Lukas 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa Almasi pinamaddihan

¹ Na jaman looy ilay, luu aturan bay pinōꞌ meꞌ panghuluꞌ parinta Rom, yana Sultan Agustus. Njawom aturan looy, mimon raayat ni kalahat-lahatan njawom ntanan na subay magrejistel pa parinta supaya kinatoonan bong dangoy eka raayat ni sakup na.

² Na ilooy ilay siꞌ yana sinsus sibuwa ni kalahat-lahatan looy. Maka ilooy na du silay masa man Gubnul Kiriniyus marinta ndooy ni Siriya.

³ Dari mimon siꞌ tu raayat saliꞌ-saliꞌ na patiluꞌ pa lahat kabboꞌ-bboan da magrejistel.

^4-5 Si Yusup pun ka tunang na si Mariyam, lai na du lakka man Nasaret ndooy ni Jalil magrejistel pilay pa Betlehem ndooy ni Yahudiya. Waktu looy ilay siꞌ ndang battong na si Mariyam. Ngkon da bay magrejistel pilay batan si Yusup disu panubuꞌ Sultan Daud. Boꞌ ndooy na silay man Sultan Daud bay pinamaddihan.

^6-7 Na sasang da ndooy ni Betlehem, magkamaddi-maddi na si Mariyam. Salla na, yaꞌ na luu lumaꞌ sinukayan batan pannoꞌ na mimon. Dari lay sila pahantiꞌ ni pasindungan hayop sadjaꞌ. Pag maddi si Mariyam, anak na lalla du bana. Pus na bay binarung, lay pinabāk ni jawom tuung man makan hayop.

Siga tukang ngipat bili-bili ka siga malaikat

⁸ Na ni sangom looy du siꞌ, luu siga tukang ngipat bili-bili nganjagahan baanan ipatan da njawom kahayangan tapit pa Betlehem.

⁹ Sasang da ndooy, luu na tulun ni awpan da disu malaikat maka liput na sila meꞌ sinag sahayaꞌ Tuhan. Pag ndaꞌ da meꞌ looy, takkahan tawu na ga sila.

¹⁰ Sugaꞌ yuk malaikat looy ninsila, “Daa kam ba tawu. Aku itu bay pitu masampay umanat mahap ningkaam ma kagak-gāk saꞌ alang-alang ni bangsa sikamimon.

¹¹ Sangom tuu du siꞌ, luu na tukang nalamat bahau jaꞌ bay pinamaddihan ndooy ni bay daira Sultan Daud. Anak-anak looy ilay yana Almasi, Papuꞌ ma bay njanjiꞌ meꞌ Tuhan.

¹² Ndaun bi teꞌ pilay. Meꞌ tuu meꞌ bi ngila iya: Pag mintu kam nammu anak-anak akket gi bay binarung, lay pinabāk jawom tuung man makan hayop, iya na silay.”

¹³ Mindangoy ko, sarunduun du luu na baw tulun sakiyan malaikat man sulgaꞌ pa bihing malaikat looy ma duhuꞌ sambayan da mudji Tuhan, yuk da,

¹⁴ “Pudji mehe pa Tuhan ni sulgaꞌ! Luu na kasalassayan bay papitu na pa junyaꞌ ni kaehe timbang na pa manusiyaꞌ.”

¹⁵ Pus meꞌ looy, lai na pabeleng ga malaikat looy siꞌ pa sulgaꞌ. Pag-anu, yuk siga tukang ngipat bili-bili looy baw siꞌ tu padisu-padisu, “Anu kam, pilay kitabi pa Betlehem. Ndaꞌ tabi teꞌ ilooy siꞌ ma bay palahil Tuhan ningkitabi.”

¹⁶ Dari siꞌ, lay na sila pilay deꞌ-dēꞌ sampay tatammu da na si Mariyam ka si Yusup. Maka meꞌ bay halling sambat malaikat looy du siꞌ, takita da na anak-anak looy lay bay pinabāk njawom tuung man makan hayop.

¹⁷ Pag-anu siꞌ, lay na sila nuntutan ga jama ndooy bay halling malaikat looy siꞌ ninsila pasal anak-anak looy.

¹⁸ Dari siꞌ, sagannap ma bay kale aka ni bay tuntut siga tukang ngipat bili-bili looy, tud bay haylan.

¹⁹ Kuwan si Mariyam baw siꞌ tu, kinanna na pin meꞌ na mimon pakaradjaan looy siꞌ. Tud yaꞌ na lakka-lakka man jawom pamiki na.

²⁰ Pag-anu, lay na pabeleng ga tukang ngipat bili-bili looy siꞌ pa baanan ipatan da. Lān da siꞌ pilay, bbuwatan da maehe Tuhan ka mudji iya sabapan mimon ma bay tasakup da. Mimon ilay siꞌ ma bay takita da, sikatuwaꞌ jaꞌ banahan ka bay umanat malaikat looy siꞌ.

Si Isa sinongan pa Tuhan

²¹ Na ngabut jaꞌ siꞌ wawuꞌ ngallaw umu anak-anak looy, lay na inislam. Maka lai na du inawnan si Isa, yana awon ma bay ndean leꞌ malaikat looy waktuhan na yaꞌ gi bay pinabattongan meꞌ nneꞌ na.

^22-24 Na njawom saraꞌ Nabi Musa ilay, pus danda maddi, pag taabut ni ka-mpatpūꞌ ngallaw, subay ya nutsiꞌ. Taat niiya nutsiꞌ, subay ya muwan duwa atsang atawa duwa takukkul ni imam nohoꞌ kinulban. Dari lay na du pilay si Yusup ka si Mariyam pa langga mehe ni Jerusalem nohoꞌ sinutsiꞌ. Anak da pun, luu na du bay boo da pilay batan luu du baw taat njawom saraꞌ meꞌ tuu: Sagannap anak lalla ma siyaka subay binoo pa mman imam. Maka subay induꞌ-mmaꞌ na mangaku ni awpan imam anak da yana bahagiꞌ Tuhan. Batan bay sinuwatan njawom saraꞌ Tuhan, sagannap anak lalla ma siyaka yana bahagiꞌ Tuhan.

²⁵ Na ndooy ni Jerusalem, luu disu lalla inawnan si Simiyun. Iya ilay intong maka tud ngisbat Tuhan. Ndang hallom na ya magdautan katakka tukang nalamat bangsa Israil. Maka luu na pin Rū Sutsiꞌ ngunungan iya.

²⁶ Lay gi pinalahil meꞌ Rū Sutsiꞌ niiya, yaꞌ gi ya matoy ngkod-ngkoran yaꞌ gi bay takita na tukang nalamat, yana Almasi ma bay njanjiꞌ meꞌ Tuhan.

²⁷ Na disu llaw, lay si Simiyun pinagmundaan meꞌ Rū Sutsiꞌ nohoꞌ pilay pa langga mehe. Luu jaꞌ siꞌ ya ndooy, luu du takka si Yusup ka si Mariyam moo anak da lān da majatu ilooy ma tinaat ni saraꞌ agama pasal anak siyaka.

²⁸ Pag takita sila meꞌ si Simiyun, lay kaddoꞌ na anak-anak looy, boꞌ tinayak meꞌ na sambayan na muwan pagsukuhan pa Tuhan, yuk na,

²⁹ “Tuhan, Papuꞌ ku, meꞌ aku disu ata nu, san situ ku matoy na, sannang na pikilan ku sabap itu na tuman nu bay janjiꞌ nu niyaku.

³⁰ Itu na manyatakan ni mata ku ma duwa tukang nalamat

³¹ ma bay ginantaꞌ meꞌ nu ni sikamimon bangsa.

³² Iya na situ sūꞌ man kabangsa-bangsahan ngita kabanahan pasal kau. Maka man sabapan na, binantug na sina mintu siga sukuꞌ nu bangsa Israil.”

³³ Pag takale meꞌ siga induꞌ-mmaꞌ si Isa bay bitsala si Simiyun pasal anak da, tud bay inu-inu sila.

³⁴ Pus meꞌ looy, lay doꞌ sila pakuhan si Simiyun supaat. Maka yuk na ni si Mariyam, “Gantaan man Tuhan, sabapan anak-anak tuu, meka sina mintu bangsa Israil binasa sabap meꞌ da yaꞌ pitsayaꞌ niiya. Sugaꞌ meka du baw sina salamat man sabapan na du. Iya ina mintu yana padduman ma magmundaan manusiyaꞌ pa Tuhan. Salla na, meka jama nuwak iya.

³⁵ Pag toklas na, bungka na kalaatan njawom atay da. Kuwan kau Mariyam, ni kaehe susa atay nu ina mintu ni anak nu, meꞌ lassa kataliꞌ pinantokan na sina njawom jantung nu.”

³⁶ Na ndooy siꞌ ni langga mehe, luu du disu bawu danda tud toa na. Awon na si Anna. Iya ilay tukang masampay siga umanat man Tuhan. Mmaꞌ na si Panuwel, disu panubuꞌ si Asel. Jaman si Anna masi baddung, lay na matoy lla na bohoꞌ pitun taun halloman da bay kinawin.

³⁷ Boꞌ yaꞌ na san ya bay llahan pabalik. Iya siꞌ tu mag-umu na umpuꞌ-mpat taun. Sangom-llaw luu na pin ya ndooy ni langga mehe numba Tuhan. Boꞌ daran gi ya puwasa sampay maku duwaa pa Tuhan.

³⁸ Na sasang si Simiyun mitsala ni si Mariyam ka si Yusup, lay pasōng si Anna pa mman da sambayan na mudji Tuhan sabapan anak da. Pus meꞌ looy, lataꞌ na man na nuntut pasal anak-anak looy ni mimon ma ndang ngagad Tuhan maddusan jama Jerusalem man ga banta da.

³⁹ Pag lupus si Yusup ka si Mariyam bay magtaat mean saraꞌ Tuhan, lay na sila moleꞌ pa Nasaret ndooy ni Jalil.

⁴⁰ Kuwan anak-anak looy siꞌ, song paehe song pataggu na pin iman na, boꞌ song palawom na pin pangahati na. Maka luu na pin supaat Tuhan ni jataꞌ na.

Si Isa tamban ni langga mehe

⁴¹ Na taun-taun, bbuwatan ga induꞌ-mmaꞌ si Isa siꞌ tu, pilay pa Jerusalem mmeꞌ ni paballangan mehe inawnan paballangan Ngalingkaꞌ.

⁴² Dari siꞌ, jaman si Isa mag-umu na sapu-duwan taun, lay na induꞌ-mmaꞌ na pilay pa Jerusalem ngikut ndang bay tabiat da mmeꞌ ni paballangan looy siꞌ. Maka lay du boo da si Isa.

⁴³ Na paddus jaꞌ siꞌ paballangan looy, moleꞌ na sila. Sugaꞌ yaꞌ san bay tasayu ga induꞌ-mmaꞌ si Isa lay ya tamban ni Jerusalem.

⁴⁴ Kanna da, luu na pin ya patuhut ni baanan lūng-kampung da. Pag-anu siꞌ, dangallaw na sila bay lumān, bohoꞌ tasayu da yaꞌ luu si Isa. Dari lay na piha da ni baanan kakampungan da ka kabagayan da.

⁴⁵ Pag yaꞌ jaꞌ ya tatammu, lay na baw sila pabeleng pa Jerusalem miha iya.

⁴⁶ Pag taabut ni katallu ngallaw na, bohoꞌ na luu tatammu da ndooy ni langga mehe ningkōꞌ ni baanan siga guru saraꞌ agama. Bbuwatan na pakale ni tōꞌ da sampay nilaw hāl agama.

⁴⁷ Na sagannap ma bay kale bitsala na ndooy tud bay kapajayip sila ni kalawom pangahati na ka ni kaalistu na nampung.

⁴⁸ Pag takita jaꞌ siꞌ ya meꞌ ga induꞌ-mmaꞌ na, tud bay jayip sila ngita iya lay pasakot ni baanan guru. Pag tilaw nneꞌ na, “Ongoy doꞌ tu Toꞌ meꞌ tuu meꞌ nu bay buwat induꞌ-mmaꞌ nu? Lataꞌ na man kami bay miha kau ni kagawa kami!”

⁴⁹ Tampung na, “Ongoy lay Neꞌ lataꞌ gi lahat man bi miha aku? Subay siꞌ ndang lay na tasayu bi mastiꞌ luu ku ntuu ni lumaꞌ Mmaꞌ ku.”

⁵⁰ Sugaꞌ sila baw siꞌ tu, yaꞌ bay takoleꞌ da hantak bitsala na.

⁵¹ Pag-anu siꞌ, lay na ya mmeꞌ ni induꞌ-mmaꞌ na moleꞌ pa Nasaret. Halloman na njawman da, mmeꞌ jaꞌ ya ni kahandak da. Na mimon bay kadarihan na siꞌ yaꞌ na lakka-lakka man jawom atay nneꞌ na.

⁵² Si Isa siꞌ tu, song paehe song palawom na pin pangahati na. Maka labba man Tuhan sampay na manusiyaꞌ, tud kasulutan niiya.