Hibrani 4 - Sabahagiꞌ Kitab Tawrat: Panagnaan ni Awwal Jaman maka Kitab Injil

Luu pahaliyan ni sagannap ma pitsayaꞌ

¹ Na san meꞌ looy bay katuwaꞌ ni kabboꞌ-bboan tabi, masi du situ luu pahaliyan ni timpu batnaa ma bay njanjiꞌ meꞌ Tuhan ndean siga sukuꞌ na. Sugaꞌ paliksaun bi doꞌ dī bi bong tud luu na kam njawom pahaliyan looy, taggahaꞌ luu na pin kam yaꞌ gi bay paasok.

² Batan kitabi pun itu, lay na du kale umanat mahap pasal pahaliyan bay hinalliꞌ ningkitabi meꞌ karuha umanat bay takale leꞌ kabboꞌ-bboan tabi. Sat na jaꞌ kuwan ninsila, yaꞌ sila bay kapaasok sabap yaꞌ sila bay pitsayaꞌ ni umanat Tuhan ninsila.

³ Boꞌ ningkitabi, sagannap ma pitsayaꞌ, kapaasok na pa jawom pahaliyan ma bay hinalliꞌ meꞌ Tuhan ni sukuꞌ na. Boꞌ sagannap ma yaꞌ pitsayaꞌ ina, niyaꞌ luu dapat da paasok. Mamintang jaꞌ kam ni bay halling Tuhan pasal kabboꞌ-bboan tabi ma yaꞌ bay pitsayaꞌ, yuk na, “Ni kalasu ku ninsila, lay na ga sila subalihan ku, basta yaꞌ na sila padari ku paasok pa jawom pahaliyan ma bay hinalliꞌ meꞌ ku ninsila.” Ni sabana na, inawnan pahaliyan ilay, ndang luu na bay pinanyap jaman Tuhan bay mapayak mimon-mimon.

⁴ Batan yuk njawom kitab, “Pag taabut ni kapituꞌ ngallaw, lay na Tuhan pahali, batan lay na magjatu mimon pabuwatan na.”

⁵ Sangkon, indanan bi na palman ma bay sabbut ku siꞌ pasal jama ma yaꞌ pitsayaꞌ, ilooy ma yuk Tuhan, “Basta yaꞌ na sila padari ku paasok pa jawom pahaliyan ma bay hinalliꞌ meꞌ ku ninsila.”

⁶ Kon ilay Tuhan bay magpalman meꞌ looy batan kabboꞌ-bboan tabi ilay, san lay na binaan umanat mahap pasal pahaliyan looy sampay sinohoꞌ paasok, yaꞌ du sila bay ngasip. Sugaꞌ ni masa batnaa, luu na pahaliyan sarī. Maka bukaꞌ na lawang na man manusiyaꞌ paasok.

⁷ Sangkon, amay-amay bean tabi na suwat njawom kitab, ilooy ma yuk na, “Llaw tuu, bong kam kale suwara Tuhan, daa na patohasun bi kōk bi.” Bitsala looy ilay siꞌ bay sinuwatan meꞌ Nabi Daud hatusan taun na paddus bay jaman kabboꞌ-bboan tabi yaꞌ ngasip ni Tuhan. Maksud suwat Nabi Daud ilay man mahati ni jama luu gi masa sarī bay ginantaꞌ meꞌ Tuhan man manusiyaꞌ kapaasok pa jawom pahaliyan na, yana batnaa na situ.

⁸ Dari katoonan tabi na, pahaliyan sabanna saꞌ silay ndooy ni Kanan man si Jasuwa bay moo kabboꞌ-bboan tabi. Bong siꞌ ilay ndang lahat looy pahaliyan sabanna bay awnan Tuhan, mastiꞌ yaꞌ na ya bay mahati ni jama ga luu gi masa bay ginantaꞌ meꞌ na man manusiyaꞌ paasok pa jawom pahaliyan na.

⁹ Sangkon pag batnaa, tabista tabi na luu na pahaliyan sarī man siga sukuꞌ Tuhan paasok ni timpu batnaa. Dari luu na du dapat tabi pahali meꞌ karuha Tuhan bay pahali ni kapituꞌ ngallaw pus na bay mapayak mimon-mimon.

¹⁰ Na soysoy ina bay paasok pa jawom pahaliyan sabanna ma bay hinalliꞌ meꞌ Tuhan ni sukuꞌ na, malaingkan patagong na sila mangasa ni hulas-sangsāꞌ da magtaat man da initung intong. Dari ko ngawon, bohoꞌ da kapahali ni bay pabuwatan da meꞌ karuha Tuhan bay pahali pus na bay mapayak mimon-mimon.

¹¹ Sangkon, daa na kitabi paagak paasok pa jawom pahaliyan looy. Daa na kitabi ngakig kabboꞌ-bboan tabi ma yaꞌ bay pitsayaꞌ ka yaꞌ bay ngasip ni palman Tuhan taggahaꞌ sampay kitabi pun yaꞌ na du kapaasok.

¹² Na palman Tuhan ina kawasahan boꞌ kabuwan gi kaallum bahau. Dari ko ngawon, palman na tawom gi man kataliꞌ batan ngassob sina pa jawom atay tabi sampay pa nyawa tabi. Maka palman na ina, inaa na man tabi mindoga bong mahap atawa maat pamiki tabi ka niyat atay tabi.

¹³ Tuhan ina yaꞌ talimbuhan. Mimon-mimon mastiꞌ takita na jaꞌ. Boꞌ na, iya na sina mintu man tabi paawop magsabanna ni mimon bay pabuwat tabi.

Si Isa panghuluꞌ imam tabi ma asahan tabi

¹⁴ Lipara luu du panghuluꞌ imam asahan tabi ma yaꞌ luu sibuꞌ sabanding na, lay na duhuꞌ pilay pa sulgaꞌ, yana si Isa Almasi, Anak Tuhan. Sangkon, subay yaꞌ labbahan tabi ilooy ma kinapitsayaan meꞌ tabi pasal iya.

¹⁵ Meꞌ iya ina panghuluꞌ imam tabi, tahati na kulang kawasa manusiyaꞌ man naggaꞌ siga sasat seytan. Takissa na parasahan tabi sabap iya mismu lay du lumingkaꞌ ni jinisan sasat seytan meꞌ karuha ningkitabi du. Sat na jaꞌ kuwan niiya, yaꞌ luu dusa na samasakali.

¹⁶ Dari pagka luu na panghuluꞌ imam asahan tabi ma yaꞌ luu sibuꞌ sabanding na, daa na kitabi loman maku tabang pa Tuhan yana poonan aseꞌ. Batan iya ina manimbang ningkitabi maka iya du muwanan kitabi tabang sumilan-sumilan gunahan ningkitabi.