da paki ni baanan Sanhidrin, miha na pin danan man da malkalaꞌ si Isa mari tasohoꞌ da na pinapatoy. Sugaꞌ yaꞌ luu tatammu da sangdanan pataꞌ man na kalabuan hukuman kapatoy.

⁵⁶ Maka meka du baw ndooy bay buwat-buwat palkalaꞌ njataꞌ si Isa, sugaꞌ yaꞌ san bay mag-uyun bitsala da.

⁵⁷ Kasohean mitnahan iya meꞌ tuu, yuk da,

⁵⁸ “Bay situ takale kami lalla tuu magsambatan, bbos-bbos langkat na konoꞌ langga mehe ma bay pinaghulas-sangsaan meꞌ manusiyaꞌ. Pag-anu, boꞌ na konoꞌ matangge sarī njawom tallu ngallaw du ma saꞌ man pabuwatan manusiyaꞌ.”

⁵⁹ Sugaꞌ san meꞌ looy halling da, yaꞌ baw bay mag-uyun bitsala da ka ilooy kasohean.

⁶⁰ Pag-anu siꞌ, ilooy ma lay na nangge panghuluꞌ imam ni awpan sikamimon nilaw si Isa, yuk na, “Oy tapahalling nu ni sumbung da njataꞌ nu? Yaꞌ kina luu daawa nu?”

⁶¹ Sugaꞌ yaꞌ san ya bay nampung. Dari lay tinilaw balik meꞌ panghuluꞌ imam, yuk na, “Bana kina kau Almasi, Anak Tuhan Mahatinggi?”

⁶² Pag tampung si Isa, “Bana, aku na situ. Maka luu gi sina masa ni sinōng takita bi aku, Anak Manusiyaꞌ, ningkōꞌ huwin pa kawnan ni bihing Tuhan Sangat Kawasa. Maka takita bi du sina ku duwai man sulgaꞌ njawom tayiꞌ baliyu.”

⁶³ Dari bbuwatan panghuluꞌ imam, lay nganggeret juba na mismu ni kalasu na sambayan na halling, “Uy, san bitu yaꞌ na tabi miha jama bay kasakup ni bitsala na pangka pa Tuhan!

⁶⁴ Ndang-ndang lai na du takale tabi pōꞌ man behe na mismu! Hantak bitsala na, saliꞌ du ya ka Tuhan! Bong ningkaam, pooy bandingan bi?” Dari ilooy na siꞌ bay pinagtaayunan meꞌ da sikamimon subay du ya pinapatoy.

⁶⁵ Dari labba mandooy, bbuwatan kasohean, ngaluraan iya, boꞌ da makkos mata na maka nuntuk iya sambayan da halling, “Tunaun teꞌ bong soy na pin bay nuntuk kau.” Pag-anu, sigi-sigi gi ya bay tinampa meꞌ siga tukang jaga ndooy.

Si Pitel maylu bahasa saꞌ iya soheꞌ si Isa

⁶⁶ Na beleng ta pa si Pitel ni haman looy, luu na baw disu danda tindog panghuluꞌ imam bay pingkaꞌ man bihing na.

⁶⁷ Pag takita na si Pitel mapasuꞌ-pasuꞌ baran na ni api, ilooy ma lay ya pasōng ngaliling sambayan na halling, “Kau bitu siꞌ bay du haboy ka si Isa, lalla looy man Nasaret.”

⁶⁸ Sugaꞌ bbuwatan si Pitel baw, magti maylu, yuk na, “Tau ta la kau. Yaꞌ bina tahati ku bong oy binitsala meꞌ nu!” Paddus meꞌ looy, lay ya pilay pa behe lawang haman looy. Maka ilooy ma tingkauk na manuk.

⁶⁹ Pag takita na baw siꞌ ya balik meꞌ danda looy, lay na baw ya māꞌ ni ga jama ma nangge-nangge ndooy, yuk na, “Lalla looy ilay, lay du siꞌ bay tabeꞌ ninsila.”

⁷⁰ Sugaꞌ lay du si Pitel maylu balik. Yaꞌ gi hallom, kuwan kasohean ma nangge-nangge ndooy, yuk da ni si Pitel, “Mattan du bitu hati ko lamud ni baanan ga lalla looy, batan jama Jalil du ko.”

⁷¹ Dari siꞌ, ilooy ma yuk si Pitel, “Ilu na Tuhan pakale-kale, yaꞌ san katoonan ku bong soy jama looy. Minulkaan na ku meꞌ Tuhan bong yaꞌ bay bana bitsala ku.”

⁷² Pag-anu siꞌ, ilooy ma tingkauk ni kaminduwa na na manuk. Sampay taintom na meꞌ si Pitel bay tunaꞌ si Isa, ilooy ma yuk na, “Yaꞌ gi san ina mintu bay tingkauk kaminduwa na manuk, ndang min tallu na ko bay maylu bahasa yaꞌ ku takila nu.” Dari siꞌ, lassa hansu na atay na sampay lay na ga kapanangis.