Malkus 12 - Sabahagiꞌ Kitab Tawrat: Panagnaan ni Awwal Jaman maka Kitab Injil

Dalil pasal siga panungguꞌ ma yaꞌ tapangandohan

¹ Pag-anu, lay na baw si Isa ngandalil, yuk na, “Luu disu jama bay ngabbun anggul. Pag lupus, lay pinaga, boꞌ na lay buwat tapaggaꞌ buwaꞌ anggul man maggaan boheꞌ na. Maka lay gi ya buwat lumaꞌ-lumaꞌ langkaw man nganjaga. Pag-anu, boꞌ lay sohoꞌ na tinungguan ni jama boꞌ na lay lome pa lahat disu.

² Pag taabut kakattuan buwaꞌ anggul looy, lay ya nohoꞌ disu ata na pilay pa mman ga panungguꞌ kabbun na ngaddoꞌ bahagiꞌ na.

³ Sugaꞌ bbuwatan siga panungguꞌ looy, lay ngahelaꞌ-helaꞌ ata na boꞌ na llagpiꞌ. Pag lupus, boꞌ na sinohoꞌ moleꞌ limboy-limboy tangan jaꞌ.

⁴ “Pag-anu, lay na baw dapu kabbun looy nohoꞌ balik disu ata na sarī pilay. Sugaꞌ damikiyan, yaꞌ du bay luu takoleꞌ na. Gam pin lay gi kinaka meꞌ da man kōk boꞌ lay gi pinakiyaꞌ-kiyaꞌ.

⁵ “Pag-anu siꞌ, lay gi ya nohoꞌ disu ata sarī, sugaꞌ lay na baw papatoy da. Sarī man ga ilooy siꞌ, meka gi du bay sohoꞌ na. Damikiyan, meꞌ looy du siꞌ, kasohean pinawu-pawu meꞌ da, kuwan kasohean, lay papatoy da.

⁶ “Katapusan, disu sa takapin tasohoꞌ na, yana anak na na mismu, kakasi na. Honaꞌ-honaꞌ na, ‘Bong itu anak ku na mismu sohoꞌ ku, mastiꞌ magmaltabat na sila niiya.’

⁷ Sugaꞌ pag takita leꞌ ga panungguꞌ kabbun looy, yuk da padisu-padisu, ‘Inaa na sina lalla kapusakahan kabbun tuu. Tu kam, papatoy tabi na mari kapakitabi na kabbun tuu.’

⁸ Dari lay du ya bay sinungkuban, boꞌ na papatoy da. Sampay lay gi hiyakan da mayat na pa poan kabbun looy.

⁹ “Na,” tilaw si Isa, “bong kaam, binatōy ilay mintu sila meꞌ ilooy ma dapu kabbun? Saꞌ ba, mastiꞌ pilay jaꞌ ya pa mman siga panungguꞌ looy, boꞌ na mapatoy sila? Pag-lupus, boꞌ pina-ntan meꞌ na kabbun na man siga panungguꞌ sarī.”

¹⁰ Yuk si Isa lagi, “Kahalan anak dapu kabbun looy ilay siꞌ magtuntun du ka suwat njawom kitab ma pinagbatsa meꞌ bi, ilooy ma yuk na, ‘Batu ma bay tinimanan meꞌ siga tukang buwat lumaꞌ batu, ilooy ya bay dari patingkat kapansahaliyan na man sikamimon.

¹¹ Ilooy ilay siꞌ man gantaan Tuhan, boꞌ tud kainu-inu ningkitabi.’ ”

¹² Na kuwan ga pa-mmean Yahudi baw siꞌ tu ndooy, agon dak na nungkuban si Isa batan tabista da na sila na bay awnan na panungguꞌ ni bay dalil looy siꞌ. Sugaꞌ yaꞌ gi bay luu dapat da ngusik iya sabap hanggaw baw sila taggahaꞌ hiluhalaꞌ na baw baanan ga jama ndooy. Dari lay jaꞌ sila lakka.

Pataꞌ kina binayaran sukay parinta bangsa Rom atawa niyaꞌ?

¹³ Pag-anu siꞌ, lay na baw ga pa-mmean Yahudi looy nohoꞌ kasohean Parisi ka ga raayat Gubnul Herod pa mman si Isa nohoꞌ nallok-nallok iya ni bitsala na.

¹⁴ Pag takka da, yuk da niiya, “Tuwan Guru, katoonan kami du situ kau jama bonto. Yaꞌ ko minig jama maka yaꞌ ko loman ni jama san gi pooy langkaw ntan da. Maka ilooy puntukan ningkau noan jama kabanahan pasal kahandak Tuhan. Pagka meꞌ naa Tuwan Guru, luu situ siꞌ la tilaw kami. Bong ningkau, sikatuwaꞌ kilay ni saraꞌ bangsa tabi mayaran sukay pa mman panghuluꞌ sultan bangsa Rom, atawa niyaꞌ?”

¹⁵ Na si Isa baw siꞌ tu, tasayu na du maksud da. Dari yuk na, “Kaam tu, magbawuꞌ-bawuꞌ jaꞌ bina kam hilas nilaw. Ongoy kam nallok-nallok aku? Boonan bi teꞌ ku pitu disu pilak mari ta-ndaꞌ ku.”

¹⁶ Luu jaꞌ siꞌ, yuk na, “Limbagan soy tu ni sīn tuu ddas ka awon na?” Tampung da siꞌ, “Sultan Sisal, panghuluꞌ sultan bangsa Rom.”

¹⁷ Dari yuk si Isa ninsila, “Pagka meꞌ naa, oy-oy sukuꞌ Sultan Sisal, deanun bi iya. Damikiyan, oy-oy sukuꞌ Tuhan, deanun bi du Tuhan.” Pag takale da bitsala na, tud bay haylan sila ni tampung na.

Sinual si Isa pasal jama pinakallum

¹⁸ Pag-anu, luu na baw pasōng pa mman si Isa baanan paki ni palhimpunan inawnan Saddusi. Na mimon Saddusi manganna bong jama lay na matoy, yaꞌ na luu masa da pinakallum bbos-bbos. Dari yuk da,

¹⁹ “Tuwan Guru, njawom suwat Nabi Musa, bong luu lalla ndahan, boꞌ lay na matoy yaꞌ gi bay anakan, talpaksaꞌ konoꞌ pinūt bawu na meꞌ danganakan na. Kon meꞌ looy supaya tabangunan na awon danganakan na bong sila bay hanak.

²⁰ Na ntuu konoꞌ, bay luu pituꞌ lalla magdanganakan. Pag-anu siꞌ, kuwan ma siyaka, lay duhuꞌ ndahan, sugaꞌ yaꞌ gi san sila anakan, lay na ya matoy.

²¹ Dari lay na baw pinūt bay nda na meꞌ danganakan na ma pasunuꞌ niiya. Sugaꞌ yaꞌ gi siꞌ sila bay anakan, lai na du matoy lla na. Damikiyan, ni katallu na

²² ngabut sampay ilooy ni kapituꞌ na sibuꞌ du karuha da. Yaꞌ gi du san bay hanak sampay lay na jaꞌ matoy sikamimon. Song hallom, sampay danda looy lay na du bay matoy.

²³ Na bong mattan luu gi masa jama matoy pinakallum bbos-bbos, pagka sila sikapituꞌ bay pingkaꞌ sitampu ka danda looy, mamooy na lay mintu lla na?”

²⁴ Dari yuk si Isa ninsila, “Tud magsāꞌ kam la. Yaꞌ san bina tahati bi suwat jawom kitab hāl meꞌ looy siꞌ. Maka yaꞌ du katoonan bi kawasa Tuhan.

²⁵ Pag ilay mintu taabut masa jama matoy pinakallum, yaꞌ na sila halla atawa handa. Sibuꞌ na du karuha da ka siga malaikat ni sulgaꞌ.

²⁶ Na buktiꞌ man tabi mindoga jama matoy pinakallum lagi, mamintang jaꞌ kam ni ilooy ma bay tabatsa bi njawom suwat Nabi Musa. Saꞌ ba, lay ya kale suwara Tuhan pōꞌ man poon kayu-kayu noleyab na meꞌ api? Yuk Tuhan niiya, ‘Aku na situ Tuhan ma sinumba meꞌ ga Nabi Ibrahim, Nabi Isahak ka Nabi Yaꞌkub.’

²⁷ “Na mandooy siꞌ tumatandaꞌ na luu gi masa jama matoy pinakallum. Batan jaman Tuhan ilay bay magpalman ni Nabi Musa, ndang hallom na banahan ga Nabi Ibrahim bay matoy. Sugaꞌ hantak bitsala njawom palman Tuhan, san sila bay matoy, llum na du batnaa. Batan yaꞌ sina luu jama matoy kasumba Tuhan. Ilooy du kasumba, sagannap ma llum. Inaa na tandaꞌ tud mattan du kam magsāꞌ.”

Panohoan numbul satu

²⁸ Pag-anu siꞌ, luu na baw pasōng disu guru saraꞌ agama ma bay kale pagbitsalahan da. Pag ndaꞌ na tud hantap bay tampung si Isa ninsila, tilaw na ni si Isa, “Tuwan, bong kau, mamooy lay la panohoan patingkat man sikamimon?”

²⁹ Tampung si Isa niiya, “Panohoan patingkat man sikamimon, yuk na meꞌ tuu: ‘Kaam bangsa Israil, pakale kam. Tuhan ina, yana Papuꞌ tabi, disu du.

³⁰ Subay ya kaasean bi ni pupus hilas atay bi sampay pa bigi-bigi jantung bi. Maka mimon pamiki bi ka mimon hulas-sangsāꞌ bi subay magbēꞌ ka aseꞌ bi niiya.’

³¹ Panohoan puntukan ni kaduwa na meꞌ tuu: ‘Kaasean bi pagkahi bi manusiyaꞌ sibuꞌ du ka aseꞌ bi ni dī bi.’ Yaꞌ na sina luu panohoan Tuhan mas hagaan man ituu siꞌ sikaduwa.”

³² Pag halling guru saraꞌ agama looy siꞌ, “Katuwaꞌ ko Tuwan Guru. Bana sina bitsala nu, disu du Tuhan, yaꞌ luu sarī.

³³ Maka bana du subay ya kaasean ta ni pupus hilas atay ta sampay pa bigi-bigi jantung ta. Maka mimon pamiki ta ka mimon hulas-sangsāꞌ ta subay magbēꞌ ka aseꞌ ta niiya. Maka subay kaasean ta pagkahi ta manusiyaꞌ sibuꞌ du ka aseꞌ ta ni dī ta. Siga panohoan tuu itu siꞌ mas hagaan pa Tuhan man mimon kulban ka jakat sinongan pa mman na.”

³⁴ Na pag ndaꞌ si Isa mahap tampung guru looy, yuk na niiya, “Tapit na sina ko tumabeꞌ ni pamarinta Tuhan.” Pus meꞌ looy, yaꞌ na luu bay nawakka nual si Isa pabalik.

Papuꞌ Sultan Daud yana panubuꞌ na

³⁵ Na sasang si Isa masi ndooy nōꞌ ni langga mehe, yuk na, “Pamāꞌ siga guru saraꞌ agama Almasi yana disu panubuꞌ Sultan Daud. Boꞌ bana du.

³⁶ Sugaꞌ sasang Sultan Daud ssob meꞌ Rū Sutsiꞌ mattoꞌ, bay ya ngawnan panubuꞌ na Papuꞌ na. Batan saꞌ ba, yuk Sultan Daud njawom kitab, ‘Yuk Tuhan ni Papuꞌ ku: Ningkōꞌ ko ni bihing ku huwin pa kawnan, boꞌ nnaꞌ ku mimon banta nu ni diyoꞌ pāt battis nu.’

³⁷ “Na bong lay awnan Sultan Daud Almasi yana Papuꞌ na, baan bi teꞌ ku bong pooy meꞌ Almasi dari Papuꞌ Sultan Daud magsabtan ka iya panubuꞌ na? Pamikihan bi teꞌ.” Na kuwan baanan manusiyaꞌ baw siꞌ tu ndooy, tud bay tinagi pakale ni tōꞌ si Isa.

Bandingan si Isa pasal siga guru saraꞌ agama

³⁸ Pag sunuꞌ tōꞌ si Isa, yuk na, “Iyakin kam taggahaꞌ lay na baw kam mintu kalakkotan meꞌ tabiat siga guru saraꞌ agama. Sila ina bong lumān, tigiꞌ sila magparorog ka juba ayad. Kainagon da subay sila inalak ni mayran.

³⁹ Bong ni jawom langga, kainagon da subay sila ni lugar patingkat ni duhuan. Luu-luu paballangan, kainagon da subay sila pinaehe nohoꞌ ningkōꞌ ni paningkoan numbul satu.

⁴⁰ Ni kabasag napsu da, nawakka sila ngalupig siga bawu danda supaya takoleꞌ da mimon altaꞌ da. Boꞌ patahaꞌ da lagi duwaa da ni mayran mari jama manganna tud basag sila ngisbat Tuhan. Ga jama meꞌ sila ilay, tud bohat sina mintu hukuman Tuhan njataꞌ da.”

Saraka bawu danda

⁴¹ Pag-anu siꞌ, lay na baw si Isa ningkōꞌ ni tagan pangannaan santiliꞌ ndooy ni langga mehe. Na sasang na siꞌ maimanan baanan manusiyaꞌ ngalabuꞌ santiliꞌ da, takita na na meka jama dayahan, mehe-mehe jaꞌ pilak bay labuꞌ da.

⁴² Yaꞌ hallom, luu bay pasōng disu bawu danda miskin ngalabuꞌ duwa sīn du.

⁴³ Pag-anu, lay linganan si Isa ga mulit na pa bihing na, boꞌ na halling, “Baan ta kam banahan, san ilay siꞌ ga jama looy bay ngalabuꞌ sīn paeka, bong baw pa Tuhan, kalabihan gi sila meꞌ bawu danda naa ma miskin.

⁴⁴ Batan sila ilay ma bay muwan paeka, yaꞌ san takissa da batan bohoꞌ silay labi-labi sīn da. Boꞌ ni bawu naa ina, san ya miskin, lay na katis pamuwan na mimon sīn na halliꞌ man na magbalanjaꞌ.”