Kolossa 4 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Kuwan kaam baw siga papuꞌ, subay mahap du meꞌ bi buwat siga ata bi ni lanan ma pataꞌ ka intong. Intomun bi, kaam pun ina, luu du Papuꞌ bi ni sulgaꞌ.

Katapusan palbiatan si Pol

² Na kaam sikamimon, maku na pin kam duwaa pa Tuhan. Maka bila kam maku duwaa, jagahan bi niyat atay bi maka muwan kam pagsukuhan pa Tuhan.

³ Maka pakuhan bi du kami duwaa. Kamura-murahan binuwanan na pin kami meꞌ Tuhan lawang masaplag garaꞌ na pasal Almasi. Garaꞌ Tuhan ilay yaꞌ gi bay tumampak maruhuꞌ, sugaꞌ ni timpu batnaa pinalahil na. Sangkon ituu na situ man ku lay tajīl.

⁴ Maka pakuhan bi du ku tabang pa Tuhan supaya tapatallak ku garaꞌ na ni manusiyaꞌ.

⁵ Na bila kam maglaw-lamud ka jama ma yaꞌ pitsayaꞌ ni Papuꞌ Isa, amay-amay buwat kam suntuan ayad. Bong luu dapat bi, pahampitan bi sila kabanahan pasal si Isa Almasi padpad luu gi waktu.

⁶ Bila kam magbitsala ka sila, subay kam magmaltabat ninsila maka makoy bitsala mahap. Maka miha kam lawang man bi matabeꞌ bitsala ma kasambu ni nyawa da. Maka subay kam saddiya ka tampung ayad bong luu nual kaam. Bong siꞌ ina kam kabitsala meꞌ looy siꞌ, sibuꞌ du kam ka bay nongan sila lawuk tabaan.

⁷ Na ni kapasal kahalan ku ntuu, si Tikikus sa nuntutan kaam. Iya itu disu danganakan tabi kinaasean meꞌ sikamimon ntuu. Maka iya itu disu pagkahi ku sosohoan Papuꞌ Isa. Magkanaalla ya masaplag kalnaꞌ Tuhan.

⁸ Sohoꞌ ku sa ya pilu supaya katoonan bi na bong pooy kaadaan kami ntuu, boꞌ bi kagamgaman na.

⁹ Maka luu gi situ ntuu si Onesimas, jama lahat bi du, sohoꞌ ku ngahongan si Tikikus. Iya pun itu disu danganakan tabi du kanaalla mmeꞌ ni Papuꞌ maka kinaasean du meꞌ sikamimon ntuu. Sila sa mintu nuntutan kaam habal mantuu.

¹⁰ Sarī man naa, luu ntuu si Aristalkus, disu soheꞌ ku ntuu njawom jīl, lay nohoꞌ masampay salam duwaa na ningkaam. Si Malkus pun, yana kaki si Balnabas, lay du nohoꞌ masampay salam duwaa na ningkaam. Bong mintu ya bay pilu, meꞌ ndang bay tugun ku na maruhuꞌ, hasiyun bi sa ya paayad.

¹¹ Maka luu gi ntuu si Justus ma inawnan du si Isa, lay du nohoꞌ masampay salam duwaa na ningkaam. Na siga lalla tuu itu siꞌ sikatallu, sila du pagkahi ku bangsa Yahudi ntuu maghulas-sangsāꞌ masōng pamarinta Tuhan. Sabapan tabang da niyaku, tud bay kagamgaman ku.

¹² Maka luu gi ntuu jama lahat bi du, yana si Epapras, lay du bay nohoꞌ masampay salam duwaa na ningkaam. Iya itu sabana-bana sosohoan si Isa Almasi. Basag ya makuhan kaam duwaa supaya taggu iman bi maka supaya tatantu bi bong oy kahandak Tuhan ningkaam.

¹³ Bong inawnan si Epapras, aku na mismu kabāꞌ bong pooy basag tuyuꞌ na ningkaam ka ni siga danganakan tabi ndooy ni Leyodisiya ka Hirapolis.

¹⁴ Maka luu gi ntuu siga kakasi tabi Duktul Lukas maka si Demas lay du nohoꞌ masampay salam duwaa da ningkaam.

¹⁵ Maka pasampayun bi doꞌ salam duwaa ku ni siga danganakan tabi ndooy ni Leyodisiya, awla na ni si Nimpa maka ni mimon jamaa ma kumpo-kumpo numba ni lumaꞌ na.

¹⁶ Na pus bi mintu matsa suwat tuu, pokonan bi na baw pilay pa mman baanan sukuꞌ si Isa ndooy ni Leyodisiya supaya tabatsa da na du. Damikiyan, suwat ma bay pokonan ku pa mman da, pakuhun bi du ninsila boꞌ batsahun bi ni awpan siga danganakan tabi nnaa.

¹⁷ Maka baan bi si Alkipus, meꞌ iya jama bay kawakilan nohoꞌ maghulas-sangsāꞌ kalnaꞌ Papuꞌ, subay pabuwat na ilooy ma bay sinukuꞌ niiya.

¹⁸ Na ni katapusan suwat tuu, aku na situ si Pol nuwat salam duwaa ku ningkaam ka tangan ku na mismu. Meꞌ aku disu danganakan bi ma tiksaꞌ ntuu njawom jīl, intomun bi sa ku. Dambuli man naa, barakat man Tuhan ningkaam. Wassalam