Hibrani 7 - Sabahagiꞌ Kitab Tawrat: Panagnaan ni Awwal Jaman maka Kitab Injil

Pagkaimam si Melkisedek

^1-2 Na si Melkisedek ilay yana sultan ndooy ni disu daira inawnan Salam mattoꞌ. Maka imam du ya man kahandak Tuhan Mahatinggi. Iya na silay bay nampang ga Nabi Ibrahim lān da moleꞌ bay maā siga sultan ka baanan sundalu da ni bonoꞌ mehe. Boꞌ iya gi man Nabi Ibrahim bay muwan sabahagiꞌ sapū ni mimon altaꞌ ma bay takoleꞌ na paddus bonoꞌ looy. Maka lay gi ya nupaatan Nabi Ibrahim. Na hatiyan awon Melkisedek ilay yana “sultan intong”. Maka ginalla du ya “Sultan Kasannangan” sabap awon daira na yana Salam, hatiyan na kasannangan.

³ Si Melkisedek ilay saꞌ meꞌ kaimaman ilooy kasohean. Yaꞌ luu induꞌ-mmaꞌ na atawa usuwan kabboꞌ-bboan na. Damikiyan, kaallum na yaꞌ du luu panagnaan na maka yaꞌ du luu katapusan na. Batan meꞌ Anak Tuhan du ya mag-imam saumu-umu.

⁴ Bistahun bi doꞌ ehe kapatut si Melkisedek. Minsan Nabi Ibrahim pinakatanyag ni kabboꞌ-bboan tabi bangsa Yahudi, lay gi ya nong sabahagiꞌ sapū ni mimon altaꞌ bay takoleꞌ ni bonoꞌ looy ni si Melkisedek.

⁵ Na bong ni saraꞌ Nabi Musa, ilooy du bay inuwakilan mag-imam yana sagannap siga panubuꞌ si Libay. Maka sila du bay inuwakilan nambut sabahagiꞌ sapū ni bay usaha siga pagkahi da panubuꞌ Nabi Ibrahim.

⁶ Sugaꞌ ni waktu ga Nabi Ibrahim ka si Melkisedek bay sitammu, kuwan pagkaimam si Libay, yaꞌ gi luu sabap lawak kaduhuan jaman ga Nabi Ibrahim man si Libay. Dari san si Melkisedek saꞌ panubuꞌ si Libay, ndang iya na mman Nabi Ibrahim bay nong sabahagiꞌ sapū. Pag-anu, lay gi ya nupaatan Nabi Ibrahim. Na Nabi Ibrahim ilay, san iya na bay njanjian meꞌ Tuhan,

⁷ tumatandaꞌ patingkat gi si Melkisedek man iya. Batan tiyap-tiyap ina jama ngantanan kapatut nupaat, mastiꞌ langkaw gi ya man ilooy ma supaatan na.

⁸ Sarī gi, ni kapasal siga panubuꞌ si Libay ma bay binuwat imam sampay magpanambut sabahagiꞌ sapū man siga raayat da, luu gi du masa da matoy. Boꞌ si Melkisedek, yuk njawom kitab, llum ya saumu-umu.

⁹ Lagiꞌ na, dari ko ngawon, minsan si Libay mismu, yana bboꞌ kaimaman ma magpanambut sabahagiꞌ sapū, tabilang du ya bay tabeꞌ ni Nabi Ibrahim bay nong sabahagiꞌ sapū ni si Melkisedek.

¹⁰ Batan jaman Nabi Ibrahim bay sitammu ka si Melkisedek, san yaꞌ gi bay pinamaddihan si Libay, bilang ndang isi Nabi Ibrahim na du ya batan Nabi Ibrahim yana bboꞌ tuut na.

Pagkaimam siga panubuꞌ si Libay ginantian ka pagkaimam meꞌ ni si Melkisedek

¹¹ Na ni bay jaman saraꞌ bay ndean Nabi Musa, si Harun ka ga pagkahi na panubuꞌ si Libay bay inuwakilan mag-imam. Maka bay sinukuꞌ ninsila noan siga raayat da saraꞌ. Sugaꞌ pagkaimam da yaꞌ bay kasutsiꞌ ni pangatayan siga raayat da. Bong siꞌ ilay bay na takaya meꞌ pagkaimam ga si Harun nutsiꞌ pangatayan jama, san Tuhan yaꞌ na bay nganggantian pagkaimam da ka pagkaimam meꞌ ni si Melkisedek.

¹² Sangkon pagka lay na ginantian pagkaimam siga panubuꞌ si Libay, damikiyan saraꞌ da pun subay du ginantian.

^13-14 Na pagkaimam man bay nganggantiꞌ yana pagkaimam Papuꞌ tabi si Isa Almasi. Pagkaimam na ilay, tumatandaꞌ sarī na batan panubuꞌ si Juda ya, saꞌ ya panubuꞌ si Libay. Boꞌ halloman kabboꞌ-bboan tabi njawman saraꞌ, yaꞌ bay luu san disu panubuꞌ si Juda bay pingkaꞌ mag-imam. Sarī gi, jaman Nabi Musa mitsala hāl imam, yaꞌ du bay sabbut na paglūng si Juda.

¹⁵ Lagiꞌ na, tumatandaꞌ gi lay na ginantian pagkaimam siga panubuꞌ si Libay sabap luu na bay pōꞌ panghuluꞌ imam bahau ma sibuꞌ du karuha na ka si Melkisedek.

¹⁶ Awnan ku Papuꞌ tabi si Isa. Maka meꞌ na bay dari imam, saꞌ man poonan usuwan meꞌ ilooy ma bay tinaat njawom saraꞌ. Arapun iya bay dari imam sabapan kaallum na ma yaꞌ luu katapusan na, tandaꞌ ehe kawasa na.

¹⁷ Boꞌ sikatuwaꞌ du ka palman njawom kitab pasal Almasi, ilooy ma yuk Tuhan, “Kau ina imam saumu-umu. Pagkaimam nu sibuꞌ du karuha na ka pagkaimam si Melkisedek.”

¹⁸ Sangkon subay tahati tabi, bong inawnan pagkaimam maruhuꞌ ddas ka jinisan saraꞌ na, lay na ginantian meꞌ Tuhan sabap yaꞌ luu kawasa na nalamat manusiyaꞌ. Maka yaꞌ na luu kapansahaliyan na.

¹⁹ Batan yaꞌ luu njawom saraꞌ ma kasutsiꞌ ni pangatayan manusiyaꞌ supaya sila mahap na pa Tuhan. Sangkon lay na Tuhan muwanan kitabi pag-asa mas mahap man saraꞌ man tabi mahap na niiya.

^20-21 Pag-asa tabi ina yana si Isa Almasi. Iya ilay, taabut na bay inuwakilan magpanghuluꞌ imam ma asahan tabi, lay gi Tuhan napa, yuk na ni Almasi, “Aku itu Magbayaꞌ. Sapahan ku na, basta kau na imam saumu-umu. Boꞌ yaꞌ na situ baluba ku.” Boꞌ siga imam lakka man panubuꞌ si Libay ilay, yaꞌ bay pingkaꞌ sapahan Tuhan meꞌ looy jaman da bay binuwat imam.

²² Dari sabapan sapa Tuhan, lay na si Isa dari poonan man tabi katantu luu na pagsulutan bahau antaraꞌ Tuhan ka siga sukuꞌ na. Boꞌ tā biddaꞌ kaayaran na man pagsulutan sibuwa.

²³ Na maruhuꞌ, meka panubuꞌ si Libay bay pingkaꞌ mag-imam, batan tuktuk luu disu matoy, luu na baw pasunuꞌ gantiꞌ na.

²⁴ Boꞌ pagkaimam si Isa ilay, yaꞌ na luu gantiꞌ na sabap llum ya saumu-umu.

²⁵ Sangkon, tapajatu na na banahan nalamat sagannap ma doman mahap na pa Tuhan, basta sila pitsayaꞌ jaꞌ niiya. Iya ilay llum saumu-umu maka wā ya makuhan sila timbang pa Tuhan.

²⁶ Danan si Isa ilay tawop binuwat panghuluꞌ imam ma asahan tabi sabap sutsiꞌ ya. Yaꞌ luu sutsutan njataꞌ na maka yaꞌ luu tamak na. Yaꞌ ya bay pingkaꞌ mmeꞌ meꞌ uwahan siga baldusa. Maka sa langkaw-langkaw langit, mas langkaw gi kabantugan na ka kapatut na.

²⁷ Yaꞌ ya sibuꞌ ka kaimaman panubuꞌ si Libay ma subay na pin nongan kulban pa Tuhan llaw-llaw. Bbuwatan da duhuꞌ nong para ni dusa da mismu, boꞌ da nong para ni dusa siga raayat da. Boꞌ ni si Isa ilay, sakayi labba du ya bay nongan umu na bilang kulban para ni dusa mimon manusiyaꞌ. San yaꞌ na binalikan saumu.

²⁸ Boꞌ sagannap ma bay inuwakilan magpanghuluꞌ imam njawman saraꞌ Nabi Musa, saliꞌ-saliꞌ sila manusiyaꞌ sadjaꞌ ma ndang dusahan pa Tuhan. Kahapan, hallom maka hallom na, lay na baw Tuhan napa subay Anak na inuwakilan magpanghuluꞌ imam saumu. Boꞌ Anak na ina yaꞌ luu dusa na atawa salla na samasakali.