Kolossa 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Na kitabi itu ma pitsayaꞌ ni Almasi, meꞌ tabi ngingat, lay na kitabi tabeꞌ niiya pinakallum pabalik sabap lay na kitabi buwanan Tuhan kaallum bahau. Sangkon, isbat tabi na hāl sulgaꞌ man Almasi ningkōꞌ ni bihing Tuhan huwin pa kawnan.

² Pandangun bi na hāl ma hagaan pa Tuhan. Bong hāl junyaꞌ, san daa na.

³ Batan pagkajama tabi ina maruhuꞌ lay na matoy. Pag batnaa, luu na kaallum tabi bahau njawom okoman Tuhan batan tibuuk na kitabi ka Almasi.

⁴ Dari pagka kaallum Almasi yana kaallum tabi, pag taabut na mintu pinalahil, malaingkan tabeꞌ na du kitabi ni kabantugan na.

⁵ Sangkon, timanan bi na mimon kalaatan meꞌ sapantun jina ka mimon jinisan kasabuhan sampay pamiki maat. Maka daa na kam magnapsu mulakab ni altaꞌ. Batan bong ina inaa tabiat bi, sibuꞌ du kam ka numba altaꞌ.

⁶ Jama ma buwat kalaatan meꞌ looy ilay, tumatandaꞌ yaꞌ sila ngasip ni kahandak Tuhan. Boꞌ ilooy na silay poonan man da tuwaꞌ mulkaꞌ bbos-bbos.

⁷ Maruhuꞌ kaam pun ina, bay du kam pingkaꞌ buwat meꞌ looy jaman bi yaꞌ gi bay pitsayaꞌ ni Almasi.

⁸ Sugaꞌ batnaa, timanan bi na mimon kalaatan meꞌ looy. Gigit njawom atay pun, ka lasu, timanan bi na du. Damikiyan, pabuwatan ma makaat pagkahi bi sampay pitna ka bitsala lakaꞌ-lakaꞌ labbahan bi na du.

⁹ Maka daa na kam sidustaꞌ-dustaꞌ. Batan pagkajama bi ilay maruhuꞌ ddas ka mimon kalaatan na, ibaratan badjuꞌ, lay na urusan bi,

¹⁰ sampay lay na saynan bi ka pagkajama bahau. Dari mangkin pasōng pangahati bi ni ilooy ma bay mapayak kaam, mangkin magsasōng na pin meꞌ arat-tabiat bi hinalin ngkod-ngkoran yaꞌ gi taabut bi arat-tabiat na.

¹¹ Dari pagka tibuuk na kitabi ka Almasi saliꞌ-saliꞌ, yaꞌ na situ kitabi minig jama. Yaꞌ na kitabi magsibiddaꞌ bong jama bangsa Yahudi atawa ssaꞌ, bong jama bay inislam atawa niyaꞌ, iskulan atawa niyaꞌ, bong ata atawa ssaꞌ. Isu-isu Almasi pandang tabi. Boꞌ iya ina luu na patannaꞌ njawom atay tabi sikamimon ma pitsayaꞌ niiya.

¹² Sangkon meꞌ kaam ina kakasi Tuhan maka sutsiꞌ na sampay lay na kam bay pineneꞌ binuwat sukuꞌ na, subay kam manimbang ni jama ka buwat mahap ninsila. Subay diyoꞌ ka lammaꞌ pangatayan bi. Maka subay tahaꞌ pasensiya bi.

¹³ Intong na, subay kam pandoy natasan salla arat pagkahi bi. Bong luu pagsaggaan bi ka pagkahi bi, siampun-ampun kam. Intomun bi, kaam pun ina, lay du kam bay inampun meꞌ Papuꞌ. Dari sapatut na, subay du kam ngampun.

¹⁴ Labi man sikamimon ma bay sabbut ku siꞌ, subay kam sikaaseꞌ-kaaseꞌ. Batan aseꞌ ina, bong ibaratan ingkot, inaa na man makkos kaam mari kam dambuwaꞌ atay sikamimon.

¹⁵ Tuhan ina bay ngaliyun kitabi supaya kitabi tibuuk pa disu baran sa njawman Almasi maka supaya kitabi wā njawom kasalassayan. Sangkon daa kam buwat oy maka oy na ma kalangkat ni kasalassayan ma lakka man Almasi. Maka subay kam tattap magsuku pa Tuhan.

¹⁶ Kannahun bi banahan mimon tōꞌ Almasi. Maka pakoyun bi na pangahati ma bay dean Tuhan ningkaam man bi sitoꞌ-tōꞌ atawa pun sipaintom-paintom. Maka ngalang kam siga kalangan pudji pa Tuhan meꞌ sapantun kalangan man jawom Kitab Jabul atawa kalangan sarī ma kasulut ni Tuhan tandaꞌ mehe meꞌ bi magsuku niiya.

¹⁷ Meꞌ kaam ina wakil Papuꞌ Isa, mimon bitsala bi ka pabuwatan bi subay magbēꞌ ka ntan bi. Maka subay kam wā magsuku ni Mmaꞌ tabi Tuhan sabapan mimon bay pabuwat si Isa ningkaam.

Palbiatan si Pol ni jama sitampu ka ni siga induꞌ-mmaꞌ ka ni siga anak sampay ni siga ata

¹⁸ Na kaam, siga karandahan, subay kam ngasip ni lla bi batan ndang inaa pataꞌ ningkaam sukuꞌ Papuꞌ Isa.

¹⁹ Kuwan kaam, kalallahan, subay kaasean bi nda bi. Daa kabangisan bi.

²⁰ Kaam baw siga anak, asipun bi jaꞌ induꞌ-mmaꞌ bi batan inaa nulut ni kahandak Tuhan. Boꞌ na, ndang inaa pataꞌ ningkaam sukuꞌ Papuꞌ Isa.

²¹ Kuwan kaam baw siga mmaꞌ, daa hangat kalanduꞌ meꞌ bi nahawi siga anak bi taggahaꞌ jamu sila nulut kaam.

²² Kaam pun baw siga ata, subay du kam wā ngasip ni siga papuꞌ bi ntuu ni junyaꞌ. Daa subay na pin luu papuꞌ bi nganjaga boꞌ bi magtuyuꞌ buwat. Jama meꞌ looy ilay, muhung jaꞌ sanglit ni manusiyaꞌ. Saꞌ ga sanglit man Tuhan puhung da. Arapun luu-yaꞌ luu papuꞌ bi nganjaga, subay kam kanaalla buwat paayad pagka kaam jama ma ngisbat Papuꞌ Isa.

²³ Oy-oy pabuwat bi, magtuyuꞌ kam ni kahilas atay bi. Ingatun bi maghulas-sangsāꞌ kam kalnaꞌ Papuꞌ Isa, saꞌ ga kalnaꞌ manusiyaꞌ.

²⁴ Maka katoonan bi na du sina, pagka kam maghulas-sangsāꞌ kalnaꞌ Papuꞌ Isa, mastiꞌ luu jaꞌ sina mintu tungbas ayad ningkaam. Tungbas ningkaam yana mimon kaayaran ma bay hinalliꞌ ni sukuꞌ na.

²⁵ Sugaꞌ soysoy buwat maat, mastiꞌ luu jaꞌ du sina mintu hisab ni jataꞌ da magtūk ka bay kalaatan da san gi soy sila, batan Tuhan ina yaꞌ minig.