Malkus 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

MALKUS Umanat si Yahiya ma Tukang Mandi

¹ Ituu tu umanat mahap pasal si Isa Almasi, yana Anak Tuhan. Duhuꞌ-duhuꞌ,

² luu bay sinuwatan meꞌ Nabi Isaya njawom kitab, ilooy ma yuk Tuhan ni Almasi, “Bbos-bbos luu sina sohoꞌ ku duhuꞌ man kau disu sosohoan ku masaplag mari saddiya na jama ni katakka nu.

³ Takale du sina mintu suwara na ngahowap ni lahat lau-lau, yuk na, ‘Saddiyahun bi na lān ni katakka Papuꞌ. Paintongun bi na mari tahan na patiluꞌ pa mman bi.’ ”

⁴ Na tunaꞌ looy ilay siꞌ, lay na binakbul batan tud luu du bana bay pōꞌ sosohoan looy, yana si Yahiya ma Tukang Mandi masaplag ni lahat lau-lau yaꞌ maglumaꞌ. Yuk na, “Tawbatan bi na dusa bi, boꞌ bi pinandi mari kam inampun na meꞌ Tuhan.”

⁵ Dari siꞌ, yaꞌ na taambat jama bahuklud pilay pa mman na lakka man Jerusalem sampay man sikaliput Yahudiya. Pag takale da umanat si Yahiya, lay na tawbatan da dusa da ni pag-awpan mimon ndooy. Sampay lay na sila pinandi meꞌ si Yahiya ni Sōng Juldan.

⁶ Pamakoy si Yahiya ilay siꞌ bay pinabuwat ka bū untaꞌ maka kambot na kuwit sapiꞌ. Makanan na tompang ka gowaꞌ buwani.

⁷ Halling na ni siga jama ndooy, “Luu gi sina pasunuꞌ niyaku tā biddaꞌ na langkaw kawasa-kapatut na man niyaku. Yaꞌ san ku tawop makkasan ingkot tumpaꞌ na.

⁸ Aku tu mandi kaam ka boheꞌ jaꞌ. Boꞌ iya ina mintu, man na mandi kaam, Rū Sutsiꞌ.”

Si Isa pinandi meꞌ si Yahiya

⁹ Na luu disu llaw, sasang si Yahiya masi mandi jama, luu na baw takka si Isa pa Sōng Juldan lakka man Nasaret ndooy ni Jalil. Pag-anu siꞌ, lay ya nohoꞌ pinandi ni si Yahiya.

¹⁰ Pag tunga si Isa man jawom boheꞌ, sarunduun takita na langit pabukaꞌ maka luu na Rū Sutsiꞌ duwai meꞌ dagbos atsang nampi taꞌ baran na.

¹¹ Maka luu suwara man sulgaꞌ, yuk na, “Kau ina Anak ku, kakasi ku. Kasulutan ku banahan ningkau.”

Si Isa sinasat meꞌ Ibilis

¹² Na paddus meꞌ looy, magti si Isa binoo meꞌ Rū Sutsiꞌ pa lahat lau-lau yaꞌ maglumaꞌ.

¹³ Ndooy siꞌ, lay na baw ya sinasat meꞌ Ibilis njawom mpatpūꞌ ngallaw-mpatpūꞌ bahangi. Boꞌ luu gi siga sattuwa katawu-tawu ndooy. Sugaꞌ luu na pin siga malaikat ngayaran iya.

¹⁴ Na song hallom, kuwan si Yahiya, lay na baw sinungkuban sampay lay na tajīl sabap meꞌ na bay nahawi Gubnul Herod pasal dusa na. Kuwan si Isa, lay na pabeleng pa Jalil masaplag umanat mahap man Tuhan,

¹⁵ yuk na, “Taabut na situ waktu binakbul ilooy ma bay tinunaꞌ mattoꞌ. Batan tapit na katakka pamarinta Tuhan. Sangkon nawbat na kam maka pitsayaꞌ na kam ni umanat mahap ma pinamahalayak na.”

Si Isa meneꞌ mpat lalla nohoꞌ mmeꞌ niiya

¹⁶ Na disu llaw, sasang si Isa lumān ni bihing Danaw Jalil, lay ya ngita duwa lalla padidilawut ngalambat, yana si Saymon ka danganakan na si Andru.

¹⁷ Yuk si Isa ninsila, “Tu kam. Mmeꞌ na kam niyaku boꞌ bi toan ku bong pooy meꞌ ngalambat manusiyaꞌ.”

¹⁸ Pag-anu, lay du magti mbanan da lambat da sampay lay na sila mmeꞌ niiya.

¹⁹ Pag lanja ga si Isa, ngita na baw ya duwa lalla magdanganakan du munaan pukut da taꞌ kumpit da. Awon da si Yaꞌkub ka si Yahiya, siga anak si Sibidi.

²⁰ Pag-anu siꞌ, lay du sila linganan si Isa nohoꞌ mmeꞌ niiya. Dari lay jaꞌ mbanan da mmaꞌ da ka ga tindog da njataꞌ kumpit da, boꞌ da lay na du mmeꞌ niiya.

Si Isa malakka seytan man jawom baran jama

²¹ Pag-anu siꞌ, lay na baw sila pawus pa Kapelniyum. Pag taabut Llaw Pahali, lay si Isa pa langga maka lay gi ya magnasihat ndooy.

²² Jama siꞌ tu ndooy, tud bay haylan ni tōꞌ na, batan tumatandaꞌ luu kapatut na man Tuhan, saꞌ meꞌ tōꞌ siga guru saraꞌ agama.

²³ Yaꞌ gi hallom, luu na baw paasok pa jawom langga looy disu lalla sineytan, boꞌ magti ngahowapan si Isa, yuk na,

²⁴ “Aha! Kau na hati si Isa, lalla looy man Nasaret, hāꞌ? Manggoy ko pitu? Pakaat nu na baw kami? Katoonan ku du bina bong soy ko. Kau na sina ilooy ma Mahasutsiꞌ lakka man Tuhan.”

²⁵ Pag-anu, ilooy ma sinaggong na seytan looy meꞌ si Isa, yuk na “Daa ko hibuk. Pōꞌ na ko man lalla naa.”

²⁶ Pag-anu siꞌ, sabapan seytan na, pakuwereg na lalla looy. Maka killahap na seytan na lān na pōꞌ lahi.

²⁷ Ni kahaylan ga jama ndooy, yuk da padangan-padangan, “Kapatut oy doꞌ ina meꞌ naa? Ilmuꞌ bahau na baw bitu pinōꞌ meꞌ na. Sampay siga seytan ngasip jaꞌ bong iya nohoꞌ!”

²⁸ Dari aka siꞌ pasal iya magti bay magkanatan ni sikaliput Jalil.

Si Isa ngulian matoa si Saymon

²⁹ Pag pōꞌ ga si Isa man langga looy, lay sila pa lumaꞌ ga si Saymon ka si Andru. Ga si Yaꞌkub pun ka si Yahiya luu na du bay mmeꞌ ninsila.

³⁰ Na ndooy siꞌ ni lumaꞌ da, kuwan matoa si Saymon ma danda pabāk na jaꞌ ni kabasag lammun na. Dari magti si Isa binaan saki ya.

³¹ Pag-anu siꞌ, pasōng na si Isa pa mman danda looy maka lay na helaꞌ na tangan na binangun. Dari siꞌ, sarunduun du lakka lammun na sampay iya na ga bay motangan sila.

³² Pag taabut sumaddop llaw, meka na jama sakihan sampay sagannap ma sineytan bay binoo pa mman si Isa.

³³ Song hallom, yaꞌ na taambat jama daira looy luu na kumpo ni awpan lumaꞌ si Saymon.

³⁴ Dari siꞌ, meka na jama kaniya-kaniya ka jinisan saki da bay kaulian meꞌ si Isa. Maka meka na seytan lay du pinalakka meꞌ na man jawom baran jama. Na siga seytan looy ilay katoonan da bong soy si Isa. Dari bila sila pinōꞌ na, yaꞌ na sila pinadari meꞌ si Isa māꞌ bong soy ya.

Magnasihat si Isa ni sikaliput Jalil

³⁵ Na sayu alab lagi, lay bangun si Isa boꞌ na pōꞌ man daira pa lugar ma yaꞌ magjama maku duwaa.

³⁶ Yaꞌ gi siꞌ hallom, lay na si Saymon ka ga soheꞌ na duwai miha iya.

³⁷ Tatammu da jaꞌ siꞌ, yuk da, “Uy Tuwan, mimon na siꞌ la jama miha kau!”

³⁸ Tampung si Isa, “Pawus na doꞌ ba tabi pa siga daira ma tapit supaya tapasaplagan ku na du ga jama ndooy. Batan ndang ituu situ ngkon ku bay pitu pa junyaꞌ.”

³⁹ Dari lay na ga si Isa palakka sampay lataꞌ na Jalil man na magnasihat ni siga langga ndooy. Boꞌ lay gi ya malakka siga seytan man jawom baran jama.

Si Isa ngulian disu lalla inipu

⁴⁰ Na disu llaw, luu na baw disu jama inipu pasōng pa mman si Isa boꞌ na sujud ni awpan na maku junjung, yuk na, “Tuwan, bong siꞌ ko la kuhi, katoonan ku mastiꞌ takaya nu jaꞌ ngulian aku.”

⁴¹ Dari siꞌ, kapaluuy na si Isa ni lalla looy sampay purut na na lalla looy sambayan na halling, “Kuhi ku ba. Kaulian na sina ko.”

⁴² Dari siꞌ sarunduun du lanyap ipu lalla looy sampay lay na kaulian.

⁴³ Pag-anu, lay na ya sinohoꞌ moleꞌ, sugaꞌ lay doꞌ ya inamay-amayan meꞌ si Isa, yuk na,

⁴⁴ “Daa ko maꞌ-māꞌ ni jama aku bay ngulian kau. Arapun pilay na jaꞌ ko pa mman imam nohoꞌ maliksaꞌ kuwit nu mari tasaksiꞌ na na yaꞌ na ko inipu. Pag-anu, boꞌ nu nong kulban meꞌ ndang tinaat ni saraꞌ Nabi Musa supaya kinatoonan na meꞌ mimon lay na ko kaulian.”

⁴⁵ Sugaꞌ pag lakka lalla looy baw siꞌ tu, gam pin nuntut na ya ni jama mimon bong pooy meꞌ na bay kaulian. Pag toklas na, yaꞌ na si Isa sumunsayaꞌ paasok pa jawom siga daira sabap liput na ya meꞌ siga baanan manusiyaꞌ magdogsog-dogsog na. Dari lay na ya kataddasan ndooy ni poan siga daira lawak man kalumaan. Sugaꞌ san meꞌ looy, song paeka na pin manusiyaꞌ lakka man sikaliput lahat looy pilay pa mman na.