Kolossa 2 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Siga danganakan, karomanan ku tasayu bi na bong pooy basag ku magtuyuan kaam ka sila ndooy ni Leyodisiya, sampay mimon ilooy kasohean sukuꞌ si Isa ma yaꞌ gi bay pingkaꞌ sitammu ka aku.

² Kon ku magtuyuꞌ supaya pataggu na pin iman bi maka supaya kam wā dambuwaꞌ atay ka tattap sikaaseꞌ-kaaseꞌ. Kainagon ku sukup na pangahati bi ni garaꞌ Tuhan ma yaꞌ gi bay tumampak ni siga angkat-angkatan maruhuꞌ, yana garaꞌ na pasal Almasi.

³ Isu-isu Almasi kabuwanan kitabi akka lawom mari tahati tabi hāl Tuhan. Boꞌ pangahati ni hāl Tuhan ina yana ladjikiꞌ hagaan.

⁴ Kon ku ilay siꞌ bay maan kaam meꞌ looy supaya kam yaꞌ takoleꞌ pinagsian meꞌ jama ma alistu nabid kabanahan.

⁵ San ku yaꞌ luu nnaa, tattap kam njawom atay ku. Maka kaam ina kagakan mehe niyaku sabap magtaayun pamiki bi maka takkoꞌ na pangando bi ni Almasi.

Pangando tabi ni Almasi poonan tabi salamat

⁶ Siga danganakan, pagka lay na kam mangando ni Papuꞌ tabi si Isa Almasi sibuwa bi bay pitsayaꞌ niiya, subay du kam mangando niiya ni mimon kahalan bi llaw pa dangallaw.

⁷ Subay tattog pangando bi niiya meꞌ karuha kayu ma nganggamut palawom njawom tanaꞌ. Ikutun bi na pin kabanahan ma bay tinōꞌ ningkaam pasal iya mari magsasōng na pin pangando bi niiya. Maka subay kam wā magsuku pa Tuhan.

⁸ Iyakin kam taggahaꞌ takawum na baw kam meꞌ jama ma mōꞌ tōꞌ palsu. Batan luu sina jinisan ilmuꞌ pinōꞌ ma mahap pinakale, sugaꞌ yaꞌ luu kapuspusan na. Luu ina mōꞌ tōꞌ lakka man arat kabboꞌ-bboan da, bong saꞌ tōꞌ lakka man jinisan aturan pinabuwat-buwat meꞌ manusiyaꞌ. Tōꞌ da ina saꞌ lakka man Almasi.

⁹ Mingkan, isu-isu Almasi subay binean, batan minsan ilay ya bay lahil pitu magbaran manusiyaꞌ, mimon pagkaTuhan Mmaꞌ na ndang luu na njataꞌ na.

¹⁰ Almasi ina magbayaꞌ ni mimon ma ngantanan kawasa-kapatut sampay siga seytan ka malaikat. Sangkon kaam ina, langkap-samat na kam sabap tibuuk na kam ka iya.

¹¹ Dari san kam saꞌ bangsa Yahudi, pagka tibuuk na kam ka Almasi, sibuꞌ na du kam ka lay na inislam tandaꞌ bi sukuꞌ Tuhan na. Sat na jaꞌ, islaman bi ina, niyaꞌ sibuꞌ karuha na ka islaman biyasa ma lakka man kapandoyan manusiyaꞌ. Batan Almasi ina, meꞌ na bay ngislam kaam, yaꞌ ya bay ngalakkahan kuwit awpan bi, arapun iya bay lakkahan na yana pagkajama bi maruhuꞌ ma nabiat buwat dusa.

¹² Batan takdang bi ilay bay llobloban pinandi, meꞌ bi ngingat, lay na kam tabeꞌ ni Almasi kinubu. Pag tunga bi man jawom boheꞌ, damikiyan, meꞌ bi ngingat, lay na du kam tabeꞌ ni Almasi pinakallum pabalik. Dari sabap meꞌ bi pitsayaꞌ Tuhan bay makallum Almasi pabalik, kaam pun ina lay na du bay binuwanan kaallum bahau.

¹³ Maruhuꞌ ilay, matoy kam ni mata Tuhan sabapan dusa bi. Bay jaꞌ kam pinagmundaan meꞌ napsu bi buwat kalaatan. Lipara batnaa, lay na kam binuwanan kaallum bahau sabap lay na kam tabeꞌ ni Almasi pinakallum. Maka lay na kam inampun meꞌ Tuhan ni mimon dusa bi.

¹⁴ Ni sabana na, kitabi itu sikamimon bay jaꞌ du pingkaꞌ buwat jinisan dusa. Dari ko ngawon, tahaꞌ na bay listahan dusa tabi ngalangga siga saraꞌ Tuhan. Lipara, lay na bay pawman Tuhan. Batan lay na tanggung Almasi dusa tabi jaman na bay nilansang taꞌ tehang.

¹⁵ Boꞌ na, man sabapan kapatoy na taꞌ tehang, lay na lappiꞌ meꞌ Tuhan Ibilis ka ga pagkahi na siga seytan ma ngantanan kawasa-kapatut. Dari ko ngawon, lay na sila hinaꞌ meꞌ Tuhan ni awpan sikamimon man sabapan toklas kapatoy Almasi.

Yaꞌ na kitabi njawman aturan agama

¹⁶ Sangkon, pagka kam tibuuk na ka Almasi, daa na parulihun bi bong luu manding kaam pa kalaatan sukat kam yaꞌ mmeꞌ ni siga aturan agama da pasal lawuk atawa inuman. Maka daa parulihun bi bong kam sinahawi sukat kam yaꞌ mogbogan siga paballangan ma tinaat meꞌ agama da atawa siga llaw mulliya meꞌ sapantun sahali buwan ka Llaw Pahali.

¹⁷ Batan siga aturan meꞌ looy ilay, yana sipat sadjaꞌ ni siga supaat ma bay binoo meꞌ Almasi pag ya bay takka pa junyaꞌ. Dari ongoy subay na pin masi inikut siga aturan meꞌ looy?

¹⁸ Sangkon daa na kam hidjab bong luu māꞌ yaꞌ sā kasalamatan bi bong kam yaꞌ bay niksaꞌ dī bi ngikut jinisan aturan agama da. Maka daa kam mmeꞌ ni ilmuꞌ kasohean ma nohoꞌ jama numba siga malaikat. Ga jama meꞌ looy ilay tinagi nuntutan kaam kajinisan bahasa bay pinalahil meꞌ Tuhan ninsila. Mingkan, ilooy du mehe ninsila ngabbu, meꞌ ndang tabiat manusiyaꞌ ma mandang hāl junyaꞌ.

¹⁹ Ga jama meꞌ looy ilay yaꞌ na ngantanan tōꞌ Almasi. Padahal Almasi ina, yana takōk ningkitabi ma binilang baran na. Iya sina poonan man mimon kalangkapan baran na koleꞌ oy-oy gunahan ninsila. Dari tiyap-tiyap ina baran langkit ka kōk na, tibuuk jaꞌ sina sikamimon. Mimon kalangkapan na sama-sama usik. Boꞌ magsasōng na pin meꞌ da sampulnaꞌ magbēꞌ ka gantaan Tuhan.

²⁰ Na kitabi itu sukuꞌ Almasi, meꞌ tabi ngingat, lay na kitabi tabeꞌ ni kapatoy na. Sangkon paddus na kitabi man siga aturan ma binista meꞌ kasohean subay binogbogan man da salamat. Sugaꞌ kaam baw tu, tatammu bi na baw ga mean siga aturan ma inikut meꞌ jama ma saꞌ sukuꞌ Almasi. Kuhi-kuhi jaꞌ kam mmeꞌ bong yuk da,

²¹ “Daa ntanan bi ituu. Daa kakanun bi inaa. Daa sagirun bi ilooy.”

²² Siga aturan meꞌ looy ilay yana panohoan ka tōꞌ lakka man manusiyaꞌ sadjaꞌ, saꞌ ga man Tuhan. Sarī gi, lawuk ina ka inuman ma tinagga meꞌ da, sandaꞌ-sandaꞌ jaꞌ, bosbos luu, bosbos katis. Hāl meꞌ naa ina, yaꞌ luu sukuꞌ na ni kasalamatan jama.

²³ Bong ndaꞌ mata, katuwaꞌ na sila mogbogan siga aturan meꞌ looy, saula-ula diyoꞌ pangatayan da. Maka meꞌ bantuk bana-bana sa sila bal-iman. Lagiꞌ na, meꞌ bantuk yaꞌ sa sila mandang hāl junyaꞌ sabap meꞌ da niksaꞌ baran da. Boꞌ ko, ni mimon taat da, yaꞌ luu san disu katabang nalloban napsu da ni kalaatan.