Kolossa 1 - Sabahagiꞌ Kitab Tawrat: Panagnaan ni Awwal Jaman maka Kitab Injil

KOLOSSA

¹ Ituu itu aku, yana si Pol, disu rasul si Isa Almasi man kahandak Tuhan. Itu suwat kami ka danganakan tabi si Timuti

² pa mman bi siga sukuꞌ Tuhan nnaa ni Kolossa. Meꞌ kaam siga danganakan kami nnaa ma magkanaalla mmeꞌ ni Almasi, kamura-murahan binuwanan na pin kam kasannangan ka barakat meꞌ Mmaꞌ tabi Tuhan.

Magsuku si Pol pa Tuhan sabapan sukuꞌ si Isa ni Kolossa

³ Siga danganakan, tuktuk kami itu makuhan kaam duwaa, wā kami muwan pagsukuhan pa Tuhan, yana Mmaꞌ Papuꞌ tabi si Isa Almasi.

⁴ Batan lay situ kami kaakahan pasal pangando bi ni si Isa Almasi ka aseꞌ bi ni mimon sukuꞌ Tuhan.

⁵ Sabapan kabanahan bay takale bi, yana umanat mahap pasal si Isa, ilooy na poonan bi ngaholat koleꞌ mimon supaat ma bay hinallian kaam ni sulgaꞌ. Maka ilooy na kon bi mangando ni si Isa ka maasean pagkahi bi manusiyaꞌ.

⁶ Umanat mahap ina, liput na junyaꞌ man na pinasaplag sampay meka na jama pitsayaꞌ. Dari magsasōng na pin hāp kawul-piil da meꞌ karuha kaam na du. Batan saliꞌ-saliꞌ na du kam lay kale sampay kahati kabanahan pasal aseꞌ Tuhan.

⁷ Boꞌ inaa na kabanahan ma bay takoleꞌ bi man si Epapras, disu limbang kami sosohoan Tuhan. Iya itu kakasi kami maka tiggo ya maghulas-sangsāꞌ kalnaꞌ Almasi pa kaayaran ningkaam.

⁸ Maka iya na du bay nuntutan kami pasal aseꞌ bi ni pagkahi bi manusiyaꞌ, yana aseꞌ njawom atay bi lakka man Rū Sutsiꞌ.

⁹ Dari labba man llaw kami bay kaakahan pasal kaam, yaꞌ na situ bakkat meꞌ kami makuhan kaam duwaa pa Tuhan. Kamura-murahan binuwanan na pin kam meꞌ Rū Sutsiꞌ akka lawom ka pangahati supaya tahati bi na banahan bong oy kahandak Tuhan ningkaam.

¹⁰ Maka kamura-murahan mōꞌ na pin kam kawul-piil ma kasulut ni Papuꞌ Isa mari kam wā tawop inawnan sukuꞌ na. Maka njawom duwaa kami, kamura-murahan tamba-manamba na pin kaayaran pabuwat bi maka magsasōng na pin meꞌ bi lungbid ka Tuhan.

¹¹ Maka kamura-murahan binuwanan du kam meꞌ Tuhan gaos lakka man kawasa na ma yaꞌ luu sibuꞌ sabanding na. Dari san gi oy katuwaꞌ ningkaam, katatas kam maka masi na pin kam gāk. Sarī gi, patahaꞌ na pin pasensiya bi.

¹² Maka kamura-murahan tattap du meꞌ bi muwan pagsukuhan ni Mmaꞌ tabi Tuhan sabap meꞌ na bay matawop kaam tumabeꞌ ni mimon kaayaran ma ndang bay hinalliꞌ ni sukuꞌ na ma njawom dantaꞌ.

¹³ Kitabi itu lay na pinaddusan meꞌ Tuhan man jawom komkoman Ibilis ma magbayaan jama njawom lindom. Sampay lay na tabi hinalin meꞌ Tuhan pa jawom pamarinta Anak na, yana kakasi na.

¹⁴ Anak na ina bay nanggung pidjalaꞌ ni mimon dusa tabi supaya tabi taampun na leꞌ Tuhan.

Patingkat Almasi man sikamimon

¹⁵ Na Tuhan ina yaꞌ takita, sugaꞌ man sabapan si Isa Almasi, sibuꞌ na du ka takita tabi arat-tabiat Tuhan ka kawasa na. Batan si Isa ina pulnaꞌ limbagan Tuhan. Maka ginalla du ya Anak Siyaka sabap iya ngantanan kawasa-kapatut njataꞌ mimon ma bay pinapayak.

¹⁶ Iya na sina man Tuhan bay mapayak mimon-mimon labba man taꞌ gumi sampay taꞌ langit. Mimon ma takita sampay ma yaꞌ takita meꞌ sapantun siga malaikat ka mimon rū ma ngantanan kawasa-kapatut ni antalaan, iya du man Tuhan bay mapayak. Intong na, mimon-mimon bay pinapayak meꞌ Anak Tuhan. Maka maksud da bay pinaluu kalnaꞌ iya.

¹⁷ Yaꞌ gi luu oy maka oy na bay pinapayak, ndang luu na Anak Tuhan, sampay iya na ngantanan mimon-mimon ni sikaliput alam supaya yaꞌ pulak-palik.

¹⁸ Iya ina pa-mmean tabi sikamimon ma pitsayaꞌ niiya. Dari iya takōk tabi maka kitabi binilang baran na. Iya ina yana poonan kaallum tabi bahau. Maka iya bay duhuꞌ pinakallum pabalik ddas ka baran ma yaꞌ na kuhi matoy. Kon na meꞌ looy supaya tumatandaꞌ iya patingkat man mimon-mimon.

¹⁹ Batan ndang bay silay ginaraꞌ meꞌ Tuhan subay mimon arat-tabiat na ka kawasa pagkaTuhan na takita njataꞌ Anak na.

²⁰ Maka ndang luu du garaꞌ Tuhan muwan lawang man mimon-mimon labba man junyaꞌ sampay taꞌ langit mahap na niiya. Garaꞌ na ilay bay pinajatu njataꞌ lahaꞌ Anak na bay pinaduwai taꞌ tehang.

²¹ Na kaam pun ina maruhuꞌ, yaꞌ du kam mahap pa Tuhan. Man sabapan laat pamiki bi ka pabuwatan bi, sibuꞌ du kam ka bay manta Tuhan.

²² Lipara, luu na Anak na bay dari manusiyaꞌ, boꞌ na nongan umu na kalnaꞌ kaam supaya kam mahap na pa Tuhan. Pag batnaa, sabapan Anak na, sutsiꞌ na kam. Yaꞌ na luu sutsutan njataꞌ bi ni mata Tuhan,

²³ basta kam tattap jaꞌ pitsayaꞌ ni umanat mahap pasal si Isa. Sangkon daa na kam kuhi pinagsian man kabanahan njawom umanat mahap ma bay takale bi. Maka daa kam jamu ngaholat Tuhan numan mimon janjiꞌ na njawom umanat mahap. Umanat mahap ina, liput na junyaꞌ man na pinasaplag. Na ni sagannap ma bay pineneꞌ masaplag, kuwan disu, yana aku na situ.

Magtuyuꞌ si Pol kalnaꞌ sagannap ma mmeꞌ ni si Isa

²⁴ Na san ku tu batnaa tiksaꞌ sabap meꞌ ku wā masaplag, yaꞌ du tu lungay kagakan ku. Kon meꞌ looy batan lay jaꞌ du bay pa kaayaran ningkaam. San pun Almasi, bay du lumingkaꞌ njawom jinisan kamalasahiyan kalnaꞌ siga sukuꞌ na. Pag batnaa, aku na baw pagantiꞌ niiya ngissahan kamalasahiyan kalnaꞌ sagannap ma pitsayaꞌ niiya, yana kitabi ma binilang baran na.

²⁵ Aku tu lay pineneꞌ meꞌ Tuhan binuwat sosohoan na kalnaꞌ kaam kabangsa-bangsahan ma saꞌ Yahudi. Sangkon tuyuan ku ngalataan kalahat-lahatan bi masaplag umanat Tuhan.

²⁶ Umanat Tuhan ina, yana pasal ladjikiꞌ ma bay llimbuhan man manusiyaꞌ ni siga angkat-angkatan maruhuꞌ. Sugaꞌ pag batnaa, luu na bay pinalahil ni sukuꞌ Tuhan.

²⁷ Umanat Tuhan ina, yana pasal garaꞌ na matabeꞌ kaam ma saꞌ Yahudi ni ladjikiꞌ lakka man iya. Ladjikiꞌ looy ilay yana Almasi patannaꞌ njawom baran bi. Boꞌ iya na sina poonan bi ngaholat ngabut arat-tabiat na.

²⁸ Dari inaa na sina kon kami masaplag pasal iya ni sikamimon bangsa. Sabuli-buli kami na situ mupusan kapandoyan bay pamuwan Tuhan ningkami man kami noan sila sampay ngawalan sila. Batan kainagon kami sikamimon ma mmeꞌ ni Almasi yaꞌ na luu sutsutan njataꞌ da ni mata Tuhan.

²⁹ Sangkon man kawasa Almasi nganggaosan aku, magtuyuꞌ-tuyuꞌ ku majatu pabuwatan ma bay sinukuꞌ niyaku.