Hibrani 5 - Sabahagiꞌ Kitab Tawrat: Panagnaan ni Awwal Jaman maka Kitab Injil

¹ Na maruhuꞌ, tuktuk luu panghuluꞌ imam bay pineneꞌ binuwat wakil bangsa Yahudi, iya na bay utusan da pa Tuhan. Iya tukang nong jakat ka siga kulban pa Tuhan supaya taampun Tuhan na siga Yahudi ni bay dusa da.

² Maka panghuluꞌ imam ina, takissa na parasahan siga raayat na bong luu bay magsiꞌ ni kaawam da, batan iya pun luu du salla na.

³ Maka pagka dusahan du ya, sarī man nong siga kulban para ni siga raayat na, talpaksaꞌ du ya nong kulban para ni dī na.

⁴ Ni hāl meꞌ meneꞌ panghuluꞌ imam, yaꞌ dari jama meneꞌ dī na ni ntan bantug meꞌ looy. Ilooy du dari meneꞌ yana Tuhan mismu meꞌ bay karuha jaman na bay meneꞌ Imam Harun.

⁵ Damikiyan Almasi pun, yaꞌ du ya bay meneꞌ dī na panghuluꞌ imam man na maehe dī na. Ilooy ya bay meneꞌ iya yana Tuhan, batan bay magpalman Tuhan niiya, “Kau ina Anak ku. Labba man llaw tuu tumatandaꞌ na aku Mmaꞌ nu.”

⁶ Maka yuk Tuhan niiya, “Kau ina imam saumu-umu. Pagkaimam nu meꞌ karuha pagkaimam si Melkisedek.”

⁷ Na jaman si Isa ntuu ni junyaꞌ, daran ya maku duwaa maka tamūd njawom duwaa na ngattap na ga boheꞌ mata na sambayan na killahap. Bbuwatan na nganjunjung pa Tuhan batan isu-isu Tuhan kasalamat iya man kapatoy na. Dari sabap iya jama lillaꞌ jaꞌ pa Tuhan, lay du bay pinaruli duwaa na.

⁸ Iya ilay, san ya Anak Tuhan, lay du ya lumingkaꞌ njawom jinisan kabinsanaan supaya takissa na parasahan manusiyaꞌ mean kahandak Tuhan tanne-pasuꞌ.

⁹ Dari pagka wā ya mmeꞌ ni kahandak Tuhan, tandaꞌ yaꞌ luu salla na, lay du ya dari poonan kasalamatan ma natas saumu-umu para ni sikamimon ma ngasip niiya.

¹⁰ Sampay lay gi ya pineneꞌ meꞌ Tuhan binuwat panghuluꞌ imam meꞌ karuha pagkaimam si Melkisedek.

Palbiatan ni sagannap ma yaꞌ gi taggu iman da

¹¹ Sarī man naa, meka gi situ siꞌ karomanan ku tinōꞌ ningkaam, sugaꞌ yaꞌ mura-mura meꞌ mahatiyan kaam sabap bilod kam.

¹² Bistahun bi doꞌ, hallom looy na kam bay mmeꞌ ni si Isa, subay siꞌ pandoy na kam noan jama. Boꞌ kaam itu, subay na pin pinagbalik-balik tinoan hāl Tuhan ma subay siꞌ ndang katoonan bi na. Sibuꞌ du karuha bi ka anak-anak ma subay na pin pinaduruꞌ, yaꞌ gi kakakan sumbalian.

¹³ Jama ina ma masi kulang pangahati da ni palman Tuhan pasal kaintongan, sibuꞌ du karuha da ka anak-anak dikiꞌ subay na pin pinaduruꞌ.

¹⁴ Boꞌ jama ma nganna sampay tattap mean kabanahan, malaingkan biyasa na sila nilang tōꞌ ma mahap ka tōꞌ palsu. Sila ilay meꞌ sapantun jama mehe na ma takaya da na mangan sumbalian.