Malkus 10 - Sabahagiꞌ Kitab Tawrat: Panagnaan ni Awwal Jaman maka Kitab Injil

Hāl jama sapeꞌ

¹ Na lakka mandooy, lay na baw ga si Isa pilay pa Yahudiya sampay pa dambilaꞌ Sōng Juldan. Ndooy siꞌ, meꞌ sibuwa du, sakiyan manusiyaꞌ lay bahuklud pilay pa mman na. Sampay lay du sila toan na meꞌ ndang tabiat na du.

² Kuwan siga Parisi, luu du bay pilay nual si Isa man da niit iya. Dari tilaw da, “Tuwan, bong ni saraꞌ agama tabi, dari kilay lalla napean nda na?”

³ Yuk si Isa ninsila, “Na oy baw ilay bay panohoan Nabi Musa ni kabboꞌ-bboan tabi sampay na ningkaam?”

⁴ Tampung da, “Bāꞌ Nabi Musa dari lalla napean nda na basta bay jaꞌ ya buwat suwat pasa.”

⁵ Yuk si Isa ninsila, “Nabi Musa bilay bay nuwat panohoan looy sabap landuꞌ tohas kōk kabboꞌ-bboan tabi sampay na kaam. Saliꞌ-saliꞌ du kam yaꞌ doman mmeꞌ ni kahandak Tuhan.

⁶ Sugaꞌ bong siꞌ bay intom bi, jaman Tuhan mapayak mimon-mimon, meꞌ na bay mapayak manusiyaꞌ disu lalla ka disu danda supaya sila sitampu.

⁷ Sangkon meꞌ halling sambat njawom kitab, ‘Subay lalla pasakkat man induꞌ-mmaꞌ na, boꞌ na nibuuk dī na ka nda na.

⁸ Dari bay duwa gi sila, lay na dari disu baran sa.’

⁹ Sangkon, ma lay na tinibuuk meꞌ Tuhan, daa na sinalay meꞌ manusiyaꞌ.”

¹⁰ Na pag takka ga si Isa pa lumaꞌ, lay na baw ya tinilaw balik meꞌ ga mulit na hāl meꞌ sapeꞌ.

¹¹ Dari yuk na ninsila, “Soysoy napean nda na boꞌ na handa na baw pa sarī, saliꞌ du ya ka magjina.

¹² Damikiyan, bong luu danda napean lla na boꞌ na halla na baw pa sarī, jina du ya.”

Si Isa nupaatan ga anak-anak

¹³ Pag-anu siꞌ, luu na baw ndooy kasohean moo siga anak da pa mman si Isa nohoꞌ tinappak niiya bumbunan da sinupaatan. Sugaꞌ kuwan ga mulit na baw siꞌ tu, bbuwatan da naggong ga jama looy.

¹⁴ Pag ndaꞌ si Isa meꞌ looy, lasu ya ni siga mulit na. Dari yuk na ninsila, “Pabiyahun bi na ba pitu siga anak-anak naa pa mman ku. Daa na saggongun bi, batan pamarinta Tuhan ina ndang para ni jama diyoꞌ pangatayan meꞌ karuha ga anak-anak naa.

¹⁵ Baan ta kam banahan, bong ina pangando jama pa Tuhan saꞌ meꞌ karuha pangando anak-anak ni induꞌ-mmaꞌ na, malaingkan yaꞌ ya kapatabeꞌ ni pamarinta Tuhan.”

¹⁶ Pag-anu siꞌ, lay na kinakkopan meꞌ si Isa ga anak-anak looy boꞌ tinappak bumbunan da sinupaatan.

Awod jama dayahan koleꞌ kasampulnaan nyawa ma yaꞌ luu katapusan na

¹⁷ Na saddong ga si Isa siꞌ dak lumān, luu na baw disu lalla sonse pa mman na boꞌ na nangge ka tuut na ni awpan na. Yuk na, “Tuwan Guru, meꞌ kau jama mahap, oy tu la subay pabuwat ku mari sampulnaꞌ nyawa ku saumu-umu?”

¹⁸ Yuk si Isa, “Oy na maksud nu ngawnan aku mahap? Yaꞌ luu mahap sarī man Tuhan.

¹⁹ Boꞌ pasal tilaw nu ilay siꞌ, katoonan nu du bina siga panohoan Tuhan, ilooy ma yuk na, ‘Daa ko mapatoy jama, daa ko magjina, daa ko nangkaw, daa ko naksiꞌ bong yaꞌ bana, daa ko ngalupig, maka pag-aratan nu nneꞌ nu ka mmaꞌ nu.’ ”

²⁰ Pag halling lalla looy, “Tuwan Guru, man kaanak-anak ku gi bilay, ndang lay na bogbogan ku panohoan looy siꞌ sikamimon.”

²¹ Na hangat si Isa ngandaꞌ lalla looy, ni kaehe aseꞌ na niiya, yuk na, “Sugaꞌ luu gi sina disu subay pabuwat nu mari yaꞌ na luu kulang nu. Moleꞌ na ko. Paballihan nu na altaꞌ nu boꞌ pagdeanun na jama miskin ballihan na. Bong siꞌ ina ko buwat meꞌ naa, luu na ladjikiꞌ nu mehe ni sulgaꞌ. Pag-lupus, boꞌ nu pabeleng pitu mmeꞌ niyaku.”

²² Pag takale meꞌ lalla looy panohoan si Isa, lay halin parasahan na batan sēng ya ni altaꞌ na yaꞌ taambat. Dari lay na jaꞌ ya lakka ni kasusa na.

²³ Pag-anu siꞌ, ilooy ma tineleꞌ meꞌ si Isa siga mulit na sambayan na halling ninsila, “Awod la jama dayahan tumabeꞌ ni pamarinta Tuhan.”

²⁴ Kuwan ga mulit na baw siꞌ tu, tud bay jayip ni bay bitsala na. Dari siꞌ nduhunan lagi meꞌ si Isa bitsala na ninsila, yuk na, “Siga anak ku, kaawran sina manusiyaꞌ lillaꞌ ni pamarinta Tuhan,

²⁵ labi na bong sila dayahan. Kamurahan gi sina untaꞌ papassūt ni lowang panahiꞌ man jama dayahan paasok pa jawom pamarinta Tuhan.”

²⁶ Siga mulit na siꞌ tu magdaruhun na meꞌ da jayip sampay kapanilaw na ga, yuk da, “Bong meꞌ naa, soy sa baw ilay kapaasok mari ya salamat?”

²⁷ Pag-anu siꞌ, ilooy ma lay si Isa ngandaꞌ ninsila sambayan na halling, “Ndang tunmanūn sina meꞌ manusiyaꞌ nalamat dī da, sugaꞌ tasalamat sila meꞌ Tuhan, batan yaꞌ luu tunmanūn niiya.”

²⁸ Pag-anu, yuk si Pitel, “Na meꞌ kami tu lay na ngambanan mimon-mimon supaya kami kapa-mmeꞌ ningkau, pooy baw tu la?”

²⁹ Yuk si Isa na baw, “Baan ta kam banahan, soysoy ina bay ngambanan lumaꞌ na, ga danganakan na, ga induꞌ-mmaꞌ na, ga anak na atawa tanaꞌ na sabap meꞌ na mmeꞌ niyaku ka masampay umanat mahap,

³⁰ malaingkan lipat min dahatus gi sina tungbas Tuhan ni jataꞌ na. Sasang na masi gi ntuu ni junyaꞌ, ndang binuwanan na sina ya siga lumaꞌ, siga danganakan, siga induꞌ-mmaꞌ, ga anak sampay ga tanaꞌ. Boꞌ na, pag mintu takka pa ahirat, koleꞌ gi sina ya kasampulnaan nyawa ma yaꞌ luu katapusan na. Sugaꞌ halloman na ntuu ni junyaꞌ, mastiꞌ lumangga doꞌ sina ya njawom laug sabapan pangando na niyaku.

³¹ Indanan bi. Meka sina jama ma ni duhuan batnaa, pag taabut mintu ni ahirat, lay na sila ni dambulihan. Damikiyan, meka du sina jama ma ni dambulihan batnaa, pag ndooy mintu, lay na ni duhuan.”

Kamintallu na si Isa nunaꞌ kapatoy na

³² Na luu jaꞌ siꞌ daka dangoy ngallaw, palanja na ga si Isa ka ga mulit na song pilay pa Jerusalem. Sila siꞌ tu lumān, si Isa lay ni duhuan. Kuwan siga mulit na baw siꞌ tu, maglamud na hanggaw maka jayip ni kabahani si Isa patiluꞌ pa Jerusalem. Katoonan da du, ni katakka da, meka jama nulang iya ndooy. Jama pun, ilooy ma patuhut ninsila, hanggaw na du. Pag-anu siꞌ, lay na baw llinganan meꞌ si Isa ga mulit na sikasapu-duwa pa bihing na, boꞌ na mahati sila pabalik bong oy katuwaꞌ niiya ni sinōng,

³³ yuk na, “Pakale kam. Kitabi itu patukad na pa Jerusalem. Ndooy ilay mintu, pina-ntan na ku, Anak Manusiyaꞌ, ni siga imam langkaw ka ga guru saraꞌ agama, boꞌ ku binotangan hukuman kapatoy. Pag-anu, boꞌ ku pina-ntan na baw ni bangsa Rom

³⁴ binuwat kalabbiyan, lluraan, llagpiꞌ, sampay pinapatoy. Sugaꞌ pag ina mintu taabut ni katallu ngallaw, pinakallum du sina ku pabalik.”

Paku si Yaꞌkub ka si Yahiya

³⁵ Pag-anu siꞌ, pasōng na baw si Yaꞌkub ka si Yahiya, ga anak si Sibidi, pa mman si Isa, boꞌ da halling, “Tuwan Guru, luu bitu siꞌ paku kami ningkau. Bong siꞌ ko kuhi, duwanun doꞌ kami.”

³⁶ Yuk si Isa ninsila, “Oy siꞌ tu paku bi?”

³⁷ Yuk da, “Kainagon kami Tuwan, pag taabut nu mintu magsultan ni mimon-mimon, bong siꞌ kadarihan ningkau, patingkoun na kami ni bihing nu, disu ni kawnan nu, disu ni kayli nu.”

³⁸ Pag halling si Isa, “Yaꞌ san bitu tasayu bi bong oy paku bi. Tatatas bi kina kabinsanaan maka kapatoy meꞌ ilooy mintu ma song lingkaan ku?”

³⁹ Yuk ga si Yaꞌkub ka si Yahiya, “Takaya, Tuwan.” Yuk si Isa, “Bana sina, takissa bi du mintu katiksaan ka kabinsanaan meꞌ karuha ilooy ma sinōng meꞌ ku.

⁴⁰ Sugaꞌ bong baw hāl meꞌ meneꞌ bong soy ningkōꞌ ni kawnan ku ka kayli ku marinta, saꞌ inaa sukuꞌ ku. Ndang lay na silay ginantaꞌ meꞌ Mmaꞌ ku bong soy pinatingkōꞌ ndooy.”

⁴¹ Pag takale jaꞌ siꞌ tu meꞌ siga pagkahi da mulit, ilooy siꞌ ma sapū, bay puhung si Yaꞌkub ka si Yahiya, tud bay lasu sila.

⁴² Dari lay sila llinganan meꞌ si Isa pa bihing na sikamimon, boꞌ da binaan, yuk na, “Daa kam ba ngakig tabiat siga pa-mmean ni junyaꞌ ma yaꞌ ngisbat Tuhan. Sila ina, meꞌ da buwat raayat da subay ga ata da. Boꞌ na, labi na sagannap ma pinakalangkaw ntan da, mangkin na maat meꞌ da buwat raayat da.

⁴³ Sugaꞌ ningkaam, yaꞌ dari meꞌ looy. Arapun soysoy kam doman patingkat, subay buwat dī na tindog pagkahi na.

⁴⁴ Dan jinis meꞌ halling, soysoy kam doman pinaehe banahan, subay buwat dī na ata sikamimon.

⁴⁵ Minsan aku, yana Anak Manusiyaꞌ, yaꞌ du ga kon ku bay pitu muhung inintu. Arapun aku tu bay pitu ngintu manusiyaꞌ sampay nongan umu ku mari meka na jama pinaddusan man hukuman ni dusa da.”

Si Isa ngulian jama buta

⁴⁶ Pag-anu siꞌ, takka na baw si Isa ka ga mulit na pa Jeriko. Lān da siꞌ pōꞌ man daira looy, meka na baw jama patuhut. Maka luu gi disu lalla buta ningkōꞌ ni bihing lān maku saraka. Awon na siꞌ si Baltimeyus, anak si Timeyus.

⁴⁷ Tasayu na jaꞌ siꞌ luu na pingkaꞌ si Isa, lalla looy man Nasaret, magti hinowapan meꞌ na, yuk na, “Ū Isa, panubuꞌ Sultan Daud, panimbangan doꞌ ku!”

⁴⁸ Sugaꞌ meka ni baanan looy bay naggong iya, yaꞌ nohoꞌ hibuk. Sugaꞌ gam pin pinabasag gi meꞌ na ngahowap, yuk na, “Ndūꞌ ba, panubuꞌ Sultan Daud, panimbangan doꞌ ku!”

⁴⁹ Pag-anu siꞌ, ilooy ma lay na patagong si Isa boꞌ na halling, “Sōn bi na ba ya pitu.” Dari lay na binaan meꞌ da lalla looy siꞌ ma buta, yuk da, “Daa na ko susa. Nangge na ko. Alay na ko sohoꞌ na pilay pa mman na.”

⁵⁰ Pag-anu, magti urusan na siob na sambayan na nangge deꞌ-dēꞌ boꞌ na pilay pa mman si Isa.

⁵¹ Yuk si Isa siꞌ tu niiya, “Luu kina karomanan nu pabuwat ku ningkau?” Pag halling lalla looy, “Tuwan Guru, doman na ku la ngita.”

⁵² Yuk si Isa niiya, “San ko ba moleꞌ na. Kaulian na ko sina sabapan pangando nu.” Dari siꞌ, sarunduun du ya ngita sampay lay na ya patuhut ni si Isa.