Hibrani 9 - Sabahagiꞌ Kitab Tawrat: Panagnaan ni Awwal Jaman maka Kitab Injil

Langga bangsa Israil mattoꞌ

¹ Na njawom pagsulutan sibuwa ilay, luu siga aturan bong pooy meꞌ kabboꞌ-bboan tabi numba. Maka luu du langga ma bay pabuwat da ka kuwit hayop.

² Na njawom langga looy ilay siꞌ, luu duwa bilik na. Kuwan ilooy ma duhuꞌ inasok, ginalla Bilik Sutsiꞌ. Ndooy ilay, luu palitaan ka lamisahan man da magpangannaꞌ tinapay ma sinongan pa Tuhan.

³ Man jama paasok pa jawom bilik looy luu kultina. Maka ndooy ni kokan bilik looy luu du kultina ni sallangan bilik looy ka bilik ni kaduwa na ma ginalla Bilik Pinakasutsiꞌ.

⁴ Njawom Bilik Pinakasutsiꞌ luu lamisahan mmas man nunu bbūg. Maka luu du ndooy baul ginalla Baul Pagsulutan bay nilangkupan ka mmas pa jawom pa poan. Njawom baul looy luu disu katsaꞌ mmas isihan makanan inawnan manna. Maka luu du tungkud Imam Harun ma bay pingkaꞌ pinasuring meꞌ Tuhan. Maka luu du njawom baul looy siga batu pepan looy ma duwa bay man nuwatan siga panohoan Tuhan ni Nabi Musa.

⁵ Ni tangkop baul looy luu duwa jama-jama siawop ginalla Serabim Sahayaꞌ Tuhan. Sila ilay yana sipat luu Tuhan ndooy. Saliꞌ-saliꞌ luu pikpik da bay pinabakkut pa duhuan da man namingan tangkop baul looy ma ginalla Lugar Kaampunan. Tangkop looy ilay, ndooy na man mesekan lahaꞌ kulban supaya inampun na meꞌ Tuhan bangsa Israil ni bay dusa da. Sugaꞌ ddong na doꞌ ku nuntutan kaam hāl meꞌ looy batnaa.

⁶ Dari meꞌ looy na silay siꞌ kadari njawom langga looy mattoꞌ. Kuwan siga imam, bbuwatan da llaw-llaw paasok pa jawom bilik looy ma duhuꞌ buwat ma bay tinaat ninsila.

⁷ Sugaꞌ bong ni bilik ni kaduwa, yana Bilik Pinakasutsiꞌ, bāꞌ njawom saraꞌ Nabi Musa, yaꞌ luu dari paasok sarī man panghuluꞌ imam, boꞌ sakayi du njawom dantaun. Maka taabut na paasok, subay luu boo na lahaꞌ kulban sinongan pa Tuhan para ni dusa na mismu ka dusa siga raayat na, dusa ma tasayu sampay ma niyaꞌ.

⁸ Dari sabap meꞌ looy siꞌ, pinalahil na meꞌ Rū Sutsiꞌ ningkitabi inaa halloman jama njawman pagsulutan sibuwa, yaꞌ luu dapat da paasok pa jawom Lugar Pinakasutsiꞌ ni awpan Tuhan.

⁹ Sarī gi, langga looy ilay mattoꞌ sampay mimon ma tinaat ndooy yana siga sipat sadjaꞌ ni siga pakaradjaan ma bay binakbul njataꞌ Almasi bbos-bbos. Batan ni sabana na, san jama bay nong siga jakat ka kulban pa Tuhan, masi du yaꞌ bay kasutsiꞌ ni atay da. Sangkon masi luu njawom honaꞌ-honaꞌ da ga dusahan gi sila pa Tuhan.

¹⁰ Sarī gi, siga aturan ma bay bogbogan da ilay tuwaꞌ pa hāl ma yaꞌ ngotab pa jawom atay, meꞌ sapantun aturan hāl makanan ka inuman sampay jinisan pandihan. San pooy meꞌ mogbogan siga aturan meꞌ looy, yaꞌ du kasutsiꞌ ni atay. Sugaꞌ talpaksaꞌ baw ninsila mogbog ngkod-ngkoran yaꞌ gi bay pinasampay pagsulutan bahau.

Lahaꞌ si Isa yana kasāhan ni pagsulutan bahau antaraꞌ Tuhan ka manusiyaꞌ

¹¹ Lipara, bay na pitu Almasi sampay lay ya dari panghuluꞌ imam ma asahan tabi. Dari takissa tabi na siga supaat poonan pagsulutan bahau ma bay pinasampay meꞌ na. Kuwan langga man na bay paasok mag-imam, patingkat man langga kabboꞌ-bboan tabi. Langga ma bay asok na, yaꞌ luu kulang na sabap saꞌ manusiyaꞌ bay matangge. Intong na, saꞌ silay meꞌ siga pakaradjaan ni junyaꞌ tuu.

¹² Dari meꞌ Almasi bay paasok ni Lugar Pinakasutsiꞌ ndooy ni sulgaꞌ, yaꞌ na ya bay moo lahaꞌ kambing atawa lahaꞌ sapiꞌ lalla. Iya bay boo na, yana lahaꞌ na mismu. Maka iya bay paasok, sakayi labba du, saꞌ na meꞌ karuha siga panghuluꞌ imam mattoꞌ talpaksaꞌ taun pa taun paasok ni Bilik Pinakasutsiꞌ. Maka man sabapan lahaꞌ na bay tumpa, lay ya nanggung mimon dusa manusiyaꞌ supaya luu na lawang man da salamat saumu-umu.

¹³ Maruhuꞌ, njawman aturan pagsulutan sibuwa, bila baran jama tamakan sabap meꞌ da bay kasagid mayat atawa bay buwat haram, subay sila sinutsiꞌ. Meꞌ nutsiꞌ sila, subay pinesekan baran da meꞌ imam ka lahaꞌ kambing ka lahaꞌ sapiꞌ lalla sampay abu sapiꞌ danda ma bay tinunu.

¹⁴ Na bong lahaꞌ hayop kasutsiꞌ, labi na bong lahaꞌ Almasi saꞌ kasutsiꞌ. Batan lahaꞌ Almasi ina kasutsiꞌ sampay ni honaꞌ-honaꞌ tabi ma bay tamakan sabap meꞌ tabi bay maabak jinisan ma katiksaꞌ ni nyawa tabi. Dari man kawasa Rū Sutsiꞌ ma luu saumu-umu, lay na Almasi nongan umu na pa Tuhan bilang kulban ma yaꞌ luu salla na. Kon na buwat meꞌ looy supaya bean tabi na kahandak Tuhan.

¹⁵ Sangkon Almasi ilay, iya na bay mōꞌ pagsulutan bahau antaraꞌ Tuhan ka sukuꞌ na. Batan ni jataꞌ kapatoy na, lay na puwasan na mimon dusa tabi bay ngalangga siga saraꞌ ni pagsulutan sibuwa. Dari sagannap ma bay lliyun pa jawom okoman Tuhan, takoleꞌ da na mimon supaat ma ndang bay njanjiꞌ meꞌ Tuhan ni sukuꞌ na. Sila ina meꞌ sapantun jama bay koleꞌ pusaka mehe ma natas saumu.

¹⁶ Na jama altaan ina, bong bay buwat suwat pusaka, meꞌ tuu aturan na: Subay lai na ya matoy boꞌ takoleꞌ pusaka na meꞌ jama ma bay pineneꞌ pinusakahan njawom suwat.

¹⁷ Batan yaꞌ gi sina llum kapatut suwat wakil pusaka ngkod-ngkoran yaꞌ gi bay matoy jama ma dapu altaꞌ.

¹⁸ Damikiyan, ni hāl pagsulutan sibuwa antaraꞌ Tuhan ka ga sukuꞌ na ni bay jaman Nabi Musa, subay du luu bay matoy boꞌ na sā pagsulutan looy. Dari siꞌ, luu du bay matoy, yana hayop bay sinumbaliꞌ supaya sā pagsulutan looy. Meꞌ tuu salsila na:

¹⁹ Pag lupus Nabi Musa bay matsahan siga raayat na saraꞌ ni pagsulutan sibuwa, kitab saraꞌ looy sampay mimon raayat na lay bay pesekan na ka lahaꞌ siga sapiꞌ lalla ka lahaꞌ siga kambing bay sinakotan boheꞌ. Man na bay mesek, batang jambangan hisop bay llagotan bū bili-bili bay inakket.

²⁰ Njawom Nabi Musa mesekan sila, yuk na, “Lahaꞌ tuu tu yana kasāhan ni pagsulutan ma bay sohoꞌ Tuhan binogbogan ningkaam.”

²¹ Pag-anu siꞌ, lay gi pesekan na langga looy ma bay pinabuwat ka kuwit hayop sampay mimon kalangkapan na ma pinagpakoy jawom da numba Tuhan.

²² Batan sabana na, bong ni saraꞌ Nabi Musa, agon mimon-mimon subay pinesekan lahaꞌ boꞌ taawnan sutsiꞌ pa Tuhan. Maka bong ina yaꞌ luu lahaꞌ bay pinaduwai, malaingkan yaꞌ luu dapat manusiyaꞌ koleꞌ kaampunan ni bay dusa da.

Si Isa Almasi yana kulban tabi sinongan pa Tuhan

²³ Na siga taat kaimaman ni langga jaman looy sipat sadjaꞌ ni siga pabuwatan Almasi ndooy ni sulgaꞌ. Dari yana meꞌ langga looy mattoꞌ ka ga kalangkapan na talpaksaꞌ sinutsiꞌ ka lahaꞌ kulban, damikiyan siga sukuꞌ sulgaꞌ pun, talpaksaꞌ du sinutsiꞌ ka lahaꞌ. Sugaꞌ subay lahaꞌ mas hagaan gi man lahaꞌ hayop pinaduwai boꞌ siga sukuꞌ sulgaꞌ takoleꞌ sinutsiꞌ.

²⁴ Sangkon na ilay lahaꞌ Almasi na bay tumpa. Pag-anu, lay na ya paasok pa jawom sulgaꞌ. Pag batnaa, ndooy na ya ni awpan Tuhan kalnaꞌ kitabi. Yaꞌ na ya bay paasok ni langga bay pinatangge meꞌ manusiyaꞌ meꞌ ilooy ma bay asok panghuluꞌ imam mattoꞌ. Batan langga looy ilay sipat sadjaꞌ ni Lugar Pinakasutsiꞌ ni sulgaꞌ.

²⁵ Maruhuꞌ, taun pa taun subay panghuluꞌ imam paasok pa jawom Bilik Pinakasutsiꞌ nongan lahaꞌ hayop pa Tuhan. Boꞌ ni Almasi, ilooy ya bay songan na lahaꞌ na mismu, boꞌ tasakup na meꞌ lahaꞌ na man muwasan dusa manusiyaꞌ sakayi labba du.

²⁶ Batan bong siꞌ ilay yaꞌ bay tasakup lahaꞌ na muwasan dusa sakayi labba du, malaingkan talpaksaꞌ ya min meka malasahi labba man waktu junyaꞌ bay pinapayak. Sugaꞌ iya ilay bay pitu pa junyaꞌ ni masa batnaa ma pinag-awnan ahil jaman supaya tasongan na na umu na man ngalakkahan dusa tabi sakayi labba du.

²⁷ Na bong inawnan manusiyaꞌ, ndang lay na sina ginantaꞌ ninsila matoy sakayi du. Pag-anu, boꞌ da hinukum meꞌ Tuhan.

²⁸ Damikiyan Almasi pun, sakayi du bay matoy mari tatanggung na dusa manusiyaꞌ. Pabeleng gi du ya ni sinōng, sugaꞌ saꞌ na maksud na mintu nanggung dusa. Arapun ilooy sa kon na lahil pabalik supaya tasalamat na sagannap ma ngagad ni katakka na.