Hibrani 12 - Sabahagiꞌ Kitab Tawrat: Panagnaan ni Awwal Jaman maka Kitab Injil

Subay akig tabi pangando siga sukuꞌ Tuhan mattoꞌ

¹ Na pagka meka jama mattoꞌ bay dari suntuan ayad ningkitabi sabap meꞌ da mangando pa Tuhan, sabuli-buli tabi ngakig sila. Maka labbahan tabi na dusa tabi sampay oy-oy na pin ma kasanggalang ningkitabi buwat kahandak Tuhan. Bong dalil ta pa jama maglumbaꞌ sonse, subay lakkahan tabi oy-oy kahabo ningkitabi supaya kitabi katatas sonse ni lān ma bay sinukuꞌ meꞌ Tuhan ningkitabi.

² Maka subay kitabi tattap magpadduman njataꞌ si Isa. Batan iya suntuan numbul satu man tabi ngita pangando sukup pa Tuhan. Maka sabapan na, patakkoꞌ na pin pangando tabi. Bistahun bi doꞌ, atas na bay natasan kabinsanaan nilansang taꞌ tehang kalnaꞌ kitabi. Maka san kaiyaan niiya binuwat meꞌ looy, yaꞌ du bay paruli na. Batan pinandang meꞌ na kagakan ma takoleꞌ na ni sinōng pag taabut na ngita jama sakiyan salamat. Pag batnaa, lay na ya ningkōꞌ ni bihing Tuhan huwin pa kawnan ndooy ni sulgaꞌ.

³ Na bila kam bininsanaꞌ, intomun bi jaꞌ katiksaan si Isa bay natasan siga baldusa sigi-sigi minsanaꞌ sampay naggaꞌ iya. Meꞌ naa ina, yaꞌ kam kuhi jamu atawa dallaꞌ mmeꞌ niiya.

⁴ San ina kam malasahi hangat naggaꞌ kalaatan, masi du yaꞌ luu pangabut-ngabut bi ni bay kamalasahiyan si Isa. Intong na, kamalasahiyan bi yaꞌ du man lahaꞌ bi tumpa.

⁵ Daa takupan bi palman njawom kitab, ilooy ma yuk Tuhan, “Kaam, siga anak ku, kannahun bi adjalan ku. Daa kam jamu mmeꞌ niyaku bong kam sahawi ku.

⁶ Batan ndang adjal ku jaꞌ sina sagannap ma kaasean ku. Maka ndang palingkaꞌ ku jaꞌ sina njawom kamalasahiyan sagannap ma inaku meꞌ ku anak.”

⁷ Sangkon na, bila kam njawom kabinsanaan, tatasan bi jaꞌ sabap ndang meꞌ naa sina meꞌ Tuhan ngadjal sagannap ma initung anak na. Ndang bong ina inawnan anak, mastiꞌ inadjal jaꞌ meꞌ mmaꞌ na.

⁸ Bong ina kam yaꞌ bay lumingkaꞌ ni adjalan Tuhan meꞌ ndang bay ginantaꞌ ni mimon anak na, malaingkan saꞌ kam anak na. Sibuꞌ du kam ka anak halambiyaraꞌ sadjaꞌ ma yaꞌ luu mangatas ngadjal sila.

⁹ Bistahun bi doꞌ, san ina siga mmaꞌ tabi ntuu ni junyaꞌ bong ngadjal kitabi, pagmaltabatan tabi du. Labi na saꞌ kitabi subay lillaꞌ ni adjalan Mmaꞌ tabi ni sulgaꞌ mari sampulnaꞌ nyawa tabi.

¹⁰ Siga mmaꞌ tabi ina bay ngadjal kitabi jaman tabi dikiꞌ para kaayaran ningkitabi. Tamūd magsāꞌ sila san bistahan da tuwaꞌ meꞌ da ngadjal. Boꞌ Mmaꞌ tabi Tuhan, tuktuk na ina ngadjal, tattap pa kaayaran jaꞌ ningkitabi supaya kitabi meꞌ iya na du sutsiꞌ.

¹¹ Bana na, samantalaꞌ tabi inadjal, mastiꞌ yaꞌ jaꞌ mahap parasahan tabi sabap bisa. Sugaꞌ pag toklas na, hayang jaꞌ pamiki tabi sampay intong na kawul-piil tabi.

¹² Sangkon na, kaam ma lamma na natasan kabinsanaan, patagguhun bi na iman bi. Ibaratan jama maglumbaꞌ sonse, tohasan bi na balik tuut bi.

¹³ Nūs jaꞌ kam lān intong supaya luu inuru meꞌ pagkahi bi ma yaꞌ gi takkoꞌ pangando da. Meꞌ looy ilay, yaꞌ sila magsiꞌ, gam pin pabasag pangando da sabapan bi.

¹⁴ Pagbuli-bulihan bi miha kasalassayan ka mimon manusiyaꞌ. Maka subay kam sutsiꞌ. Batan yaꞌ sina mintu luu sikita ka Papuꞌ bong ya yaꞌ sutsiꞌ.

¹⁵ Sipaintom-paintom na pin kam mari kam yaꞌ luu nikutan Tuhan sampay masensengan aseꞌ na. Paayad-ayad kam taggahaꞌ nganggamut na baw duga njawom atay bi. Batan bong ina luu ni baanan bi meꞌ naa, malaingkan kalingog sina ningkaam maka song hallom meka na kam kalakkotan ni arat na.

¹⁶ Maka iyakin kam taggahaꞌ ubay na baw kam mintu ka jama ma saꞌ lla bi atawa nda bi. Maka daa pondok pamiki bi meꞌ kadari bay jaman si Esaw yaꞌ ngisbat Tuhan. Bistahun bi doꞌ, subay siꞌ pagka si Esaw anak siyaka, lay na labuꞌ pa iya siga supaat ma bay njanjiꞌ meꞌ Tuhan ni mmaꞌ na. Salla na, lay jaꞌ sambian na supaat pagkasiyaka na ka lawuk sakayi kakan du.

¹⁷ Dari siꞌ song hallom jaman looy, katoonan bi na du, pag taabut si Esaw bay doman koleꞌ supaat pagkasiyaka na, yaꞌ na ya bay nduwan. Maka san du pooy meꞌ na bay nangis mogos sinupaatan, yaꞌ na du bay luu dapat na mabalik bay kaadaan na. Sangkon ilagan bi dī bi.

Punu Saynay ka Punu Zayon

¹⁸ Siga danganakan, meꞌ tabi itu patapit pa Tuhan, yaꞌ na sibuꞌ ka ni siga kabboꞌ-bboan tabi ni bay jaman Nabi Musa. Jaman looy ilay, lay sila patapit pa Punu Saynay. Ndooy siꞌ, takissa da na jogjog maka ngallab na ga leꞌ api punsak na. Boꞌ bay gi sila kalindoman sabap ngalikob na lahat looy sampay luu gi baliyu ngimpūs.

¹⁹ Maka bay gi sila kale halling tabuliꞌ tiniyup pahaddo boꞌ pasunuꞌ suwara Tuhan katawu-tawu. Tandaꞌ da sinawan, lay na ga sila nganjunjung Tuhan nohoꞌ patagong magpalman.

²⁰ Boꞌ tud bay tawu sila bay binandaan, ilooy ma yuk Tuhan, “Labba man jama sampay na hayop, bong luu bay nabbaꞌ punu tuu, subay hiniyak ka batu ngabut sampay na matoy.”

²¹ Tandaꞌ katawu-tawu siga pakaradjaan bay tasakup da, minsan Nabi Musa mismu bay du māꞌ ngegkeg na ga ya ni katawu na.

²² Boꞌ ningkitabi itu batnaa, sarī na punu bay inabut meꞌ tabi. Awon na Punu Zayon, daira Tuhan sabanna ma llum saumu-umu, yana daira Jerusalem man sulgaꞌ. Ndooy ilay, libu-libuhan malaikat kumpo-kumpo njawom kagakan.

²³ Maka ndooy ilay, lay na tabi takka pa jawom kumpohan sagannap ma ginalla siga anak Tuhan siyaka, yana sagannap ma pitsayaꞌ ni Almasi, ma lay na talista awon da ni sulgaꞌ. Maka lay na tabi takka pa jawom baanan siga rū jama intong mattoꞌ ma yaꞌ na luu salla na. Maka lay na tabi takka pa mman Tuhan, yana tukang ngahukum manusiyaꞌ sikamimon.

²⁴ Maka lay na kitabi takka pa mman si Isa ma bay mōꞌ pagsulutan bahau antaraꞌ Tuhan ka manusiyaꞌ. Boꞌ toklas lahaꞌ na bay tumpa mas ayad man toklas lahaꞌ si Habil bay tumpa ni awwal jaman. Batan lahaꞌ si Habil bay moo sumpaꞌ, boꞌ lahaꞌ si Isa bay moo kasalamatan.

²⁵ Sangkon, amay-amay daa tuwakun bi umanat Tuhan ningkaam batnaa. Mamintang doꞌ kam ni bay jaman kabboꞌ-bboan tabi. Bong sila bay pinidjalaꞌ sabap meꞌ da nuwak bitsala lalla looy man junyaꞌ, yana Nabi Musa, labi na saꞌ kitabi pinidjalaꞌ bong tuwak tabi na baw bitsala lalla looy ma lakka man sulgaꞌ.

²⁶ Jaman Tuhan magpalman man taꞌ Punu Saynay ni kabboꞌ-bboan tabi, lay ga pingkaꞌ jogjog gumi meꞌ suwara na. Sugaꞌ ni sinōng, sampay langit gi sina njogjog meꞌ na, batan ndang bay ya nganjanjiꞌ njawom kitab, yuk na, “Luu gi situ masa ku nganjogjog sakayi gi, sugaꞌ saꞌ na sat gumi, sampay langit jogjog ku na du.”

²⁷ Na Tuhan ilay māꞌ meꞌ looy mari tallak ningkitabi bong inawnan pakaradjaan ma bay pinapayak, luu sina masa da njogjog sampay man labbasakayi lanyap. Kon subay meꞌ looy supaya ilooy sa tamban, isu-isu siga pakaradjaan ma yaꞌ kuhi usik san pooy meꞌ njogjog.

²⁸ Sangkon, pagka Tuhan bay matabeꞌ kitabi ni pamarinta na ma yaꞌ tajogjog, subay kitabi magsuku niiya sampay kinanna meꞌ tabi ehe aseꞌ na ningkitabi. Maka sumba tabi ya ni lanan magpataꞌ niiya, hati na, ni kaehe maltabat tabi ka tawu tabi niiya.

²⁹ Batan Tuhan ma sumba tabi ina, subay ga api noleyab ngampud sikamimon bong lasu na.