Hibrani 11 - Sabahagiꞌ Kitab Tawrat: Panagnaan ni Awwal Jaman maka Kitab Injil

Hatiyan pangando pa Tuhan

¹ Na bong ina luu pangando tabi pa Tuhan, tatantu tabi takoleꞌ tabi jaꞌ mimon ma agad tabi ma bay njanjiꞌ meꞌ Tuhan. Minsan yaꞌ lagi takita tabi ilooy ma hinolat meꞌ tabi, pagka luu pangando tabi, yaꞌ na tabi hawal-hawalan mastiꞌ luu jaꞌ masa na takoleꞌ tabi.

^2-3 Sabapan pangando tabi, manganna kitabi mimon-mimon ni sikaliput alam bay pinapayak meꞌ palman Tuhan. Dari mimon ma takita tabi batnaa bay pinaluu meꞌ ilooy ma yaꞌ takita, yana palman. Tud hagaan pangando pa Tuhan. Sabapan pangando siga kabboꞌ-bboan tabi, ilooy na man Tuhan kasulutan ninsila.

⁴ Pamintangan bi na si Habil ni awwal jaman. Sabapan pangando na pa Tuhan, kuwan ilooy ma bay songan na pa Tuhan mas mahap man ilooy ma bay songan kakaꞌ na si Kayin. Man tabi tau sabap ilooy bay songan si Habil bay hinasi meꞌ Tuhan. Maka sabapan pangando na, lay na ya awnan Tuhan jama intong. Sangkon minsan hallom na si Habil lay matoy, luu na pin pamintangan lay mbanan na ningkitabi sabapan pangando na.

⁵ Damikiyan si Idris, sabapan pangando na pa Tuhan, lay ya inangkat pa sulgaꞌ yaꞌ san bay pingkaꞌ matoy. Lataꞌ na lahat man na bay piniha, yaꞌ na san ya bay tatammu sabap lay na ya kinaddoꞌ meꞌ Tuhan. Boꞌ na, yuk njawom kitab, ndang iya jama bay kasulut ni Tuhan.

⁶ Na bong inawnan nulut ni kahandak Tuhan, tunmanūn meꞌ jama kasulut niiya bong yaꞌ luu pangando da niiya. Sarī man naa, soysoy doman patapit pa Tuhan subay pitsayaꞌ luu ya. Maka subay ya pitsayaꞌ Tuhan nupaatan sagannap ma magkainagon lungbid ka iya.

⁷ Damikiyan Nabi Nū, sabapan pangando na pa Tuhan, pag lay jaꞌ ya binaan leꞌ Tuhan luu takka dunuk mehe bbos-bbos, lay du ya pitsayaꞌ. Dari lay du ya ngasip ni Tuhan nohoꞌ buwat bahitlaꞌ man nalamat ga paglūng na. Maka sabapan pangando na, lay ya initung meꞌ Tuhan intong. Sugaꞌ kuwan jama lahat na, yaꞌ kuhi pitsayaꞌ pag binaan meꞌ Nabi Nū luu takka dunuk. Batan inawnan dunuk, yaꞌ gi san bay pingkaꞌ takita leꞌ manusiyaꞌ. Dari sabap yaꞌ sila mmeꞌ pitsayaꞌ ni Nabi Nū, ilooy na man da bay kalabuan hukuman kapatoy ni bay dunuk looy.

⁸ Damikiyan Nabi Ibrahim pun, sabapan pangando na pa Tuhan, lay jaꞌ du ya mmeꞌ ni panohoan Tuhan. Bay sohoꞌ Tuhan niiya, subay ya maglayin pa disu lahat ma bay njanjiꞌ meꞌ Tuhan pinamuwan niiya. Dari lay na jaꞌ ya ngambanan lahat na san yaꞌ gi bay tasayu na bong ninggai lahat looy man na bay tumiluꞌ.

⁹ Pag takka ga Nabi Ibrahim pa lahat looy, sabapan pangando na, pitsayaꞌ du ya ni janjiꞌ Tuhan song hallom kapaiya du lahat looy sampay ni siga panubuꞌ na. Damikiyan ilooy na du silay lahat bay janjiꞌ Tuhan ni anak Nabi Ibrahim, yana si Isahak, sampay ni mpu na si Yaꞌkub. Sugaꞌ san lay sinukuꞌ ni ga Nabi Ibrahim lahat looy, lay jaꞌ sila meꞌ karuha jama sampi ndooy tamban ni siga lumaꞌ luna.

¹⁰ Sugaꞌ ni katuwaan na bana, ilooy ya agad ga Nabi Ibrahim yana daira kakka bay pinatangge meꞌ Tuhan mismu. Boꞌ yaꞌ na kuhi langkat saumu-umu.

¹¹ Sitti Sara pun, sabapan pangando na pa Tuhan, lay na ya pitsayaꞌ tattap tinuman meꞌ Tuhan janjiꞌ na muwanan iya ka Nabi Ibrahim anak. Dari lay du ya bay hanak san toa na ya banahan sampay tupa na ga.

¹² Maka Nabi Ibrahim pun, subay siꞌ yaꞌ na du bay hanak batan agon meꞌ anggawtaꞌ jama matoy na ya ni katoa na. Sugaꞌ sabap pitsayaꞌ ya ni janjiꞌ Tuhan, lay ya kabuwanan panubuꞌ meꞌ eka potean taꞌ langit ka ungus ni tapiyan.

¹³ Na ga Nabi Ibrahim ilay ka ga anak-mpu na mangando na pin pa Tuhan ngabut sampay da bay matoy san yaꞌ gi bay takoleꞌ da ilooy ma bay njanjiꞌ meꞌ Tuhan ninsila. Sugaꞌ gāk baw sila batan tabista da bbos-bbos takoleꞌ da ilooy ma bay agad da. Sangkon meꞌ da ngingat, jama sampi sadjaꞌ sila pahās jaꞌ ni junyaꞌ tuu.

¹⁴ Na tiyap-tiyap ilay jama mista meꞌ looy, tumatandaꞌ luu gi lahat sarī pagdautan da.

¹⁵ Sugaꞌ saꞌ baw silay ndang bay lahat man ga Nabi Ibrahim maruhuꞌ pagdautan da. Batan bong tud ilay ilooy du lahat pinagdautan meꞌ da, sannang jaꞌ meꞌ da pabeleng.

¹⁶ Sugaꞌ iya bay agad da yana paglahat mahap gi man mimon paglahat ni junyaꞌ, yana paglahat man sulgaꞌ. Dari sabapan kainagon da magdautan daira ma ndang bay pinanyap meꞌ Tuhan ninsila, gāk sina Tuhan inawnan Tuhan da.

^17-18 Sarī gi, sabapan pangando Nabi Ibrahim pa Tuhan, pag bay ya sinuwayan meꞌ Tuhan nohoꞌ nongan umu anak na, yana si Isahak, lay du ya kuhi. Bistahun bi doꞌ, Nabi Ibrahim ilay bay njanjian meꞌ Tuhan binuwanan panubuꞌ paeka poonan man si Isahak. Sugaꞌ san meꞌ looy, lay gi Nabi Ibrahim kuhi nongan umu anak na pa Tuhan.

¹⁹ Njawom atay na, san si Isahak bay matoy, mastiꞌ takaya Tuhan du makallum iya pabalik. Dari minsan Nabi Ibrahim yaꞌ bay tabawus nongan umu anak na sabap meꞌ Tuhan bay matagong iya, dari ko ngawon, lay du tabawiꞌ na umu anak na.

²⁰ Na si Isahak pun, sabapan pangando na pa Tuhan, lay ya makuhan ga anak na si Yaꞌkub ka si Esaw supaat mari mahap kasongan da bbos-bbos.

²¹ Si Yaꞌkub pun, sabapan pangando na pa Tuhan, pag tapit jaꞌ ya matoy, lay du ya makuhan siga mpu na anak si Yusup supaat. Pag-anu, boꞌ na mudji Tuhan sasang na patukod ni tungkud na.

²² Damikiyan si Yusup pun, sabapan pangando na pa Tuhan, pag tapit jaꞌ ya matoy, lay ya maintoman siga pagkahi na bangsa Israil pasal Tuhan moo sila palakka man Ejip ni sinōng. Sampay lay gi sila tugun na nohoꞌ moo siga towang mayat na pa lahat ma tiluꞌ da bbos-bbos.

²³ Damikiyan siga induꞌ-mmaꞌ Nabi Musa, sabapan pangando da pa Tuhan, yaꞌ du sila bay tawu nunggud panohoan sultan bangsa Ejip, yana Pir-awun. Sangkon pag taabut Nabi Musa bay pinamaddihan, lay ya tinapuk njawom tallum buwan. Tabistu meꞌ induꞌ-mmaꞌ na iya anak jalang-jalang.

²⁴ Damikiyan Nabi Musa, sabapan pangando na pa Tuhan, minsan ya sannang jaꞌ njawman dayang-dayang, yana anak Pir-awun, pag taabut na mehe, yaꞌ na ya doman binilang anak na.

²⁵ Honaꞌ-honaꞌ na, gam na ya magpalapay ni kabinsanaan bangsa na sukuꞌ Tuhan man na nnaa magparasahan ayad maabak dusa ma moo kagakan samantalaꞌ du.

²⁶ Maka honaꞌ-honaꞌ na, gam na ya natas pinadiyoꞌ sabapan holat na ni katakka Almasi bbos-bbos man na nnaa lakkop leꞌ mimon altaꞌ ni Ejip. Batan ilooy ya pandang na supaat man Tuhan ni sinōng.

²⁷ Dari sabapan pangando Nabi Musa pa Tuhan, lay du boo na mimon bangsa na lakka man Ejip. Boꞌ yaꞌ na ya tawu san biddaꞌ na lasu sultan niiya. San kajinisan katiksaan bay lingkaan na, lay jaꞌ tatasan na sabap takita-kita na na Tuhan ma yaꞌ takita ngunungan iya.

²⁸ Maka sabapan pangando Nabi Musa, lay sohoꞌ na pagkahi na bangsa Israil mesekan siga papagan lawang lumaꞌ da ka lahaꞌ bili-bili. Kon na bay nohoꞌ meꞌ looy supaya yaꞌ talapay siga anak da pag pōꞌ malaikat Tuhan mapatoy mimon anak siyaka ma lalla ni sikaliput Ejip. Dari labba mandooy, luu na paballangan inawnan Ngalingkaꞌ bay tinagnaan meꞌ Nabi Musa, yana pangintoman ni bangsa Israil bay llingkaan meꞌ malaikat looy.

²⁹ Maka sabapan pangando bangsa Israil pa Tuhan, lay sila kapalintas ni Dilawut Akket lumān ni tanaꞌ diyoꞌ lagguꞌ-lagguan. Subay ga lān taꞌ dile sadjaꞌ bay tinūs meꞌ da sabap lay bay sinihān meꞌ Tuhan boheꞌ dilawut looy. Sugaꞌ pag pauru ga sundalu bangsa Ejip bay ngonse sila, sarunduun du lay pinabalik boheꞌ looy pa bay limpaꞌ na. Dari lay na ga katis baanan sundalu looy matoy limbo.

³⁰ Damikiyan sabapan pangando bangsa Israil pa Tuhan, lay na ga luntu kutaꞌ Jeriko jaman da ngaliput daira looy pituꞌ ngallaw.

³¹ Maka si Rehab pun, sabapan pangando na pa Tuhan, yaꞌ ya bay talapay pinapatoy ni siga pagkahi na ma yaꞌ ngisbat Tuhan san iya disu puta. Tandaꞌ pangando si Rehab, pag takka siga sundalu bangsa Israil mayu-mayuhan daira na, lay gi ya nabangan sila sabap pitsayaꞌ ya ni Tuhan da.

³² Na bong itu padara ku na pin meꞌ ku nuntut pasal basag pangando kabboꞌ-bboan tabi, hallom gi boꞌ lupus suwat tuu. Batan luu gi situ tatuntut ku pasal pangando ga si Gidyon, si Barak, si Samson, si Jepta, Sultan Daud, Nabi Samwel sampay na kanabi-nabihan ilooy kasohean.

³³ Ga jama looy ilay, sabapan pangando da pa Tuhan, jinisan bay takaya da. Luu na bay maā siga sultan ka sundalu da man kalahat-lahatan. Maka luu du bay tanyag matangge kaintongan ni lahat da sampay koleꞌ jinisan supaat ma bay njanjiꞌ meꞌ Tuhan. Maka luu du bay hiniyakan pa jawom baanan halimaw, boꞌ yaꞌ san bay kongoy-kongoy.

³⁴ Luu du bay hiniyakan pa jawom api mehe, boꞌ yaꞌ san bay lūs. Luu bay llān leꞌ banta da ka kataliꞌ, sugaꞌ lay du bay sinalamat. Maka luu gi kasohean ma lamma, sugaꞌ man sabapan pangando da pa Tuhan, lay du pinabasagan. Luu gi bay kabuwanan tawakka mehe ni bonoꞌ sampay man da bay malahi siga sundalu ma song ngagaw lahat da.

³⁵ Maka luu gi karandahan bay kapatoyan, sugaꞌ sabapan pangando da, lay na llum pabalik kakasi da. Sugaꞌ luu du baw silay sukuꞌ Tuhan bay sigi-sigi pinakissahan paddi ngabut sampay man da matoy sabap meꞌ da yaꞌ kuhi ngalabbahan pangando da pa Tuhan. Bong siꞌ ilay sila bay kuhi ngalabba, mastiꞌ lay jaꞌ sila pinōꞌ. Sugaꞌ honaꞌ-honaꞌ da, gam na tatasan da supaya sila sannang pag mintu taabut pinakallum pabalik mimon manusiyaꞌ.

³⁶ Luu gi silay kasohean, sabapan pangando da, bay lumingkaꞌ binuwat kalabbiyan sampay llagpiꞌ. Kasohean pinusas na ga ka karina sampay tajīl gi.

³⁷ Kasohean bay matoy hiniyak ka batu, kasohean bay sinebak duwa ka kehet-kehet, maka kasohean bay matoy tinigad ka kataliꞌ. Kasohean, yaꞌ san luu pamakoy da sarī man kuwit bili-bili atawa kuwit kambing ni kasigpit da. Kasohean, sabapan pangando da pa Tuhan, lay gi bininsanaꞌ sampay nilaugan.

³⁸ Maka luu gi siga sukuꞌ Tuhan bay pinalahi. Dari lay na sila magpilulān ni siga lahat lau-lau sampay ni kapunu-punuhan. Patannaan man da tuli ni siga lowang pampang sadjaꞌ atawa lowang tanaꞌ. Mingkan sabana na, manusiyaꞌ ma mandang hāl junyaꞌ, yaꞌ san tawop palamud ni jama meꞌ sila ma mangando pa Tuhan.

³⁹ Ga jama looy ilay labbasakayi, pagka basag pangando da, kasulutan banahan Tuhan ninsila. Sugaꞌ san meꞌ looy, halloman da llum, yaꞌ gi bay takoleꞌ da supaat ma bay janjiꞌ Tuhan ninsila.

⁴⁰ Batan honaꞌ-honaꞌ Tuhan, mas mahap bong sila pinaagad ningkitabi ma dambuli supaya haboy na kitabi ka sila pinabuwat dambaanan ma yaꞌ na luu salla na pa Tuhan.