Hibrani 3 - Sabahagiꞌ Kitab Tawrat: Panagnaan ni Awwal Jaman maka Kitab Injil

Si Isa Almasi patingkat man Nabi Musa

¹ Na siga danganakan ku, yana sukuꞌ Tuhan, kaam ina, meꞌ aku na du, lay na lliyun meꞌ Tuhan pa jawom okoman na. Sangkon kannahun bi na si Isa ma pinagbāꞌ meꞌ tabi ni manusiyaꞌ iya rasul Tuhan ka panghuluꞌ imam ma asahan tabi.

² Iya ilay bay magkanaalla majatu mimon ma bay hinalap meꞌ Tuhan niiya. Dansusun du karuha na ka bay jaman Nabi Musa bay magkanaalla ngayaran mimon ma ginalla jama lumaꞌ Tuhan.

³ Sugaꞌ kuwan si Isa, tawop pinaehe labi man Nabi Musa meꞌ karuha tukang buwat lumaꞌ mas tawop pinaehe labi man lumaꞌ bay patangge na.

⁴ Yaꞌ sina luu lumaꞌ bong yaꞌ luu tukang matangge. Damikiyan, yaꞌ du luu oy maka oy na bong saꞌ Tuhan bay mapayak ka palman na.

⁵ Na kuwan Nabi Musa ilay, kanaalla bay ngayaran siga sukuꞌ Tuhan meꞌ karuha tindog ngayaran jama lumaꞌ bōs na. Bay pabuwatan na ilay yana sipat ni siga pakaradjaan ma pinalahil meꞌ Tuhan ni batnaa.

⁶ Boꞌ Almasi baw ilay, saꞌ ya tindog meꞌ karuha Nabi Musa, arapun iya ilay tud Anak Tuhan mismu kanaalla magtakōk ni siga jama lumaꞌ Mmaꞌ na. Boꞌ kitabi na situ initung jama lumaꞌ Tuhan basta tattap jaꞌ pangando tabi ni Almasi, maka basta yaꞌ jaꞌ kitabi jamu ngagad ni mimon ma bay njanjiꞌ meꞌ Tuhan ni siga sukuꞌ na.

Sagannap ma yaꞌ doman pitsayaꞌ ni si Isa, mehe kalugian da

⁷ Sangkon subay kanna tabi suwat njawom kitab, yana panohoan Rū Sutsiꞌ ningkitabi, ilooy ma yuk na, “Llaw tuu, bong kam kale suwara Tuhan,

⁸ daa na patohasun bi kōk bi meꞌ kadari jaman kabboꞌ-bboan bi bay nulang kahandak Tuhan. Bbuwatan da sigi-sigi malasu iya ndooy ni lahat lau-lau, batan yaꞌ sila kuhi ngasip niiya.”

⁹ Yuk Tuhan pasal sila, “San meka na pabuwatan kahaylan-haylan bay pinōꞌ meꞌ ku ninsila, masi sila bay nuway-nuwayan pasensiya ku meꞌ da yaꞌ ngasip.

¹⁰ Sangkon tud bay lasu ku ninsila. Mpatpūꞌ taun na ku bay natasan arat da meꞌ looy ndooy ni lahat lau-lau. Ndaꞌ ku, jawom atay da, doman jaꞌ sila magsiꞌ. Tud bay awam sila ni kahandak ku ka arat-tabiat ku.

¹¹ Dari ni kalasu ku, lay na ga sila subalihan ku, basta yaꞌ na sila padari ku paasok pa jawom pahaliyan ku.”

¹² Sangkon siga danganakan, iyakin kam taggahaꞌ luu laat njawom pamiki bi moo kam yaꞌ pitsayaꞌ ni kabanahan sampay man bi na nikutan Tuhan sabanna ma llum saumu.

¹³ Sangkon llaw pa dangallaw, padpad luu gi waktu, sipaintom-paintom na pin kam supaya kam yaꞌ tadupang meꞌ napsu bi sampay man bi kapagdusa. Ilagan bi dī bi taggahaꞌ patohas na baw kōk bi sampay man bi yaꞌ na kuhi mean kahandak Tuhan.

¹⁴ Basta ina yaꞌ jaꞌ labbahan tabi pangando tabi ni Almasi ngabut sampay pa katapusan, mastiꞌ hampit jaꞌ kitabi ni mimon supaat na.

¹⁵ Sangkon, daa na takupan tabi ilooy ma bay sabbut ku siꞌ man jawom kitab, ilooy ma yuk na, “Llaw tuu, bong kam kale suwara Tuhan, daa na patohasun bi kōk bi meꞌ kadari jaman kabboꞌ-bboan bi bay nulang kahandak Tuhan.”

¹⁶ Kitabi itu, ndang katoonan tabi na du, tud lay takale kabboꞌ-bboan tabi suwara Tuhan jaman da bay binoo meꞌ Nabi Musa palakka man Ejip. Salla na, yaꞌ sila kuhi mean kahandak Tuhan.

^17-18 Sangkon tud bay lasu Tuhan ninsila njawom mpatpūꞌ taun jaman looy. Dari man sabapan bay kadarihan da yaꞌ bay ngasip ni kahandak Tuhan, lay na sila subalihan Tuhan yaꞌ na dari paasok saumu pa jawom pahaliyan ma bay halliꞌ na ninsila. Pag toklas na, lay na jaꞌ sila matoy ndooy ni lahat lau-lau yaꞌ maglumaꞌ.

¹⁹ Maka tabista tabi na du, poonan da yaꞌ bay kapaasok sabap yaꞌ sila pitsayaꞌ ni palman Tuhan ninsila.