Malkus 11 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa pinudji pag takka na pa Jerusalem

¹ Na tapit jaꞌ siꞌ ga si Isa pa Jerusalem, takita da na ga kawum Betpaji ka Betani ni bihing Punu Jaytun. Pag-anu, lay si Isa maduhuꞌ mulit na duwa,

² yuk na, “Pilay doꞌ kam pa kawum looy ni duhuan. Ndooy mintu ngita sina kam kuraꞌ baddung iningkotan, yaꞌ gi bay pingkaꞌ binakuraan. Lakkahan bi ingkot na boꞌ boonun bi pitu.

³ Bong luu nilaw kaam bong ongoy kam buwat meꞌ naa, yuk bi, ‘Gunahan bitu ni Papuꞌ. Yaꞌ du konoꞌ hallom tinuhiyan sa.’ ”

⁴ Dari lai na sila lumān. Takka ni kawum looy, takita da na luu banahan ndooy kuraꞌ baddung bay iningkotan tapit pa lawang lumaꞌ ni bihing lān. Maka sasang da ngalakkahan ingkot na,

⁵ luu du ndooy siga jama nangge-nangge. Pag tilaw da, “Batōy bi na llakkahan ingkot kuraꞌ naa?”

⁶ Pag tampung da, lay jaꞌ asip da meꞌ bay tugun si Isa ninsila, sampay lay na sila pinadari moo kuraꞌ looy.

⁷ Takka jaꞌ siꞌ sila pa mman si Isa, lay na ampihan da kuraꞌ looy ka sammek da, boꞌ lay na bakuraꞌ si Isa.

⁸ Na sasang si Isa pasōng taꞌ kuraꞌ looy pa Jerusalem, meka na jama ni duhuan natag pakayan da ni lān man maehe iya. Kuwan kasohean, lay nappeꞌ engas katumbu-tumbuhan ndooy boꞌ lay du tinatag ni lān.

⁹ Manusiyaꞌ siꞌ tu ni duhuan na sampay ilooy ni dambulihan na, labbasakayi maghowapan, gakan iya, yuk da, “Pudji tabi Tuhan! Sinupaatan jama naa ma pitu ni kawasa-kapatut Papuꞌ tabi Tuhan!

¹⁰ Sinupaatan pamarinta jama naa ma pagantiꞌ ni pagkasultan bboꞌ tabi Sultan Daud! Pudji tabi Tuhan ni sulgaꞌ!”

¹¹ Takka jaꞌ siꞌ si Isa ni Jerusalem, lay ya patiluꞌ pa langga mehe. Pus na ngandaꞌ-ngandaꞌ mimon ndooy, lay na ya lakka sabap kohap na lahat. Pag-anu, lay ya pabeleng pa Betani ka ga mulit na sikasapu-duwa.

Si Isa numpaan poon kayu igira

¹² Pag meꞌ sumawung, lān ga si Isa pabeleng pa Jerusalem lakka man Betani, lingantu na ya.

¹³ Pag-anu, ngita ya man katāhan poon igira labung dawun na. Dari lay ya pilay miha buwaꞌ na. Takka pilay, yaꞌ luu bay tatammu na sarī man dawun batan ndang saꞌ ilooy timpu igira buwaꞌ.

¹⁴ Pag-anu, yuk na ni kayu looy, “Labba man batnaa yaꞌ na situ ko buwaꞌ pabalik.” Boꞌ lay gi takale ga mulit na bay halling na meꞌ looy.

Si Isa malakka siga padadagang man langga mehe

¹⁵ Takka jaꞌ siꞌ ga si Isa pa Jerusalem, lay na ya paasok pa haman langga mehe. Ndooy siꞌ, ngita na ya siga tukang dagang ka jama malli. Dari tud bay lasu ya, sampay lay na ga bulikad na ga lamisahan siga tukang nambian sīn. Maka lay gi bulikad na ga paningkoan siga jama dagang atsang man ngulban sambayan na malakka sila.

¹⁶ Damikiyan, lay du pinara meꞌ na sagannap ma moo barang mari yaꞌ na patabbaꞌ pa jawom haman langga looy.

¹⁷ Maka yuk na ninsila, “Luu bilay palman njawom kitab, ilooy ma yuk Tuhan, ‘Lumaꞌ ku ina yana lugar halliꞌ man mimon kabangsa-bangsahan maku duwaa.’ Sugaꞌ kaam baw tu, lay na pabuwat bi subay ga lumaꞌ baanan sugaru!”

¹⁸ Lay jaꞌ takale meꞌ siga imam langkaw ka ga guru saraꞌ agama bay bitsala si Isa siꞌ, tud bay dugahan sila. Dari miha na ga sila jalan man da mapatoy iya. Sugaꞌ hanggaw sila taggahaꞌ sinaggaꞌ na baw sila meꞌ baanan jama ndooy ma hangaꞌ na ni tōꞌ na.

Pamintangan takoleꞌ njataꞌ poon kayu igira

¹⁹ Na pag taabut sangom, lay na ga si Isa palakka man daira.

²⁰ Pag meꞌ sumawung subu, lān ga si Isa bbeleng pabalik pa Jerusalem, lay sila pingkaꞌ man poon igira looy balik. Pag ndaꞌ da, matoy na kayu looy sampay layu na ga dawun na labbasakayi.

²¹ Pag-anu, taintom na meꞌ si Pitel bay halling si Isa numpaꞌ. Dari yuk na, “Tuwan Guru, ndaun doꞌ ba poon igira ma bay sumpaan nu! Layu na ga!”

²² Yuk si Isa ninsila, “Ndang sina. Pitsayaꞌ jaꞌ kam pa Tuhan.

²³ Baan ta kam banahan, minsan gi ina punu naa, bong yuk bi, ‘Pungkad ko, boꞌ nu ngahiyakan dī nu pa dilawut,’ mastiꞌ ngasip jaꞌ sina bong kam yaꞌ duwa-duwa pitsayaꞌ nduwan meꞌ Tuhan paku bi.

²⁴ Sangkon ituu jaꞌ meꞌ ku ka kaam: Bila kam maku duwaa pa Tuhan, oy-oy paku bi, subay kam manganna lai na takoleꞌ bi. Bong siꞌ ilay meꞌ looy jaꞌ pangando bi, mastiꞌ nduwan jaꞌ sina kam.

²⁵ Sugaꞌ bila kam maku duwaa, subay kam duhuꞌ ngampun soysoy dusahan ningkaam supaya inampun na du kam meꞌ Mmaꞌ bi ni sulgaꞌ.

²⁶ Batan bong kam ina yaꞌ ngampun jama, malaingkan yaꞌ du kam inampun meꞌ Mmaꞌ bi ni sulgaꞌ.”

Tinilaw si Isa bong lakka man ninggai kapatut na

²⁷ Na takka jaꞌ siꞌ sila ni Jerusalem, lay si Isa pilay pa langga mehe pabalik. Sasang na maglan-lān ni haman langga, luu pasōng pa mman na siga imam langkaw ka ga guru saraꞌ sampay ga matatoa ni agama.

²⁸ Tilaw da niiya, “Soy doꞌ ina bay muwanan kau kapatut, taggahaꞌ lay na ga ko pabasa-basa dilaw buwat kajinisan ni langga tuu?”

²⁹ Iya tampung si Isa, “Doꞌ kam bi. Tilaw ta doꞌ kam duhuꞌ. Bong tatampung bi tilaw ku, boꞌ bi baan ku bong soy bay muwanan aku kapatut buwat mimon meꞌ looy siꞌ.

³⁰ Ituu tilaw ku. Soy ilay bay muwanan si Yahiya kapatut na mandi jama? Tuhan kilay atawa manusiyaꞌ sadjaꞌ?”

³¹ Sila baw siꞌ tu, lay doꞌ duhuꞌ isun bong oy pataꞌ tampung da. Yuk da padisu-padisu, “Yaꞌ bitu la luu jalan man tabi tumanjataꞌ. Bong itu tabi māꞌ lakka man Tuhan, yuk na na baw, ‘Bong meꞌ looy, ongoy baw kam yaꞌ bay pitsayaꞌ ni umanat na?’

³² Bong baw itu yuk tabi kapatut na bay lakka man manusiyaꞌ, piligru ningkitabi.” Na ngkon da mista meꞌ looy sabap tawu sila pinaglupung-lupungan meꞌ baanan manusiyaꞌ ndooy. Batan labbasakayi manganna si Yahiya disu nabi.

³³ Dari siꞌ, tampung da niiya, “Yaꞌ la katoonan kami.” Pag halling si Isa ninsila, “Bong meꞌ naa, yaꞌ du kam baan ku bong soy bay muwanan aku kapatut.”