Galatiya 5 - Sabahagiꞌ Kitab Tawrat: Panagnaan ni Awwal Jaman maka Kitab Injil

Sagannap ma tibuuk ka si Isa paddus na man sakup saraꞌ

¹ Na siga danganakan, kon ilay Almasi bay maddusan kitabi man jawom sakup saraꞌ supaya kitabi sumunsayaꞌ na. Sangkon amay-amay daa na kam kuhi pinahata meꞌ saraꞌ pabalik. Takkoan bi na kasumunsayaan bi.

² Indanan bi bitsala ku. Bong ina kam nohoꞌ inislam sabap kanna bi inaa man bi initung meꞌ Tuhan intong, malaingkan yaꞌ sina luu pūs Almasi ningkaam samasakali.

³ Maka baan ta kam banahan, sagannap ina ma nohoꞌ inislam man da initung intong, talpaksaꞌ ninsila mogbogan saraꞌ Nabi Musa labbasakayi.

⁴ Lagiꞌ na, bong luu nnaa doman mangasa ni sangsāꞌ da mogbogan saraꞌ man da initung intong, sibuꞌ du sina sila ka bay palabba man si Isa Almasi. Maka tinuwak gi meꞌ da aseꞌ-tabang Tuhan ninsila.

⁵ Boꞌ kitabi baw itu ma pitsayaꞌ sampay mangasa ni gaos Rū Sutsiꞌ, holat tabi arat-tabiat tabi sigi-sigi hinalin ngkod-ngkoran yaꞌ gi kitabi intong gi man intong.

⁶ Dari meꞌ kitabi itu tibuuk na ka si Isa Almasi, katoonan tabi na yaꞌ luu pagbiddaan pa Tuhan bong jama bay inislam atawa niyaꞌ. Ilooy du puntukan banahan yana pangando tabi niiya ma takita ni aseꞌ tabi ni pagkahi tabi manusiyaꞌ.

⁷ Kaam la maruhuꞌ, tud bay mahap meꞌ bi mmeꞌ ni kabanahan. Sugaꞌ pag batnaa, soy na baw ina bay moo-moo kaam magsiꞌ?

⁸ Tōꞌ da bina, tud saꞌ sina lakka man Tuhan. Batan Tuhan ina bay ngaliyun kaam mari kam paddus man jawom sakup saraꞌ agama.

⁹ Bong ina luu san disu jaꞌ tōꞌ bingkok timaꞌ bi, song hallom pasampun boꞌ pasampun na pin. Bong dalil ta pa pasulig, song hallom, lataꞌ na man na ngassob.

¹⁰ Kamasaꞌ, pagka ina kam ndang luu na njawman Papuꞌ Isa, tatantu ku mastiꞌ pabeleng du sina kam pa kabanahan ma bay tōꞌ ku ningkaam. Boꞌ ga jama looy ilay ma ngalingog pamiki bi ka tōꞌ palsu, soy maka soy na, basta kalabuan jaꞌ sina sila hukuman meꞌ Tuhan.

¹¹ Siga danganakan, bong luu nnaa māꞌ aku magnasihat talpaksaꞌ subay binogbogan hāl meꞌ ngislam man ta initung intong, daa kam hidjab. Bong ina bana bitsala da, ongoy taggahaꞌ masi ku llaugan meꞌ siga pagkahi ku Yahudi? Maka bong ina bana ninsila, yaꞌ na lammis siga Yahudi niyaku san ku masaplag pasal kapatoy si Isa taꞌ tehang.

¹² Bong para niyaku, kuwan sila ma ngalingog kōk bi nnaa nanggehan hāl meꞌ ngislam, gam na sohoꞌ da na kinehetan sampay awpan da labbasakayi.

¹³ Kaam ina siga danganakan, lay na kam lliyun meꞌ Tuhan pa jawom okoman na supaya kam paddus na man jawom sakup saraꞌ. Sugaꞌ amay-amay daa pakoyun bi kasumunsayaan bi bilang daawa man nganduwan napsu bi. Arapun pakutuun bi na meꞌ bi sikaaseꞌ-kaaseꞌ sampay sitabang-tabang.

¹⁴ Batan mimon ina saraꞌ Nabi Musa, lay na tinikmod pa disu panohoan sa, ilooy ma yuk Tuhan, “Kaasean bi pagkahi bi manusiyaꞌ sibuꞌ du ka aseꞌ bi ni dī bi.”

¹⁵ Na bong ina kam yaꞌ sikaaseꞌ-kaaseꞌ sampay wā kam sasaꞌ-manasaꞌ, malaingkan buwat jaꞌ kam dī bi subay ga idoꞌ sitokob-tokob. Song hallom, sikalangkat-kalangkat na sina kam dambaanan.

Bong kita mean kahandak Rū Sutsiꞌ, yaꞌ kita nganduwan oy-oy napsu maat

¹⁶ Sangkon ituu na bāꞌ ku ningkaam: Mmeꞌ jaꞌ kam ni kahandak Rū Sutsiꞌ. Bong ina pakutuꞌ bi du meꞌ bi mean iya, malaingkan yaꞌ na luu masa bi taboo-boo meꞌ napsu bi buwat kalaatan.

¹⁷ Napsu ta ina wā nguntra kahandak Rū Sutsiꞌ. Rū Sutsiꞌ pun wā du nguntra napsu ta. Magsaggaꞌ jaꞌ sila. Sangkon mamooy-mamooy ina paruli ta, luu na pin ilooy disu naggaꞌ.

¹⁸ Sugaꞌ bong ina maglillaꞌ na kitabi ni Rū Sutsiꞌ, malaingkan iya na padduman tabi, saꞌ na saraꞌ agama.

¹⁹ Na bong ina jama pinagbayaan meꞌ napsu da, tumatandaꞌ jaꞌ sina ni kawul-piil da, batan kajinisan kalaatan da, meꞌ sapantun magjina, buwat kasabuhan, yaꞌ ngagak dī da,

²⁰ numba kajinisan sarī man Tuhan, ka makoy ilmuꞌ seytan. Boꞌ na, daran sila lammis, sasaꞌ, dangkiꞌ ka pasuꞌ kōk da. Tabiat da ina ngulihal kaayaran ni dī da sadjaꞌ. Maka mōꞌ sila pagsaggaan atawa magsisasaꞌ pagkahi da dambaanan.

²¹ Maka jama ina ma pinagbayaan meꞌ napsu da, kainagon da kapasila na altaꞌ pagkahi da, maka panginum sila, sampay mmeꞌ sila ni buwatan baanan danda ka lalla buwat kalalamaan, meꞌ naa, meꞌ naa. Sugaꞌ ndang bay kam silay baan ku maruhuꞌ, jama ma buwat meꞌ looy, yaꞌ luu kabigiꞌ-bigian da ni okoman Tuhan.

²² Boꞌ jama ma pinagbayaan meꞌ Rū Sutsiꞌ ina, sibuꞌ karuha da ka poon kayu ayad jaꞌ buwaꞌ na. Batan jinisan kahapan takita ni kawul-piil da, yana aseꞌ, kagakan, sannang atay, pasensiya, bbuwatan ayad ni pagkahi da ka arat mahap. Tapangandohan sila

²³ ka lammaꞌ pangatayan da sampay pandoy ngagak dī da. Ga jama meꞌ naa ina, san yaꞌ na luu saraꞌ maintong sila.

²⁴ Meꞌ kitabi itu tibuuk na ka si Isa Almasi, bong kinawnan pabuwatan tagga pa Tuhan, timanan tabi na. Meꞌ tabi ngingat, pagkajama tabi maruhuꞌ ma wā pinagbayaan meꞌ napsu tabi, lay na tabeꞌ matoy ni si Isa Almasi llansang taꞌ tehang.

²⁵ Maka pagka lay na kitabi binuwanan kaallum bahau meꞌ Rū Sutsiꞌ, sapatut na subay bean tabi na kahandak na.

²⁶ Sangkon daa na kitabi takabbu. Maka daa na kitabi siparuga-paruga atawa sikadangkiꞌ-kadangkiꞌ.