Malkus 13 - Sabahagiꞌ Kitab Tawrat: Panagnaan ni Awwal Jaman maka Kitab Injil

Langga mehe ni Jerusalem tinunaꞌ lluntu

¹ Na pag pōꞌ ga si Isa man langga mehe, yuk disu mulit na, “Tuwan Guru, ndaun doꞌ ba ehe siga batu man bay buwat langga naa ka ga lumaꞌ ni bihing na! Tud kainu-inu na lingkat da!”

² Pag halling si Isa, “Ohoꞌ, pakaruwan na kam ngandaꞌ batan luu sina waktu ni sinōng lluntu na labbasakayi. Yaꞌ na sina mintu luu takapin nangge san lasa duwa batu magpangkat.”

Si Isa nunaꞌ kahalan ni sinōng

³ Pag-anu siꞌ, lay na baw patukad ga si Isa pa taꞌ Punu Jaytun boꞌ da ningkōꞌ paawop pa langga mehe ni dambilaꞌ labbak. Pag-anu siꞌ, lay pasōng ga si Pitel ka si Yaꞌkub, si Yahiya ka si Andru, sila-sila jaꞌ, pa mman si Isa, yuk da,

⁴ “Tuwan, bong siꞌ dari, baan doꞌ kami bong sumilan binakbul ilooy ma bay bitsala nu siꞌ. Maka oy lay la mintu sipat na man jama mindoga tapit na binakbul?”

⁵ Tampung si Isa, “Iyakin kam mari kam yaꞌ takoleꞌ binoo magsiꞌ.

⁶ Batan bbos-bbos, meka sina mintu pasunuꞌ bahasa sila na Almasi ma bay sinohoꞌ meꞌ Tuhan nalamat manusiyaꞌ. Boꞌ meka jama taboo da magsiꞌ.

⁷ “Pag taabut bi ina mintu kaakahan meka na bonoꞌ mehe ni kalahat-lahatan matā-matapit, daa doꞌ gundalaꞌ pamiki bi. Ndang bay silay ginantaꞌ meꞌ looy, sugaꞌ saꞌ gi baw lay katapusan junyaꞌ.

⁸ Bbos-bbos ina meka na kabangsa-bangsahan ka ga sultan sibonoꞌ-bonoꞌ. Maka meka na sina mintu kalahat-lahatan tuwaꞌ linug maka gotom. Sugaꞌ mimon balaꞌ meꞌ looy ilay mintu bohoꞌ panagnaan kamalasahiyan ma magkadarihan ni manusiyaꞌ bbos-bbos. Bong siꞌ dalil ta pa danda maddi, bohoꞌ nagnaꞌ paddi battong na.

⁹ “Na kuwan kaam ina, iyakin kam batan luu sina mintu masa bi sinungkuban sampay binoo gi sina kam pa mman baanan kapakihan nohoꞌ hinukum. Boꞌ llagpiꞌ gi kam ni pag-awpan siga jamaa ni siga langga da. Kasohean ina kam binoo gi pa awpan siga gubnul ka ga sultan nohoꞌ hinukum ninsila sabap meꞌ bi mmeꞌ niyaku. Sugaꞌ sabap meꞌ looy, luu na dapat bi masaplag umanat mahap ninsila.

¹⁰ Umanat mahap tuu itu ndang bay na ginantaꞌ subay duhuꞌ pinasampay ni mimon kabangsa-bangsahan, boꞌ taabut llaw kiyamat.

¹¹ “Na bila kam mintu tasungkub sampay pina-ntan pa huwis sinumariya, daa na kam hanggaw bong oy subay halling bi man ngandaawa. Luu du Rū Sutsiꞌ ngunungan kaam sampay muwanan kaam bitsala pataꞌ man nampung. Dari bitsala bi ina mintu lakka man Rū Sutsiꞌ, saꞌ na lakka man pamiki bi dī bi.

¹² “Ni sinōng, luu sina jama ma yaꞌ pitsayaꞌ niyaku taaku da minsan danganakan da langgung nohoꞌ pinapatoy sabap meꞌ da mmeꞌ niyaku. Damikiyan, luu du sina mintu siga induꞌ-mmaꞌ ma yaꞌ pitsayaꞌ niyaku taaku da minsan anak da mismu nohoꞌ pinapatoy. Kasohean anak pun, bong tasayu da induꞌ-mmaꞌ da mmeꞌ niyaku, mastiꞌ binanta du meꞌ da sampay taaku da lagi nohoꞌ pinapatoy.

¹³ Kaam ina kinalammisan jaꞌ sina mintu meꞌ jama sikamimon sabap mmeꞌ kam niyaku. Sugaꞌ soysoy ina natas pangando na ngabut sampay pa katapusan, salamat jaꞌ ya.”

Ilooy ma tud sinukang meꞌ Tuhan

¹⁴ Yuk si Isa lagi, “Ni sinōng, luu sina takita bi ilooy ma kabinasa ma tud sinukang meꞌ Tuhan pinatangge ni lugar ma tinagga niiya. Maruhuꞌ-ruhuꞌ ilooy siꞌ ndang bay tinunaꞌ njawom kitab. (Soysoy matsa tunaꞌ looy, pahamun bi paayad.) Pag mintu kam ngita meꞌ looy, kuwan sagannap ma maglahat ni Yahudiya, subay magti lahi deꞌ-dēꞌ pa kapunu-punuhan.

¹⁵ Maka soysoy lay ni taꞌ pantān lumaꞌ, daa na san paasok pa jawom ngaddoꞌ oy maka oy na.

¹⁶ Damikiyan, sagannap ma buwat ni huma, daa na sila san moleꞌ ngaddoꞌ badjuꞌ da.

¹⁷ Pag ina mintu tinakdil na meꞌ looy, tud kaluuy-luuy sina jama awla na sagannap karandahan ma battong atawa ma anakan dikiꞌ masi gi duruꞌ.

¹⁸ “Sangkon, maku kam duwaa pa Tuhan, kamura-murahan yaꞌ du magsabtan ka timpu tanne.

¹⁹ Batan biddaꞌ na silay mintu kamalasahiyan ma labuꞌ taꞌ manusiyaꞌ pag taabut meꞌ looy. Kamalasahiyan meꞌ looy ilay mintu, yaꞌ gi luu manusiyaꞌ bay ngissa labba man jaman Tuhan bay mapayak junyaꞌ tuu sampay batnaa. Kahapan yaꞌ na du baw lay kabalikan saumu.

²⁰ Bong siꞌ ilay mintu yaꞌ bay kulangan Tuhan halloman balaꞌ looy, mastiꞌ katis jaꞌ manusiyaꞌ man taꞌ babaw junyaꞌ. Sugaꞌ kalnaꞌ sagannap ma bay peneꞌ na sukuꞌ na, kulangan na du sina mintu halloman kamalasahiyan looy.”

²¹ Maka yuk si Isa, “Ni waktu looy ilay mintu, bong luu maan kaam, ‘Ndaun ba, atu na Almasi,’ atawa ‘Alay na ndooy,’ amay-amay daa kam pitsayaꞌ.

²² Luu sina mintu pōꞌ mangaku bahasa sila na Almasi atawa disu nabi. Boꞌ mōꞌ gi sina mintu sila siga pabuwatan kahaylan-haylan mari luu jama takoleꞌ da binoo mmeꞌ ni tōꞌ da ma yaꞌ tuwaꞌ. Bong siꞌ ina mintu takaya da, sampay sagannap ma bay pineneꞌ meꞌ Tuhan sukuꞌ na boo da du magsiꞌ.

²³ Ngkon ku itu ndang maan kaam na mimon pakaradjaan looy ma magkadarihan ni sinōng mari taiyakin bi.

Katakka Anak Manusiyaꞌ pa junyaꞌ pabalik

²⁴ “Pasunuꞌ man kamalasahiyan meꞌ looy, ngalindom gi sina mataallaw maka buwan pun, yaꞌ na du ninag.

²⁵ Kuwan ga potean, maglatakan na sina mintu sampay mimon-mimon taꞌ langit njogjog na du.

²⁶ “Pus meꞌ looy, takita na sina Anak Manusiyaꞌ duwai njawom tayiꞌ baliyu ni kaehe kawasa na ddas ka sahayaꞌ na.

²⁷ Pag-anu, boꞌ na magpanohoꞌ ni siga malaikat na mumpung sagannap ma bay peneꞌ na sukuꞌ na man sika-mpat pidju alam.”

Pamintangan ni poon kayu igira

²⁸ Yuk si Isa lagi, “Na ni kapasal katakka ku ina mintu, ngaddoꞌ jaꞌ kam pamintangan man poon igira. Pag takita bi pasapput na dawun na, inaa na sipat man bi toon tapit na timpu pangallaw.

²⁹ Damikiyan, pag takita bi mintu taabut na siga pakaradjaan ma bay sabbut ku siꞌ, malaingkan katoonan bi na du tapit na banahan katakka ku.

³⁰ “Baan ta kam banahan, yaꞌ gi sina mintu katis matoy jama angkat-angkatan batnaa, ndang nagnaꞌ na binakbul ilooy ma bay sabbut ku siꞌ.

³¹ Indanan bi. Lanyap jaꞌ sina mintu gumi ka langit, sugaꞌ bong bitsala ku, yaꞌ baw situ kuhi baluba saumu-umu.

Yaꞌ kinatoonan bong sumilan takka Papuꞌ Isa

³² “Katakka ku ina mintu, yaꞌ kinatoonan meꞌ manusiyaꞌ bong llaw oy atawa lisag dangoy. San ga malaikat ndooy ni sulgaꞌ sampay aku, Anak Tuhan, yaꞌ du toon. Ilooy du toon yana Mmaꞌ ku.

³³ Sangkon iyakin kam. Subay ndang saddiya na kam, batan yaꞌ tatunaꞌ bi bong sumilan katakka ku ni sinōng.

³⁴ Subay kam meꞌ karuha siga ata wā saddiya ni katakka papuꞌ da ma bay lome. Yaꞌ gi bay patuwak papuꞌ da, lay doꞌ ya ngahalap lumaꞌ na ninsila, boꞌ lay gi sila sinukuan saliꞌ-saliꞌ ka pabuwatan da. Kuwan ilooy ma tukang jaga lawang, lay tugun na nohoꞌ iyakin.

³⁵ “Damikiyan, kaam pun, subay du kam iyakin mari kam saddiya sabap yaꞌ katoonan bi bong sumilan Papuꞌ bi, yana aku, pabeleng. Yaꞌ tatunaꞌ bi bong deꞌ kohap ka, tangngaꞌ bahangi ka, deꞌ subu ka sasang manuk tingkauk, atawa noy kallat subu na ka.

³⁶ Boꞌ katakka ku ina mintu talkadjut. Ilooy ilagan bi, taggahaꞌ lay na baw kam meꞌ karuha jama tuli takosa-kosa ni katakka ku.

³⁷ Sangkon batnaa ndang baan ta na kam sampay na sikamimon, basta subay kam iyakin.”