Hibrani 6 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Sangkon, ddong na kitabi kataddasan ni tōꞌ ma ndang lay na takoleꞌ tabi jaman tabi bahau bay mmeꞌ ni Almasi. Palanja na kitabi pa pangahati lawom mari pataggu na iman tabi. Ibaratan buwat lumaꞌ, bong kita lay na matangge tehang, san kita yaꞌ na matangge pabalik. Hati na, san yaꞌ na pagsibalik-balik tabi tōꞌ ma ndang katoonan tabi na. Awnan ku ilay siꞌ yana hāl meꞌ sapantun nawbatan dusa, pangando pa Tuhan,

² ka hāl mandi, hāl nappak bumbunan jama maka hāl meꞌ manusiyaꞌ pinakallum pabalik sampay hāl meꞌ Tuhan motangan hukuman ma natas saumu-umu njataꞌ manusiyaꞌ.

³ Sangkon, bong siꞌ nugut jaꞌ Tuhan, sampunan tabi na pangahati tabi ni hāl Tuhan

^4-6 mari song patakkoꞌ na pin pangando tabi ni Almasi. Batan bong ina jama lay na ngalabbahan pangando da niiya, siya-siya sila. Bistahun bi doꞌ, lay na sila pingkaꞌ pinadantaan pamiki da, maka lay na takissa da kaayaran ladjikiꞌ man sulgaꞌ ma yaꞌ luu sibuꞌ sabanding na. Sampay lay na sila pinaasokan Rū Sutsiꞌ. Sarī gi, lay na sila ngissa kaayaran ma bay njanjiꞌ njawom palman Tuhan. Sampay lay na sila ngissa kawasa njataꞌ da sasang da njawman pamarinta Tuhan ma bahau jaꞌ takka ni masa tuu. Na bong ilay ga jama meꞌ looy lay na patatak, tunmanūn na silay meꞌ da pinatawbat balik sabap sibuꞌ du sila ka bay ngalansang Anak Tuhan taꞌ tehang pabalik. Batan man sabapan da, awon si Isa binuwat na ga kalabbiyan.

⁷ Na kitabi itu manusiyaꞌ meꞌ kadari huma njawom panguwan. Kasohean tanaꞌ ni huma looy mura jaꞌ inassob. Boꞌ na, tinanom na buwaꞌ jaꞌ paayad. Tanaꞌ meꞌ looy ilay mehe kapansahaliyan na ni jama ma bay tanom. Boꞌ na, sinupaatan gi meꞌ Tuhan.

⁸ Sugaꞌ kasohean tanaꞌ ni huma looy gam pin katomoan lumput itingan. Tanaꞌ meꞌ looy ilay yaꞌ luu pūs na. Pag toklas na, sinumpaan sampay tinunu na ddas ka tinanom na.

⁹ Siga kakasi ku, san ku ilay siꞌ bay halling meꞌ looy, ni bistahan ku, saꞌ baw lay tuwaꞌ pa kaam meꞌ karuha tanaꞌ looy ma yaꞌ luu pūs na. Batan tatantu ku iya pabuwat bi kaayaran ma sikatuwaꞌ ka jama ma salamat na.

¹⁰ Tuhan ina intong. Sangkon mimon kaayaran bay pabuwat bi yaꞌ luu takupan na. Takita na du sina aseꞌ bi niiya sabap meꞌ bi nabang ni siga pagkahi bi sukuꞌ si Isa ngabut sampay batnaa.

¹¹ Kainagon kami itu tiggohan bi na pin buwat meꞌ naa halloman bi llum supaya tantu takoleꞌ bi mimon ma hinolat meꞌ bi man Tuhan.

¹² Ngkon ina kam paintoman ku supaya kam yaꞌ jamu makutuꞌ kahandak Tuhan. Akigun bi jaꞌ sagannap ma yaꞌ jamu mangando pa Tuhan sampay natasan jinisan kasusahan kalnaꞌ iya. Jama meꞌ sila ina, takoleꞌ da siga supaat bay janjiꞌ Tuhan ni sukuꞌ na.

Janjiꞌ Tuhan siguru tinuman

¹³ Intomun bi bay jaman Tuhan nganjanjiꞌ ni Nabi Ibrahim. Taabut Tuhan napa, pagka yaꞌ luu awon langkaw labi man niiya, lay na jaꞌ ya napa makoy awon na mismu.

¹⁴ Janjiꞌ na ni Nabi Ibrahim, yuk na, “Supaatan ta ko maka buwanan ta ko panubuꞌ lipat man lipat.”

¹⁵ Dari siꞌ, pagka yaꞌ bay kuhi jamu Nabi Ibrahim pitsayaꞌ san ya bay hallom ngagad, lay du bay takoleꞌ na ilooy ma bay njanjiꞌ niiya.

¹⁶ Na tabiat manusiyaꞌ bong sila doman kinapitsayaan, napa sila ni awon Tuhan batan basag gi kawasa na man ninsila. Dari pus da napa, yaꞌ na luu pagjawapan da.

¹⁷ Tuhan pun, kainagon na subay tumatandaꞌ du yaꞌ kuhi baluba bay janjiꞌ na ni siga sukuꞌ na. Sangkon lay du ya bay napa.

¹⁸ Dari luu duwa pakaradjaan ma yaꞌ tabaluba saumu, yana janjiꞌ Tuhan ka sapa na. Batan tunmanūn meꞌ Tuhan karapatan. Sangkon kitabi ma lay na paasok pa jawom okoman Tuhan, yaꞌ na maglumba meꞌ tabi ngaholat koleꞌ mimon ma bay janjiꞌ Tuhan ningkitabi.

^19-20 Holat tabi ina meꞌ karuha bahudjiꞌ ngagot ni tanaꞌ diyoꞌ mari kitabi yaꞌ usik man okoman Tuhan. Kon luu holat tabi batan luu na pag-asa tabi, yana si Isa Almasi. Iya ilay panghuluꞌ imam tabi. Boꞌ pagkaimam na ina sibuꞌ karuha na ka ni si Melkisedek, yaꞌ luu katapusan na. Si Isa ilay lay na duhuꞌ man kitabi paasok pa jawom Lugar Pinakasutsiꞌ ni pag-awpan Tuhan mari kitabi mahap na pa Tuhan. Sangkon yaꞌ na kitabi alang-kapalang paawop pa Tuhan.